Read O Debleskro Drom - I Bibla an o Romano Rakepen 2021 Debleskro tsiro 3 Bible Online

Debleskro tsiro 3 - O Debleskro Drom - I Bibla an o Romano Rakepen 2021 bible

Debleskro tsiro 3

¹“Tchin kau liil ap o Debleskro budepaskro, kai dell jak ap i patslende an o foro Sardes: Kawa penell kowa, koles o Debleskro Ducho[14] hi, un koles i efta bolepangre momlia an o wast hi. Me djinau lauter, hoi tumer kran. Tumer han mulo, ninna te penenn le pral tumende, te han djido.

²Stenn pre o sopastar! Mashkral tumende hi gomme menshe, kai patsenn ap mande. Kolla hi gar bud. Un lengro patsepen hi tikno. Krenn lengro patsepen pale soreles! Glan miro Debleste hi kowa gar mishto doha, hoi tumer mange krenn.

³Ma bistrenn, hoi tumenge penlo was un hoi shunan! Un rikrenn ap kal laba! Un awenn pale ap o tchatcho drom! Te krenn kowa gar, un stenn gar pre o sopastar, palle wau pral tumende har i tchorepaskro. Un tumer djinenn gar, hawo tsireske pale wau.

⁴Ninna te hi gar bud patsle an o foro Sardes, kai djan ap miro drom, hi sawe patsle mank tumende, kai kran pengre koola gar tchiklo. Kolla hi moldo, te wenn le rido an parne koola, un djiwenn mantsa an o bolepen.

⁵Kowa, kai soreles an o patsepen atchas, un gar pre das, kowa lella parne ripja. Un leskro lab lau me gar win dran o liil, kai i djide dren tchinlo hi. Ninna penau glan miro dadeste un glan leskre bolepangre, kai job hi miro.

⁶Shunenn halauter mishto, hoi o Debleskro Ducho penella ap i patslende!”

⁷“Tchin kau liil ap o Debleskro budepaskro, kai dell jak ap i patslende an o foro Filadelfia: Kawa penell o Debleskro tchatchepaskro. Koles hi o Davideskro klidepaskro an o wast. Job te krell o wudar pre, palle nai krell les kek pale pandlo. Job te krell o wudar pandlo, palle nai krell les kek pre.

⁸Me prindjrau lauter, hoi tumer mange kran. Dikenn, me krom i wudar glan tumende pre, hoi kek nai pandell. Tumen hi i tikni soor, un rikran miro lab an tumare djia, un dan man gar buchoste.

⁹Shunenn, hoi me kol bengeskre menshentsa krau, kai chochenn un penenn pendar, te hi le o Debleskre menshe, un jon hi kek Debleskre menshe. Me krau, te wenn le pash tumende, te witsrenn le pen glan tumende ap i phub, un te haiwenn le, te kamau tumen o tselo djijestar.

¹⁰Tumer rikran ko lab, hoi tumenge penom, un wan gar khino an o patsepen ap mande. Doleske rikrau mire wasta pral tumende an ko pharo tsiro, kai i bibacht wella pral i tsele menshende ap kai phub, te well diklo, hoi an lengre djia hi.

¹¹Me wau an i tikno tsiro pale. Rikrenn tumaro patsepen soreles, te lell kek wawar ko shukar koowa tumendar, hoi tumenge an o bolepen hi, un hoi kolla lenna, kai dan pengro patsepen gar pre.

¹²Kowa, kai soreles an o patsepen atchas, un gar pre das, dran koleste krau me jekes, kai hi har i baro bar, hoi rikrell miro Debleskro kheer. Un kowa atchell koi tardo hako tsireske. Un me tchinau o lab miro Deblestar ap leste, un o lab o Debleskro forestar. Kowa hi o newo Jerusalem, hoi dran o bolepen tele wella. Un miro newo lab tchinau ninna ap leste.

¹³Shunenn halauter mishto, hoi o Debleskro Ducho penella ap i patslende!”

¹⁴“Tchin kau liil ap o Debleskro budepaskro, kai dell jak ap i patslende an o foro Laodicea: Kawa penell kowa, kai kharell Amen, un penell hako tsiro o tchatchepen, un sikrell i menshende o tchatcho drom pash o Debleste. Job his koi pashel, har o Dewel lauter kras.

¹⁵Me djinau halauter, hoi tumer kran. Tumer han har i pipen, hoi hi gar shila, witar gar tato. Kamaus, te wenn tumer jek kolendar.

¹⁶Tumer han paash tato. Doleske tchungrau tumen win dran miro mui.

¹⁷Tumer penenna: Mer ham brawelo, un men hi halauter; tchi hunte well men buder. Me penau tumenge: Tumer djinenn gar, te han an i bibacht, jaake te khaitenn tumer man. Tumer han tchorwelo un nango un korelo.

¹⁸Doleske penau tumenge: Ginenn mandar sonakai, sawo sonakai, hoi an i jag thodo was, jaake te wenn tumer tchatchepah brawelo. Ginenn mandar ninna parne ripja, un riwenn kolla ap tumende, te han buder gar nango, un hunte ladjenn tumen buder gar. Un ginenn kutch djet, un makenn tumare jaka, te nai dikenn pale!

¹⁹Lauteren, kai kamau o djijestar, kolende sikrau lengri doosh, un penau lenge dawentsa, te shunenn le ap mande. Mukenn kanna tumaro tchilatcho drom, un awenn pale ap miro drom!

²⁰Dikenn, me hom glan o wudar tardo, un dau ap ko wudar. Koon shunell, hoi me penau, un krell mange o wudar pre, pash koleste djau me dren, un chau leha, un job chal mantsa.

²¹Kowa, kai soreles an o patsepen atchas, un gar pre das, kowa nai beshell pes mantsa ap miro rajeskro beshepaskro, jaake har me ninna soreles tardo homs, un me beshom man miro dadeha ap leskro rajeskro beshepaskro.

²²Shunenn halauter mishto, hoi o Debleskro Ducho penella ap i patslende!”