Read O Debleskro Drom - I Bibla an o Romano Rakepen 2021 Rut 1 Bible Online

Rut 1 - O Debleskro Drom - I Bibla an o Romano Rakepen 2021 bible

Rut 1

¹An ko tsiro, har i tchatchepangre mursha i raja pral o Israel his, was i bari bok an o them. Un i mursh dran o foro Betlehem an o them Juda djas an o them Moab, te djiwell lo koi peskri romjah un peskre dui mursh tchawentsa.

²Leskro lab his Elimelech. Un leskri romni kharas Naomi. Un leskre dui tchawe kharan Machlon un Kiljon. Un jon his dran i familja Efrat dran Betlehem an o them Juda. Un jon wan an o them Moab un atchan koi.

³Kote meras o Elimelech. Un leskri romni Naomi atchas kokres pale peskre dui tchawentsa.

⁴Un kolla lan penge romjen dran o them Moab; un koi jek kharas Orpa un koi wawar Rut. Un jon djiwan kote jaake deesh bersha,

⁵koi meran ninna o Machlon un o Kiljon. Un koi djuwel atchas kokres pale, lat his buder kek tchawen un buder kek romes.

⁶Un joi shunas, te kras o baro Dewel peskro dji pre peskre menshenge an o them Juda, un das len maro. Koi las li peskro koowa khetne, te djal li peskre tchawengre romjentsa dran o them Moab pale pale.

⁷Un joi djas peske dran o gab, kai le jek tsiro djiwan. Un lakre dui tchawengre romja djan lah. Un ap o drom pale an o them Juda,

⁸penas i Naomi ap lende: “Kanna djan pale pale, hakeni an lakri dakro kheer! O baro Dewel mu dell tumen peskro latchepen, jaake har tumer latches hans ap tumare romende un ap mande.

⁹O baro Dewel mu dell tumen, te hatsenn tumer pale i romes, pash koleste khere han.” Un joi tchumras len. Un jon rowan soreles

¹⁰un penan ap late: “Na-a, mer kamah tuha pale te djal pash tire menshende.”

¹¹I Naomi penas: “Djan khere, mire tcha! Hoske kamenn tumer mantsa te djal? Me hom buder gar terni doha, te lap tchawe, te nai wans le tumare romma.

¹²Djan khere, mire tcha! Me hom phuri, te romedinerap buder gar. Ninna te nai kroms kowa un loms kai rat i romes, un anoms mursh tchawen ap i phub,

¹³kamans tumer ko tselo tsiro kek romeha te djiwell, — jaake rah bis te jon bares doha wans? Ma krenn kowa, mire tcha! O baro Debleskro wast hi phares ap mande tchiddo. Kamau gar te hidjrenn tumer miro pharo djipen mantsa.”

¹⁴Har le kowa shunan, rowan le gomme budeder. Un i Orpa tchumras peskro romeskri dat un djas peske. I Rut kamas lat gar kokres te mukell.

¹⁵Koi penas i Naomi ap i Rut: “Dik, i Orpa djas pale pash peskre menshende un pash peskro debleste. Dja tu ninna pale lake palla!”

¹⁶I Rut penas: “Rake gar ap mande dren, te mukap tut! Me mukau tut gar. Kai tu djah, djau me ninna. Kai tu atcheh, atchau ninna. Tire menshe hi mire menshe. Un tiro Dewel hi ninna miro Dewel.

¹⁷Kote kai tu mereh, kamau ninna te merell. Un kote kamau me paskedo te well. O baro Debleskri choli well pral mande, te rikrau gar, hoi tuke penom. O merepen kokres nai tchinell men, — ko jekes o wawarestar.”

¹⁸Un har i Naomi dikas, te mukell pes i Rut gar tele anell, te djal li lah, mukas li tele te rakrell li ap late dren.

¹⁹Jaake djan kol dui khetne, bis te wan le an o foro Betlehem. Un har jon an Betlehem dren wan, his o tselo foro ap i herja, un i djuwja putchan: “Hi kaja tchatchepah i Naomi?”

²⁰Joi penas ap lende: “Penenn gar ‘Naomi’[1] ap mande! Denn man Mara[2] gole! O sorelo Dewel kras miro djipen shutlo.

²¹I pherde wastentsa djom me win, un pale mukas man o baro Dewel te well i wastentsa, kai tchi dren hi. Denn man buder gar ‘Naomi’ gole! O baro Dewel hi buder gar ap miri rig. Awa, o sorelo Dewel anas bibacht ap mande.”

²²Jaake was i Naomi pale dran o them Moab. Un lah was lakro tchaweskri romni, i Rut. Kaja his i djuwel dran o them Moab. Kowa his an ko tsiro, kai lan le o djob dren, har wan le an o foro Betlehem.