Read O Debleskro Drom - I Bibla an o Romano Rakepen 2021 Rut 2 Bible Online

Rut 2 - O Debleskro Drom - I Bibla an o Romano Rakepen 2021 bible

Rut 2

¹Koi his i mursh, leskro lab his Boas. Kowa his i menshendar i Naomjakro romestar Elimelech, un his i an-diklo mursh.

²His i diwes, koi penas i Rut ap i Naomi: “Me kamau ap i hachetikri phub te djal un djob pre te hadell, hoi tchiddo atchas. Djau pash jekeste, kai latcho hi ap mande un mukell man kowa te krell.” Un i Naomi penas: “Dja miri tchai!”

³Koi djas li win, kolenge palla, kai o djob tchinenn, un hadas djob pre ap i hachetikri phub. Un kowa was jaake, kai kau kotar phub o Boases his, ko murshes dran o Elimelecheskri familja.

⁴Pal i tsiro was o Boas dran o foro Betlehem un penas ap peskre budepangre, kai o djob tchinenn: “O baro Dewel well tumentsa!” Un jon penan ap leste: “O baro Dewel dell tut peskri bacht!”

⁵Un o Boas putchas o pralstunestar mank i budepangre: “Hawe menshendar hi koi terni djuwel?”

⁶Un ko pralstuno budepaskro penas: “Koja hi dran o them Moab, un was khetne i Naomi fun kotar pale.

⁷Un joi mangas, te djal li pal i tchinepangre, te hadell li djob pre, hoi tchiddo atchas. Un taissarlake was li un atchas bis kanna, un las pes gar bud tsiro, te beshell li pes.”

⁸Koi penas o Boas ap i Rut: “Miri tchai, shun ap mande! Dja ap kek wawar kotar phub, te hadess djob pre! Atch kate, un rike tut pash i djuwjende, kai kate budrenna.

⁹Dik, te atchess pash lende un dja lenge palla! I murshenge, kai kate budrenn, penom me, te taprell tut kek an. Te hi tut trush, dja pash i khore un pi pani, hoi i budepangre anan.”

¹⁰Kote witsras li pes glan leste tele ap i phub un penas ap leste: “Hoske hal tu jaake latches ap mande, kai me dran o wi-them hom?”

¹¹O Boas penas ap late: “Mange was lauter penlo, hoi tu ap tiro romeskri dake lauter kral pal tiro romeskro merepen, te mukal tiro dades un tiri dat un tiro them un djal pash menshende, kolen tu glan kowa gar prindjral.

¹²O baro Dewel mu dell tut ko latchepen pale, hoi tu lake kral! Job, o baro Dewel, ko Dewel pral o Israel, pash koleste tu wal, un tel koleskro wast tut khatral, job te dell tut i shukar brawlepen halautereske, hoi kral.”

¹³Joi penas leske: “Tu hal jaake latcho ap mande, miro rai! Tu rakral latches ap mande un kral miro dji pale soreles, ninna te hom me kek kol djuwjendar, kai tuke budrenna.”

¹⁴Un har was o tsiro chapaske, penas o Boas lake: “Ab kate kai, un le tuke maro un tchip les an o shut!” Koi beshas li pes pash kolende, kai tchinenn o djob tele. Un job das late peklo djob an o wast. Un joi chas lentsa un was tchalo, un mukas tchiddo, — jaake bud his lat.

¹⁵Un har li pre stas, te hadell li pale djob pal lende pre, penas o Boas ap peskre budepangre: “Mukenn lat ninna mank ko khetne pandlo djob pre te hadell! Ma tradenn lat krik!

¹⁶Tserdenn ninna dran o khetne pandlo djob tchomone lake win! Un mukenn les lake tchiddo, te nai lell li les peske khetne. Un ma tchingrenn doleske ap late!”

¹⁷Un jaake las li djob koi khetne bis ap i rat. Un har li o djob win das, hoi joi khetne las, koi his kowa jaake deesh-te-efta kilogramme djob.

¹⁸Un joi hidjras lauter an o foro un anas les peskro romeskri dake, un das lat ninna ko peklo djob, hoi pral atchas lakro chapastar.

¹⁹Kote penas i Naomi ap late: “Kai hals tu kau diwes? Un kai lal tu kawa khetne? O Debleskri bacht well ap koleste, kai jaake latches his ap tute!” Un i Rut penas ap i Naomi, pash koneste joi his un djob khetne las, un penas lake ninna: “Ko mursh, pash koleste me kau diwes budrom, kharell Boas.”

²⁰Kote penas i Naomi ap i Rut: “O baro Dewel mu tchiwell peskri bacht ap leste! O baro Dewel tserdas peskro latchepen gar pale, — gar i djidendar, witar gar i mulendar.” Un pale penas i Naomi ap late: “Tu hunte djiness, ko mursh hi jek mare menshendar. Job hi jek kolendar, kai pal maro tchatchepen menge ap i rig hunte wenn.”

²¹I Rut penas: “Job penas ninna ap mande: ‘Rike tut pash mire budepangre, bis te anan le o tselo djob dren.’”

²²Un i Naomi penas ap i Rut: “Kowa hi mishto, miri tchai, te djah tu kol djuwjentsa win, kai leske budrenna. Te djals tu ap i wawareskro kotar phub, nai wals, te taprell jek tut an.”

²³Un jaake rikras li pes pash kol djuwjende, kai o Boaseske budran, un las djob khetne an ko tselo tsiro, kai anan le o djob[3] un o gib[4] dren. Un pal kai tsiro atchas li khere pash peskro romeskri date.