Read O Debleskro Drom - I Bibla an o Romano Rakepen 2021 Rut 3 Bible Online

Rut 3 - O Debleskro Drom - I Bibla an o Romano Rakepen 2021 bible

Rut 3

¹Un i Naomi penas ap late: “Miri tchai, me kamau tuke i romes rodell, te djal tuke pale mishto.

²Tu djineh, ko Boas, pash koleskre budepangre tu hals, hi mare menshendar. Job hi kai rat ap i platsa, kai le o djob win denna.

³Thob tut un mak tut latcho djeteha dren! Un rib tiro shukar ripen an! Palle dja tele pash koi platsa! De jak te dikell tut ko mursh gar, bis te job chas un pijas.

⁴Un palle dik, kai job tchiwell pes tele! Te sowas lo dren, dja koi un tchip tut pash leskre pire tele. Un job penell tuke palle, hoi tu kress.”

⁵Un joi penas: “Lauter, hoi tu penal, kamau me te krell.”

⁶Un joi djas tele pash koi platsa, kai denn le o djob win un kras lauter, hoi lakro romeskri dai lake penas.

⁷Un har o Boas chas un pijas un leskro dji bachteles his, djas lo kote, kai o wi-dino djob tchiddo hi, un tchiwas pes koi pal tele. Un tchorchanes was i Rut pash leste, un tchakras leskre pire pre, un tchiwas pes pash leskre pire tele.

⁸Mashkral an i rati tapras i traash ko murshes, un job djangras pre, tchiwas pes glan un dikas: Kote hi i djuwel pash leskre pire tchiddo.

⁹Un job putchas: “Koon hal tu?” Un joi penas: “Me hom i Rut, tiri budepaskretsa. Le tiri baja un tchake man! Tu hal miro romeskre menshendar, kai man pal tumaro tchatchepen hunte romedinerell.”

¹⁰O Boas penas: “O baro Debleskri bacht well ap tute, latchi tchai! Tu sikral, te rikreh tu pash tiri familja kanna gomme latcheder un shukeder har tu kowa glanstunes kral. Tu nashal gar i terne murshenge palla — gar i brawelenge un witar gar i tchorwelenge.

¹¹Un kanna, tchai, ma dare! Lauter, hoi tu mange peneh, krau me tuke. I tsele menshe an miro foro djinenn, te hal tu i latchi djuwel.

¹²Un tuke hi tchatcho, te hom me jek tire menshendar, kai tuke koi hunte well. Ninna te hi jaake, djiness, te dell i wawar mursh mire menshendar, — kowa well glan mande.

¹³Atch kai rat kai. Taissarlake putchau lestar. Te kamell lo tuke koi te well, hi kowa mange mishto. Te kamell lo gar, krau me kowa. Kowa dau me man sowel pash o djido Debleste. Kanna atch tchiddo bis taissarlake!”

¹⁴Koi atchas li pash leskre pire tchiddo bis ap o wawar diwes. Un stas jaake sik taissarlake pre, kai jek o wawares gomme nai gar dikas. O Boas kamas gar, te djinell jek, te was i djuwel ap kai platsa.

¹⁵Un job penas: “Le o diklo, hoi trul tute hi, un rike les pre!” Un joi rikras les pre. Un job tchoras shob khore djob dren. Un tchiwas les lake ap o dumo. Un palle djas lo an o foro.

¹⁶Un joi was pash peskro romeskri date. Un koja putchas: “Har djas tuke, miri tchai?” Un joi penas lake lauter, hoi ko mursh lake kras.

¹⁷Un penas: “Un kal shob khore djob das lo man peha, un penas: ‘Tu djas gar pale pash tiro romeskri date i wastentsa, kai tchi dren hi.’”

¹⁸I Naomi penas ap late: “Atch khere, miri tchai, bis te tu djineh, har kawa win djas. Kau mursh dell gar buder palla, bis te kawa kau diwes gomme lauter kerdo hi.”