Read O Debleskro Drom - I Bibla an o Romano Rakepen 2021 Rut 4 Bible Online

Rut 4 - O Debleskro Drom - I Bibla an o Romano Rakepen 2021 bible

Rut 4

¹Un o Boas djas pre pash o foreskro wudar, kai i mursha khetne wenn, un beshas pes koi. Kote was ko wawar mursh, kai lake ninna koi hunte wals, kolestar o Boas rakras. Un o Boas penas ap leste: “Ab kai pash mande, un besh tut pash mande!” Un job was un beshas pes pash leste.

²Un o Boas las deesh murshen kol phureder murshendar an ko foro un penas ap lende: “Beshenn tumen kate pash mende. Un jon beshan pen.”

³Un job penas ap koleste, kai lake ninna koi hunte wals: “Ko kotar phub, hoi hi maro phraleske, o Elimelech, kowa kamell i Naomi, kai dran o them Moab pale was, te bikrell.

⁴Un koi penom mange, me kamau, tu te djiness kowa, un te penap tuke, te giness les kate glan kal murshende un glan kal phureden mare menshendar. Te kameh tu les gar te ginell, palle pen les mange, jaake te djinap me les. Tu un me ham kolla, kai les nai ginenn, un kek wawar har mer dui. Un me wau pal tute.” Un job penas: “Awa, me kamau te ginell.”

⁵Koi penas o Boas: “Ap ko diwes, kai tu ko kotar phub dran i Naomjakro wast gineh, hunte less tu ninna i Rut, kai hi dran o them Moab, kolakro rom mulo hi, un romedineress lat, te lell li tutar i tchawo. Koleste well palle ko kotar phub. Un jaake atchell ko kotar phub an leskri familja.”

⁶Koi penas ko wawar: “Te hi kowa jaake, nai ginau les gar mange. Me ginoms tchomone, hoi palle gar mire tchawenge wals. Jaake le tu kowa tuke, koleske me hunte koi woms. Me nai ginau les tchatchepah gar.”

⁷An i phure tsirja his jaake an o them Israel pash i bikepen un pash i parepen, te riwas ko bikepaskro peskri kirach win un das lat o wawareste, te sikrell lo, kai kau koowa jaake tchatcho hi un atchell. Un kowa his an o Israel jaake har te das lo peskro dadeskro wast koi pre.

⁸Un har ko bikepaskro ap o Boas penas ‘gin tu les’, riwas lo peskri kirach win un das lat leste.

⁹Kote penas o Boas ap i phureden un ap i tsele menshende, kai koi pashel his: “Tumer shunan un dikan, te ginom me kau diwes i Naomjatar lauter, hoi his o Elimeleches un leskre tchawen, o Kiljon un o Machlon.

¹⁰Un ninna lom me i Rut dran o them Moab, kolakro rom o Machlon his, te well li miri romni un anell leske i tchawo ap i phub. Jaake atchell ko kotar phub an leskri familja, un leskro lab merell gar win mank peskre phralende un an kau foro. Un tumer shunan un dikan kowa un djinenn, jaake hi kowa.”

¹¹Un i tsele mursha un phureder, kai pash o foreskro wudar his, penan: “Mer dikam kowa un djinah, jaake hi kowa. O baro Dewel krell, te well koi djuwel, kai an tiro kheer weh, har i Rachel un har i Lea. Kol dui djuwjendar was o tselo kheer Israel. Un tu wess brawelo mank tire menshende Efrat, un tiro lab well sharedo an o foro Betlehem!

¹²Un kol tchawe, hoi o baro Dewel tut koi terni djuwjatar della, wenn jaake bud, te well tiri familja jaake baro har i familja Perez, koleskro dad o Juda his un koleskri dai i Tamar his.”

¹³Jaake las o Boas i Rut, un joi was leskri romni. Un o baro Dewel das, te was li wawartchandes, un las i mursh tchawes.

¹⁴Kote penan i djuwja ap i Naomi: “Sharedo well o baro Dewel, hoi tut kau diwes i tchawes das, kai tuke koi hi. Kowa well an-diklo an o them Israel.

¹⁵Un job krell tiro djipen bachteles, un dell jak, te djal tuke mishto, te weh phuro. Tiro tchaweskri romni, kai tut peskro tselo djijeha kamell, anas les ap i phub. Koja hi tuke budeder moldo har efta tchawe.”

¹⁶Un i Naomi las ko ternepen, un tchiwas les ap peskre herja un das ap leste jak.

¹⁷Un kol djuwja, kai an i khera pash lende djiwan, penan: “Jek mursh tchawo was i Naomjake boldo!” Un jon dan les o lab Obed. O Obed was o dad ko murshestar Isai. Koleskro tchawo his o David.

¹⁸Un kolla hi i menshe, kai pal o Perez wan. Leskro tchawo his o Hezron.

¹⁹Leskro tchawo his o Ram, leskro tchawo his o Amminadab.

²⁰Leskro tchawo his o Nachshon. Leskro tchawo his o Salmon.

²¹Leskro tchawo his o Boas. Leskro tchawo his o Obed.

²²Leskro tchawo his o Isai. Un leskro tchawo his o David.