Read O Debleskro Drom - I Bibla an o Romano Rakepen 2021 1. Samuel 19 Bible Online

1. Samuel 19 - O Debleskro Drom - I Bibla an o Romano Rakepen 2021 bible

1. Samuel 19

¹Un o Saul rakras peskro tchaweha un peskre budepangrentsa, te kamell lo o Davides te marell. O Jonatan, kai kamas o Davides o djijestar,

²penas kowa o Davideske un penas: “Miro dad kamell tut te marell. Jaake khate tut taissarlakro un rike tut khatemen.

³Me kamau miro dadeha win te djal kote ap kai platsa, kai tu hal, un rakrau leha pral tute. Un hoi shunau, kowa penau tuke pale.”

⁴Un o Jonatan rakras peskro dadeha un rakras latches pral o Davideste un penas: “Miro baro rai, an kek doosh ap tute un kre o Davideske tchi! Job hi tiro budepaskro un kras tuke kek tchilatchepen. Un lauter, hoi job kras, his tuke mishto.

⁵Job dikas gar ap peskro djipen, har djas lo koi un kuras pes o Filistareha un das les mulo. Jaake te las o baro Dewel o tselo Israel dran i wasta i Filistarendar. Un tu dikal kowa un hals bachtelo. Hoske kameh tu doosh ap tute te anell un i rat jekestar, koles kek doosh ap peste hi? Hoske kameh tu o Davides mulo te dell tchitcheske?”

⁶Un o Saul shunas ap o Jonatan un das pes sowel un penas: “Me dau man sowel pash o djido Debleste, o David hunte merell gar!”

⁷Kote das o Jonatan o Davides gole, un penas leske lauter, un anas les pash o Saul. Un job budras leske pale, har glan ko tsiro.

⁸Un pale was i baro kurepen, un o David djas win te marell lo pes i Filistarentsa. Un job das len jaake soreles, te hunte nashan le.

⁹Un ko tchilatcho ducho, bitchedo o baro Deblestar, was pral o Saul, har job khere beshdo his un peskro witsepaskro tchuri an o wast rikras. Ninna o David his koi un bashras ap peskri dorjengri bashepaskri.

¹⁰Un o Saul witsras peskro tchuri, te dell lo o Davides ap i wanta. Un o David stas ap i rig, jaake te djas ko tchuri an i wanta. Un job nashas peske.

¹¹An koi rat bitchras o Saul lurden pash o Davideskro kheer, te denn le jak, te nashell lo gar peske, un te denn le les mulo taissarlakro. Un leskri romni, i Michal, penas leske kowa un penas: “Te nasheh tu gar kai rat, palle denn le tut taissarlakro mulo.”

¹²Un i Michal mukas o Davides dran i wochni tele, un job nashas peske.

¹³Palle las i Michal o khereskro dewel, o Terafim, un tchiwas les ap o tchiben, un tchiwas busjengre balla kote, kai o shero tchiddo wals, un tchakras kowa lauter i ripjeha.

¹⁴Har wan o Sauleskre bitchepangre, te lenn le o Davides, penas i Michal: “Job hi nasselo.”

¹⁵Kote bitchras len o Saul i duito kopo, te dikenn le pal leste, un penas: “Anenn les an peskro tchiben kai pash mande, te dap les mulo.”

¹⁶Un kol lurde djan koi un hatsan tchi har ko khereskro dewel Terafim an o tchiben tchiddo, un kol busjengre balla pash leskro shero.

¹⁷Kote putchas o Saul i Michalatar: “Hoske chochral tu man, un mukal koles te nashell, kai mange tchilatchepen kamell?” Un i Michal penas ap o Saul: “Job penas ap mande: ‘Muk man te djal, te dap tut gar mulo!’”

¹⁸O David nashte nashas peske, un djas pash o Samuel an o foro Rama un penas leske halauter, hoi o Saul leha kras. Un o David djas khetne o Samueleha pash i khera, kai o Debleskre rakepangre djiwan, un jon atchan koi.

¹⁹Un o Sauleske was penlo: “Dik, o David hi pash o Debleskre rakepangre an Rama.”

²⁰Kote bitchras o Saul lurden, te anenn le o Davides. Har dikan kolla kol tsele Debleskre rakepangren un lengro pralstunes, o Samueles, un shunan, har kolla o Debleskro rakepen win rakran, koi was o Debleskro ducho pral kol bitchepangren. Un jon rakran ninna o Debleskro rakepen win.

²¹Un kowa was o Sauleske penlo. Un job bitchras wawar bitchepangren koi. Un ninna kolla rakran o Debleskro rakepen win. Un o Saul bitchras o triinto kopo wawaren koi. Un ninna kolla rakran o Debleskro rakepen win.

²²Kote kras job pes ap o drom an o foro Rama. Har was lo pash koi bari brunna, hoi pash i djobeskri platsa Seku hi, putchas lo: “Kai hi o Samuel un o David?” Un jon penan leske: “Pash kol khera, kai o Debleskre rakepangre djiwenn an o foro Rama.”

²³Un job djas koi. Ap peskro drom was ninna pral leste o Debleskro ducho. Un job djas un rakras o Debleskro rakepen win, bis te was job pash kol khera, kai o Debleskre rakepangre djiwenn an o foro Rama.

²⁴Kote riwas job ninna peskre koola win, un rakras glan o Samuel o Debleskro rakepen win, un peras ap i phub un his nanges koi tchiddo o tselo diwes un i tseli rat. Doleske well penlo: “Hi o Saul ninna mank o Debleskre rakepangre?”