Read O Debleskro Drom - I Bibla an o Romano Rakepen 2021 1. Samuel 27 Bible Online

1. Samuel 27 - O Debleskro Drom - I Bibla an o Romano Rakepen 2021 bible

1. Samuel 27

¹O David penas peske an peskro dji: “Well ko diwes, kai perau o Sauleske an i wasta, un job dell man mulo! O feteder mange hi, te djap jaake sik har djala an o them Filistia. Palle mukell o Saul mandar tele, un rodell man buder gar an o tselo them Israel. Un job nai krell man tchi buder!”

²Jaake kras pes o David ap o drom peskre 600 (shob-sheel) murshentsa. Un jon djan pash o baro rajeste pral o foro Gat. Leskro lab his Achish, koleskro dad his o Maoch.

³Un o David peskre murshentsa atchas pash o Achish an o foro Gat. Hakenes his peskri familja pash peste. O Davides his peskre dui romjen pash peste, i Ahinoam dran Jesreel, un i Abigajil dran Karmel, kolakro rom o Nabal his.

⁴Un har le o Sauleske penan, te nashas o David an o foro Gat, rodas job les buder gar.

⁵O David penas ap o Achish: “Te kameh tu mange latches te well, palle muk man an i foro ap o them te djal, te nai djiwap kote. Kowa hi mange doha. Hoske djiwap me, tiro budepaskro, pash tute an o rajeskro foro?”

⁶Un o Achish das les ko diwes o foro Ziklag. Doleske hi o foro Ziklag gomme kau diwes kol bare rajenge dran o them Juda.

⁷Ko tselo tsiro, kai o David an o them Filistia his, his jek bersh un star tchon.

⁸An ko tsiro peras o David peskre murshentsa an ko them dren, kai djiwenn i Geshurarja un i Girsarja un i Amalekarja. Kolla his i rah tsiro kote an o them, un djiwan bis pash o mulo them Shur un bis tele pash o them Egiptia.

⁹Un kai o David an kau them dren peras, kote mukas lo kek murshes un kek djuwjat djides, un las i tsele bakre un grumja, burike un khamele, un kol tsele ripja peha, un djas pale pale pash o Achish.

¹⁰Un te putchas o Achish: “Kai peran tumer kau diwes dren un randan?” palle penas o David: “An o them Negev an Juda.” Oder: “An o them Negev, kai i Jerachmeelarja djiwenn.” Oder: “An o them Negev, kai i Kenarja djiwenn.”

¹¹Un o David mukas kek murshes un kek djuwjat djides. Job kamas gar, te nai well jek an foro Gat un penell kote, hoi job peskre murshentsa tchatchepah kras. Un jaake kras kowa o David o tselo tsiro jaake rah, har job an o them Filistia djiwas.

¹²Un o Achish patsas o Davides, un penas peske: “Job kras pes pash peskre menshende Israel jaake khandles, te atchell lo hako tsireske miro budepaskro.”