Read Ocotepec Mixtec Hebreos 3 Bible Online

Hebreos 3 - Ocotepec Mixtec bible

Hebreos 3

¹Hermano, nī ncana Yāā Dios ndá ndóhó, de cúu nú nchivī ndoo maá yā. Túsaá de nacani vāha inī nū sīquī Cristo Jesús, Yāā jā cúu apóstol jā ní ntetíñú Yāā Dios, de suni cúu yā sūtū cúñáhnú sīquī tūhun cándíja ó.

²Chi nī squíncuu vāha yā nūū Yāā Dios, Yāā jā ní ntee tiñu ñúcuán sīquī yā, tá cúu nūū ní squíncuu vāha Moisés nūū ndá nchivī jā ní ncāhān Yāā Dios jā cúu ji nchivī vehe yā.

³De cúñáhnú ndasí cā Jesús nsūú cā Moisés, tá cúu nūū cúñáhnú ndasí cā tēe sáhá vehe nsūú cā maá vehe.

⁴Chi ndācá vehe íyó tēe jā ní nsāhá. Sochi maá Yāā Dios cúu jā ní nsāhá ndācá jā íyó.

⁵De Moisés nī squíncuu vāha dē jíín tiñu jā ní ncuu dē mozo nī jito dē nchivī vehe Yāā Dios. De nī ncachī tūhun dē sīquī ndācá tūhun jā stéhēn yā tiempo jā quiji.

⁶Sochi Cristo chi sa cúu yā maá Sēhe jā ndácu tiñu nūū nchivī vehe Tatá yā, de vāha squíncuu yā jēhē ji. De suni maá ó cúu nchivī vehe yā, de tú cuiñi nīhin ó jíín tūhun jā cándíja ó jondē quīvī sándīhí, de tú cúsiī inī ō jā ñúhún inī ō ndācá jā váha jā coo. Tūhun jā natātú nchivī Yāā Dios

⁷Túsaá de ná chúhun inī ō jā cáhān Espíritu Santo nūū tutū īī:Mitan de tú cunini ndá nú jā cáhān Yāā Dios,

⁸de mā cúnīhin inī nū tá cúu nūū ní ncunīhin inī nchivī janahán.Chi nduú ní ncándíja ji nūū yā tá nī jica ji nūū ñuhun tíhá.

⁹Chi ñúcuán nī nsāhá tatā ndá nú tiñu jā ní nquītī inī ni, ncachī yā,vísō nī jinī ji tiñu ñáhnú jā ní nsāhá nī ūū xico cuīyā.

¹⁰Jā ñúcuán nī nquītī inī ni jíín nchivī tiempo ñúcuán.De nī ncāhān ni jā maá-ni jā sndóo ji ichi ndaā,chi nduú cúnī ji cuniquīn ji tūhun nī.

¹¹De jā ñúcuán nī nquītī inī ni, de nī ncāhān téyíí nījā má quívi cuitī ndá ji nūū natātú ji sāhá nī. Ncachī yā.

¹²Túsaá, hermano, coto ndá nú jā má cōó nēhén ánō ni iin nú jā caca yátá nú jā má cándíja cā nū Yāā Dios, Yāā técū.

¹³Chi sa ndācá quīvī sndíhvī tāhán inī nū, juni íyó cā tiempo, tácua mā cúnīhin inī ni iin nú jā stáhví cuāchi ndóhó.

¹⁴De tú ná cuíñi nīhin ó jondē quīvī sándīhí jíín tūhun jā ní nquijéhé ó jíín, ñúcuán de coo cáhnú ó jíín Cristo.

¹⁵Chi cáhān tutū:Mitan de tú cunini ndá nú jā cáhān Yāā Dios,de mā cúnīhin inī nū tá cúu nūū ní ncunīhin inī nchivī janahán. Cáchī.

¹⁶¿De ní nchivī cúu jā ní jini tūhun yā de nī ncunīhin inī? Suu ndihi nchivī jā ní scácu Moisés jā ní nquee Egipto.

¹⁷¿De ní nchivī cúu jā ní nquītī inī yā nūū ūū xico cuīyā? Suu nchivī jā ní nsāhá cuāchi de nī jīhī ndá ji nūū ñuhun tíhá.

¹⁸¿De ní nchivī cúu jā ní ncāhān téyíí yā jā má quívi cuitī ji nūū natātú ji sāhá yā? Suu ndá nchivī jāá nduú ní ncándíja nūū yā.

¹⁹Túsaá de jínī ō jāá nduú ní ncúu quīvi ndá ji nūū natātú ji, sīquī jāá nduú ní ncándíja ji yā.