Read Oksapmin Matyu 2 Bible Online

Matyu 2 - Oksapmin bible

Matyu 2

¹Herot oh mong kakhan hat patin Maria uh Jisas ohnong Betrehem aptei itipmur. It patin dakuu han ihir atan marpatdapat Jerusarem ap mutuhnong apingopari.

²Aprisa Nuhur atan marpatdapat merum wamar Juda ire kakhan tit ita ma hapat dahama ihan dir sus ohe danong ham armi matpera rim apriyamur. Gin ama itiri brer oh de tei pat por dahandeingopari.

³Dahamtiperhan gahan Herot oh ire Juda ire kakhan tit itirimur ma riya meng oh amrama sein bupang ringopri. Sein bupang ritporhan Jerusarem kuuhan ihir Gin dire kakhan hat pat han moh er han moh brer moh sutiprao rim ihir sein bupang ritpari.

⁴Gahan Herot oh Got ohe ap yawar nita han ihirnongo ire sawa am hat pati han ihirnongo Gur tap tei hatinmuro potporhan ihir tap tei hatperhan oh Got ohe darhetipra ma ritip han oh de aptei itipra risheo por dahandeingopri.

⁵Dahamtiporhan ihir Judia mong Betrehem aptei itipramuro rim brak matpamur potpari.

⁶Got ohe meng porishe han ihir tit meng por ma brak matip oh mamaru hat patmur.Juda mong Betrehem apteidapat hanisip tit apripramuro. Aprisa Isrer nure napapten han hatipramuro. Ihtin han tit Betrehem apteidapat apripra ohoh ihan Betrehem aptei gar aptei orhora; win isip aptei hatipramuro. por brak matipmur. Ihtin ohoh ihan Betrehem aptei itiri ma hapat daham potpari.

⁷Potperhan Herot oh atan marpatdapat ma apdori dakuu han ihirnong nohe patnong aprina pongopri. Potporhan ihir apriperhan oh brer oh desut itiro daham ihirnong Gure merum ma wamtiri oh desut pat hangwero por sa ahar dahamtipri.

⁸Dahamar am hapat Noh brer ohnong sutpora dahama ihirnong Gin gur Betrehem apteinong sonmur. Susa pomat angmar wamtinmur. Wamara apris napotinmur. Napotperhan noh sus ohe danong ham armi matipramur pongopri.

⁹Gipotporhan ihir arpin amrama pipari. Sayaoh atan marpatdap merum ma wamtiri oh atei patgopri. Ihan merum dimat pipari. Sus wandeiyaoh merum oh ap ohe dason ohot kimirit patgopri.

¹⁰Kimirit pathan ihir Brer oh matei pat ma hapat daham amam hatpari.

¹¹Amam hama ap oh ros wandeiyaoh Maria ihit iman patingopari. Patihan ihir katin takira tongnom ohnong armi matpari. Armi deipti ire mim apriya erer oh taphoma apdapari. Ma apdapa oh kwei goro irat gap gapgwesi tomo irat harheir gwe hatin gapgwesi hano oh ama han erer oh yan isipsi mohopti han ohwi apdapari.

¹²Gahan kinpitap mandap oh Got oh Gur Herot ohe pat kat ohri it sapri. Wan mandap kat sonmur pongopri. Potporhan ihir arpin amrama wan mandap pipari. Josep ohe brer imansi Isip mongnong ma pip ohe meng oh

¹³Ihir saperhan gahan Got ohe atamreipti han enser ihir tit han tit kinpitap mandap apris Josep ohnong Go masona. Herot oh brernong moh kaimat itpora dahapat ohoh ihan go brer imansi Isip mongnong tandutinmur. Sus atei patin kaput noh it aprina napotipramur pongopri.

¹⁴Potporhan Josep oh arpin masasa kwitem hat patin orhor brer imansi Isip mongnong pipari.

¹⁵Sus patin gahan amrayaoh Herot oh haputmuro ritperhan it apdapari. Isip mongdapat ma it apdapa oh Got ohe meng porishe han ire han tit ohe mengtei por ma brak matip meng oh arpin dam timdipmur. Gipor ma brak matip oh Nohe brer oh Isip mong tei patin gin aprina potporhan Isip mongdapat apripramuro por ma brak matip oh dam timdipmur. Herot ohe brer han mon ihirnong kaimat sarisuh ohe meng oh

¹⁶Herot oh na haput patin orhor dakuu han ihir wan mandap saperhan oh Epe. Ihir dasuh naham wan mandap sa piyao daham heisup hangopri. Heisup hama ire Nuhur asut wamtipamur ma ritiri meng oh dahama Jisas oh brer oh ihtin san hat ma hapat daham ohe han ihirnong Gur Betrehem ap mutuhnong susa brer krismas yot na birhit pat brero ama ihtin brer gonsi ihirnong kaimat itinmur. Betrehem aptei pati brersi; Betrehem ap kakduup kakduup aptei ma pati brersi kaimat itinmur por darhengopri. Jisas ohnong kaimat itinmat ohe dasiapruh oh Gur ama aptei brer ihirnong gonsi kaimat itinmur por darhengopri.

¹⁷Por darhetporhan ihir sus brer han mon ihirnong kaimat sarisheri. Ihama Got ohe meng risuh han Jeremaia ohe rim ma brak matip meng oh dam timdipmur.

¹⁸Ohe rim ma brak matip meng oh mamarumur.Hanip ihir amrayaoh Rama aptei supir ihir saheih ham payimaprimuro. Reser uhe puh ihir iraire brer ihirnong payimaprimuro. Payimaptin brer ihir na pati ohoh ihan supir ihirnong kinmat da ayah matiprio. rim ma brak matip meng oh arpin dam timdipmur. Josep oh brer iman ihitsi Nasaret ap mutuhnong pip ohe meng oh

¹⁹Gahan Herot oh haputporhan Got ohe atamreipti han enser ihir tit kinpitap mandap aprisa Josep ohnong

²⁰Gin gwe brer ohnong kaimat itpora ma dahat pat han oh haputirmuro. Ihan brer iman ihitsi guragur it Isrer mongnong sonmur pongopri.

²¹Potporhan arpin amrama brer iman ihitsi Isrer mongnong sus indipri.

²²Patin gahan oh amraoh Herot ohe mon Akereas oh itap ohe aduup apitnong hatmuro ritperhan oh kas hatipri. Kas hatporhan Got oh kinpitap mandap Go Gariri mongnong sonmur potporhan

²³Oh susa Nasaret ap mutuhnong sus patesuhri. Nasaret aptei ma patesuh oh rih Got ohe meng rishe han ire meng oh Oh Nasaret han hatipramur rim ma brak matpa oh arpin dam tarpatipmur.