Read Oksapmin Matyu 4 Bible Online

Matyu 4 - Oksapmin bible

Matyu 4

¹Ihtiporhan Got orhe Yahsup oh Jisas ohnong Gin go hanip timbas irat timbas mongnong sonmur. Sus patin den na dam be patin sande hanen gon hapat tit oh katket matipramur. Ihtiporhan Satan oh apris go er hat ha sonohrim kis nahatipramur por pisongopri.

²Pisaporhan oh atei sus patin den na dam patin hanen sande rim tit oh katket matipri. Ihpat pahoh hatipri.

³Pahoh hatporhan er da nahapat han oh aprisa Go Noh Got orhe brermur ripat ohoh ihan kwei moh den mara dinmur pongopri.

⁴Potporhan oh Go giritipra. Got oh hanip nuhurnong meng napotporhan ma brak matpa mengnong moh dahatinmur. Ma brak matpa ohHanip gur den ohe kasip ohsiwi yah hat eimat paten dasi haptida. Basra. Got ohe naporpat meng ohe kasip ohsi paten ina dasi haptimur. ritporhan brak matpamur. Ihat brak matpa ohoh ihan den dam eimat paten dasi na haptio rim noh gwe ma napor meng oh amram na imtiprohmur potipri.

⁵Potporhan Satan oh gin Jerusarem ap mutuhnong sapera pora pisangopri. Pisusa Got ohe ap yawar hamekat tei putei mahat prungopri.

⁶Prusa hamekat ka hatdapat Rih Got oh ritporhan ma brak matpa meng moh giritpamur.Got oh orhe atamreipti han enser bap ihirnong Gur oh kwei trah tei tapdiprarim gur marin orhorwi paptenmur porpatmur. rim brak matpamur. Ma brak matparu ihir ihat gonong namrin napapti ohoh ihan pung rim kakdahnong wayonmur. Wasa go Noh Got orhe brermur ripat ohoh ihan ihir ihat namrin napapti ohoh ihan go na tapdiprohmur pongopri.

⁷Potporhan Jisas oh Es. Got oh ritporhan ma brak matpa mengnong moh dahatinmur. Gur Hanipyah ohnong be bokdushe kis deipri ritporhan brak matpamur. Ihtin ohoh ihan noh gwe mengnong namram pung rim na waprohmur potipri.

⁸Potporhan Satan oh Gin yei kanong saper pora pisangopri. Pisusa yei ka hatdapat Gin kak hat pati han ire hrepnong mat papti erer moh yahnap yahnap hanwi pat moh wamtinmur.

⁹Wandeipat go katin takira nohe danong ham armi nahahanoh noh mama erer moh gonong napriprohmur pongopri.

¹⁰Potporhan oh Satan go sona. Got ohe ritporhan ma brak matpa meng oh mamaru hat patmur. Gur guragure Hanipyah Got orhe danongwi ham armi deiyao orhe atamreindin oh atamreiyao ham patenmur ritporhan brak matpamur. Ihtin ohoh ihan noh gwe danong na hatiprohmur. Ihan go sona potipri.

¹¹Gipotporhan Satan oh mandama sangopri. Saporhan Got ohe atamreipti han enser kat ihir aprisa papangopari. Jisas oh kopenat ma tamreindip ohe meng oh

¹²Gahan Jon ohnong karapus matamuro ritperhan Jisas oh Gariri mongnong it apingopri.

¹³Aprisa Nasaret aptei mandama Kapaneam apteinong sus angopri. Kapaneam oh tom hru hir patmur. Seburun ire mongsi Naptari ire mongsi mong en tei oh patmur.

¹⁴Oh sus ama aptei ma indip oh Got ohe meng porisuh han Aisaia ohe rim ma brak matip meng oh arpin dam timdipmur.

¹⁵Ma brak matip oh mamaru hat patmur.Seburun ire mong ma pati hano Naptari ire mong ma pati hano tom hrunong sapti mandap tei ma pati hano tom Jodan han tan ma pati hano Gariri mong ma Juda na hat pati han bapo ihir

¹⁶kwitem hatin hat patin atan has hah hatin hatporhan wamtiprimur. Ihir kwitem hatin hat patin hapuriya da hatin hat patin mong da teinong hatin hatiprimuro. rim brak matipmur. Ma brak matip oh arpin Jisas oh ama apteinong susa has hatin hat patin ama meng oh dam timdipmur.

¹⁷Ihama Jisas oh ama aptei patdapat aptei aptei meng pot pisanipatri. Meng pot ma pihip oh Got orhe mengtei napapindin oh gin kakduup hah ohoh ihan gur er danong kom asar mandama da tamburketinmuro pot pisanipatri. Jisas oh kopenat ma hanip ambutip ohe meng oh

¹⁸Gahan Jisas oh tom Gariri hir oh usoh Saimon Pitasi; arwap Andru ihit aning ung mipti han yot ihit aning mitperim ung tom dahnong deiptingopari.

¹⁹Deiptihan Gut nohe kom aprishenmur. Apriperhan noh gute aning ung tamitperhan daripti ohe tan mat orhor hanip ihirnong ambur nohe han nadein han yot nahatporhan gut hanip ihirnong amburin han yot hat pateprimur pongopri.

²⁰Potporhan ihit kapkap ite ung mandama ohe kom apingopari.

²¹Apriperhan ihir pipari. Sus asotei wandeiyaoh Sebedio orhe mon Jemiso Jono ihir tamder patingopari. Ihir tamder bot bas tongnoma ung pondeiptingopari. Pondeiptihan Jisas oh We. Gut aprina pot uangopri.

²²Pot uatporhan ihit kapkap ungo itapo erer oh mandama ohe kom apingopari. Jisas oh hanip pomat pisasuh ohe meng oh.

²³Gahan Jisas oh Gariri aptei aptei sus iraire rotu ap rosa Got ohe napapten ohe yah meng oh pot pisao tihan tihan sik hat pati kuuhan pondeio mat pisanipatri.

²⁴Imat pisapatin Siria mong aptei aptei ihir ohe imat hanip yah mat pisapat meng oh amrama ihirhe iraire ti han ti han sik ham batbetsi hat pati bapo mongsup oh ga at pat bapo ketsup oh da aban mat papat bapo buh girir net bes girir net rit pati bapo ihtin kuuhan ihirnong Jisas ohe patnong popingopari. Popriperhan oh ama ihat pati bap ihirnong yah deinipatri.

²⁵Indeipatin Gariri aptei aptei pati hano Dekaporis ma pati hano Jerusarem ma pati hano Judia mong aptei aptei ma pati hano tom Jodan han tan ma pati hano ama kuuhan ihir isip tit ohe kom pipari.