Read Oksapmin Mak 3 Bible Online

Mak 3 - Oksapmin bible

Mak 3

¹Gahan Jisas oh it rotu apnong rongopri. Rooh han tit bes tan wasi han tit patgopri.

²Pathan kat ihir Jisas oh tuperipti dik moh yah matiprohdo. Yah deihanoh tuperipti dik oh na ihapti ohoh ihan oh er hat sapat hanmur potperim wamat angopari.

³Wamat patin oh bes tan wasi han ohnong Go apris ire mutuh moh tandeitina pongopri.

⁴Porpat ihirnonghe sawa meng oh Tuperipti dik oh hanip tamreim arwapnanah ihirnong panggeim yah deiyahan yahmur ripatda da na panggeim er deiyahan yahmur ripat. Tuperipti dik oh ha haputinoh rim er mar mandayahan yahmur ripatda da ambur yah deiyahan yahmur ripat. Guragur daham ritinmur pongopri. Potporhan ihir kimirit mandangopri.

⁵Kimirit mandatperhan Jisas oh ire Nuhur ohe danong ham ohe mengnong na amratiprohemur ma dahaya danong oh awamara am hapat heimsi rim da er hangopri. Da er ham hanip ihirnong sam sam mat wamat pisusa bes tan wasi han ohnong Gwe bes wa tan oh dirhis potina potporhan oh arpin bes wa tan oh dirhis poroh bes oh yahnap hat mandangopri.

⁶Yahnap hat mandatporhan Parisi ihir wandeipti ohnong heisup mara kotnong rosa Herot ohsi pati han ihirsi kapkap ama tarmutpa oh. Tarmura Jisas ohe sutin ohe meng oh ama wanin matpa oh. Among among ma pati kuuhan bap ihir aprisa Jisas ohe duupnong hatpa ohe meng oh

⁷Gahan Jisas oh orhe pinggit pisapat han ihirsi atei oh mandama ihir tom hru teinong pipari. Saperhan kuuhan ruumsan ihir ohe kom apingopari.

⁸Gariri mong ma pati kuuhano Juda mong ma pati kuuhano Jerusarem ap mutuh pati kuuhano Itumia mong ma pati kuuhano tom Jodan han tan ma pati kuuhano Saidono Taiao ama mong ma pati kuuhano among among ma pati kuuhan ihir Jisas ohe ma ihpat meng oh amrama han isip isip tit apingopari.

⁹Aprisa rih sik hat pati han ihirnong trun yah deipato rima sik hat pati han ihir ohe boknong bes marinperim mergoshat apingopari. Mergoshat apriperhan oh orhe pinggit pisapat han ihirnong Han isip maihir nohnong nadupnetipri. Gur bot oh mamen tahat patina pongopri. Potporhan ihir bot oh mamen matpari.

¹¹Mamen matperhan mongsup oh ga at pat han ihir aprisa Jisas ohe duup oh bos hamnong mar timongopari. Timapti ihir akit mengtei Jisas ohnong Go Got ohe brermuro pongopari.

¹²Potperhan oh Gur nohnong oh ama han ohe brermur napor tirip hapri. Kimirinmur por baso por indeingopri. Jisas orhe nathei han ihirnong kis matip ohe meng oh

¹³Ihama Jisaso ihir yei mutuhnong ruhpari. Rusa orhe ambutin han ihirnongwi Gur nohe pat teinong moh apris tap tei hatinmur potporhan ihir ohe pat tei sus tap tei hatpari.

¹⁴Tap tei hatperhan oh nathei han ihirnong Gin gur nohsi tap hat sashen han hama norhe mengtei norhe meng pot pisashen han aposer hama

¹⁵mongsup ga at pat ire mongsup ga aperiyao ihat sashen han bapo rim kis naham win natiprohmur pora kis mar ire win angopri.

¹⁶Ama nathei han ire win ma atip oh tit Saimon Jisas oh win tit Pita ma potip han ohmur.

¹⁷Tit han Jemis ohmur. Tit han Jon ohmur. Ama yot ihit Sebedi ohe mon yot ihitmur. Ihitnong oh wan win Boanesis ama potip oh. Boanesis ma porishe oh minggihim mona ma porishe oh. Ite meng riya oh kasipwi hama minggihim hatin hat meng riptio rim minggihim mona potipmur.

¹⁸Ihtiporhan tit han oh Andru ohmur. Tit oh Pirip ohmur. Tit oh Batoromyu ohmur. Tit oh Matyu ohmur. Tit oh Tomas ohmur. Tit oh Arpias ohe mon Jemis ohmur. Tit oh Tadias ohmur. Tit oh Saimon Serot ohmur.

¹⁹Tit oh Judas Iskariot ohmur. Judas Iskariot oh Jisas ohnong nang hatip han ohmur. Ama nathei han ihirnong Jisas ohhe kis mar win angopri. Jisas ohnong Go Biersebur ohe kasip ohsi tamreipatmur potpa meng oh

²⁰Ihama Jisaso irair it yei mutuh oh patimdapat yei mutuh mandama it ap mutuhnong waihpari. Wasa ap rosa patin kuuhan isip isip tit it tarmungopari. Tarmutperhan Jisas oh orhe pinggit pisapat han ihirsi den oh kinhat daro damo hatin ina hatpari.

²¹Kinhat den din ina hatperhan supir itapir taptem ihir amrapti Oh da ban taham da timbas hat patin ihat sapat moho rima ambur apingopari.

²²Kopen ambur apriptin sawa meng am hat pati han ihir Jerusarem apteidapat apingopari. Aprisa Wa. Jisas ohe mama ihpat moh Got ohe kasipsi ihpatda. Basra. Mongsup ire duuptei han Biersebur ohe kasip ohsiwi mongsup ihirnong er mat darherpatmuro por indeingopari.

²³Imtiperhan Jisas oh Gur nohe duupnong moh aprinmur potporhan ihir ohe duupnong saperhan oh paham mengtei meng tit pongopri. Satan oh orhe han ihirnong hanip mutuh patin Gin go ga taper sona potiprohda. Basra. Orhe hano rim na potiprohmur.

²⁴Tit kakhan ohe hrepdapatwi hat patimdapat amuk orhe amuk orhe gosham sut patin goshayahanoh irair tap hat gonsi timbas hatiprohemur.

²⁵Tap aptei yot gutagut tam tuker gusuyahanhe gurangur tap hat na pateprimur. Timbas hatiprohemur. Timbas hatipririm tap han gurangur na ihaptimur.

²⁶Ihat orhor Satan oh orhe nita ihirsi tam tuker gusuyahanoh irairnong na patem tap hat timbas hatiprohemur. Timbas hatipririm orhe han ire ga na apetiprohmur. Ihtin ohoh ihan nohnong oh Satan ohe kasip ohsi patin na indeipat ma hapat dahenmur.

²⁷Mohnong dahenmur. Kasip han ohe erer oh adatpera daham be ap ros adariptida. Basra. Orhornongri nang bok mat sar mandapti orhe erer oh adariptimur. Amaru hat orhor noh kasip han Satan ohnong nang bok mat sara indeipatmur.

²⁸Gur er hat son ohe da tit hayao Got ohnong dasei meng poriyao hayahanoh ama ihya ohe yan oh dat namdatin ina hat patmura;

²⁹Yahsup ohnong dasei deiyahanoh ama ohe yan oh dat na namdatin ina hat patmur. Ohe pe oh wamtiprimur.

³⁰Ihir Go mongsup ohe kasip ohsi patim ihat tamreipatmur potperhan oh ama meng oh pongopri. Jisas oh Got ohe mengnong amram dindeipti ihir nohsi taptem ihirmur potip ohe meng oh

³¹Jisas oh kuuhan ihirnong meng por am deipatin orhe supo orhe nap gapiniro ihir apingopari. Aprisa kot teimdapat Jisas oh nure patinong ha maronoh por meng darhengopari.

³²Meng darhetperhan han isip ma Jisas ohnong porpermat pati han ihir Jisas ohnong Go amratin. Gwe Suao arwaniro ihir aprisa kot tei maroh gosi mengitperim naminhan patiri pongopari.

³³Potperhan oh Nohe emo nap gapiniro oh de ihira pora

³⁴ohnong porpermat pati han ihirnong wandeipat Gur moh wamtin. Nohe emhero nohsi taptemo gur diradir mama pati ohmur.

³⁵Got ohe dahapat danong ma dindeipti guroh nohe nap nanip kuunango wanango emhero gurmur pongopri.