Read Oksapmin Ruk 11 Bible Online

Ruk 11 - Oksapmin bible

Ruk 11

¹Gahan tit dah tit Jisas oh tit dus tit susa itap ohsi mengingopri. Mengit mandatporhan orhe pinggit pisapat han tit ohnong Hanipyaha. Go Jon ohe orhe pinggit pisasuh han ihirnong Got ohsi mengritinmat oh Mihat mengrinmur por ma pinggitipru mat orhor nuhurnonghe mihat Got ohsi mengrinmur napor am naham namgitinmur potipri.

²Potporhan oh Gur Got ohsi mengritper riyahanoh mihat mengrinmur.At Gota. Ongengnap hat pat han gonong armi naham ongengnap hat orhorwi ha napaptengwemur. Gorhe hrepnong naham napapindin ohe da oh mong mong gonsi ha aprinohmur.

³Go den gin din ohe kis oh kis mat napina.

⁴Nuhurhe kat han ihir er nahatperhan it ihirnong yansi na mar eimat hanhan mar mandaptimur. Ihan gohe nure er hat sapti pe oh yansi nahatipra. Dat namdatinmur. Er hat ha songwe rim ruumsup naham er nahapat han ohe mutuhnong nahapra. por ihat Got ohsi mengir patenmur pongopri.

⁵Giporpat orhe han ihirnong Gur mohnong dahenmur. Gur guragure yah han tit kut mutuh orhor apirhanoh Noh den timbas hat patin oh apir moh gin noh kinmatiproh daham gorhe yah han ohe apnong asoh susa Gin norhe yah han oh nutanut timdinmat kwitem apirmur. Noh den timbas patin apir ohoh ihan go den yitir tit napinmur por dahamtiprohmur.

⁶

⁷Dahamtiporhan ap nita han oh Es. Noh aphe tapura brer ihirsi tap dahnongwi ham timaya tei ohoh ihan noh gonong kinmat dat napriproh. Na napriproh ohoh ihan go apris nohnong ina ruumsup nahatipra napotiprohmur.

⁸Napotiproh orhor go na kasa ham kandeipatin oh masasa gorhe ma hatip hat pat erer oh arpin dat napriprohmur. Ma dat napriproh oh gutagut yah han hat pati ohe pe oh dat na napriprohmur. Gorhe na kasa ham ma kandei ohe pe oh dat napriprohmur.

⁹Amaru hat orhor Got ohnong dahamtinmat oh dipwi dahamatwi ayahanoh ama daham dahandeiya da oh napriprohmur. Angmat orhorwi ayahanoh ama angmat aya ohe pe oh wamtiprohemur. Ha napanggeitinoh rim ap gwatei dipwi kang kang pot ayahanoh ama dipwi kang kang por aya gurnong oh ap gwatei nadapuma napanggeitiprohmur.

¹⁰Datpera daham Got ohnong dahandeipti gurnong napripatmur. Wamtipera daham angdeipti gur wandeiptimur. Ha napanggeitinoh rim ap gwatei kang kang poripti gurnonghe ap gwatei nadapuma napanggeipatmur.

¹¹Brer oh itapir gurnong Ata. Aning bok tit napin naporhanoh itap go na dapti han ambep bok tit apriprohda. Basra. Brer ire ma dahanahaya han orhorwi apriprohmur.

¹²At go ner gwe napin naporhanhe sutin han tohah er oh apriprohda. Basra. Ner gwe yah orhor apriprohmur.

¹³Gur kakdah moh er hat pati han bap orhora; guragure brer ihirnong yah hanwi apriptimur. Aw tei mahat ma pat han at Got oh atnap yahnap hat pat han ohoh ihan gur Got gorhe Yahsup oh nure mutuhnong mar napina poriyahanoh oh arpin napriprohmur pongopri. Kat han ihir Jisas ohnong Go Satan ohe kasip ohsi tamreipatmur potpa ohe meng oh

¹⁴Gahan ihir mongsup oh atem apat pat han tit popriperhan Jisas oh Mongsup hanipnong atem apat pat han go maras sona potporhan oh arpin maras saporhan hanip oh atem tanpura mengingopri. Mengitporhan kuuhan ruumsan ma tarmut pati ihirhe wamara sein bupang rim da tupnet ringopari.

¹⁵Da tupnet ritperhan kat han ihir wamara Es. Mohra Got ohe kasipsi indeipatda. Basra. Mongsup ire duuptei han Biersebur ohe kasip ohsiwi mongsup ihirnong er mat darherpatmur por indeingopari.

¹⁶Imtiperhan kat han ihir Jisas orhor orhe winnong daptuhur er hat ha sonoh daham ohnong Nuhur Moh Got ohe kasip ohsi patim indeipat ma hapat dahatin ohe da oh na wandeipti han tit namgitinmur. Namgirit nuhur dahatper por da akis deingopari.

¹⁷Da akis matperhan Jisas oh ire kis deiya ohe dao Biersebur ohe kasip ohsi indeipatmur poriya ohe dao oh am hapat mama paham meng moh pongopri. Tit kakhan ohe hrepdapatwi hat patimdapat amuk orhe amuk orhe gosham sut patin goshayahanoh irair tap hat gonsi timbas hatiprohemur. Tap ap ma pati guragur tam tuker gusuyahanhe guragur tap hat timbas hatiprohemur.

¹⁸Amaru hat orhor Satan ohhe orhe nita ihirsi katket taham gusuyahanoh irair kinhat kasip hat indiprohe. Gonsi tap hat timbas hatiprohemur. Timbas hatipririm na ihapti ohoh ihan nohnong Moh Satan ohe kasip ohsi indeipat ma hapat ma naporipti oh kianorim ginaporipti.

¹⁹Gur nohnong Biersebur ohe kasip ohsi mongsup gur maras sona por er mat darherpatmur naporiyahanoh guragure han ire mongsup ihirnong ma er mat darheriptinong oh gur nihohe kasip ohsi er mat darheripti ma hapat dahapti. Ihir Got ohe kasip ohsi indeipti ma hapat ma dahapti oh nohnonghe Moh Got ohe kasip ohsi indeipat ma hapat dahenmur. Gur ihat ma na dahat pati oh guragure mongsup ihirnong er mat darheripti han bap ihirhe gurnong Biersebur ohe kasip ohsi na indeipatmur. Got ohe kasip ohsi indeipatmur. Gur kinham ihan na dahapti napotiprohemur.

²⁰Noh Got ohe kasip ohsi mongsup ihirnong er mat darherpat ohoh ihan Got orhe kasip hrepnong naham napapindin oh apris gin mama pat oh ma hapat dahenmur pongopri.

²¹Giporpat Gur mama mengnong dahatinmur. Han kasip tit dup wama ap gwatei kat patin oh mahaw ihir apris orhe erer oh bisei mar na adariptimur.

²²Han kasipnap tit apirhanoh ama kwet pat han ohnong ambapte deipat gapah han ihirnong mohsi ambapte mar sutipramur daham mamen mat it pat erer oh gonsi adatiprohmur. Adarpat ohe ihsen erer oh ros adatiprohmur. Adarpat ama erer oh orhe han ihirnong nitat mat apriprohmur. Noh amaru mat Satan ohnong ambapte mar ihat apripatmur pongopri.

²³Gur nohe tapnong ham na napanggeipti han gur nohnong er naham mahaw nahaptimur. Gur hanip ihirnonghe Orhe sipsip bap amtiper na daham na naruprup deiyahanoh ama han gur okmat darheriptimur pongopri. Jisas oh Mongsup ihir hanip mutuh mandam susa orhor it apripramur potip ohe meng oh

²⁴Jisas oh giporpat Gin gur mongsup bap ihirnong dahatinmur. Mongsup tit hanip mutuh patdapat Gin noh ga taper saporo rim saprohmur. Susa tupetporim ohe indin gat mong teinong angtahatiprohmur. Angtahama ohe indin mong tei timbashanoh Noh it hanip mutuhnong sapora rim it apriprohmur.

²⁵Apris wandeioh ama han ohe mutuh oh yah hat indin tei huhun hirmar yah mat papat orhor yah da oh ti na pathanoh oh wamat mandama

²⁶it susa atnap er matin ohe mong sup beshei ihirnong ambura apris irair ros indiprohemur. Ma ihat indiprohe oh rih er da oh gar hat patesuhmur. Gin oh atnap isipnap er hatiprohmur. Ihtin ohoh ihan er da mandapti orhor yah danong oh it gure mutuhnong na deiyahan er da oh it apris atnap er nahaprohmur pongopri. Got ohe mengnong amram dindeipti bap ihir amamsi hat pati kuuhan ihirmur potip ohe meng oh

²⁷Jisas oh ameng oh gipotporhan kuuhan ire tarmuriya mutuh amdapat tit kuu tit Jisas ohnong Gonong ma nasara non namdip kuu uh amamsi kuumuro pongopri.

²⁸Potporhan Jisas oh Es. Nohnong non namdip kuu uhnong dahatipri. Amamsi kuuhan ihiroh Got ohe mengnong amram dindeipti bap ihirmur pongopri. Kuuhan ihir Jisas oh wanohe na imtin han tit ha namgitinoh dahat patin potip ohe meng oh

²⁹Gahan kuuhan ihir apris tarmuriptin Jisas oh Gin mama dik ma pati kuuhan bap gur er hat son ohe danongwi hat sapti bap gurmuro. Ihtin bap gur nohnong Gin oh wanohe na imtin hatin han tit ha namgitinoh. Namgirit Moh Got orhorsiwi ihat sapat hanhe dahatper naporiptimur. Gure ma dahapti da oh noh ti na namgipramur. Nohe ma namgitipra oh Jona ohe ma hatipru ham namgitipramur.

³⁰Rih Jona ohe tei Got oh Ninipa ap mutuh ma pati kuuhan ihirnong pinggitipmur. Jona ohe tei ma pinggitipru mat orhor Hanip Brer nohe boknonghe naham gin mama dik ma pati kuuhan bap gurnonghe imat orhor namgitipramur.

³¹Noh gurnong dakuu meng am nahatporhan gur ma na dahapti oh gin mohnong dahatinmur. Rih Soromon oh mong ohe kakhan ham patesuhmur. Ihat patim dakuu mengwi am deisuhmur. Am deipatin wan mong kak hat pat kuu tit ohe dakuu meng amrapat meihdapat orhor ohe meng oh amratpora daham ohe meng amratinmat apdapmur. Oh dakuu han hat patesuh orhor gin mama dik ohe dakuunap isip hat ma pat han oh norhor pokwi mam pat ohmur. Ihtin ohoh ihan ama ihtip kuu uh kaput pepe dik ma nasatipra dik oh masasa gurnong Dakuu isipsi hat pat han moh ohe meng oh kianorim na amrashe napor inahatipramur.

³²Ninipa ap mutuh ma pateshe kuuhan ihirhe Jona ohe meng oh potporhan ihir amrama Dir er hat pati sa daham iraire er hat sapti da oh mandatpamur. Jona ohe ma potip meng oh kasip meng potip orhora; gin nohe mama naporpat mengnong moh atnap kasipnap meng naporpatmur. Ihtin ohoh ihan kaput pepe dik ma nasatipra dik oh Ninipa kuuhan ma pateshe ihir masasa gurnong Kasipnap han ohe meng moh gur de tei pateshe. Kinham pomat na amrashe napor inahatiprimur pongopri. Kin oh da mutuh ohe hasmur ritip ohe meng oh

³³Jisas oh Gur mohnong dahatinmur. Hanip gur ram oh has mara tare dusnong sariyao baket san ohsi teimdapat giadeiyao na deiptimur. Has mara hanip ihir has tei orhor ha watahat marongwe rim has mar orhe pohon saripti gwar ka orhor sariptimur.

³⁴Hanip gure da mutuh ohe has nahatporhan ma dahapti oh kin ohmur. Kin oh yah hat orhorwi has hat pathanoh da mutuh ohe dahe gonsi yah hat has hat patmur. Kin oh yah hat has hat na pathanhe da mutuh ohe dahe kwihat orhor patmur.

³⁵Ihan da mutuh ohe danong oh kwi hatiprarim has mat orhorwi paptenmur.

³⁶Has mat orhorwi papayahanoh gorhe ina oh tit pe tit na kwi hama ram has mar pitap tei ka itperhan ap gonsi has hat orhorwi ma patru has nahat orhorwi napapteprohmur pongopri. Jisas oh Parisio sawa mengnong am hat pati hano Gur hinhinsi han bap hatiprimuro potip ohe meng oh

³⁷Jisas oh ameng oh pot mandatporhan Parisi ihir tit han tit Gin go nohsi susa nohe ap oh den diper pongopri. Potporhan ohsi susa ap rosa Jisas oh bes tom na gahmar be tongnoma den dangopri.

³⁸Iham tongnom den dapatin Parisi ambur ma pisa han oh wamar Epe. Jisas oh bes tom na gahmar bisei ham den de moh kinham ihaho daham ama da darhetip oh.

³⁹Da darhetporhan Hanipyah oh Parisi ihirnong Gure mutuh oh hanip ihirnong sum ire erer oh bisei mar adaripti ohe dao ti da ti da ohe er hat son ohe dao oh gure mutuh oh teip hat patmur. Ihat teip hat patin orhor ina teimdapat preto kapo teimdapatwi gahmara mutuhdapat na hirmar ma saripti ohe tan hat pati gurmur.

⁴⁰Gur da huut pati bap gurmuro. Got oh hanip ma namanhetip oh ina tei ohe da mohwi yah hat hirmar ha paptengwe daham namanhetipda da ina mutuh ohe da ohsi tap mat yah hat hirmar ha paptengwe daham namanhetip. Basra. Ina mutuh ohe da ohsi; tei ohe da ohsi yot mat orhor hirmar yah mat orhorwi ha paptengwe daham namanhetipmur.

⁴¹Ihan gur Nuhur bisei hat pat beso preto moh gahdeiyahan ongeng deiyamur dahapri. Guragure pret tei ma it pati erer oh hatip hat pati han ihirnong apris panggeitinmur. Iham ama ohe pe oh na bisei ham ongeng tahaptimur.

⁴²Parisi gure ma ihapti ohe pe oh ruumsup oh guragure boknong hatipra ohoh ihan gur hinhinsi hat pati bap gurmuro pongopri. Gure ma ihapti oh tohan panongwi basmur. Win timbas hatinmat papti han saman ohsi dara sama katheihanoh kat oh dara Got ohnong apriptimur. Ma ihapti oh yah orhora; isip sawa mengnong asoh ma mandapti oh ermur. Gur isip sawa mengnong ma mandapti oh mamarumur. Gur hanip ihirnong yah mat papindin dao Got ohnong bopor deipti dao oh gur mandaptimur. Ohnong mandapri. Ohsi guragure erer oh dara kat oh Got ohnong ma apripti ohe da ohsi tap mar orhor paptenmur.

⁴³Parisi gur rotu ap ronmat oh hanip ihir Maihir yahnap han bap maras tongnoya ma hapat ha napotingwe rim ros yah teiwi tongnoptimur. Den tamohopti teinong saptihe ihir Nohan han yaha go patda napor yah mat orhorwi meng ha naporingwe daham sapti han bap gurmur. Parisi gure ma ihapti ohe pe oh ruumsup oh guragure boknong hatipra ohoh ihan gur hinhinsi hat pati bap gurmuro.

⁴⁴Hanip sein itpa mong oh teimdapat yah hat patin hanhan hat pati kuuhan ihir Moh yah monghe daham saya apriya haptimur. Among ohe tan hat pati han bap oh gurmur. Parisi gure ma ihapti ohe pe oh ruumsup oh guragure boknong hatipra ohoh ihan gur hinhinsi hat pati bap gurmuro.

⁴⁵Gipotporhan pohon sawa mengnong am hat pati han ihir tit han tit Tisa. Gwe mihtin meng Parisi ihirnong por dasei dei meng moh ihirnongwi na dasei deimur. Nuhurnongsi tap mat dasei naham inahapatmur pongopri.

⁴⁶Potporhan Jisas oh Pohon sawa mengnong am hat pati han bap gur kuuhan ihirnong amram na dimtin hatin ohe sawa meng oh pora ruumsup aptahaptimur. Imat ruumsup aptahat mandama panggeitinnonghe na panggeiptimur. Sawa meng am hat patim ma ihapti ohe pe oh ruumsup oh guragure boknong hatipra ohoh ihan gur hinhinsi hat pati bap gurmuro.

⁴⁷Rih gure ranir ihir Got ohe meng pot pisapti han ihirnong sushe ohe tam gip oh gur dara kwei tem gat hrepnong mat saripti pomar paptimur.

⁴⁸Rih ranir ihir Got ohe meng pot ma pisapti han ihirnong sushe ohe tam gip oh puh gur dara kwei tem gat hrepnong sara pomar ma papti oh ihirnong Sei sutpa por tam gip tang mar papti hatin hat pati bap gurmur. Parisi gure ma ihapti ohe pe oh ruumsup oh guragure boknong hatipra ohoh ihan gur hinhinsi hat pati bap gurmuro.

⁴⁹Gur ihat pati han bap ohoh ihan Got oh dakuu am hat patdapat mama meng moh ritipmur. Ma ritip oh Kaput norhe meng pot pisapti han propeto norhe mengtei darherpat hano ihir ire patinong susa meng pot pisaptin ihir kat ihirnong garmar ina ruumsup apriyao kat ihirnong suyarit hapuriyao mat pisasiprimur ritipmur.

⁵⁰Ma ritip meng oh puh gure boknongsi tap mar napor giritipmur. Ihan gin mama dik ma pati kuuhan bap gur ihtin bap hat pati ohoh ihan mong kopen ma darpa pe orhor Got ohe meng pot pisapti han ihirnong sut ma pisasheru mat orhor ginhe mama sut pisapti oh ama ohe batbet gonsi oh gur datiprimur.

⁵¹Rih kopenat ma sutpa oh Eper ohnongri sutpamur. Ohnongri supti ohe pe oh Got ohe meng pot pisapti han ihirnong sut pisashemur. Pisusa gahan Sekaraia oh Got ohe ap yawar ohsi; apop sum atendeipti kwei tan ite mutuh oh patin sutpamur. Ama ihashe ohe batbet gonsi oh gur tap mat datiprimur.

⁵²Pohon sawa mengnong am hat pati han gur Got ohnong am hatin ohe da oh gur ki ohe tan marin papti orhor guragurri am hatinmat dapum na roptimur. Kat ire ron mandap kat oh gur mandap agaheimat paptimur. Gure sawa meng am hat patin ma ihapti ohe pe oh ruumsup oh guragure boknong hatipra ohoh ihan gur hinhinsi hat pati bap gurmuro.

⁵³Jisas oh ama meng oh pot mandapat kot roporhan ama pohon sawa mengnong am hat pati hano Parisio ihir heisup mara heisup meng poripti Gin dir ohe da aban matperhan oh wan meng tit ha ritinoh. Ritporhan ama ohe pe oh dir er meng ri moho rim meng oh orhe boknong matper daham dahamtin meng oh nahsi mat orhorwi dahamat patiwi hangopari.

⁵⁴