Read Oksapmin Jon 10 Bible Online

Jon 10 - Oksapmin bible

Jon 10

¹Jisas oh Noh arpin meng napotiprohmur. Sahapti han sipsip ire pati doho oh gwatei katsimur. Ama doho gwatei katnong oh tit han tit na rosa wan kat rohanoh ama han oh gapah hapat han ohmur.

²Sipsip ma papat han orhorwi ama doho gwatei katnong oh ropatmur.

³Patem ama han orhor apriporhan doho gwatei wamat pat han oh adaputporhan oh ropatmur. Rosa orhe sipsip bap sahapatnong nitat win rim itatporhan orhe meng amram orhe duupnong apriptimur. Apriperhan orhor kot dahnong propatmur.

⁴Prosa itat pisaporhan ihir orhe meng amram orhe kom apriptimur.

⁵Wan han ihiroh itatperhan ire itayanong oh na amram ire kom na apris tandutiprohemur ringop.

⁶Jisas oh ama paham meng oh ritporhan Parisi ihir mutuh meng oh ihir hanhan ham na dahangopa. Jisas oh sahapti han ihirnong noh yah mat papat hanmur ritip ohe meng oh

⁷Parisi ihir Jisas ohe paham meng ma ri ohe mutuh mengnong oh hanhan hatperhan Jisas oh Noh arpin meng napotiprohmur. Sahapti han sipsip ire doho gwatei kat hatin hat ma pat han oh norhormur.

⁸Ohri hat ma apripti ihiroh gapah hapti han bap ihir apripti ohoh ihan sahapti han sipsip bap ihiroh ire ma itayanong oh na amraptimur.

⁹Doho gwatei kat hatin hat ma pat han oh norhormur. Hanip gur norhornong Oh pokwi dire doho gwatei ron kat hat pat han ma hapat daham ma maraya han guroh eimat paten dasi haptimur. Eimat paten dasi ham royao marayao ham den dam yah hat patimur.

¹⁰Gapah han ire ma apripti oh sahapti han ihirnong gapah hamo sumo timbas maro matinmatwi apriptimur. Nohnong oh Ihir eimat paten dasi hapti yahnap hat ha patengwe rim apdormur.

¹¹Norhor sahapat han ihirnong yah matwi papat hanmur. Yah matwi papat han ohoh ihan ihirnong er matipririm norhornong ire gwemat niyarit hapurhanoh yahmur daham yah mat papatmur.

¹²Sipsip nita han ohdapat tit han ohnong Go gin nohe sipsip moh go nasahatinmur por ohe bes teinong deihanoh ohe ma asahapat han ire danong na hama ama asahapat ohe yan datin ohe danongwi hapatmur. Ihat patin kotwa ihir sipsip ihirnong sutperim apriperhan oh ire nita han na hat pat ohoh ihan ire danong na ham kas ham mandam tandurpatmur.

¹⁴Norhor sahapat han ire nita han ohoh ihan norhor ihirnong yah mat orhor papat hanmur. Imat yah mat orhor papatim norhor ihirnong am haho ihirdapat nohnong am hayao hat patimur.

¹⁵Ma ihat pati oh Got nute nohdapat Got ohnong am haho ohdapat nohnong am haho nutanute ma ihat pati da hatin hat orhor patimur. Noh ihirnong ihat am ham papat ohoh ihan ihirnong er matipririm norhornong ire gwemat niyarit hapurhan yahmur daham yah mat orhor papatmur.

¹⁶Nohe saham papten han kat han ihirnong oh kopen ambur popris ohri ma papat han ire tapnong na mat patmur. Ire tapnong na mat pat ohoh ihan noh ambur ire tapnong matpora dahapatmur. Ire tapnong matinmat oh norhor meng potporhan norhe meng amram ihir apris ire tapnong ham tap tit bapwi hat pateprimur. Papat han nohhe tit han pokwi hat pat ohoh paptepramur.

¹⁷Norhe da orhor Noh gin ire gwemat haputpora daham haputipramur. Hapurpat norhe da orhor Noh gin it maspora daham it masapramur. Noh ihat dahat pat ohoh ihan at oh norhornong bopor nahat napapatmur.

¹⁸Hanip ihirdapat iraire da orhor nitperhan na haputipramur. Norhe da orhor Noh gin haputpora daham haputipramur. Norhe da orhor hapurpat norhe da orhor it masapora daham masapramur. Ma ihtipra oh at oh Go gorhe da orhor hapura it masonmur napor nadarhetip tei ohoh ihan noh ihtipramur pongop.

¹⁹Jisas oh ameng oh potporhan Juda ihir amrama kat han ihir Mama han oh mongsup oh ohe mutuh oh da aban mat papatin ihat mengripat han ohoh ihan nuhur ama ihat mengripat han ohe meng mohri nuhur amratiproheda. Nuhur na marasiprohemur goshangopa. Goshatperhan kat han ihir Es. Mongsup oh da aban mat papatsi han ihiroh mihtin dakuu mengwi riyao kin kwisi han ihirnong pondeiyao haptida irair gigosham yot da hangopa. Juda ihir Jisas ohnong na dahat patin oh Noh Gotmur potip ohe meng oh

²²Gahan rih Got ohe ap yawar ma er hatporhan it hatpa ohe dik oh hatporhan Jerusarem aptei oh tarmur den diperim ama ihtipa oh.

²³Ihtiperhan mong er hah teio rim Jisas oh Got ohe ap yawar ohe kepu dahnong oh Soromon poripti kepu dahnong oh ros sangop.

²⁴Saporhan Juda ihir ohnong huupmara Nuhur mama yot da hat pati oh go desut pomat am nahatipra. Go arpin Got ohe darhetipra ma ritip han ohhanoh go desut Noh arpin ama nadarhetipra ma ritip han oh nohmur napor am nahatipra por dahandeingopa.

²⁵Dahamtiperhan oh Noh napotir orhor gur na amratirimur. Nohe at ohe mengtei hanip dire na imtin hatin da ma ihpatgwer oh gur Oh ama han orhor ma hapat ha dahatingwe rim noh gure kintei ma ihpatgwer ohmur.

²⁶Ha dahatingwe rim ihpat orhor gur nohe sahapti han hatin hat na pati ohoh ihan guroh Ama han oh gin apris mama pat ma hapat na dahaptimur.

²⁷Noh norhe sahapat han ihirnong norhor am hat patmur. Am hat pat ohoh ihan norhor itatporhan ihir namrama norhe kom apriptimur.

²⁸Nohe kom apriperhan noh eimat paten da oh apripatmur. Ma apripat ohe da oh na timbas ham eimat eimatnap ma patepra da oh apripatmur. Norhe bes teinongwi mat papat ohoh ihan hanip ihirdapat norhe bes teinong mat papat ihirnong ambur wan teinong matin hatinda. Na imtin hatin hat patimur.

²⁹At kasipnap erer orhe hrepnongwi mat papat han orhordapat ihirnong norhe bes teinong nadeipat ohoh ihan hanip ihirdapat at orhe hrepnong mar orhe bes teinong papat ihirnong ambura wan teinong na matin hatin hat patimur.

³⁰Nohsi; at ohsi nutanut tit pokwi hat patimur pongop.

³¹Potporhan ihir Epe. Oh Got hatin hat patim ihat mengri moho daham kwei dara ohnong sutperim ihangopa.

³²Ihtiperhan Jisas oh Noh At orhe yah mat ma indeipat da oh gurnong namgipatin gur wanaham orhor nohnong nitperim ma ihya oh dehnong wamar Mama da moh er hah ma hapat daham nitper ihya pongop.

³³Potporhan ihir Nuhur gwe yah ma ihpatgwernong oh daham na ihyamur. Go hanip orhor Noh Gotmur rim Got ohnong ma dasei dei oh daham kweisi nitperim ihyamur pongopa.

³⁴Potperhan oh Wa. Ranir ihirnong por ma brak matpa meng oh gur hanhan hat patida. Got ohdapat hanip ihirnong Gur got hat pati han bapmur potporhan brak matpamur.

³⁵Mama brak matpa mengnong hanip dir amkar mandatin hatinda. Hanip dirnong Gur got hat pati bap gurmur ma napotip mengnong oh hanip dir gin amkar na mandatin meng ohoh ihan Got oh Moh norhe gon brermur napor ma nadarhetip brer noh Noh Got ohe brermur ritporhan gur kianorim Go Got ohnong dasei deipatmur naporiya.

³⁷Noh At ohe ma ihpat da oh na hapat ohe pe oh gur na amraptineng oh yahwa.

³⁸Noh At ohe ihpat danong oh ihpat ohoh ihan gur norhe mengnong Nuhur na amratper dahayahanoh norhe mama ihpatnong moh wamar Epe. Oh itap orhorsi patin ihpat ma hapat. Itap oh mon orhorsi patin ihpat ma hapat daham am hatinmur pongop.

³⁹Potporhan ihir ohnong net por marinperim ihya orhor ohe imtin dik oh kopen na apin patin ohoh bes tarpir sangop.

⁴⁰Saporhan nuhur ohsi it Jodan dahnong susa han tannong deihpa. Desa Jon ohe kopenat tom ma patitip tei oh kotpa. Koripti atei inpa.

⁴¹Patin kuuhan kat ruumsan tit Jisas ohe patnong apinipti. Aprisa iraire da oh Jon oh hanip dire na imtin hatin da na indeisuh orhor mengnong oh Ihtin han tit ihat apripramura; ihat apripramur ma risuh meng oh gin gonsi mama han ohe bok oh arpin tarpapatmur ponipti.

⁴²Poriptindapat kuuhan ruumsan ihir Oh arpin Got ohe brer ohoh ihan ohwi inahatin hatin han ma hapat dahangopa.