Read Oksapmin Jon 11 Bible Online

Jon 11 - Oksapmin bible

Jon 11

¹Gahan kat han ihir Jisas ohnong Rasaras oh sik hat patmur pongopa. Ama han orhe kor taptem uh Maria uhmur. Maria uh gapgwesi tom san oh dukera Hanipyah ohe tongnong amora urhe kak batsi ma ahirmatir kuu uhmur. Uhe arwap uh Mata uhmur. Nanip oh Rasaras ohmur. Ama ihir Betani aptei ihirmur.

³Gahan Nanip Rasaras oh sik hatporhan kor yot ihit Hanipyah ohnong gur sus potinmur. Orhe yah han Rasaras ohhe sik hat patmur potinmur por darheriya hangopa.

⁴Darheriyahan Jisas ohnong potperhan oh amrama am hapat Ama ohe sik moh na haputin ohe sikmur. Ama sik oh Got ohe brer noh yah matporhan nohnong armi nahayao Got ohnong armi deiyao matin ohe sik oh imat patmur ringop.

⁵Ripat oh Mariao Matao ihir tambenirnong bopor mat papat orhor sik hat pat meng oh am hama oh kapkap na sangop. Yot dah atei orhor angop.

⁶

⁷Patema gahan orhorsi pati han nuhurnong Gin dir it Judia mongnong sapera napongop.

⁸Napotporhan nuhur Tisa. Ama Juda ihir kopenpok ma kweisi gonong nitperim ihangweri oh ginhe it amongnong sapero ripatda potpa.

⁹Potperhan oh Ei. Noh mong da orhor at ohe atamreindin oh atamreindin hat patmur. Mong da hat patin ma tamrein sapti oh na tapam yah hatwi atamrein saptimur.

¹⁰Patem mong kwitem hatporhan hanip dir tamrein sayahanoh na wataham tamrein saptin tapaptimur. Gin noh mama pat moh mong da hat patmur. Mong da tei pat ohoh ihan yah hat orhor saprohemur napongop.

¹¹Naporpat Rasaras oh haput pato rim nuhurnong Dire yah han Rasaras oh timon patmur. Ihan noh sus pamsapramur napotporhan nuhur timon pat meng naporkin daham ohnong Hanipyaha. Oh timon pat oh yah hatipramur potpa.

¹³

¹⁴Potperhan Ihir ihat dahat patio rim Es. Rasaras oh haputporhan sein it patimur.

¹⁵Noh na pim patin ma haputir oh yahwa. Gin diradir susa noh ohnong da tit matporhan gur wanahama nohnong Oh arpin imtin hatin hanhe daham am hatiprimur. Gin dir sein itiri teinong sapera napongop.

¹⁶Napotporhan tit han Tomas ohe win tit Ditimas oh Jisas oh apteinong saporhan ihir sutiprikin. Sutperhan haputiprakin daham Ihan dirhe ohsi susa diradirnong tap mat ohsi ha nitingwe. Niyarit diradir tap hat haputper napongop. Jisas oh haputpa han ihir it ma masapti ohe duuptei oh norhorwimur ritip meng oh

¹⁷Napora nuhur pipa. Susa koriyaoh Rasaras ohe sein oh iraire pohon kwei tem saripti teinong sara hathat timbas dah timda hangop.

¹⁸Jerusarem ap mutuh ma Juda bap pati ihirhe Betani aptei kakduup ohoh ihan ama Jerusarem ap mutuh pati ihirhe trun han ihir aprisa Matasi Maria ihitnong da yah maro sein aptei paptingopa.

¹⁹

²⁰Paptihan Mata uhnong Jisas oh apirhe potperhan Maria uh ap oh patina Mata uh mandap ambur apingop.

²¹Aprisa Jisas ohnong Hanipyaha. Go matei patinneng nohe nanip oh na haputirnengmur.

²²Ginhe go Got ohnong tit da tit matinmur porhanhe oh arpin amram gorhe ma por meng orhor matiprohmur pongop.

²³Potporhan Jisas oh Gwe nanin oh it da apris masapramur pongop.

²⁴Potporhan uh Noh am hat patmur. Mong pepe dik oh hanip gonsi it da apris masapri ohoh ihan oh it masapramur dahapatmur pongop.

²⁵Potporhan Jisas oh It da apris masapti ohe duuptei oh norhe bokdapatwi hat patmur. Eimat paten da ohe duupteihe norhorwimur. Noh ihat pat han ohoh ihan norhornong Ohwi inahatin hatin hanwa ma dahaya guroh haputinnong ina teimdapat hapuripri orhor danong oh na hapur dipwi pateprimur.

²⁶Gur matei da patin orhor nohe danongwi hat ma pati guroh haputinnong na hapura eimat patiru hat orhor pateprimur. Gin go nohe ma napor mengnong moh Arpin meng napor ma hapat dahat patda pongop. Jisas oh kuuhan ihirsi tap hat ma yimtip ohe meng oh

²⁷Jisas oh potporhan Mata uh Hanipyaha. Dawa. Noh gonong Go Got oh ihirnong ambutin han kakdah darhetipramur rim ma kis nahat napapatdapat nadarhetir han oh gomur dahat patmur pongop.

²⁸Pora Jisas oh apteinong na pim patin ap borpe Mata uhe sus ma por tei orhor patina uh it arwap uhe patnong susa uhnong Tisa oh apris Go ha aprinoh ripathe. Ihan go ahar aprinmur ama potip oh. Potporhan uh amrama kapkap tandeima Jisas ohe pat apingopa.

³⁰

³¹Apriperhan ama Juda ihir apris uhnong da yah mar papti han ihir uh kapkap tandeim saporhan wamara Uh hanip sein itiri teinong sus payimatporim ro ma hapat daham kom ama ruhpa oh.

³²Maria uh Jisas ohe pat aprisa Jisas ohe tong duup bos hamnong ham timama ohnong Hanipyaha. Go matei patinneng nohe nanip moh na haputirnengmur yimat tit pongop.

³³Yimat tit potporhan Jisas oh uhe ma yimao Juda ire kom apris ma yimayao oh wamara ohhe yimtin ina hangop.

³⁴Yimtin ina hapat ihirnong Gur sein oh de tei itiri pongop. Potporhan ihir gohe sus wamtin pongopa.

³⁵Potperhan oh yimangop.

³⁶Yimtiporhan ihir Epe. Han moh wamtin. Orhe bopor mar da apin pat han oh haputiro rim mama yima ohmur ringopa.

³⁷Ripti kat han ihir Mama han moh kin kwisi han ihirnong yah deipat ohoh ihan han moh kopen na haput patin rih orhor oh apris patinneng hanip moh yah matporhan na haputirnengmur ringopa. Jisas oh Rasaras ohnong pamsuhup ohe meng oh

³⁸Ritperhan Jisas oh ire ina ruum dariya ina ruum hatin orhor ohhe ina ruum daringop. Ihtin ina ruum ohhe darpat susa sein ma itiri tei oh kotpa. Koriyaoh kwei tem ohon sein sara teimdapat kwei tansi apatiri hangop.

³⁹Apatirihan Jisas oh Gur kwei tan moh dapus potinmur pongop. Potporhan Mata uh Wa. Hanipyaha. Rasaras oh hapur sus hathat timbas dah timda tei moh gwesi nahatiproh basda pongop.

⁴⁰Potporhan Jisas oh Noh ma go nohnong Ohwi inahatin hatin hanwa dahahhan go Got ohe kasip yah danong wamar am hatiprohmur ma ginaporhe oh gin go na daham ginaporpatda pongop.

⁴¹Potporhan ihir kwei tan oh dapus pongopa. Dapus potperhan oh aw teinong watahama itap ohnong Ata. Nohe ma napotiproh meng oh gorhor amram inahatiproho rim noh gonong weso napormur.

⁴²Go nohe meng oh dipwi amrapatmur dahapat orhor mama ihir Han moh Got orhe darhetip han ma hapat ha dahatingwe rim mameng moh napormur pongop.

⁴³Porpat kasip mengtei orhor Rasaras go masasa kot teinong moh marona pongop.

⁴⁴Potporhan Rasaras oh arpin haputir tei orhor it masasa marangop. Maraoh beso buho oh nang atpayao rumkin watahsi giandeiyao matirisi orhor marangop. Marporhan Jisas oh Gin gur ohnong arpit mandayarit ha sonoh potporhan ihir arpit amdatperhan oh yah hat orhor sangop. Sawa poripti ire duuptei han Parisio ihir Jisas ohnong sutin ohe meng oh wanin matpa ohe meng oh

⁴⁵Jisas oh imat Rasaras ohnong pamsaporhan Maria uhsi ma apriya Juda han dam ihir wamara Epe. Ohwi inahatin hatin han ma hapat ama dahatpa oh.

⁴⁶Dahapti gahan kat han ihir Parisi ire patinong susa ihirnong Jisas ohe imat hanip ma pamsa ohe meng oh ama potpa oh.

⁴⁷Potperhan Got ohe ap yawar hanat bok han ire duuptei hano Parisio ihir Kaunsir ihirhe tap tei ha hatingwe ama potpa oh. Potperhan kaunsir ihir apris tap tei hatperhan ihir Mama han moh Ihir oh ama hanhe ha dahatingwe rim hanip dire na imtin hatin han mama pinggim indeipat moh ihir wamara gonsi ohe danongwi hatiprio. Ihir gonsi ohe danong hatperhan Rom ihir aprisa dire Got ohe ap yawar apnong naer deiyao tap mong ma pati bap dirnong er nahayao nahatiprio. Ihan dir kinmatper ama goshatpa oh.

⁴⁸

⁴⁹Goshapti irair tit han Kaiapas Got ohe ap yawar hanat bok han ire duupteinap han oh tandeima Jisas ohnong sutperhan yah hat pateprio rim Gur da timbas hat patim giporiptida.

⁵⁰Tap han diradir gon hapuriyahan ermur. Diradir gon haputipririm dire gwemat tit han oh pokwi ma haputipra oh yahmur. Gur na dahat patida ama gipotip oh.

⁵¹Ohe ma gipotip oh orhe da oh na gipotipmur. Oh Got ohe ap yawar hanat bok han ire duupteinap han hat patin Got oh ameng oh am matporhan oh Jisas ohe Juda bap ire gwemat ma haputipra ohe meng oh potipmur.

⁵²Juda bap ire gwemat haputipramur ma potip meng oh Juda ire gwematwi na gipotipmur. Got ohe han gonsi among among ma oktahat pati bap ihirnong oh tit hanwi matinmat haputipramur rim gipotipmur.

⁵³Gahan ihir sutin ohe meng oh ama wanin deishe oh.

⁵⁴Ihir ohe sutin meng oh wanin mat pisapti tei ohoh ihan Jisaso nuhur Juda ire kintei katnong na ham aharwi sashemur. Ahar susa gahan orhe han nuhursi among oh mandama irat timbas hanip timbas mong mutuh ohe kakduup oh pipa. Susa ap mutuh Iprem ap mutuh oh kora atei inpa.

⁵⁵Gahan Pasopa dik rih Isip ire hrepdapat hat patim Got oh pisusa iraire mong Kenannong pihip ohe dik oh Pasopa diko rim kakduup hata tei Juda trun han ihir aptei aptei amdapat Gin Pasopa dik na bisei hapti dik kakduup hahmur. Gin dir diradire ina boknong ongeng matpero rim Jerusarem ap mutuhnong ama apdapa oh.

⁵⁶Aprisa Got ohe ap yawar oh rosa Jisas oh patdo rim ama angmatpa oh. Angmar ti na pathan Gin oh na apriprohkin gur kiano dahaya. Got ohe ap yawar ohe hanat bok han ire duuptei hano Parisio ihir be han ihirnong gur Jisas ohnong wandeiyahanoh nuhurnong namgitinmur. Namgiyarit nuhur karapus matiprohemur. Parisi ire ma giritiri meng oh amram na apirkin dahayamur ama gigoshatpa oh.

⁵⁷