Read Oksapmin Jon 16 Bible Online

Jon 16 - Oksapmin bible

Jon 16

¹Naporpat Gur Got ohe danong hat pati da oh mandapririm gurnong ihat ma patepri ohe meng oh mama gurnong napor am nahah ohmur.

²Gurnong ma inahapri oh duuptei han ihir Gurnong Gur rotu ap moh na rosiprimur napor baso naporiprimur. Napora Nuhur maihirnong suyarit hapuriyahan Got oh nuhurnong Gur yah hayamur napotiprakin daham niprimur.

³Ihir at nuhutnong hanhan hat pati ohoh inahaprimur.

⁴Ma inahaya tei oh gur Ohe ma napongop oh gin arpin mama inahaya ma hapat gur ha dahengwe rim mameng moh naporpatmur. Noh rih oh gursi tap hat patim ohoh ihan gurnong mihtin meng moh na naporisuhmur. Gin noh son tei ohoh gurnong mameng moh naporpatmur napongop. Jisas oh Yahsup oh apris gurnong mimat napaptepramur potip ohe meng oh

⁵Naporpat Jisas oh Gin oh noh nadarhetip han orhe pat son oh kakduup hah sa dahama noh mameng moh naporpatmur. Mameng moh napotporhan gur Oh ha namdam saprao daham da trun er hapti orhor dahanahatinnong oh Go denong sapra napor na dahanahaptimur.

⁷Gur da trun er hapri. Noh aprin meng napotiprohmur. Napanggeit napapten Yahsup oh apris ha napanggeitinoh rim noh sapramur. Noh na ushanoh napanggeit napapten Yahsup oh na apripramur. Noh ushanoh ama Yahsup ohnong darhetporhan oh aprisa gurnong napanggeit napaptepramur.

⁸Yahsup oh napanggeit napapatim oh kakdah han ihirnong ire er hapti da atirip haho yah hapti da pinggio Got oh bopor heisup mat papatda pinggio hapramur.

⁹Ire er hapti da ma atirip hapra oh Ihir ohnong ohwi inahatin hatin hanhe ma na dahapti ohe pe oh iraire er hat sapti da oh pitap teinong mar atirip hapramur.

¹⁰Yah hapti da ma pinggipra oh noh at ohe patnong saporhan Yahsup oh nohnong Oh yahnap hat pat han ma hapat ha dahatingwe rim pinggipramur.

¹¹Hanip ihirnong dahamar Got ohe heisup mat papat da ma pinggipra oh kakdah mama ohe er nahatin duuptei han ohnong Got oh Moh er han hat patmur por bopor heisup isip mat papat ohoh ihan orhe bopor heisup mat papat da oh pinggipramur.

¹²Noh gurnong am nahatin meng oh trun pat orhor trun meng naporpatin da ban tahapririm noh gurnong mameng mohwi napotiprohmur.

¹³Kwitnong oh arpin mengnong isip mat papten ohe Yahsup oh aprisa arpin meng gonsi oh am naham dason nahapramur. Imat meng ma naporipra oh orhe da meng oh na naporipramura; orhe amrapat mengwi naporipramur. Naporpat ihtin han tit apripramura; Ihtin han tit apripramura napor am nahapramur.

¹⁴Gurnong imat napor ma am nahapra oh nohdapat Yahsup ohnong meng potporhan oh aprisa gurnong norhe meng wanin oh napor am nahapramur. Ma ihapra oh nohnong winsi naham ihapramur.

¹⁵At ohe erer oh norhe gonsi ohoh ihan nohdapat ohnong potporhan oh arpin aprisa gurnong meng oh am nahapramur napongop. Jisas oh Noh saporhan gur yimtipri orhor komdapat amamsi da datiprimur potip ohe meng oh

¹⁶Naporpat Jisas oh Gur kakun gar tit wanahaptimur. Wanahapti komdapat gar tit na wanahaprimur. Gar tit na wanahat patem it wanahatiprimur napongop.

¹⁷Napotporhan orhe namgit napisapat han kat han nuhur Oh Noh at ohe patnong sapramur. Ihan gur kakun gar tit wanahaptimur. Wanahapti komdapat gar tit na wanahatiprimur. Gar tit na wanahat patema it wanahatiprimur ma napor moh kian meng naporo gosham nuhur apetpa.

¹⁸Gosham aperipti gar tit na wanahatiprimur ma napor moh kian meng sa napor. Dire hanhan hat pati meng napor moho goshatpa.

¹⁹Gigoshatperhan oh nure dahamtin da oh am hapat nuhurnong Gur kakun gar tit wanahaptimur. Wanahapti komdapat gar tit na wanahatiprimur. Gar tit na wanahat patem it wanahatiprimur ma napor moh kian meng sa napor goshaptikino

²⁰napora nuhurnong Gur arpin nohnong napayimaprimur. Napayimaptin kakdah morhe danong hat pati han bap ihir Sei suya napor amam hatiprimur. Gur nohnong napayimatin da hatipri orhor komdapat it yah dasi hatiprimur.

²¹It yah dasi ma hatipri oh mamarumur. Kuu ihir brer itinmat ake ni ma hapat daham da er haptimur. Da er hapti brer sariptimur. Sara it ake su danong na hama nohe brer yah sar moh daham amam haptimur.

²²Amaru hat gur gin kakun ama ihtin er dasi haptimur. Kwit it ma wanahatipri oh amam dasi hatiprimur. Amam dasi hatperhan ama amam danong timbas matin han oh timbasnapmur.

²³Gur wanaham ma amam hatipri oh nohnong Go inahatina napor na dahanahaprimur. At ohnongwi por dahandeiprimur. Ma dahandeipri oh norhe mengteiwi dahandeiyahanoh oh Jisas orhe mengtei nohnong napor dahanahaya ma hapat daham ama dahandeiya da orhor inahapramur.

²⁴Rih gur nohe mengtei Got ohnong na dahandeiptimur. Gin oh nohe mengtei dahandeinmur. Dahamar ama dahandeiya oh dariprimur. Daripti gure ama dariya ohe amam oh isipnap tit hat pateprimur napongop. Jisas oh Noh erer oh norhe hrepnongwi mat papatmur potip ohe meng oh

²⁵Naporpat Jisas oh Gin oh noh meng moh paham mat naporpatmur. Kaput oh paham mat na napora at ohe ihat pat meng At oh ihat pat hanmura; ihat pat hanmura napor pitap tei meng orhor naporipramur.

²⁶Napotporhan gur nohe mengtei at ohnong dahandeiprimur. Dahamtiperhan noh at ohnong Gin at go ire ma dahanahaya meng oh go imtinmura; imtinmura na poripramur.

²⁷Orhorwi gurnong Ihir nohe mon ohnong Itap ohe patdapat apdap ma hapat daham ohe danong ham bopor mat papti ohoh ihan nohhe ihirnong bopor mar ire danong ham indeipramur daham gure danong ham bopor naham inahapramur.

²⁸Noh rih at ohe pat teimdapat kakdah wanhupmur. Gin it at ohe pat son hahmur. Son hah ohoh ihan kakdah moh mandama at pat sapramur napongop.

²⁹Napotporhan nuhur Epe. Gin go paham mat na napormur. Gin pitap tei mengwi napormur.

³⁰Nuhur kopen na dahanahat patin orhor gomdapat daham naporpat han ohoh ihan nuhur Oh erer da gonsi oh am hat pat ma hapat. Oh arpin Got orhe patdapat apdap han ma hapat dahayamur potpa.

³¹Potperhan oh Gur rih nohnong Oh arpin ihtin hanhe na dahat patimur. Gin oh gur Oh ihtin han ma hapat ma dahaya oh yahmuro.

³²Gurnong oknahatperhan gur nohnong namdam it guragure nitat aptei kukutiprohemur. Kukutperhan noh norhap pat hatiprohmur. Namdatiprohe orhora; norhap na pat hatiprohmur at ohsi pat hatiprohmur.

³³Kakdah moh gur ruumsupsi hapti orhor noh kakdah mohe erer oh nohe hrepnong mar ambapte mat papatmur. Ambapte mat papat ohoh ihan gur Oh erer moh orhe hrepnongwi mat papat ma hapat daham manap da tei hat orhorwi da yah hat patenmur. Gur Nuhur Jisas orhe tapnong hat pati moh yah hat patiwa daham gur da yah hat ha patengwe rim noh mameng moh napormur napongop.