Read Oksapmin Jon 19 Bible Online

Jon 19 - Oksapmin bible

Jon 19

¹Ihir Jisas ohnong mandatipra. Sutinmur potperhan Pairat oh orhe han ihirnong Jisas ohnong ambur pisus kawsi sutinmur ama potip oh. Potporhan ihir ambur pisus kawsi ama sutpa oh.

²Kawsi suma dupsi ami bap ihir watiap nang hatin gah dapsi han oh dara kimin daken hatin mara hanipyah kamoheim hat pati han ire kakung aripti ohe tan mara ohe kak tei ama anpa oh. Aripti kamoheim ire aripti hatin heimsi watah oh dara Jisas ohnong dasei mar ama anpa oh.

³Aripti ohe duupnong susa Nohan Juda ire duuptei kamoheima por rumkin dusnong moh tingtung por sut ama pihipa oh.

⁴Sutperhan Pairat oh it kot marasa Ama han oh ohe boknong matin meng oh timbasmur. Gin gur Arpin ohe boknong matin meng oh timbas ma hapat ha dahatingwe rim noh gure patinong pamramur. Gin gur ohnong wamtinmur pongop.

⁵Potporhan ihir wandeiyaoh watiap nang kimin daken hatin mar ohe kak tei ma asariya ohsi; heimsi watah ma ariya ohsi marangop. Maraporhan Pairat oh Gin mama han ohnong gur wamtin pongop.

⁶Potporhan Got ohe ap yawar hanat bok han ire duuptei hano ire dupsi hano ihir wamara ator mengtei orhor Ei. Irat bok sur garmar sutina. Irat bok sur garmar sutina poriptiwi deingopa. Matperhan Pairat oh Noh ohe boknong mar irat bok sur garmar sutin meng oh ti na pat orhor guragurdapat ohnong sutper riyaoh sutina pongop.

⁷Potporhan ihir Es. Nure sawa meng oh hanip irair orhor Noh Got ohe brermur ma riya ihirnong oh suyarit ha haputinohmur riptimur. Ihan mama han moh Noh Got ohe brermur ripat ohoh ihan suyarit ha haputinoh pongopa.

⁸Potperhan Pairat oh Jisas ohe Noh Got ohe brermur ma ripat meng oh amrama kas yahnap tit hangop.

⁹Ihama Jisas ohsi it ap rongopa. Ap rosa Jisas ohnong Go de hana por ama dahamtip oh. Dahamtiporhan Jisas oh it meng diteim na pora ama kimirit mandatip oh.

¹⁰Kimirit mandatporhan Pairat oh Go nohe kasip hat ma patnong moh hanhan hat patim nohnong go it meng na naporda. Nohe mengtei Gin mandatina porhanoh namdatiprohemur. Gin irat bok sur garmar sutina porhanoh arpin inahatiprohemur. Go hanhanda ama potip oh.

¹¹Potporhan Jisas oh Gwe ma nohnong inahah moh gorhe kasip ohsi nohnong na inahahmur. Got oh gonong Gin go ihtina napotporhan inahahmur. Ihtin ohoh ihan gwe nohnong ma inahah moh garpok er da ham inahahmur. Got ohe ap yawar hanat bok han ire duupteinap han ohe gwe bes teinong nohnong ma nahat oh heisup naham inahat ohoh ihan ohe ma inahat oh isipnap er hatmur ama potip oh.

¹²Potporhan Pairat oh arpit mandatin danongwi hat ama indip oh. Oh ihat mandatpora ma dahapat danong oh Juda ihir am hapti ohnong Mama han oh Noh duuptei kamoheimmur ma ri moh Rom ire duuptei kamoheim Sisa ohnong amkar ohnong duuptei han hatporim girimur. Ihan go mama mihat mengir han ohnong arpit mandahanoh go Sisa ohe yah han basmur por kas meng deingopa.

¹³Kas meng matperhan Pairat oh meng oh Jisas ohe boknong matinmat Jisas ohsi pamrasa dahamar sapat han ohe tongnopat tei oh tongnongop. Ama tongnopti tei ohe itpa tei oh Hibru ire mengtei Gabata poriptimur. Dire mengtei kwei it pihipa tano poriptimur. Ama ap tan tei tongnongop.

¹⁴Pasopa dik oh kimsi hatipri ma hapat daham erer mamen deipti dik oh mongsut orhor tongnongop. Tongnoma ama Juda ihirnong oh Gure duuptei kamoheim oh mama pat ohmur. Wamtin pongop.

¹⁵Potperhan ihir Baes. Er oh pisona. Pisus irat bok sur garmar ha sutingwe ator mengtei pongopa. Potperhan Pairat oh Gure duuptei kamoheim oh irat bok sur garmar ha sutingweda potporhan Got ohe ap yawar hanat bok han ire duuptei han ihir Es. Nure duuptei kamoheim oh tit hanwi. Sisa ohwimur pongopa.

¹⁶Imat poriptin Pairat oh Ihan gin irat bok sur garmar ha sutingwe rim guragure bes teinong nahahmur por ire bes teinong ama matip oh. Jisas ohnong irat boknong sur garmatpa ohe meng oh

¹⁷Pairat oh ire bes teinong matporhan ihir ama ambur pihipa oh. Ambur pisaptin Jisas orhor ohe sutin irat bok oh marim ap mutuh oh mandama Hanip kak monga ma poripti mongnong ama pihipa oh. Hanip kak monga ma poripti mong oh Hibru ire mengtei Gorgota ma poripti mongnong pisongopa.

¹⁸Pisusa atei oh Jisas ohnong irat bok sur garmara daptuhur gonongopa. Gonopti yot han ihitnong irat boknong sur garmara Jisas oh mutuh oh patina tit han oh oper tannong deiya; tit han oh watah tannong deiya mar gonongopa.

¹⁹Imtiperhan Pairat oh irat barak tan tit dara Moh Jisas Nasaret ihirmur. Juda ire duuptei kamoheim ohmur rim Hibru ire mengteio Rom ire mengteio Grik ire mengteio oh ama barak tan tei brak deingop. Brak mara ama irat brak dei tan oh dara Jisas orhe irat bok sur gardeiya kakwit andeh brak mat saringop. Itporhan ap mutuh oh kakduup ohoh ihan ama Juda ruumsan han ihir apris brak oh sangopa.

²⁰

²¹Saptin Got ohe ap yawar hanat bok han ire duuptei han ihir Pairat ohnong Go Oh Juda ire duuptei kamoheimmur por brak matipra. Oh orhe da orhor Noh Juda ire duuptei kamoheimmur rit sapat hanmur por brak matinmur pongopa.

²²Potperhan Pairat oh Norhe ma brak dei meng orhor patru mandamur pongop.

²³Potporhan ami ihir Jisas ohnong irat bok sur garmat mandapti Jisas ohe an pat watah pan oh ama yotayota han ihir nitat gosham adaringopa. Adaripti tei ohe watah oh na dip mar titwi tap mat hatpa tan oh dara tap mat hatpa tan moh na bopok goshatiprohemur. Ihan dir nih datiproho rim satunong kis tahatper gosham satu hangopa. Satu hapti tit han ohe brak hatporhan ama han oh adaringop. Ama imtipa oh rih Propet ireOrhe an pat watah pan oh nitat gosham datiprimur. Dara tit satu ham datiprimur rim ma brak matpa meng oh arpin dam tarpatipmur.

²⁴

²⁵Imtiperhan Jisas orhe sup uho sup nap uho Kropas inap Maria uho Makdara ihir Maria uho ihir Jisas ohe irat bok sur gardeiya duup oh tandeit patin

²⁶Jisas oh supnong wamaro orhe boporsi han nohnong wanahamo hapat sup uhnong Norhe bopor nahat napapat kuua. Jon moh gorhe brermur pora nohnong Moh gorhe suamur napongop. Napotporhan noh ama dik oh uhnong ambur pisusa nohe ap oh uhnong papindin danong ham paptesuhmur. Jisas ohe haputip ohe meng oh

²⁷

²⁸Gahan Jisas oh Norhe ihat tamrein ma sapat oh gin gonsi mamen mar timbas deimur dahapat gin noh tom dinsi hahmur ringop. Noh tom dinsi hahmur ma ritip oh rih orhe boknong mar ma brak matpa meng oh dam ha tarpatinoh rim giritipmur.

²⁹Ritporhan wain ator gap tom san oh pathan ihir dara tom gap timbas han tit dara ohe bok oh wain tom gap mara pandipero rim wain ator gap tom dahnong mara tom gapsi hatporhan bur bok tei karmara Jisas ohnong Gin gwe ma batbet hah oh ha pang hatinoh rim Moh dinmur por ohe atem teinong asaringopa.

³⁰Atperhan Jisas oh ama ator gap oh bit mar dama Gin nohe ma ihpat oh mamen mar timbas deimur rim kak gateng rim da maras sangop. Jisas ohnong atoheitem ma tong potpa ohe meng oh

³¹Jisas oh haputporhan ama Juda ihir Kimsi Pasopa dik ohsi; tuperipti dik ohsi tap hat patepri ohe mamen tahatin dik oh gin hah ma hapat. Ihan hanip sein oh irat bok sur gartahat patin ermur. Kimsi tuperipti dik pateprisi ohoh rim Pairat ohnong Gorhe han ihirnong potinmur. Kimsi Juda maihir tupetin dik patepri ohoh ihan gin orhor hanip sein oh da napnep patihanoh mun tam ahendeiyarit hapuriyarit sein itinmur potinmur ama potpa oh.

³²Potperhan dupsi han ami ihir aprisa Jisas ohe tansi tansi ma sur garmata han yot ihitnong mun tam ahemara Jisas ohnong wandeiyaoh hapur hangop. Hapurhan mandangopa.

³³

³⁴Mandapti ama ami ihir tit han oh ban isip bes tei tahe poripti han ohsi Jisas ohe atoheitemnong moh tong pongop. Tong potporhan kapkap heimsi; tomsi tap hat marangop.

³⁵Ohe ma ihtip meng oh mama brak matip han norhor wamat patin imtiperhan wamat indip han norhor mama brak dei ohmur. Norhor wamat patim imtipa ohoh ihan noh arpin meng rim brak deimur. Arpin meng mama brak dei moh gur Orhor ihtin hanhe ha dahatingwe rim brak deimur.

³⁶Jisas ohe mun tam ma na ahemtipa oh rih ma brak matpa meng oh Orhe tam oh na ahemtiprimur rim ma brak matpa meng oh arpin tarpatipmur. Amaru tit meng ma dam tarpatip oh Ihir tit han tit ohnong atoheitem moh tong potpa han ohnong wamtiprimur rim ma brak matpa meng oh arpin tarpatipmur. Jisas ohe sein oh kwei tem itpa ohe meng oh

³⁷

³⁸Gahan Arimatia ihir Josep oh Jisas orhe danong hasuh orhor Juda ihirnong kas ham ama danong reman patesuh han Josep oh susa Pairat ohnong Noh gin Jisas ohe sein oh dara itiprohmur ama potip oh. Potporhan Pairat oh Mai. Go dar itina potporhan oh arpin sein datporim apingop.

³⁹Apripatin rih kwitem dus Jisas ohe pat apdap han Nikodemas oh harheir gwe hatin gapgwesi han oh ruumsan mohoma Josep ihit apingopa.

⁴⁰Aprisa ihit sein oh arpit pukdasa Juda ire pohon hanip sein ma gapgwesi mar watah tansi ban mat sariptiru mat ban deingopa.

⁴¹Ban deipti kimsi tuperipti dik patepri ma hapat ihan gin orhor mamen taham sein itpero rim kakduup rang tei moh kopen hanip sein na it pati kwei tem moh itiprohemur rim sein oh pisusa atem oh saringopa.

⁴²