Read Oksapmin Jon 21 Bible Online

Jon 21 - Oksapmin bible

Jon 21

¹Gahan Jisas oh it masasa orhe han nure kintei bimrip oh ama pitap hatip oh. Ama pitap hatip oh Saimon Pitao Tomas tit win Ditimaso mong Gariri Kena aptei han ihir Nataniero Sebedi ohe mon yoto yot han nuhuto nuhur tom hru Taibirias ohe kakduup oh inpa.

³Patim Saimon Pita oh Gin noh kwihan bot dah rusa aning mim sapatmur ririt nuhur aning ung tom dahnong mat sayaoh aning oh ung ti na tamima onham pipa.

⁴Ihat saptin mong da hatin hangop. Mong da hatin hapatin Jisas oh tom dinin hir amdapat Nohanhera. Gur aninghe ti ung tamiheda napor unangop. Unatporhan nuhur Jisas ohnong hanhan mara Nuhur aning ti ung na tamihemuro por uatpa.

⁶Por uatperhanoh oh Ihan gur bes oper tandapat ohe tom dahnong oh panditinmuro. Pandiriyahan aning oh ung tamitiprohemuro napot unangop. Napot unatporhan nuhur ung oh arpin adahnong apanditpa. Apanditperhan aning ruumsan ung tamingopa. Tamitperhan nuhur ruum moh kinmat pramtin hatpa.

⁷Kinmat pramtin ham bundeiptin orhe bopor nahat napapat han noh Pita ohnong Epe. Moh dire Hanipyah oh ma hapat potporhan Pita oh tei ohe watah ma daphot sar oh ara tom dahnong wangop. Wasa supim hat Jisas ohe patnong sangop.

⁸Saporhan nuhur tom bus tei oh kakduupo rim nuhur bot dahdapat orhor aning ung oh tom hru tei orhor pramat ohe kom pipa.

⁹Susa bus teinong hapti wandasa wandeiyaoh irat har mar aningo deno Hanipyah oh temat patgop.

¹⁰Temat patdapat nuhurnong Gur ama ung tami aning oh ti poprina napongop.

¹¹Napotporhan Saimon Pita oh it bot dahnong rusa aning ung oh nang oh arpima pramat tom dinin teinong deingop. Matporhan aning oh sayaoh aning isipnap orhap 153 hangop. Ihtin aning isip ung tami orhor ungnong na turkangop.

¹²Ihtiporhan Jisas oh Gur gin apris den dina napotporhan nuhurhe Moh nuranure Hanipyah orhor ma hapat daham kas ham Go de hana na potpa.

¹³Na potperhan oh deno aningo oh dara popris namdengop.

¹⁴Jisas oh it masasa orhe namgit napisapat han nure kintei ma pitap hatip oh bimrip oh ama pitap hatip oh. Jisas oh Pita ohnong go nohnong bopor nahat napapatda por meng potip ohe meng oh

¹⁵Jisas oh den namdiporhan nuhur diperhan oh Saimon Pita ohnong Jon ohe mon Saimon go maire nohe danong ham bopor nahat napaptiru gohe ihtin bopor nahat napapatda da isipnap bopor nahat napapat por dahandeingop. Dahamtiporhan oh Dawa. Hanipyaha. Nohe gonong bopor nahat ma napapat da oh go am hat patmur pongop. Potporhan oh Go ihan norhe han sahapti bap hatin hat pati ihirnong sahanmur pongop.

¹⁶Pora gahan it tipnerip oh Jon ohe mon Saimon go arpin nohe danong ham bopor nahat napapatda potporhan oh Dawa. Hanipyaha. Nohe gonong bopor nahat ma napapat da oh go am hat patmur pongop. Potporhan oh Go ihan norhe han sahapti han hatin hat pati ihirnong go wamat napaptenmur pongop.

¹⁷Pora it bimrip meng oh Jon ohe mon Saimon go nohnong bopor nahat napapatda potporhan oh Rihhe it tap meng orhorwi dahanahahhe daham da er hama Hanipyaha. Erer oh go am hat patmur. Ihan nohe ma gonong bopor nahat napapat da oh go am hat patmur pongop. Potporhan oh Go norhe han sahapti han hatin hat pati ihirnong nasaham napaptenmur.

¹⁸Noh arpin meng napotiprohmur. Go brer put hat patim gorhe watah oh gorhor aro gorhe ma sapor rinong suso hapatmur. Kaput paser hah teihe wan han ihir ire bes tei watah nariyao go bes arhatporhan gwe sapor ma dahat pat teinong besdap namrim napisayao hatiprimur pongop.

¹⁹Ama potip oh Pita oh paser hatporhan sutperhan Got ohe winnong adaptuhur ma haputipra meng oh gipotipmur. Gipora Pita go nohe kom aprina pongop.

²⁰Potporhan oh ohe kom sangop. Saporhan Jisas orhe bopor nahat napapat han noh ite kom pip. Noh nuhur Pasopa dik den ma diri oh Jisas ohe boknong tongnom muhutir han noh ohnong Gwe nang han oh nih por dahamtir han noh ite kom pipmur. Saporhan Pita oh tandapurker wanahangop. Wanahama Jisas ohnong Hanipyaha. Gin dite kom ma apir han ohe ma haputipra oh kinhat haputipra por dahandeingop.

²²Dahamtiporhan Jisas oh Go ohe ma haputipranong oh Oh kinhat sa haputipra dahatipra. Nohe danong hat orhorwi hat patenmur. Noh Jon ohnong go na haput patin orhor noh it apripramur porhanoh go Oh imat por ma hapat daham ohe danong hat patepra. Nohe danongwi hat patenmur pongop.

²³Ihtiporhan Jisas orhe han ihir amrama Jisas oh Jon ohnong imat potip ohoh ihan Jon oh na haputipra hanmur naporiptimur. Ma naporipti oh Jisas oh Jon oh na haputipramur napotipda ihan gur Oh na haputipra hanmur potiprohe. Oh Jon oh na haput patin noh apripramur naporhan oh oh norhe dahapat da ohmur napotip ohoh ihan gur Oh na haputipra hanmur gure ihat ma dahapti da oh be ihat dahaptimur.

²⁴Ama han norhor norhe kintei Jisas oh ihat saporhan orhe ihat sasuh ohe meng oh noh mama brak mat sar ohmur. Noh ihat wamat sasuh ohe meng oh brak mat sar ohoh ihan gur arpin meng napor brak matip ma hapat dahenmur.

²⁵Jisas ohe ma ihat tamrein sasuh meng oh ruumsan pat orhor kat mengwi noh mama brak mat sar ohmur. Kat meng oh noh na brak deimur. Ohe ma ihat sasuh ohe meng oh isipnap pat ohoh ihan noh gonsi brak deihanoh brak ban isip hahrit kat de tei itin hatipri rim noh kat meng na brak mar mandamur. Gin nohe meng oh kimur.