Read Oksapmin Jon 4 Bible Online

Jon 4 - Oksapmin bible

Jon 4

¹Jisas oh orhe bes teidapat hanip ihirnong tom na patinipata; orhorsi pati han nure bes teidapatwi tom patirishemur. Ihaptin be ma pati kuuhan ihiroh Jon ohe bes tei pang han ihirnong tom patitporhan pang han ohe duupnong haptimur. Jisas ohe bes tei ruumsan kuuhan ihirnong tom patitporhan ruumsan kuuhan ihir ohe duupnong haptimur ritperhan Parisi ihir ama amratpa oh.

³Amratperhan Jisas oh Epe. Gin ihir ihtin meng oh amraya ma hapat dahapat Judia mong oh mandama nuhur it Gariri mongnong pipa.

⁴Gariri mongnong sonmat oh Dir munun mandap moh na saprohemur. Samaria mong mutuh gateng mandap morhor kapkap saprohemur rim Samaria mong kat orhor pipa.

⁵Susa mongsut hat patin orhor Samaria mong ohe Sikar aptei oh kotpa. Sikar aptei oh nure puh Jekop ohe mon Josep ohnong mong amdatip ohe kakduup mong oh kotpa.

⁶Koriyaoh Jekop ohe mong pohmat pihip tom tem oh patgop. Pathan Jisas oh ruumsan sori tei ohoh na son ham tupetporo rim tom tem duup oh tongnongop.

⁷Tongnotporhan nuhur den mohotperim ap mutuhnong pipa. Nuhur saperhan oh patin Samaria kuu tit tom yohom apingopri. Apriporhan Jisas oh Tom oh ti namdina potipri.

⁸

⁹Potporhan uh Go Juda gurmuro. Go Samaria nuhursi mahaw hat pati ohoh ihan go kianorim nohnong Tom ti namdina naporo pongopri.

¹⁰Potporhan oh Es. Go Got orhe gonong napin han oh go hanhan haho deip nahah han nohnong hanhan haho hahmur. Gomdapat am hahneng nohnong Go tom ti namdina napornengmur. Naporneng noh dasi tom oh namdenengmur potipri.

¹¹Potporhan uh Dasi tom oh ma napor moh tom uup tem marapat tomnong ginaporkin dahama ohnong Hanipyaha. Go tomsan timbas pat moh tom oh dah maham pat moh ihan go de teimdapat dasi tom oh yohom namdiproh.

¹²Dire aw Jekop oh tom tem moh pohmara orhor deo orhe nita ihir dayao ire sahapti han ihir dayao hashemur. Mama pohmatip han oh han kasipnap hanmuro. Gin go ohe kasipnong gwe hrepnong mat papatim nohnong kasip tom oh namdiprohmur naporda pongopri.

¹³Potporhan Jisas oh Hanip tom pohmatpa tem moh dayahanoh it komdapathe tom din haptimura;

¹⁴nohe ma ri tom oh namdiporhan dayahanoh it komdapathe tom din dahe na haptimur. Tom din da na hat patin tom uuptem ohdapat marapat orhor hatin hat hanip mutuh oh ihat patin dipwi paten dasi haptimur potipri.

¹⁵Potporhan uh ihan Hanipyaha. Gwe ma ri tom oh ti namdina. Namderit noh dama it tom na din hama tom yohom na aprisipramur pongopri.

¹⁶Potporhan oh Er da hat sapat kuu moh urhe er da hat ma sapat oh ha mandatinoh. Ihan imap ohe meng oh potpor daham Go giri oh ihan susa gorhe imannong ambura nohe pat tei moh it aprin potporhan

¹⁷uh Noh han timbas kuumur pongopri. Potporhan oh Go Noh han timbas ma ri oh arpin meng rimur.

¹⁸Go han hanen gon dara mandatipmur. Ginhe gosi ma pat han oh gwe han basmur. Ihat pat ohoh ihan Go noh han timbas kuumur ma ri oh arpin meng rimur potipri.

¹⁹Potporhan uh Hanipyaha. Go nohe han dara mandapat ohe meng oh arpin meng napor ohoh ihan noh gin Go propet hat pat hanhe dahahmur. Go ihat propet hat pat ohoh ihan go mama meng moh napotina.

²⁰Nure awher ather ihir mama yei moh rus Got orhe danong ham armi maro haptimur. Juda bap gurhe Jerusarem ap mutuhnongwi aprisa Got ohe danong ham armi maro henmur riptimur. Ma ihapti oh gin de mengnong oh dimtin ina meng hat pat por dahandeingopri.

²¹Por dahamtiporhan oh Kuua. Go nohe ma napotiproh mengnong arpin menghe dahatinmur. Kaput hanip ihir yei kanong ruyao Jerusarem ap mutuhnong sayao ham Got ohe danong ham armi maro na haprimur.

²²Samaria gure ohe danong ham ma armi maro hapti han oh gur hanhan hat patim ihaptimur. Got oh Juda nuhurnong oh Gure mutuhnong gure namburin han nadarhetipramur rit natip han oh Juda nure mutuh apris pat ohoh ihan nure ma ohe danong ham armi maro hapti han oh nuhur orhornong wamar am hat patim orhor ihaptimur.

²³Ihtin orhora; gin mama pati dik moh arpin Got orhe danong hat patim ma armi deipti oh damdapat orhorwi arpin armi matin ohe da ohsi hat patim armi deiptimur. Amaru hat patim orhorwi Got oh Nohnong armi nahat ha napaptengwe dahapatmur.

²⁴Got oh inao damo oh timbas hanmur. Dawi pat han ohoh ihan ohe danong ham armi maro ma hapti ihir damdapatwi ihaptimur potipri.

²⁵Potporhan uh Nohe da oh Mesaia ohnong Krais ma poripti han oh apris meng gonsi pomat am naham da nadapetipra ma hapat dahat patmur pongopri.

²⁶Potporhan oh Krais ma poripti han oh noh mama dit mengripti ohmur potipri.

²⁷Jisas oh ameng oh porpatin orhor orhorsi ma pati han nuhur susa wamtipamur. Wamara Oh gin kuu urhe pat moh uhsi mengripatda dahatpamur. Dahatpa orhor nuhur tit han tit Go kianorim uhsi mengripat na potpamur.

²⁸Na por be damdapat dahatperhan gahan uh tom san mandama ap mutuhnong susa ap mutuh ihirnong Gur amratin.

²⁹Han tit aprisa nohe rihohe ihasuh meng oh gonsi napormur. Nohe ihat patesuh meng oh arpin mengwi napor ohoh ihan oh Krais ohdo rim gur gonsi apris ohnong wamtinmur ama potip oh.

³⁰Potporhan irair ama apdapa oh.

³¹Ihir kopen na apin patin Jisas orhorsi ma pati han nuhur ohnong Tisa. Go den moh dina por kamtipa.

³²Por kamtiperhan oh Es. Noh gure na dahat pati den oh patmur napongop.

³³Napotporhan nuhur ihan tit han oh tit den apopirit dekin goshatpa.

³⁴Goshatperhan oh Nohe nohnong ma nadarhetip han orhe atamreindin oh atamreima timbas matporim ihpatmur. Ama ihat dahapat da oh norhe den ha de hatin ham kasip nahat napapat da ohmur.

³⁵Gur hayop yotayota sutporhan den damsi datin ham datiprimur riptimur. Nohe ma napor oh gin orhor damsi hat pat ohoh ihan gur gin orhor den dam oh datinmur. Mama apriya Samaria ihir meng amram dimtin inasi hat patim apripti ohoh ihan gur meng oh ihirnong potinmur. Meng ma potiprohe oh gur den dam suhuya hatin hatiprohemur.

³⁶Den ma suhupti han ihir yan dariptimur. Gin Samaria ihir apriperhan gur meng potperhan ihir eimat paten dasi hatiprohemur. Eimat paten dasi hatiprohe ohoh ihan Samaria ihirnong suhuya han guro ma gonotip han oho guragur Wes dam dariyao rim tap hat amam hatiprohemur.

³⁷Ma ihtiprohe oh noh gurnong wan ire ma tamreishe ru teinong nadarhetiprohmur. Nadarhetporhan gur sus gure bes tei na gonotpa den ire bes tei ruumsan tamreinpa den oh gur suhundiprohemur. Ma suhdiprohe oh kuuhan gure ma ripti meng ohe tan hatiprohemur. Gure ma ripti meng oh mamaru hat riptimur. Rih ma den gonotpa han ire den oh wan ihir susa dam suhuptimur ma ripti mengru hat gin gur sus arpin ihtiprohemur napongop.

³⁸

³⁹Napotporhan ama aptei han ihir apingopa. Kat han Samaria ihir kuu uhe meng oh Oh nohe rihohe inahasuh meng oh gonsi napormur potporhan ihir amrama Jisas oh arpin inahatin hatin han ma hapat daham apingopa.

⁴⁰Aprisa Jisas ohnong go diradir pateprimur pora ire apteinong susa Jisas ohsi nuhur yot dah inpa.

⁴¹Iham ama han ihirhe kat han dam gon tit meng amrapti Arpin Jisas ohwi inahatin hatin hanwa dahangopa.

⁴²Dahapti kuu uhnong Rih gwe meng amram arpinhe daham ohe danong hatirimur. Ginhe orhe meng mohhe amram Arpin moh nuhurnongo mong mong ma pati han ihirnongo eimat paten dasi nahatin han oh mama pat oh ma hapat daham ohe danong hayamur pongopa. Jisas oh kamoheim ohe mon pomtip ohe meng oh

⁴³Gahan nuhur ateidapat susa Gariri mongnong pipa.

⁴⁴Gariri mongnong ma pipa oh Jisas oh Got ohe meng pot pisapti han ihiroh wan apteinong sus Got ohe meng potperhan winsi deiptimur. Iraire aptei oh meng oh potperhan winsi na deiptimur potin tei ohoh ihan oh Dir norhe aptei mongnong na susa wan apteinong saprohemur napotporhan nuhur arpin orhe apteinong na susa Gariri mongnong pipa.

⁴⁵Susa kotperhan ama ihirhe rih Pasopa den dapti dik oh Jerusarem ap mutuhnong susa Jisas ohe ihtip erer oh wandeipti am hat pati tei ohoh ihan nuhur kotperhan ihir apris ohnong amam mar ambungopa.

⁴⁶Ambutperhan nuhur susa Jisas ohe tomnap orhor irat gwe wain tom gap ma matip aptei oh kotpa. Kotperhan Jisas oh Judia mongdapat apris patmur ritperhan Kapeneam aptei gapman ohe duuptei hat pat han oh amrama orhe brer mon oh sik hat pato rim apingop. Apriporhan Jisas ohnong Nohe mon oh sik ham haputin ina kakduup hatmur ihan go apris napomtina por kandeingop.

⁴⁷

⁴⁸Por kamtiporhan Jisas oh noh hanip ire na imtin hatin da tit gurnong na namgihanoh gur Ohwi inahatin hatinwa na dahatiprohemur pongop.

⁴⁹Potporhan kamoheim oh Es. Nohe brer oh haputipra. Go kapkap aprina pongop.

⁵⁰Potporhan oh Gin go sona. Brer oh patmur potporhan oh arpin ma hapat daham it sangop.

⁵¹Oh kopen mandap oh sapatin orhe atamreipti han ihir mandap aprisa Brer oh gin patmur ama potpa oh.

⁵²Potperhan itap oh Desut yah hangwer por ama dahamtip oh. Dahamtiporhan ihir Gwe mon oh apung mongsut orhor ina mumun oh tihih hama yah hangwermur ama potpa oh.

⁵³Potperhan itap oh Wa. Arpinda. Apung orhor ma napongwer sut orhor yah hatirda ripat Jisas oh Got orhe darhetipra ma ritip han oh ma hapat ama dahatip oh. Dahapat orhe taptem han ihirnong potporhan ihirhe amrama irair tap daham Ohwi arpin inahatin hatin han ma hapat ama dahatpa oh.

⁵⁴Jisas ohe Judia mongdapat apris Gariri mong oh patim hanip dire na imtin hatin han ma matip oh tipnerip oh ama imtip ohmur.