Read Oksapmin Jon 7 Bible Online

Jon 7 - Oksapmin bible

Jon 7

¹Gahan Juda ihir Jisas ohnong sutinmat riphariptin ohoh nuhur Judia mongnong na susa Gariri mong orhor aptei aptei oh sashemur.

²Gahan Juda ire pohon tom ap tem ham ma pateshe danong oh ham tarmur den dashe dik oh kakduup hatporhan

³Jisas orhe arwapir ihir Jisas ohnong Go Judia mong ohe aptei apteinong na susa Gariri mong morhor aptei aptei mohwi ma tamrein sapat oh Judia mong ma pati gorhe kuuhan hat pati bap ihir gonong kinhat wanaham gonong winsi nahatiprohe. Ihan go mamong moh mandama Judia mongnong susa hanip dire na imtin hatin da oh pinggit pisashenmur.

⁴Han ihir Nohnong winsi han ha nahatingwe daham ma ihat sapti han ihiroh gwe mamaru hat saptida. Basra. Ihir Nure ihat sapti da moh ihir wanahama winsi han ha nahatingwe daham ire ma ihat sapti da oh pitap teinong mar pinggit pisaptimur. Ihan go imtin hatin han hat pathanhe ire ma pitap teinong mar pinggit pisaptiru mat orhor Judia mongnong sus ihirnong pinggit pisashenmur pongopa.

⁵Ihir moh Aprin Got ohe Ihirnong ambutin han darhetipra ma ritip hankin na dahat patim gipotpamur.

⁶Gipotperhan Jisas oh ihirnong Gure dik oh timbas ohoh ihan guragure Nuhur ihtiper ihtiper dahat sapti oh yahwimur. Nohe ma ihat sapatnong oh diksi hat pat ohoh kopen ama dik oh na apin patmur.

⁷Kakdah han bap guragurnong oh tap han bap guragur ohoh ihan kat ihirdapat kat han gurnong heisup na nahaptimur. Nohnong oh kakdah han bap guragure er hat sapti da oh noh pitap teinong mar natirip hatporhan nohnong ama ohe pe oh heisup nahat napisaptimur.

⁸Nohe sus ma imtipra dik oh kopen na hat pat ohoh ihan noh gin na saprohmur. Gurwi ire tarmur ma den dipri teinong oh sonmur pongop. Jisas oh den tarmur dapti teinong pip ohe meng oh

⁹Potporhan Jisas orhe arwapir ihir tarmur den ma dipri teinong oh sangopa. Saperhan Jisaso nuhur Gariri orhor inpa. Patin ihir piya tei gahan nuhur ahar Jerusarem ap mutuhnong ruhpa.

¹⁰

¹¹Rus patin tarmur den dapti dik hangopa. Hatperhan Juda ihir Ama han oh de tei pato rim ama angmatpa oh.

¹²Angdeipti kat han ihir Oh yah hanmur. Kat han ihir Es. Oh hanip dasuh nahat sapat hanmur gosham ahar dahdah meng ama gigoshatpa oh.

¹³Dahdah meng ma goshatpa oh Juda ihir Jisas ohnong sutin danong hat patin ohoh ihan patem ihir dirnong nitiprohe ma hapat daham kas hat patim pitap teinong na mara ahar dahdah meng ama gigoshatpa oh.

¹⁴Gahan tarmur den dapti dik orhor na timbas hat patin mutuh katket mar Jisas oh Got ohe ap yawar oh rosa meng am deingop.

¹⁵Meng am matporhan Juda ihir Wa. Sawa poripti duuptei han ihir na suhur matpa han moh de tei dasi hatip gosham da darhengopa.

¹⁶Da darhetperhan oh Wa. Noh norhe da orhor daham meng na naporpatmur. Ma nadarhetip han ohe da meng oh napotporhan orhe daham ma napor meng orhor gurnong naporpatmur.

¹⁷Ma nadarhetip han orhe da meng oh gurnong naporpat orhor gur ama meng oh naporpat ma hapat na dahaptimur. Gur Noh Got ohe dahapat dahnong oh am ham noh ihtiprohmur ma dahaya han gurwi nohe mengnong Oh orhe da meng bas ma hapat. Arpin Got ohe da meng oh ohnong potporhan napor ma hapat daham am haptimur.

¹⁸Tit han tit orhe damdapat orhor Nohnong winsi han ha nahatingwe. Ihan noh sus meng potpor daham apirhanoh apris dasuh meng napotiprohmur. Tit han ohdapat tit han ohnong Gin go sus nohe da meng moh ihirnong potinmur por darherhanoh ama han oh sus ma darhetir han orhe winnong oh ha adaptuhutingwe rim dasuh meng na pora ma darhetir han orhe arpin meng orhorwi apotiprohmur.

¹⁹Moses oh sawa meng oh brak mar napdap orhor gur amram dimtinnong oh tit han tit dimtin hanhe timbasnapmur. Amram na dindeipti ohe pe oh guragure boknong mar ihat saptida. Ihan kianorim nohnong Oh Moses ohe sawa mengnong moh na amram amkar ihat sapat hanmur napor nitperim ihapti pongop.

²⁰Potporhan ama ihir Gonong mongsup oh da ban nahatporhan gur nohnong nitperim ihaptimur ripatda. Gonong han de ihir nitperim ihapti. Go da ban taham giripatda pongopa.

²¹Potperhan Jisas oh Noh tuperipti dik oh na wandeipti han tit ma imtir oh tamreindirmur. Tamreinporhan gur Tuperipti dik na ihapti dik moh oh kinham sa ihah daham da darhetirimur.

²²Gur kinham Tuperipti dik na ihapti dik moh oh kinham sa ihah daham da darhetiri. Guragure ihaptinong oh dahenmur. Moses oh eit watah gatmatin ohe meng oh brak mar gurnong natipmur. Ama meng oh brak mar ma natip oh orhe da oh na natipmur. Rih ropir pohon ma ihat pateshe da oh brak mar natipmur. Natporhan gur Oh nuhurnong ihenmur ihenmur napor natip ma hapat daham gur tuperipti dik orhor tamreiya hatin ham brer ire eit watah agatdeiptimur.

²³Tuperipti dik orhor ma ihapti oh Moses ohe sawa meng oh mandam amkatipri daham ihaptimur. Gure tuperipti dik ma ihapti oh Brer ihir yah hat ha patengwe rim eit watahwi agatdeiptimur. Nohe tuperipti dik ma pomtir oh ha yah hat patenoh rim hanip ina boknong gonsi yah matirmur. Noh hanip boknong gonsi yah matir ohoh ihan gur kinham heisup nahapti.

²⁴Hanip guragure ina teimdapat ihapti danong asoh sapri. Da mutuhdapat hanip ma indeipat danong asoh wamar sanmur pongop. Ire Jisas ohe boknong yot da hatpa ohe meng oh

²⁵Gahan Jerusarem ap mutuh kat kuuhan ihir ama gigoshatpa oh. Mama han ohnong ihir sutper indeipti han basda.

²⁶Sutper indeipti han oh hanip dire kintei tandeim meng naporpat orhor kak hat pati han ihirdapat ohnong meng na por kimirim wamat patimur. Kimirim ma wamat pati oh Moh Krais orhorkin daham kimirim wamat patikin

²⁷Dire ma dahat pati oh Got ohe darhetipra ma ritip han ohe apteinong oh dir hanhan hat patimur. Mama han orhe pat apteinong oh dir am hat pati ohoh ihan oh Got ohe darhetipra ma ritip han oh basmur dahat patimur goshangopa.

²⁸Goshatperhan Jisas oh Got ohe ap yawar oh meng am deipatin orhor kasip mengtei Gur arpin nohe apteio nohnongo am hat patida. Norhe da orhor na apdapmur. Arpin han At orhor nadarhetipmur. Ama nadarhetip han ohnong oh gur hanhan hat patimur.

²⁹Noh arpin han ohsi patesuh han ohoh ihan norhor ohnong am hat patmur. Orhorsi patin nohnong orhor nadarhetporhan noh apdapmur pongop.

³⁰Potporhan ihir ambur nang atpatperim indeingopa. Imtiperhan ohe sutin dik oh kopeno rim Got oh ire besnong arahmatporhan ihir na maringopa.

³¹Na marinperhan ama kuuhan trun ihir Ohnong Krais ma ripti han oh orhe wan kasip titsi apriprada. Ohra gin mama kasip ohsi mama ihat apripat ohmur. Orhe darhetipra ma ritip han oh mama han morhormur dahangopa. Dupsi han ihir Jisas ohnong ha ambutingwe rim darhetpa ohe meng oh

³²Kuuhan ihir Jisas oh Got orhe darhetipra ma ritip han ohda da moh wan hana daham yot da hatperhan ire daham gigoshapti da meng oh Parisi ihir amrama Parisi ihiro Got ohe ap yawar hanat bok han ire duuptei han ihiro ihir Got ohe ap yawarnong wamat pati dupsi han bap ihirnong Gur Jisas ohnong ambur nang atpatinmur por ama darhetpa oh.

³³Darhetperhan ihir apriperhan Jisas oh Noh kakun gursi matei patema it nadarhetip han orhe patnong sapramur.

³⁴Saporhan gur nohnong oh Oh nuhurnong ha napanggeitinoh rim nohnong angnahatipri orhor nohe pat teinong aprin ohe inasi na hat pati ohoh ihan gur nohe pat teinong apris na wanahatiprimur pongop.

³⁵Potporhan ama Juda ihir Oh denong saporhan dir ohnong na wamtipri. Oh diradir kat han Grik ire mutuh rih sus ma pati han ire patinong saprada. Susa ama Grik ihirnong meng am matiprada. Oh na imtiprakin.

³⁶Ihan oh Gur angnahatipri orhor apris na wanahatiprimur ma naporhe oh kian meng naporhe. Oh Gur nohe pat teinong aprin ohe inasi na hat patimur ma naporhe oh kian meng naporhe gosham dahanggoshangopa. Jisas oh Gur tom dinsi hat patihan nohe duup moh apris dinmur potip ohe meng oh

³⁷Gahan ama tarmur den dapti dik ohe pepe dik oh isip tarmur den dapti diko rim Jisas oh tandeima kasip mengtei Gur tom din hayahanoh nohe duup moh apris tom dinmur.

³⁸Dama Got oh meng potporhan ma brak matparu Gur nohnong Ohwi inahatin hatin hanwa ma dahaya han gure mutuhdapat eimat paten dasi nahatin ohe tom oh dipwi marasipramur pongop.

³⁹Ama napor tom oh Got orhe Yahsup ohmur. Ama Yahsup oh Jisas ohe danong hapti han ire ma datipri ohe Yahsup ohmur. Ama Yahsup oh Jisas oh masas Got orhe has yah da ohsi na mat patin ohoh ihan Got orhe kopen na darhet pat ohe Yahsup ohmur. Jisas ohnong yot da hatpa ohe meng oh

⁴⁰Jisas oh ama tom ohe meng oh ritporhan kat han ihir Moh arpin Got ohe darhetipra ma ritip propetmur ringopa; kat han ihir Moh Got oh ihirnong ambutipra hanmur ma ritip han Krais ohmur ringopa. Gahan kat han ihir Wa. Ama han ohe mong oh Gariri ohda.

⁴¹

⁴²Ma brak matpa meng oh Krais oh Depit ohe puh ihirmur. Oh Depit orhe puh ohoh ihan orhe itpa aptei Betrehem apteidapat apripramur rim ma brak matpa meng ohwa. Ihat brak matpa ohoh ihan mama han moh wan aptei han ihir ohoh ihan oh ama Krais oh basmur ringopa.

⁴³Ihapti ihir Jisas oh Got oh nambutin han darhetipra ma ritip handa da moh wan hana daham irair yot da hangopa.

⁴⁴Yot da hapti kat han ihir ohnong ambur nang atpatper dahaya orhor kas ham na ambungopa. Duuptei han ihir Nuhur Jisas ohe meng na amraptimur ritpa ohe meng oh

⁴⁵Na amburipti ap yawar wamat pati dupsi han ihir Parisio ap yawar ohe hanat bok han ire duuptei hano ire patinong it ama pipa oh. Saperhan ihir Gur kinham ambur na popriyao por ama dahamtipa oh.

⁴⁶Dahamtiperhan ihir Ihat dakuunap hat ma mengripat han oh rih timbasmur. Ihtin hannong oh nang atpam popriproheda ama potpa oh.

⁴⁷Potperhan Parisi ihir Gursi ohe dasuh meng oh amram dindeiyanda.

⁴⁸Dire kakhano nuhuro tit han tit ohe mengnong amram arpin meng napor ma hapat dahaptida. Basra. Nuhur ti na amraptimur.

⁴⁹Ihan sawa ma hanhan hat pati kuuhan ihir ohe danong ma haya oh Got oh ihirnong bopor heisup mat papat han ihirmur ama potpa oh.

⁵⁰Potperhan irair tit han Nikodemas rih Jisas ohsi mengitporim ohe pat ma pip han oh Wa. Dire ma pohon ihapti oh hanipnong be bokdus Oh er hanhe por na suptimur. Orhe meng oh amrapti Moh er hanhe moh yah hanhe dahaptimur. Ihan gur bokdus oh ohnong Er hanmur potipri ama potip oh.

⁵¹

⁵²Potporhan ihir Go Gariri gur basmur. Ihan kinham go meng katwandeipat. Ma brak matpa meng oh go pomat wamtinmur. Wamara propet ihir tit Gariri mongdapat apripramur por brak matpa meng oh timbas hatiprohmur ama potpa oh.

⁵³Pora ihir iraire apnong ama kukutpa oh.