Read Oksapmin Aposer 8 Bible Online

Aposer 8 - Oksapmin bible

Aposer 8

¹Sitipen oh haputporhan kat han ma Got orhe da hat pat danong dindeipti han ihir aprisa Sitipen ohe sein oh dara sein sara payamamo hatpari. Ama Sitipen ohnong imat suta dik oh Jerusarem ap mutuh ohe Got ohe nita sios bap ihirnong ruumsup mar er matin da oh tarpatipmur. Ihat ma tarpatip oh Sor oh Got ohe meng amrapti sios bap kuuhan ihir ha timbas hatingwe rim ap ap oh susa kuuhan ihirnong ambura pisusa karapus mat pisangopri. Karapus maro ruumsup maro deipatin Got orhe nita ihir gonsi Judia mongnongo Samaria mongnongo oh kukut sangopari. Saperhan Jisas orhe mengtei atamreipti han aposer ihirwi Jerusarem ap mutuh oh patesheri. Samaria mongnong sus Hanipyah ohe yah meng oh pot pihipa ohe meng oh

⁴Ihir kukut susa ama aptei aptei oh Got ohe yah meng oh pot pisasheri.

⁵Ihama Pirip oh mong Samaria mong ohe ap mutuh tit susa Krais ohe meng oh porisuhri.

⁶Ameng oh poro na wandeipti han indeio deisuhri. Ma indeisuh oh mongsup ga apetporhan akitwi ngak rim maras sayao buho beso haputpasi bapo buh tikikitinsi bapo ihirnong pondeio deisuhri. Indeipatin ihir wamar am hapti ohe mengnong pomat amrangopari.

⁸Amrapti ama aptei han ihir amam yah tit hangopari.

⁹Ama aptei han irair tit han Saimon oh amkimon han haho Nohwi ihtin hanmur rio hanipatri.

¹⁰Ihpatin Samaria ihir wandeipti Wanohe hapat han mohoh kiansi ihpato rim da darherisheri. Da darheripti meng kamah hano be hano ihir gonsi ohe mengnong amrasheri.

¹²Ihaptin gahan Pirip oh Got ohe napapindin yah mengo Jisas Krais orhe kasip ohsi yah nahapat mengo oh potporhan ihir amrapti ihir gonsi Arpin meng napor ma hapat dahangopari. Dahapti kuuhan gonsi ihir tom wangopari.

¹³Saimon ohhe Moh arpin meng ma hapat daham tom wangopri. Wasa Pirip ohsi ihit patesheri. Ihat patim Pirip oh hanip dire na imtin hatin han oh indeipatin Saimon oh wamara Moh kian ohe kasip ohsi patim indeipato daham da darhengopri.

¹⁴Ihtiporhan gahan Jerusarem ap mutuh ma pati aposer han ihirhe kat han ihir aprisa Samaria pati han ihir Got ohe meng amraptimur ritperhan ihir Pitasi; Jon ihitnong Gut wamar sonmur por ihitnong darhengopari. Darhetperhan ihit wamar pipari.

¹⁵Wamar susa kopen ma amratiri ihir Jisas ohe winwi rim tom waihirimur. Waihir orhor Got ohe Yahsup oh ire mutuhnong na mat patmur rim Yahsup oh ire mutuhnong ha hatinoh rim ihirnong bes marima Got ohnong adahamtipari. Adahamtiperhan Got ohe Yahsup oh ire mutuhnong hangopri.

¹⁸Got orhe Yahsup oh ire mutuhnong hatporhan Saimon oh wandeipat Ihit bes marinperhan Got ohe Yahsup oh ire mutuhnong hah moho dahapat manisi susa ihitnong Noh kuuhan ihirnonghe marinporhan Got orhe Yahsup oh ire mutuhnong ha henoh rim gute indeipti da oh nohnonghe namgitina. Namgiyarit noh yan moh napripora pongopri.

²⁰Potporhan Pita oh Go Got ohe be musum napripat han moh yansi mohopti handa. Oh be napripat han ohoh ihan go Noh yansi mohotpor dahah oh ermur. Ihan gorhe yan ohsi; gorhorsi tap hat timbas hahhanhe yahmur.

²¹Gwe ma ihat dahat pat da moh Got ohe kintei ernap hat pat ohoh ihan nute ihat mama tamreipti moh nute ohsi dire taman basmur.

²²Noh gwe danong nawandei oh Ite ihapti da moh nohnongwi ihtin han hat patnengo dahapat da oh gorhornong gisipga nahat napapathemur. Ihan gin go Nohe ihat er hat gisipga nahat napapat da moh kom asar mandatpora daham Hanipyah oh ama er da oh dat ha namdatinoh rim ohnong Nohe er da oh gisipga nahat napapat da moh go dat namdatinmur por dahamtinmur potipri.

²⁴Potporhan Saimon oh Gute ma naporiya meng moh nohe bok moh atnap sup naham er nahatiprarim gut Hanipyah ohnong nadahamtinmur pongopri. Potporhan ihit arpin adahamtipari.

²⁵Adahamtiperhan ite wamtiri meng oh poriyao Hanipyah ohe meng oh poriyao hapti it Jerusarem ap mutuhnong sapero rim ihit sus mandap aptei aptei oh meng pot it Jerusarem ap mutuhnong pipari. Pirip oh Itiopia han tit ohnong da adapem tom patitip ohe meng oh

²⁶Gahan Hanipyah ohsi tap hat pati da enser ihir tit aprisa Pirip ohnong Pirip go Jerusarem ap mutuhdapat Gasa apteinong sapti mandap kup oh sonmur. Ama hanip timbas mongnong sapti mandap kup oh go sonmur pongopri.

²⁷Potporhan oh amandap kup oh pipri. Sus wandeioh Itiopia ihir tit han apripatgopri. Oh Itiopia ire kak hat pat kuu Kandasi uhe erer oh ohe hrepnong mat apapat han ohmur. Oh Jerusarem ap mutuhnong rotu ham pirdapat

²⁸orhe apteinong it saporim iraire tongnotperhan hos ihir pramat pisapti bas oh tongnoma Got ohe meng risuh han Aisaia ohe meng rim brak matip meng oh sat apripatgopri.

²⁹Apripathan Got ohe Yahsup oh Pirip ohnong Go ohe duupnong hama gutagut tap hat son potporhan

³⁰oh kapkap sakat susa ohe duupnong hama oh Aisaia ohe brak matip meng oh sapatin oh amrapat Gwe mama sapat meng moh mutuh mengnonghe dahapatda da na dahapat por dahamtipri.

³¹Dahamtiporhan oh Mutuh meng oh nohnong namgiyaritda ihan noh potahat dahatiproh. Ihan go maras tongnom pomat namgitinmur pongopri. Potporhan oh rus tongnotipri.

³²Tongnoma wandeioh ma brak matpa meng mohOhnong Sipsip sutperim ma pohon supti teinong pisaptiru mat orhor ohnonghe imat pisus sutpamur. Suptin sipsip ihirnong bat agatdeiptin ma kimirit patiru hat patin orhor oh kimirit patin orhor sutpamur.

³³Meng na pomtin dus orhor be bisei mar da tein dus sutpamur. Imat ma sutpa oh orhe puhsi ham paten danong agatmar sutpa ohoh ihan ohe puh ihir mohmur ti na ritiprimur. girim ma brak matpa meng oh sa sapatgopri.

³⁴Sapatdapat Pirip ohnong Meng moh ma brak matip han orhe boknong mar brak matipda da wan han tit ohe boknong mar brak matip por dahandeingopri.

³⁵Por dahamtiporhan Pirip oh Mama brak matip meng moh Jisas ohe boknong mar brak matipmur pora ameng ohe boknong duup mara Jisas ohe ihat pat ohe yah meng oh gonsi potipri.

³⁶Pot susa tom hru gar duup tit kotpari. Koripti ama han oh Pirip ohnong Tom hru moh noh Got ohe danong ham waprohmur. Noh kinhapat han ohra ihan noh na waproh pongopri.

³⁷Potporhan Pirip oh Go Jisas ohwi inahatin hatin hanwa pomat dahat pathanoh yahwa. Tom wayona potporhan oh Dawa. Noh ihat ma dahat pat oh noh Jisas oh Got ohe brer ma hapat dahat pat ohoh ihan noh tom waprohmur pongopri.

³⁸Potporhan Pirip oh ama pisapat han ohnong Gin matei kimiritinmur. Nuhut tom waper potporhan oh kimiritporhan Pirip ohsi ihit tom dahnong wasa Pirip oh ama han ohnong tom patitipri.

³⁹Tom patira kot teinong hatperhan Got ohe Yahsup oh Pirip ohnong pumat sa pihipri. Pisaporhan ama han ohhe Pirip ohnong na wamara oh orhe sapat mandap kup oh amam hat ama pip oh.

⁴⁰Pirip oh watahahoh Asdot aptei pat hangopri. Pathan oh aptei aptei oh yah meng oh pot pisasuhri. Pot pisusa Sisaria aptei kotipri. Kora patesuhri.