Read Oksapmin Rom 9 Bible Online

Rom 9 - Oksapmin bible

Rom 9

¹Krais ohe tapnong hat pati diroh dasuh menghe na ripti ohoh ihan Krais orhe tapnong hat pat han noh arpin meng napotiprohmur. Norhe da oh noh arpin meng ripat han ma hapat dahapatmur. Yahsup ohdapathe Go arpin ripat hanmur naporpatmur.

²Noh arpin meng ma napotiproh oh mamarumur. Norhe aptei han Juda ihir Krais ohe danong na hat patio rim noh ihirnong ake tom isip mat papatmur.

³Noh ihirnong Got ohhe ambur paptepraneng daham ake tom mat ma papat oh noh de mandap katdapat ihirnong panggeitiproh dahat patmur. Got orhordapat nohnong Go Krais orhe tapnong hat pat da oh namdapat norhe bopor heisup nahat napapat hrepnong hatinmur. Hahhan ihirnong ambutin dasi mar ambutiprohmur naporhanhe noh ihirnong ake tom isip mat papat ohoh Yahwa. Go inahatina potiprohmur dahat patmur.

⁴Ama ihir Isrer ohe brer ire puh ihirmur. Ihir Got oh Norhe brer matipramur ma ritip bap ihirmur. Ama bap ihirnong Got oh orhe has da oh pinggisuh bap ihirmur. Ama bap ihirnong Got oh dik asarisuhmur. Got oh orhe sawa meng poro orhornong daham pomat armi mar papten ohe da pinggimo mar pinggisuh bap ihirmur. Orhor noh ihtin han tit gurnong napripramur por rit asarisuh han bap ihirmur.

⁵Ama han bap ire ropir ihiroh nuranure duupteinap awher ihirmur. Ama awher duuptei han ire puh ire bokdapat Krais oh hanip brer tarpam apdapmur. Ama apdap Krais oh dire kakhan titwi ham erer gon moh orhe hrepnongwi naham napapat han Got orhormur. Orhornongwi dipdipwi armi mar papten han ohmur. Arpinwa. Got orhe damdapat orhor Noh imtipora daham ma inahapat ohe meng oh

⁶Ama Krais ohe danong na hat pati Isrer bap ihir Got ohe rit asarisuh mengnong oh dam timbas mar ihat patida. Basra. Isrer ohe puh ihirhe gonsi Got orhe nitawi hama arpin Isrer na haptimur.

⁷Amaru hat orhor Epraham ohe puh ihirhe gonsi Got orhe nitawi hama arpin Isrer bap hat patida. Basra. Kat tit Got orhe nita na hat pati bap ihirmur. Got orhor Noh Aisak ohe puh ihirnongwi Gur norhe nita bapmur potipramur ritipmur.

⁸Ama giritip oh be hanip puh artahat saptinong asoh daham norhe nitamur na ripatmur. Orhe daham ma rit atip bap ihirwi arpin norhe nita ihirmur ripatmur.

⁹Ama Epraham ohnong rit atip oh mamaru mat rit atipmur. Norhe dahat pat dik oh aprisa Sera uhnong kusen tei orhor brer manhetin ina dasi matporhan manhem brer mon itipramur por rit atipmur.

¹⁰Got orhe nita ma deipat ohe meng tit mama pat ohmur. Nure aw Aisak ohe inap Rebeka uh brer yot tap mat ma itipnong oh dahenmur.

¹¹Ama brer yot oh kopen na it patin orhor ite sasiprinong oh yah hat sasiprido da er hat sasiprio na wamar hanhan hat patin orhor Got oh Ohri ma wandapra han oh kom ma wandapra han ohe hrepnong mat paptepramur ritipmur. Ma ritip oh Got oh Ama han ohnong noh ihtin han matipramur daham ma kis deipat da oh hanip dire ihat saya ohe pe oh imat na kis deipatmur. Orhe Noh imtipora ma dahapat ohe pe ohwi kis deipat han ma hapat ha dahengwe rim ama da oh imtipmur.

¹²

¹³Got orhe damdapat ma imtip meng oh ite boknong mar ritporhan ma brak matip oh mamaru hat patmur. Ohri ma wanhup han Esa ohnong oh noh na bopor mat paptesuhmur. Kom ma wanhup han Jekop ohnong noh bopor mat paptesuhmur ritporhan brak matipmur.

¹⁴Got orhe da orhor dirnong ti da ti da ma napripat han moh Oh er dahat patim dirnong ti da ti da napripat hanhe potiproheda. Basra. Orhe da oh yahnap hat patim ohoh inahapatmur.

¹⁵Got oh Norhe da orhor ti da ti da apripat moh yaho ma dahat pat oh Moses ohnong mama meng moh potipmur. Noh norhe da orhor tit han ohnong tit hinhina mar ambutpor dahahhanhe hinhina mar ambutiprohmur. Tit han ohnong tit hinhina mar panggeitpor dahahhanhe hinhina mar panggeitiprohmur gipotipmur.

¹⁶Moses ohnong ma gipotipru mat orhorwi inahapat han ohoh ihan hanip dire Oh ha inahatinoh dahapti ohe pemdapatdo da diradire kasip hat sapti ohe pemdapatdo oh ti da ti da napripatda. Basra. Dire ma ihapti ohe pe oh na inahapatmur. Orhe damdapat ma imtipora dahapat ohe pe ohwi inahapat hanmur.

¹⁷Orhe da orhor ma inahapat ohe meng oh tit mama brak matpa ohmur. Ma brak matpa meng oh Got oh Isip mong ohe kakhan Pero ohnong Gwe kakhan hat pat moh gorhe da ohsi kakhan ham ihat na patmur. Norhe da orhor Mama han ohnong kakhan mara norhe Imtipora dahapat da oh ohe boknong mat papatin kuuhan ihir norhe kasipnong oh wamara ihir ha am hatingwe. Am hama norhe mama ihat pat winnong moh nadaptuhura aw pe mong pe mong mong moh ha napishengwe daham gonong kis naham mama inahat napapat ohmur gipotipmur. Gipotporhan brak matpamur.

¹⁸Ma imtip oh dir wamara orhe da orhor tit han ohnong tit hinhina mar panggeitpor dahahhanhe hinhina mar panggeipat ma hapat. Tit han ohnong tit na hinhina mar ohe danong aban matpora dahahhanhe ohe danong aban deipat ma hapat dahaptimur.

¹⁹Got orhe da orhor imtipora dahah da oh inahapat hanmur ma napor meng moh gur sama dahapti gurdapat it nohnong mama ohe meng oh napotiprohekin. Gurdapat Nuhur Got orhe damdapat ma inahapat da oh nuhur amkar mandatin hatinda. Basra. Amkar na mandatin hatin hat pati ohoh ihan yah hat sayado er hat sayado oh orhe napin pat da orhorsiwi hat saptimur. Nuhur orhe napin pat da ohsiwi hat sapti ohoh ihan nuhurnong kianorim Gur er han bapmur napotiproh gurdapat nohnong ginapotiprohekin daham noh gurnong mameng moh napotpor ihpatmur.

²⁰Hanip diradir ohoh ihan dir namanhetip Got ohnong Go kianorim nohnong mihtin dasi naham namanhetip potiproheda. Basra. Hanip dire geim ma manheptinong oh dahenmur. Geim ohdapat ma manhe han ohnong Go nohnong kianorim mihtin geim namanhe potiprohda. Basra. Oh ma manhe han ohnong na gipotiprohmur.

²¹Manhepat han orhor arpak darema Gin geim yot manhetpora daham pus geimsi; ga geimsi manhepatmur. Orhe damdapat daham imat ma manhepat oh er basmur. Oh yahmur.

²²Got orhe da orhor ma inahapat da oh amaru hat orhor inahapatmur. Ma inahapat oh heisup mar timbas matiprawa dahat papat bap ihirnong Nohe kasip dao heisup dao moh wanaham ha am hatingwe daham timbas matiprawa dahapat orhor orhe manap da tei it wamat papatmur. Orhe heisup mar sutin han ihirnong manap da tei wamat papatnong oh dirdapat ero potiproheda. Basra. Na gipotin hatinmur.

²³Imat manap da tei ma wamat papat oh orhor rih orhor Mama han ihirnong hinhina mar panggeitipramur. Panggeima norhe has yah da oh ire boknong matipramur. Matporhan norhe yahnap hat patim ma papat da oh ihir wamar sa am hatipri daham imat papatmur.

²⁴Hinhina mar panggeitipramur ma ritip han bap oh dirmur. Ma ginapotip oh Juda hat pati han nuhurnongwi ginapotipda. Ma ginapotip oh Juda hat pati hansi; Juda na hat pati hansi dirnong tap mat ginapotipmur.

²⁵Imat ma napotip meng orhor tit Hosea ohnong potporhan oh brak matipmur. Ma brak matip oh mamaru hat patmur.Mama nohe nita hat na pati kuuhan maihirnong oh kaput norhe nita bapmur potipramur. Nohe na bopor mat papat kuuhan bap maihirnong kaput norhe bopor mat papat bapmur potipramur. gipotporhan Hosea oh brak matipmur.

²⁶Ihtin meng orhor tit ma ohnong potporhan ma brak matip oh mamaru hat patmur.Ire pati tei oh gur norhe nita bap basmur ma gipotip tei oh atei orhor noh it Gurnong oh patru patepra han Got norhe brermur potipramur. ritporhan Hosea oh brak matipmur.

²⁷Tit meng ma gipotip oh Aisaia oh Isrer ohe puh ire boknong kasip mengtei Isrer ohe puh ihir han artaham tom dinin ban hatin na satin hatin haya han ihiroh tom dinin ban na satin hatin hat patin orhora; Got oh uut han pok tit ambutipramur.

²⁸Hanipyah oh kakdah mong moh kapkap nasam yan oh pomat napripra ohoh ihan uut han pok tit ambutipramur potipmur.

²⁹Aisaia oh Got oh uut han pokwi ambutipramur ma ritip meng orhor tit meng ohri ma ritip meng oh mama mihat pat ohmur. Aw tei ohe erernong gonsi orhe hrepnong mat papat han Hanipyah orhor Juda dire danong na hama dire puh ihirnong uut han na mandatipneng dirnong Sodom aptei hano Gomora aptei hano ihirnong mat sum timbas matipru naham timbas nahatipnengmur Aisaia oh girim brak matipmur. Juda hat pati han ihir Krais ohe boknong tung rim or wandas mandapti ohe meng oh

³⁰Dire mama riya mengnong moh dahama Mama mihat pat ma hapat dahaptimur. Juda na hat pati han bap ihir Got oh nuhurnong Gur yah han bapmur napotin ohe mandap oh na angdeishemur. Na angdeishe orhor ihir Krais orhorwi inahatin hatin hanwa dahat pati ohe pe oh Got orhordapat Gur yah han bapmur por papatmur.

³¹Juda hat pati bap nuhurnong oh Got ohe sawa mengnong ohwi amram dindeiptin Got oh dirnong yah hanmur napotiprakin daham isip mar papteshemur. Isip mar papteshe orhor tap kat mat na dindeipti ohe pe oh Gur yah han bapmur na naporpatmur.

³²Gur yah han bapmur ma na naporpat oh Juda bap nuhur Krais ohwi inahatin hatin hanwa dahapti ohe danong dasei mar ma mandapti oh ama danong oh kwei hatin hat pat boknong oh tung rim or wandas mandaptimur. Or wandas mandatperhan Gur yah han bapmur na naporpatmur.

³³Ama kwei boknong tung rim or wandas mandapti ohe meng oh tit meng Got oh Aisaia ohnong potporhan ma brak matip meng oh mamaru hat patmur.Gur amratin. Noh Saion Jerusarem ap mutuh oh kwei hatin han tit itipramur. Kwei hatin han tit ma matipra oh hanip ihir ama kwei bok oh tung rim or wandas hen ohe kwei hatin han tit itipramur. Hanip ihir ero por dasei mar mandatin kwei hatin oh itipramur. Itporhan ama itipra han ohnong Ohwi arpin inahatin hatin hanhe ma dahaya bap ihiroh Noh kinham sa mama han ohe boknong moh hatir na dahaprimur. potporhan brak matipmur.