Read Oksapmin 1 Korin 16 Bible Online

1 Korin 16 - Oksapmin bible

1 Korin 16

¹Gin gure Got ohe nita bap Judia mong ma pati bap ihirnong panggeitinmat mani ma tap tei mat asaripti ohe meng oh napotiprohmur. Ma napotiproh oh Garesia mong pati sios bap ihirnong Gur imat asarinmur ma potip meng hatin mat orhor gin gurnonghe imat orhor napotiprohmur.

²Gur mamaru mat mani oh asarinmur. Guragure tamreim ma daripti mani oh sama guragure ma daripti kis orhorwi mat orhor tit Sande tit Sande oh asarinmur. Imat asariptin nohe ma apripra oh ama wanin mat asaripti wanin orhor datipramur. Gurnong wan tit it angmar asarinmur na napotipramur.

³Imat mani oh ruprup mat asaripti ama asaripti maninong apison han ihirnonghe Mama ihir yah mat pisapri han ihir ma hapat daham kis mat paptin noh apripramur. Aprisa Jerusarem ap mutuh pati kuuhan ihir Moh arpin Korin sios ihir ihat napanggeipti ma hapat ha dahatingwerim ohe brak oh noh apris gure ma asaripti mani ohsi tap mat Jerusarem ap mutuhnong darhetipramur.

⁴Gur Nurarhe apisayahan er hatiprohekin dahayahanoh nohsi diradir tap hat saprimur. Por oh Noh Korin ap mutuh pati sios gurnong wanaham apripramur potip ohe meng oh

⁵Noh Masedonia mong aptei aptei meng pot pisasipramur. Meng pot pisuso hapat gure pati teinong apris diradir tap hat indiprimur.

⁶Noh gursi tap hat ma indipra oh trun tit indiprade da na indiprae dahapat orhor tit ma dahapat oh trun dik tit indipramur dahapatmur. Noh gursi trun dik patin mong er ham tom inimsi hat pat mong oh gaterit noh sapramur dahapatmur. Noh ihat patdapat wan apteinong ma sapra oh nohe ma sapra apteinong oh gur mandap sa napanggeit napisapri dahapatmur.

⁷Noh apris gursi atei gar dik tit na indipra ma hapat. Hanipyah oh Yahwa. Go isip dik tit indin naporhan yahwa isip dik orhor indipra ma hapat daham noh Masedonia mong aptei aptei maihirnongri meng pot pisus mamen deipat gure pati teinong apripramur dahapatmur.

⁸Noh gin Epesas ap mutuh mama pat oh noh meng pot pisasiprarim mahaw han bap trun ihir noh meng pot pison mandap nagahei mat napapti orhor Got oh pat ohoh ihan nohe kuuhan ihirnong meng pot pison mandap oh namanhet patin noh ihirnong meng pot pisapatmur. Epesas ap mutuh morhor patin den dara amam hapti Pentikos dik oh hatporhan noh sapramur dahat patmur.

¹⁰Timoti oh norhe Hanipyah orhe atamreindein oh norhe mama hat atamreipatru hat atamreipat han ohoh ihan oh gure aptei oh apirhanhe oh manap da tei orhor ha patenoh rim gurhe manap da tei orhor ambur ohnong pomar paptenmur.

¹¹Oh Be han ihat apripat mohwa daham kom asaripri. Ohe ma napor mengnong pomat amrama pomat paptenmur. Imat paptimdapat orhe it aprin ohe mandap oh panggeim darhetinmur. Noh Timoti ohsi; taptem kat han ihirsi ma apripri ihirnong wamat pat ohoh ihan mandap oh panggeim darhetinmur.

¹²Gin diradire taptem Aporos ohe meng oh napotiprohmur. Noh trun tit Aporos go diradire taptem kat han ihirsi Korin ap mutuhnong susa ama Korin ap mutuh sios pati ihirsi tap hat indinmur porpat orhor oh Gin noh na son ina hat patmur ripatmur. Kaput gure patinong aprin ohe mandap oh pat hapathanoh sa aprisipra. Por oh kapkep maro matip ohe meng oh

¹³Gur mamengnong moh dahenmur. Gurnong er da oh apris er nahatiprarim watahat patenmur. Ihat watahat patim gure Krais ohnong ohwi inahatin hatin hanwa ma dahapti da oh kas ham gapa hatipririm watahpei ham kasip hat orhorwi patenmur.

¹⁴Gur guragure Nuhur ihtipera daham ma ihapti da oh Got ohnongo hanip ihirnongo ihirnong da apris bopor mat paptim orhor ihat sashenmur.

¹⁵Nohe taptema. Gur Stepanaso orhe brer imdero ihirnong daham gur am hat patimur. Akaia mong Got ohe nita hat pati ihir ama ihirri Got orhe danong ham Got orhe nita hatpamur. Hapti Gin dir Got orhe nita bap ihirnong panggeit pisasipera daham panggeit pisaptimur.

¹⁶Ama ihat daham tamreipti han bapo ihirsi tap hat patim tamreipti bapo ama ire hrepnong hat patim ire meng amram dindeinmur napor mama kasip mengtei naporpat ohmur.

¹⁷Noh gursi na pato rim pitning hat patin gahan Stepanaso Potunataso Akaikaso ihir apriperhan noh pitning hat pat da oh ire boknong hama da yah ham amam hat patmur.

¹⁸Noh ihat amam hat ma pat oh gure danong ihir ma nayah matiriru hat orhor nohnonghe imat da yah nahatperhan noh amam hat orhor patmur. Ihat pati han ihir ohoh ihan gur ihirnong ihat pati hano rim amam mar paptenmur.

¹⁹Esia mong aptei aptei sios bap ihir gurnong Ihirhe sa yah hat patio rim dahatahatperhan noh mama brak mat nasar ohmur. Akwirasi Prisira ihit gaminsi; ite gamin ap ma tarmur rotu hapti kuuhansi ihirhe gurnong dipwi Hanipyah orhe nita bap nuranur ohoh ihan Ihirhe sa yah hat patio rim dahatahatperhan noh mama brak mat nasar ohmur.

²⁰Gure taptem gonsi mama pati ihir gurnong Ihirhe sa yah hat pati rim dahatahatperhan noh mama brak mat nasar ohmur. Taptem guragur ma wanggoshaya teihe tuhup gosham amam goshenmur.

²¹Gin norhor gur sa yah hat patio rim Por norhe bes tei mama brak mat nasar ohmur.

²²Hanipyah orhe danong na haper daham na bopor mat pati han ihirnonghe Got orhe bopor heisup mar timbas deipat da ohsi ihirsi tap hat ha paptenoh dahapatmur. Hanipyah oh kapkap orhor ha aprinoh dahapatmur.

²³Hanipyah Jisas Krais orhe damdapat orhor Noh ihirnong imat yah matpora ma dahapat da oh gursi tap hat ha napaptenohmur.

²⁴Gur hanipyah Jisas Krais orhe tapnong hat patio rim noh gurnong bopor nahat napapat ohe da oh pitap teinong mara gurnong mama naporpat ohmur. Gin Por nohe menghe kimur.