Read Oksapmin Garesia 1 Bible Online

Garesia 1 - Oksapmin bible

Garesia 1

¹Noh Got ohe meng pot pisapat han Por noh mama brak dei ohmur. Noh mama mihat tamrein sapat moh tit han tit Gin go mama moh tamrein sashenmur napora kis naham na nadarhetipmur. Jisas Krais ohsi; Jisas ohnong ma pamsuhup han at Got ohsi itarhe taman Go meng pot pisona napora kis naham nadarhetpamur.

²Nohsi; Jisas ohe nita ihirsi nuhur mama brak mar Garesia aptei aptei sios gurnong mama nadarheriya ohmur.

³At Gotsi; ama Hanipyah Jisas Krais ihitnong Gutagute damdapat orhor yah matpera ma dahapti da ohsi yah mar manap ham yah hat paten dasi mat paptenmur por gure paten meng oh nadahandeipatmur. Noh Krais oh dire at Got ohe danongwi dimara dire er gap hirmar namdatinmat haputip ma hapat. Hirmat namdama kakdah mama gin ma er hat pati ohe er nang oh natpat napapatin gatmar arpit namdatinmat haputip ma hapat rim gure paten meng oh nadahandeipatmur.

⁵At Got oh Krais ohnong imat darhetipo rim ihan dir ohnong dipdipwi armi mar papten hanmur. Arpinwa. Gur yot menghe dindeipri ritip ohe meng oh

⁶Got oh Jisas orhe damdapat yah matpora daham ma haputip ohe pe oh orhor gurnong namburpatmur. Imat ma namburpat danong oh gur kapkapwi mandama wan mengnong Moh yah menghe dahama dindeiptio rim noh da dokdok sarpatmur.

⁷Gur wan mengnong amram ma dindeipti oh Oh yah meng napanggeitin menghe daham dindeipti orhor na napanggeitin mengnong dindeiptimur. Ihir Krais ohe yah meng ohe boknong oh na napanggeitin er meng oh dip mar yah mengnong er mar gurnong da ban naham er mat naporiptimur.

⁸Nuhur titdo enser ihir titdo nure yah meng ma napotpa meng oh mandapti wan meng tit naporiyahanoh ama han oh irat has teinong eimat ha sonohmur.

⁹Nohe ma ri oh it ritiprohmur. Tit han tit aprisa gure yah meng ma am nahatpa meng oh mandama wan meng tit naporhanoh ama han oh irat has teinong eimat ha sonohmur.

¹⁰Nohe ma ripat meng moh hanip ihir ha amam nahengwe rimda da Got oh ha amam nahenoh rim noh giripatda. Noh hanip ihirnong gapamtinmat giripatda. Basra. Noh Got oh ha amam nahenoh rim giripatmur. Noh hanip ihir nohnong ha amam nahengwe dahahhanoh Krais ohe danongwi ham noh yah hat atamreindiprohda. Basra. Na ihtiprohmur. Noh hanip ire atamreipatin nohnong ha amam nahatingwe daham na tamreipat ohoh ihan noh Krais ohe danongwi hat patim orhe atamreipatmur. Got oh Por ohnong ma ambutip ohe meng oh

¹¹Nohe taptem gur dahatinmur. Nohe yah meng ma napotip meng oh hanip diradire damdapathe na napotipmur.

¹²Noh suhur ham saporhan meng am nahayao be meng naporiyao nahatperhan am ham meng na napotipmur. Na napotipmura; Jisas Krais ohwi nohe kinteinong meng oh pitap matporhan ama pitap matip meng oh napotipmur.

¹³Noh rih Juda nuranure pohon danong dimar ma ihat susuh oh gur amram am hat patimur. Nohe ma ihat sasuh oh Jisas ohe nita ihir ha timbas hatingwe rim noh kasip ham ihirnong sut pisasuhmur.

¹⁴Ihama noh Juda nuranure pohon mengnong am ham dimtin ohe da oh noh han pohon han ihir hatin hapat norhorsi tap san ihirnong oh norhe hrepnong mara nohri hat sasuhmur. Nuranure pohon meng oh isip hat ha sonoh rim nohri han ham kasip hat patesuhmur.

¹⁵Noh ihat sasuh orhor em uh na nit patin orhor Got orhe damdapat Moh norhe han matiprawa dahatipmur. Gahan orhe damdapat yah matpora ma dahapat da ohsi orhe han nahatipmur.

¹⁶Ma nahatip oh Got orhe damdapat Gin norhe brer ohe da oh noh pinggitpora. Pinggirit oh am hama ama da ohsi wan han bap ihirnong meng pot ha pisonoh dahama orhe brer ohe da oh namgim am nahatipmur. Am nahatporhan noh am hama hanip ihirnonghe ti na dahamtipmur.

¹⁷Kopen kis nahatir han noh Jerusarem ap mutuhnonghe sus Jisas ohe rih kis matporhan tamreishe han ihirnong noh ti na wamtipmur. Ti na wamara Arebia mongnong pipmur. Susa atei patdapat gahan it Damaskas apteinong sus indipmur.

¹⁸Patin gahan krismas yitir birhitporhan noh Pita ohsi mengitporo rim Jerusarem apteinong pipmur. Susa ohsi ma indip oh tan kinhei dah ohwi indipmur.

¹⁹Ama ihat indip ohhe Jisas ohe atamreishe han ihirnong kat han ihirnong na wamtipmur. Jisas ohe nap Jemis ohnongwi wamtipmur.

²⁰Noh Got ohe kintei ohoh ihan arpinnap meng napormur.

²¹Pita ohsi tan kinhei dah patin gahan susa Siria mongo Sirisia mongo oh indipmur.

²²Atei patin Judia mong ma pati han Jisas ohe danong hat ma pati sios ihir nohnong na wanahat patina.

²³Mengwi Er nahasuh han oh da tamburkera Jisas ohe yah meng oh ha timbas hatinoh daham ma sut pisasuh meng oh gahan it orhor ameng orhor pot pisapatmuro ritperhan ihir amratpamur.

²⁴Amrama Got orhor imat ma hapat daham Got ohnong armi matpamur.