Read Oksapmin Korosi 4 Bible Online

Korosi 4 - Oksapmin bible

Korosi 4

¹Ihirnong ma papti han gurhe Nure napapat han oh putei mahatdapat napapat ma hapat. Nuhurnong duung dasei nahat napapat han oh patwa. Ihan dir duung dasi mara yah mat orhorwi papteper daham yah mat orhorwi paptenmur. Meng pot pisashen ohe meng oh

²Gur dipwi Got ohnong meng por dahamarwi patenmur. Got ohnong meng por ma dahandeipti oh gure da oh tei patin orhorwi Got ohnong kasip ham dipwi weso por dahamarwi paptenmur.

³Ihat paptim gur At Gota. Gorhe Krais ohe boknong mar ma nareman papatesuh meng oh gin Poro ire pitap teinong mar pot pison mandap oh Got go aisip matinmur. Aisip matporhan ihir meng oh ha poringwemur por nure ihirnong pomat porin ohe meng mandap menghe nadahandeinmur. Noh ama meng orhor pot pisapatin karapus nahatpa ohoh ihan gur nohe meng pot pison mandap meng oh dipwi nadahamarwi paptenmur.

⁴Noh karapus hat pat orhor kuuhan ihirnong Got ohe meng pot pison da oh na mandatin ina hat pat ohoh ihan gur Got go Por ohe ihirnong meng pitap teinong mar meng pot pison mandap oh aisip matinmur por Got ohnong nadahandeinmur.

⁵Hanipyah orhe nita na hat pati bap ihir gure mutuh oh patihanhe onggem ihir ihat patin orhor gure yah hat saya apriya hatin ohe da oh yah mat manap da tei orhorwi pinggit pisashenmur.

⁶Pinggit pisus meng potinnong oh ambar mengteiwi yah mat orhorwi pot pisashenmur. Imat pot pisaptin ihir dahanahatin meng tit dahanahayahanhe it ihirnong ambar mengtei yah mat orhor porin ohe da oh gur sa am hapri. Tikikas ihitnong iraire yah hat pati mengsi darhetip ohe meng oh

⁷Nuranure nap taptem Tikikas oh Hanipyah ohe atamreindin oh nuhursi tap hat kasip hat orhorwi atamreipat hanmur. Ama atamreipat han nure bopor mat papti han ohnong Go susa ihirnong nure ma ihat pati mengo norhe mama ihat pat mengo gonsi meng oh sus potinmur. Ihir da ha yah hatingwe rim susa potinmur por mama darher ohmur.

⁹Onisimas ohsi; ihitnong tap mat mama darher ohmur. Onesimas diradire bopor mat papti taptem mohoh ama han guragurmur. Mama potahat orhorwi tamreipti han yot ihit apris gurnong nohe pat tei mama tarpapat ohe meng oh ihit apris ha napotingwe rim noh ihitnong mama darher ohmur.

¹⁰Nohsi tap hat karapus hat pat han Aristakas oh gurnong Ihirhe sa pati rim dahatahapatmur. Banabas ohe amup Mak ohhe gurnong Ihirhe sa pati rim dahatahapatmur. Ama dahatahapat han oh gure pati tei oh apirhanhe nohe rih gurnong imat ambutinmur ma napotirru mat orhor ambutinmur.

¹¹Jastas ohe win tit Jisas ohhe gurnong Ihirhe sa pati rim dahatahapatmur. Ama Juda hat pati yitir han ihirwi nohsi Got ohe napapindin hrepnong nahatin ohe atamreindin oh atamreiptimur. Ihat ma atamreipti oh nohe danong pang naham napanggeiptimur.

¹²Epapras guragur tap bap ohhe gurnong Ihirhe sa pati rim dahatahapatmur. Oh Krais ohe atamreipat han ohmur. Oh arpupsi hat orhorwi dipwi gure indin ohe meng oh At Gota. Ihir gorhe danong hatin ohe da oh hanipyah ire dahat ma sapti da hatin hat ha patengwemur. Ihat patin gorhe Ihir ihat ha patengwea. Ihat yah hat orhorwi ha sashengwe gorhe ihat ma dahapat da ohsi ihirnong am mar paptenmur. Imat papatin ihir gwe ma dahapat da oh isip am hat ha patengwemur por nadahamarwi patmur.

¹³Ohe ma nadahandeipat oh Reodisia aptei hano Hiraporis aptei hano ama aptei han iresi tap mat nadahadeipatmur. Ohe gure danong ham ma arpupsi hat orhor ma nadahadeipat oh noh am hat pat ohoh ihan arpin meng gurnong mama naporpat ohmur.

¹⁴Nuranure bopor mat pati han dokta Ruksi be han Demas ihithe gurnong dahatahaptimur.

¹⁵Diradire taptem Reodisia aptei ihirhe sa yah hat patio rim Por oh dahatahat hangwermur potinmur. Nimpa uhe apteinong tarmur ma beten hapti ihirnonghe Nimpa uhsi sa yah hat patio rim Por oh dahatahat hangwermur potinmur.

¹⁶Gur nohe mama brak mat nasar meng moh sapti Reodisia aptei ihirnong apisonmur. Apisaperhan ihir rotu haya tei oh sa satipri. Nohe ihirnong ma adarhetir ohe brak ohhe gur dara guragure ma tarmuripti tei oh satinmur.

¹⁷Gur Akipas ohnong Por oh Akipas oh Hanipyah ohe tapnong hat patim orhe atamreindin ma apdap oh atamreim ha amamen matinohmur napor nat hangwermur potinmur.

¹⁸Gin gurhe sa yah hat pati napor Por noh pepe meng mohwi gin norhe bes tei brak mat nasar ohmur. Gur nohe ma karapus hat patnong mohhe hanhan nahapri. Got ohnong nadahamarwi paptenmur. Nohdapathe gure nadahamtin oh Got gorhe damdapat Yah matpora daham bapkei mat papat da oh ihirnong bapkei mat paptenmur por nadahamara gurnong mama brak mat nasar ohmur. Gin nohe meng oh kimur.