Read Oksapmin 2 Tesaronaika 1 Bible Online

2 Tesaronaika 1 - Oksapmin bible

2 Tesaronaika 1

¹Poro Sairaso Timotio nuhur Tesaronaika aptei Got ohe nita kuuhan bap gur diradire at Got ohsi; Hanipyah Jisas Krais ohsi tap hat patio rim mama brak mat nasariya ohmur.

²Nuhur diradire at Gotsi; Hanipyah ihitnong Gut ihirnong gutagute damdapat orhor Yah matper daham ma yah deipti da ohsi; manap gosham yah hat paten da ohsi mar paptenmur por nadahadeiptimur. Poro ire Tesaronaika ihirnong win adaptuhut pisashe ohe meng oh

³Nure taptem bapa. Gure ma Hanipyah ohnong Orhorwi inahatin hatin hanwa ma dahat pati da ohsi; arwananah ihirsi da gosat pati da ohsi ama ihat dahapti da yot oh guragure bok oh isip hat saptio rim nuhurhe Ihir ihat saptio rim Got ohnong dipwi weso naporiptimur. Weso ma naporipti oh Got oh ama weso potin da oh nuhurnong napin pat ohoh ihan Got ohnong weso naporiptimur.

⁴Weso pora Got orhe nita bap aptei aptei ma pati ihirnonghe Tesaronaika sios bap ihir ihat kasip hat orhorwi patimur por gure winnong armisi naham win nadaptuhut napisaptimur. Nuhur imat gure winnong ma nadaptuhut napisapti oh mamaru mat napisaptimur. Kat ihirdapat Tesaronaika aptei pati Got ohe nita ihirnong Maihir Got orhe nita bapmur rim ina ruumsup apriperhanhe ihir batbet isip dat sapti orhor ire Got ohe danong hat ma pati da oh na gapa ham kasip hat orhorwi ihat saptimuro por gure winnong armisi naham win nadaptuhut napisaptimur. Got ohe duung dasi hat pat da ohsi nasatipra ohe meng oh

⁵Gure na gapa ham kasip hat orhorwi ma sapti oh Got orhor duung dasi hat orhorwi nasam inahapat hanhe dahatin ohe da oh pinggit pisaptimur. Gure batbet dar ma ihat sapti oh Got oh Maihir norhe papindin hrepnong hatin inasi hat patim ihat saptimur naporpatmur.

⁶Got oh duung dasi hat pat han ohoh ihan gure ruumsup napripti han ihirnonghe orhe duung da orhorsi sama ama ruumsup nahapti batbet orhor iraire boknong apripramur.

⁷Aprisa orhe danong ham ina ruumsup daripti dirnong pang inasi nahatipramur. Duung da ohsi naham ma nasatipra oh Hanipyah Jisas Krais orhe ma apripra dik oh inahatipramur. Orhe ma apripra oh orhe enser kasipnap ihirsi; irat has ohsi tap hat apris pitap hatiprimur.

⁸Ama inahatipra dik oh Got ohnong hanhan mar ihat sapti kuuhan bapo Hanipyah ohe yah mengnong kom asar mandapti kuuhan bapo ihirnong iraire er hat ma sapti ohe er yan oh apripramur.

⁹Er yan ma apripra ihirnong oh orhe kasip ohsi has mat papat teinong oh na matipranapmur. Irarhe wan tei eimat dipwi batbet dar paten teinong matipramur.

¹⁰Ma imtipra oh Got orhe ma Noh ama dik oh Hanipyah ohnong pitap matporhan orhe nita bap hat patim Ohwi inahatin hatin hanwa ma dahat pati kuuhan ihir ohnong armisi da maro amam maro sa hatipri ma dahat pat dik orhor imtipramur. Orhornong armi mar ma imtipri oh nuhur gurnong meng napotperhan gur amram arpin meng naporiptihe daham orhornong am hat pati bap gursi; diradir tap hat orhornong armi matiprimur. Poro ihir Tesaronaika ire paten meng adahandeishe ohe meng oh

¹¹Dir orhornong armi matin dasi hat patin oh ha aprinoh rim nuhur gure paten meng oh dipwi Got ohnong nadahandeiptimur. Gure paten meng ma nadahandeipti oh mamaru mat nadahandeiptimur. At Gota. Gorhe Ihir norhe nita hat patim mama da mohsi mihat orhorwi ha sashengwe daham Gur norhe nita hatinmur por gorhe nita mat papat bap ihir gorhe ma dahapat da ohsi hat patim saya apriya hat ha patengwemur. Ihat patima gorhe kasip ohsi ire Nuhur mama yah danong mohwi ihtipera ma dahapti dao Krais ohnong ohwi inahatin hatin hanwa daham yah hat ma sapti ohe dao ama ihat sashen ohe inasi mat paptenmur por dipwi nadahamar paptimur.

¹²Imat paptim Hanipyah Jisas Krais gutagute taman gutagute damdapat orhor Ihirnong imat yah matper ma dahapti da ohsi mat paptenmur. Imat paptim ihir ama da ohsi hat orhorwi saya apriya haptin kat ihir wamara Hanipyah gorhe imat papat danong oh wamara gorhe winnong armisi nahat sa napaptepri. Gorhordapathe gorhorsi tap hat pati ire winnong armisi mar paptenmur por nadahandeiptimur.