Read Oksapmin 2 Tesaronaika 2 Bible Online

2 Tesaronaika 2 - Oksapmin bible

2 Tesaronaika 2

¹Nohe taptem gur amratin. Dir Hanipyah Jisas Krais oh it apris orhe duupnong naham ruprup nahatiprawa daham dir minhan patimur.

²Ma minhan pati han oh apdormur naporiyahanhe kapkap bupang rim Arpinkin dahamhe da er hapri. Apdormur ma naporipti han ihir kat ihiroh Nuhur Got ohe Yahsup oh nure atem teinong rit natporhan naporiptimur. Kat han ihir Nuhurra Poro ihir naporiptin nuhur amram naporiptimur. Kat han ihir Poro ihir brak mar nadarhetperhan nuhur sama naporiptimur. Imat naporiyahanoh gurri ama mengnong oh Arpinhe daham amrapri.

³Ama dasuh meng ohnong amrapririm mohnongri dahat patenmur. Mamarumur. Hanip ruumsan kat han ihir Got ohnong sakarap mar kom atin da ohri popriyao Got ohe danong na ham isipnap er hat pat han orhornong eimat timbas hatin han ohri pitap tei ham apiro ama ihat pati han bap ihirri hat apriprimur. Ama ernap han oh na apin pat ohoh ihan ama ihat dasuh meng naporiyanong asoh Arpinhe dahapri. Arpin han oh kom apripra ohoh.

⁴Ama Got ohe danong na ham isipnap er hat pat han oh mamaru hat apripramur. Got orhornongo Got ohemur por ma armi deipti han erero kat han ire erernong Moh nure Gotmur poripti erero oh gonsi tap mar amkara Nohwi ihtin han hat patmur rim orhe winnong armi taham tandaptuhutipramur. Tandaptuhura Got ohe ap yawar ohom rosa Norhor Gotmur rim Got orhor hatin ham tongnotipramur.

⁵Ameng oh noh gursi patim naporisuh meng oh gur hanhanda. Gur am hat patimur. Ginhe it tap meng orhor naporpatmur.

⁶Gure tit ma am hat pati oh ama er han oh gin orhor pitap hatiprarim tit han tit mandap apam gaheimat papatmur. Ama gaheimat papat oh Got orhe Ama dik oh sa pitap hatipra ma dahat pat dik oh kopen ohoh ihan Satan ohnong Go gaheimat paptenmur potporhan Satan oh gaheimat papatmur. Gaheimat ma papatnong oh gur am hat patimur.

⁷Ama ernap han oh pitap teinong hatiprarim gaheimat papat orhor ama han ohe er da oh ahar tarpat sapatmur. Ahar tarpat sapatin orhor pitap hatiprarim mandap gaheimat papat han Satan ohnong Got oh dar wan teinong mara ernap han ohnong pitap teinong matipramur.

⁸Pitap teinong matporhan Hanipyah Jisas oh orhe atem teidapat Gin go timbas hatina por ohsi; orhe ma apripra has kasip ohsi ama ernap hat sapat han ohnong sum timbas matipramur.

⁹Ama ernap han ohe ihat ahar apris ma pat oh Satan orhe er hat pat orhe kasipnap kasip ohsi kasip matporhan ama kasipnap ohsi apris patim hanip dire pati mutuhnong apripramur. Ama ohe kasip ohsi aprisa arpin tarpatipra ohe kis hano hanip dire na imtin hatin hano oh arpin Got orhe kasip ohsi ha indei hatin mat imtipramur.

¹⁰Indeipat er apteinong son inasi hat pati bap ihirnong orhe dasuh er da ohsi isipnap dasuh matipramur. Arpin mengnong amratperhan namburipra ohe mengnong na amratiprohemur daham kom at pati ohe pe oh er dasi han oh ihat apris dasuh mar ambutipramur.

¹¹Got oh Ihir norhe nambutin arpin mengnong moh kom at pati ohoh ihan noh dasuh mengnong moh arpin menghe dahatin ohe da ohsi matpora.

¹²Mara arpin mengnong moh na amratin menghe daham mandama er danong hat son ohe danong oh amamsi hat orhor dimat ha sashengwemur. Ihat patin noh sama Gur er yan datin han bap gurmur pora sama heisup mat paptepramur daham da aban matin sup oh ire mutuhnong matipramur. Gur kasip hat orhorwi patenmur ritip ohe meng oh

¹³Nure taptem Hanipyah oh bopor nahat pat bapa. Got oh weso napotin inasi nuhurnong nahatporhan nuhur Got ohnong dipwi weso naporiptimur. Weso ma naporipti ohe duuptei oh mamaru hat patmur. Rih mong na tarpat patin orhor gurnong Got oh Ama han ihirnong norhe han matipramur. Norhe han ma matipra oh norhe Yahsup oh ihirnong irarhe teinong mar ongeng mat sa paptepra. Imat papatin arpin mengnong amram Arpin menghe daham amram dindeiptin noh ambutipramur daham orhe han naham kis nahatipmur. Imat kis naham napapat hano rim nuhur dipwi weso naporiptimur.

¹⁴Got oh gurnong kis nahat napapatin nuhurhe Got ohe yah meng oh gurnong ma naporipti ohe pe oh Got oh gurnong Gur norhe han hatinmur naporpatmur. Ma naporpat oh Hanipyah Jisas Krais orhe has yah dasi hat ma pat oh ihirhe irair tap hat sa datipri daham gurnong norhe han hatinmur naporpatmur.

¹⁵Orhor imat kis naham namburpat han ohoh ihan nure taptem gur nure be naporipti mengo brak tem ma naporipti mengo ama Got ohe sawa meng naporipti mengnong mandatipririm kasip hat orhor amram marin patenmur.

¹⁶Hanipyah Jisas Kraissi; at Got ihit dirnong bopor nahat napaptimur. Bopor nahat napaptim itaite damdapat orhor Ihirnong imat yah matpera dahapti ohe pe oh dirnong oh saheih ham ina ruumsupsi hat patin natimbas mara eimat pang inasi hat paten ohe dasi nahayao yah nahatiprawa daham ma minhan pati ohe da oh tit dawi naham kasip nahayao nahat napaptimur.

¹⁷Ama inahat napapti han yot itaitnong gure paten meng oh Gut ire danong akasip mara pang inasi mat paptenmur. Ire saptinonghe ti da ti da yah hat sapti ohe da ohsiwi mat paptenmur. Menghe yah mengwi rit sashen ohe dasiwi mat paptenmur. Gut imat ihirnong paptenmur por nadahandeiptimur.