Read Oksapmin Hibru 4 Bible Online

Hibru 4 - Oksapmin bible

Hibru 4

¹Got orhe ihir apris matei sa tupetipri ritip meng oh na timbas ham pat ohoh ihan gur orhe napotip teinong sonmat oh wan katnong hapri. Wan katnong hatperhan Got oh wanahama tupetin teinong na hatin ina ham wan katnong haya ma hapat dahatiprarim gur ihan kas ham duutin dasi hat orhor orhe napotip teinong hatinmat orhorwi sashenmur.

²Ihat sayahan oh yahmur. Ihat na susa rih gure ranir Isrer ire da hat sashe da hatin hat sayahan oh ermur. Ihir tupet indin tei meng oh amrashe orhor arpin dam timdin meng ma hapat na dahatperhan dam na timdipmur. Dam na timama ihirnong ma na panggeisuh meng ohmur. Ihirnong ma porisheru mat orhor gin gurnonghe dam timdin ohe yah meng moh naporiptimur.

³Dam timdin meng naporipti moh Arpin dam timdin meng naporiya ma hapat dahapti kuuhan dir oh orhe Matei sa tupetipri napor nakis matip teinong haptimur. Orhe tupet indin tei ohe meng ma napotip oh tit oh mamaru mat napotipmur.Noh ihirnong heisup mat papatim orhor ihir susa sa tupetipri ma dahat pat teinong oh ihir eimat eimatnap na hatiprimur. Noh heisup ham awam akwera giripatmur. Got oh ameng oh ritporhan brak matpamur. Got oh erer oh gonsi darpama mamen deipat orhor tuperpat ama tupetin tei oh patim ihirnong ameng oh potipmur.

⁴Got orhe ma tupetip oh tit han tit Got oh bes oh ihat tupetip ma hapat daham ma brak matip ohe meng oh mamaru hat patmur. Got oh Erer moh noh gonsi mamen dei ma hapat. Gin bes moh noh tupetpora daham tupetipmur por brak matipmur.

⁵Got oh orhe tupetin tei pat ma hapat ha dahengwe rim brak matpa meng ma napor oh gin it napotiprohmur. Ihir susa sa tupetipri ma dahat pat teinong eimat eimatnap na hatiprimur ritporhan brak matpamur.

⁶Ama tupet indin ohe yah meng oh rih ihir amrashe orhor sakarap ham na dindeishe ohe pe oh ama tupetin teinong na hatpamur. Ihir tupetin teinong na hatpa ohoh ihan Got oh Hanip ihir matei sa tupetipri ritip tei oh patmur. Pat ohoh ihan kat dir saprimur.

⁷Ire son ohe dik atip teinong na pipa ohoh ihan dire son ohe dik oh komdapat natipmur. Komdapat ma natip dik gin mama pati dik morhor son ohe dikmuro napor dik natipmur. Ama dik natip meng oh komdapat tarpatip han Depit ohe atem tei rit atporhan brak matipmur. Ma brak matip meng oh rih ma napor meng orhor it napotiprohmur. Mamaru hat patmur.Gin mama pati dik morhor gur Got ohe meng tit naporhanhe Ama napor mengnong oh na amratiprohemur daham kasip ham komhe asaripri. ritporhan brak matipmur.

⁸Josua oh ihirnong Kenan mongnong pisus ire ma tupetpa oh tupetin oh ateiwimur Got oh dahatipneng komdapat Depit ohe atem teidapat tupetin tei oh patmur it na ritipnengmur.

⁹Got oh komdapat tit tupetin tei oh patwa daham ritip ohoh ihan Got orhe dophei dah tamreima bes oh tupetipru hat Got orhe nita bap dire ihat tupetin dik oh patmur.

¹⁰Ihat ma pat oh mamaru hat patmur. Got oh Ihir ihat sa tupetipri daham ma natip tupetin teinong hapti diroh Got ohe erer mamen deipat tuperpat ma tupet patru hat orhor eimat tupet pateprimur.

¹¹Ihat tupetipri aptei oh pat ohoh ihan ire sakarap ham ire tupetin teinong na hatparu gurhe ihtipririm kasip hat orhor Eimat tupetipri teinong sapriwa daham kasip hat orhorwi patenmur.

¹²Got ohe meng dam tarpapat kasip meng oh mamaru hat patmur. Bior tansi tansi gret hat ma patnong oh Got ohe meng gretnap meng ohe hrepdapat mat papatmur. Ama gretnap ohdapat dire mutuhnong hama tamsi; awarsinong moh orhe meng gret ohsi katket mara tam orhe dei awar orhe dei mar pomat dason mat papatmur. Indeipat diradire ina tei dahapti dasi; mutuhdapat ma dahapti dasi ayotnong ohhe pomat dason mar wamat napapatmur.

¹³Orhor imat napapat han ohoh ihan Got orhe darpatip erer oh tremanhe ti na patmur. Gonsi pitap teinong hama Got orhe kintei oh pitap teinongwi patmur. Dire ihapti meng oh sam potin han oh Got orhe kintei oh pitap teinongwi hat patmur. Diradire hanat bok han Jisas oh diradire ruumsup hayanong am hat patim napanggeipat ohe meng oh

¹⁴Dire hanat bok han duuptei han hat ma pat han oh Got orhe mon Jisas orhormur. Oh aw teinong rus aw tei mahat ma pat oh orhor tandaptuhutin han hat pat ohoh ihan guragure Oh inahatin hatin hanwa daham ma rit sapti da oh mandapri. Kasip hat orhorwi marin paptenmur.

¹⁵Ama diradire hanat bok han oh diradire kakdah mohe ruumsup nahapti dao er hat ha songwerim kis nahapat dao oh orhor orhe boknongwi mar am hat pat ohoh ihan dire ina bok moh ruumsup namkarhanhe orhor orhe boknongwi mar am hat pat han ohoh ihan oh Ihir ihat pati ma hapat daham hinhina naham napanggeipatmur. Er hat son da oh orhe boknong kis deisuh orhor orhordapat ambapte mar er hat na sasuhmur.

¹⁶Orhe damdapat orhor Noh ihirnong imat yah matpora daham napanggeim yah nahapat han ohoh ihan dir orhe duupnong ham dahamtinmat na kas haptimur. Ruumsup namkat pathanhe watahpei hat orhor dahandeiptimur. Dahamtiperhan orhor hinhina naham napanggeitiprawa dahat pat yah da ohsi napanggeipatmur.