Read Oksapmin 1 Jon 5 Bible Online

1 Jon 5 - Oksapmin bible

1 Jon 5

¹Gur mohnong dahenmur. Jisas ohnong Got orhor dirnong namburin han nadarhetip ma hapat dahapti han bap dir Got orhe brer hat patim ihat dahaptimur. Orhe brer hat patim ihat dahapti ohoh ihan itap orhornong da apris bopor deipti da hatin hat orhor orhe brer hat patim ihirnonghe imat da apris bopor deiptimur.

²Gur Got ohnong da apris bopor mar orhe naporpat sawa meng oh gonsi amram dindeiyahanoh ama ihapti ohe pe oh Noh Got orhe nita ihirnonghe imat bopor mat papat ma hapat daham am haptimur.

³Got orhornong da apris ma bopor deipti ohe da oh orhe naporpat sawa meng gonsi amram dindeipti da ohmur. Kakdah ohe danong ambapte matin ohe da oh Jisas ohnong Ohwi inahatin hatin hanwa ma dahapti ohe da ohmur. Got orhe brer hat pati dir ama da ohsi hat pati ohoh ihan ama da ohsi kakdah ohe danong ambapte deiptimur. Ama dasi hat pati ohoh ihan Got orhe sawa mengnong oh dimtin sawa meng hat pat sawa meng ohmur.

⁵Kakdah mohe danong ambapte deipti han bap ihir de ihir dahayahanhe Jisas ohnong Got orhe brer darhetip hanwa ma dahapti han bap ihirwi kakdah mohe danong ambapte deipti han bap ma hapat dahenmur. Got oh orhe mon ohe boknong mar meng am nahapat ohe meng oh

⁶Ama Got orhe brerwa dahapti han Jisas Krais oh kakdah mama wandasa tom waso heim tandukero ma hatip ohe pe oh Arpin Got orhe brer ma hapat dahatin ohe da oh dirnong namgim ihtipmur. Ma ihtip oh tom ohwi na waihipmur. Tom ma waihip ohsi orhe heim ma tanduketip ohsi tap mat namgim ihtipmur. Ihtiporhan Got orhe Yahsup oh arpin da ohe duuptei han hat pat ohoh ihan Krais orhe ma ihtipnong oh arpin Got orhe brer hat patim ihtip ma hapat dahatin ohe da oh napor am nahapatmur.

⁷Arpin Got orhe brermur dahatin ohe danong ma namgipat oh yitir damur.

⁸Tit da oh orhe tom waihip ohe da ohmur. Tit da oh orhe heim tanduketip ohe da ohmur. Tit oh Got orhe Yahsup ma am nahapat ohe da ohmur. Ama yitir da ihiroh dirnong nitat da na am nahaptimur. Tit dawi hama Jisas oh Got orhe brermur dahatin ohe danongwi am nahaptimur.

⁹Hanip ire naporiya meng oh dir amram arpin menghe dahaptimur. Hanip ire naporipti meng oh Got orhe naporpat meng hrepdapat hat pat ohoh ihan orhe mon ohe boknong mar naporpat meng moh atnap isip ma hapat daham amranmur.

¹⁰Got orhe brer ohnong Ohwi inahatin hatin hanwa dahayahanhe ama ihat dahapti han gure da mutuhdapat orhor Got oh orhe mon ohe boknong mar naporpat meng moh Arpin ma hapat dahatin ohe da oh gure da mutuh oh pat haprohmur. Got orhe naporpat mengnong Arpinhe na dahapti han bap ihir Got orhe mon ohe boknong mar naporpat mengnong moh dasuh menghe dahapti ohoh ihan Got orhornong dasuh han hatin mat paptimur.

¹¹Got orhe ma naporpat meng oh mamaru hat patmur. Got norhor norhe brer ohe dap teidapat gurnong eimat yah hat paten dasi nahat napapatmur napor dirnong am nahapatmur.

¹²Yah hat eimat paten da oh imat napin pat ohoh ihan mon orhe tapnong hat pati bap diroh yah hat eimat paten dasi hat pati bap dirmur. Mon orhe tapnong na hat pati bap ihiroh ama eimat yah hat paten dasi na hat pati bap ihirmur. Jon ohe pepe ma brak matip ohe meng oh

¹³Monhera. Nohe mama brak mat nasar moh Got orhe brer ohnong Ohwi ihtin han pat ma hapat ma dahapti gurnong brak mat mama nasar ohmur. Ma nasar oh gur Nuhur arpin eimat yah hat paten dasi hat pati ma hapat daham ha am hatingwe rim noh mama brak mat nasar ohmur.

¹⁴Got orhornong dahamtinmat oh orhe Imtipora ma dahapat danong ohwi dir dahamtipera daham dahandeiyahanoh na kas ham Oh arpin inahatiprohwa daham watahpei ham orhe duupnong ham dahandeiptimur.

¹⁵Imat ma dahandeiya ohe pe oh Arpin amrama gin ma dahandeiya han oh gin napir ma hapat dahaptimur.

¹⁶Got orhe nita bap guragur wandeiyaoh tit uh tit eimat batbet dar paten ohe hrepnong na matin ohe er da oh dat sapathanoh arwapir gur wamara Got oh ha ayah matinoh rim Got ohnong adahandeinmur. Adahamtiperhan ohe er hat sapat da oh dat amdama eimat paten dasi sa matiproh. Nohe gur imat adahandeinmur ma napor meng moh eimat batbet dar paten ohe hrepnong na matin ohe er hat sapti han ire adahandein ohe mengnong oh napormur. Eimat batbet dar paten ohe hrepnong nahatin ohe er da ohri patmur. Ama danong hat pati han ire ihat pati danong asohhe adahandeinmur na napormur.

¹⁷Er hat ma sapti oh gonsi er dawi hat patmur. Ihtin orhor ti ma er hat sapti oh eimat batbet dar paten ohe hrepnong na nahatin ohe er danong hat saptimur.

¹⁸Dir am hat patimur. Got orhe brer ihir Nuhur er hat sapera daham er hat son ohe danong hat na saptimur. Got orhe kis mar napdap brer oh orhe hrepnong naham orhe damer ohe tan tare nahat napapat ohoh ihan Satan oh kinhat apris nambur napisus er da teinong nahatiproh. Oh dirnong na inahatin ina hat patmur.

¹⁹Dir am hat patimur. Kakdah moh ohe erer gon oh gonsi Satan ohe hrepnong mat papatmur. Papatmura; Got orhe brer hat pati dirnong oh Got orhor orhe hrepnong nahat napapatmur.

²⁰Dir am hat patimur. Got orhe brer oh kakdah mama wandas patesuh ohe pe oh dire da nadapema arpin Got orhornong am hatin ohe da oh napdapmur. Napriporhan dir ohnong am haptimur. Am hapti orhe brer Jisas Krais ohsi tap hat ma pati oh Got orhorsi tap hat patimur. Ama ohsi ihat pati Got orhor arpin Got eimat paten dasi nahapat Got orhormur.

²¹Nohe taptem brer gur han apsup ihirnong kom asar eimat mandanmur. Gin Jon nohe meng oh kimur.