Read Oku Mat 10 Bible Online

Mat 10 - Oku bible

Mat 10

¹Jesus nɛy tooy ghon-ɛyfɛl nə wen ghɛ njio-sebaa ɛyvəm è fo əbtaawe se ghene ge ghene yɛ jume ɛyfim so, gese chuke tenkii teyaf tejim, nɛ̀ ɛynkii əbnəə wɛ əb fóon ngɛk se əbghune.

²Lɛɛ teghele ghɛ́ ntum nə Jesus ghɛ njio-sebaa ɛyvəm. Wɛ mbiy lu Simon wɛ ɛ́ toŋten ge Bita nɛ̀ wan-no ə wene Andole, nɛ̀ ghon ə Zebedee ghɛ Jɛms ghene Joon,

³nɛ̀ Filib ghene Baltolomew, nɛ̀ Ntomas ghene Matio wɛ wel ɛyfii shile, nɛ̀ Jɛms wɛ wán ə Alfaeus, nɛ̀ Taddaeus,

⁴nɛ̀ Simon wɛ əb nè luŋen nɛ̀ ketume, gese nɛ̀ Judas Iskaliot wɛ əb nè kalen əmnaŋ, ɛ́ koo Jesus.

⁵Jesus loo tume ghel ghɛ njio-sebaa ghin, è tef ghene ge: Ghàà ghɛn ndu se ɛylak nə əbtume, nɛ wel yɛ ke se ndu ɛ ntɛke Samalia.

⁶Ghɛn ndu nɛ lu se ghele Islaele, ghene lu ka bvəyse njiɛ sɛ se lɛyenmen.

⁷Ghɛne loo ndu, ghɛn yɛ fekte se ghele ge: Ɛysak ə Feyine shi ɛ nchiɛ ɛ nchiɛ.

⁸Ghɛn yɛ chuke ghel, lose ghel se ɛykuo, chuke ghel ɛyyafe kensaase, gese jume ɛyfim. Mɛ fó əbtaawe vin se ghɛn se lólò, ghɛn yɛ chuke ghel so se lólò.

⁹Ghɛne loo ndu ghàà wel liɛ əbkaa.

¹⁰Ghàà wel liɛ kebam se ɛyjɛl fɛn kene ndəy selee, kene guose ɛvəə selee, kene mbàŋ, bek ge ɛ́ lu se yɛ toknen nɛ̀ wel əbfɛlen.

¹¹Ghɛne lii naa ɛ ntɛk ɛykɛ, ghɛn kɛŋ wel wɛ əb koŋen se fiisene ghɛn, è yɛ chii ghɛne ghene se chin se ka ghɛne nɛ̂y lòò se fo.

¹²Ghɛne ndu è lii ɛ ndaa, ghɛn suuy ge: Əmnyiaŋe yɛ lu se ghɛn.

¹³Ɛ́ fiisen ghɛn, ghɛn mak mbose se ndaa fo, yɛ lu wɛ ge ɛ́ jia fiisen ghɛn, ghɛn vəse é mbose yɛn gok se ghɛn.

¹⁴Ke gan ge ɛ́ jia fiisen ghɛn ɛ kelik, è jia yio kenəə kɛ ghɛne suuyen, ghɛne loo lòò se fo, ghɛn tɛte kebvəle kɛ foo se ghɛn ə ɛvəə.

¹⁵Mɛ suuye əbluuy se ghɛn ge: Kɛ Sodom ghene Gomolla yî yɛ ghoblen ɛ kechii nsak, chia kɛ ntɛk nɛ̂ ghane.

¹⁶Yɛn-a! Mɛ tume ghɛn ka bvəyse njiɛ ɛ məme baase. Ke me se lu ge ghɛn yɛ feesen ka yiose dî, gese loole ge wɛ̀ɛ̀ ka əbnlal dì.

¹⁷Ghɛn yɛ toknen bek ge ghele nɛ̂y koo ghɛn è ndu so se ndaa nsak, è yɛ lu se gese se tɛle ghɛn ɛ ghene ngayse ɛyjem.

¹⁸Ɛ́ nɛ̂y guf ghɛn è ndu so se ɛyshiɛ nə ghɛ ɛ́ saken, nɛ̀ tefone bek mɛ é ghɛn fekte kenəə ə Feyin se ghene gese nɛ̀ se əbtume.

¹⁹Ɛ́ koo ghɛn è loo sak, ghàà wel yɛ kán ge yi sɛ nɛ̂y suŋnen lɛɛy-a, gese nɛ̀ ge yi sɛ suuy gee ghɛ-a, bek ge Feyine nɛ̂y fo kii dii kɛ wɛ̀ suuy kɛn əbliy fo.

²⁰Giɛ sɛ se nɛ̂y yɛ fəy ɛ ghɛn ɛychio jia nɛ̂y yɛ lu sɛne, se nɛ̂y lòò se Keyioy kɛ luun kɛ Ba ə wɛn wɛ əb suŋnen ɛ məm nə ghɛn.

²¹Ɛ nɛ̂y loo lu əbliy fo, é wel yɛ kal əmnaŋ kum wán-nyii ge ɛ́ yuy, nɛ ɛbaye kale əmnaŋ ge ɛ́ yuy ghon ə ghen, nɛ ghone bo fəye wiy fô ghene ɛbaa ə ghene nɛ̀ ɛnoo ghene, dî kale əmnaŋ ge ɛ́ yuy ghene.

²²Ghel ɛjime nɛ̂y yɛ bane ghɛn bek ka ghɛn luun ghel ə ghom, dî nɛ naa ndɛ wɛ əb nɛy teem ketaan se chin se kenləysen naa boy.

²³Ɛ́ nɛ̂y loo nəkse ghɛn ɛ ntɛk, ghɛn nyiŋ è ndu se ntɛk ɛylee. Mɛ suuy əbluuy se ghɛn ge ghɛne jia nɛ̂y jɛl ntɛke sɛ Islaele sejim nɛ Wanwele báà gwiy.

²⁴Wan-ɛyfɛle báà se chia ba-ɛyfɛl nə wen, nɛ kekose chia wiy ba-ɛyfɛl nə wen.

²⁵Wan-ɛyfɛl lu se yɛ saŋle se yɛ lu ka ba-ɛyfɛl nə wen, nɛ kekose saŋle se yɛ lu ka ba-ɛyfɛl nə wen. Ɛ́ lɛ toŋte ba-ɛykfəə ge Beelzebul, é ɛ́ jia toŋte ghel ə wen ɛ teghel tɛ te befen chia ɛyghene-a?

²⁶Ke me se lu ge ghàà ghɛn yɛ fane ghel. Ghɛn yɛ ke ge chəm wiy yɛ ɛy yî buu ghàà bvəsen, nɛ̀ kenəə kenlete wiy kɛ ɛ́ yî buu ghàà yɛ ke.

²⁷Kenəə kɛ me suuyen se ghɛn ɛ nfiine lu nɛ ghɛn lu se yɛ suuy ɛ chuy ɛybanen, nɛ kɛ ɛ́ chəmten chəmten se ghɛn lu nɛ ke nɛ̂y fəy ɛ əbkwak.

²⁸Ghàà ghɛn yɛ fane ghel ghɛ lòó ghene yuy kɛn kechak əbghun è jia yuy keyioy. Ghɛn yɛ fan nɛ lu Feyin. Lu wen wɛ lòó əb yuy wel, è bese keyioy ə wen ɛ kemboo əbvəs.

²⁹Lòó wel yun əmnjoŋtekule əmbua se əbkaa nɛ kechine tene wiy, dî nɛ chèmè lòó femoke jia fəy se ntiɛ nɛ Feyine maa.

³⁰Chèmè lu nəŋ sɛ se luun ɛ wɛ̀ ketuu fene Feyine ko ke ka se luun.

³¹Ke me se lu ge ghàà ghɛn yɛ fan bek ge ghɛne chia əmnjoŋtekule naa se ɛydio.

³²Naa ndɛ wɛ əb beemen ɛ ɛyshiɛ nə ghele ge yi lu wel ə wom, lu nɛ Wanwel yî beeme wen sɛy ɛ ɛyshiɛ nə Ba ə wom ɛ ɛyyio.

³³Dî nɛ naa ndɛ wɛ əb maan mɛ ɛyshiɛ nə ghele lu nɛ mɛ yî maa sɛy wen ɛ ɛyshiɛ nə Ba ə wom ɛ ɛyyio.

³⁴Ghàà ghɛn yɛ kwaate ge mɛ nè gwiy nɛ̀ əmnyiaŋe se ketuu ntiɛ. Mɛ nè báà gwiy nɛ̀ əmnyiaŋe; mɛ nè gwiy nɛ̀ əbngiabsene.

³⁵Mɛ nè gwiy se nɛɛy ge ghon ɛluumene jia yɛ fəy fo ghene ɛbaa ɛ ghene, é ghon ɛkiye jia yɛ fəy fo ghene ɛnoo ə ghene, é əbkiy ə ghone jia yɛ fəy fo ghene ɛnoo lum nə ghene.

³⁶Wel əbbaanese nə wel əbtaa nɛ̂y yɛ lu wel ɛykfəə nə ghen.

³⁷Naa ndɛ wɛ əb koŋen ba ə wen kene no ə wen chia ka əb koŋen mɛ báà kwɛnten se yɛ lu wel ə wom, nɛ naa ndɛ wɛ əb koŋen wán ə wen əbluumen kene əbkiy chia ka əb koŋen mɛ báà kwɛnten se yɛ lu wel ə wom.

³⁸Naa ndɛ wɛ əb báà bɛɛy kentam ə wen è yɛ jɛl so ɛ mɛ ɛybam báà se lu kekwɛnten se yɛ lu wel ə wom.

³⁹Naa ndɛ wɛ əb luŋen se babte ɛychii ə wen náà lɛɛy ɛyghene, nɛ naa ndɛ wɛ əb lɛyen ɛychii ə wen bek mɛ náà kiile ɛychii.

⁴⁰Naa ndɛ wɛ əb fiisen ghɛn, fiisen nɛ lu mɛ, nɛ naa ndɛ wɛ əb fiisen mɛ, fiisen wel vi wɛ əb nè tumen mɛ.

⁴¹Naa ndɛ wɛ əb fiisen wele ntum nə Feyine bek ka luun wele ntum nə Feyine nɛ̂y kiile əbmakte wɛ luun wɛ wele ntum nə Feyine. Wel fiisen wel wɛ əb nɛɛyen kenəə kɛ Feyine koŋen bek ka luun wel əbjuŋ, é Feyine nɛ̂y fo əbmakte se wen ka wɛ əb fóon se ghel ɛjuŋe.

⁴²Naa ndɛ wɛ əb foon chèmè kɛn əbbome moo əmsanen se wele wɛ̂ nchɛke nchɛk ɛ məme ghon-ɛyfɛl nə mɛ bek ka luun wán-ɛyfɛl nə mɛ, jia náà buu se kiile əbmakte ə wen.