Read Oku Mat 12 Bible Online

Mat 12 - Oku bible

Mat 12

¹Ko se lu ɛ keleŋ əbliy fo, Jesus se chia ɛylem ɛsaŋ ɛylee ɛ kechii ɛybam nɛ̀ jeŋ yafe ghon-ɛyfɛl nə wen, ghene me se kole əbtuu ɛsaŋ, fiksee, kfəle ɛshiɛ ten.

²Ghele kenone Falisee yɛn kenəə ten, è suuy se Jesus ge: Yɛn-a! Ghon-ɛyfɛl nə wɛ̀ nɛɛy kenəə kɛ ɛysake báà beeme ge ɛ́ nɛɛy ɛ kechii ɛybam.

³Jesus fise ge: Ghɛn nè bɛɛy ghàà jaŋ kenəə kɛ David nè nɛɛyen ɛ əbliy wɛ jeŋ nè yafen ghene ghel ɛyjɛl nə wen-a?

⁴Əb lɛ nè báà lii ɛ ndaa-ɛykokse Feyin, è liɛ keban kɛ ɛ́ nè taŋlen Feyin so, ghene yiɛ, keban nɛ ɛysake nè báà beeme ge lòò wen kene ghel ɛyjɛl nə wene yiɛ, nɛ lòó yiɛ kɛn ghɛ́ ntaŋle-a?

⁵Moo ghɛne bɛɛy ghàà jaŋ ka ɛysake Moses dinen ge ghɛ́ ntaŋlee loo fɛl ɛ ndaa-ɛykokse ɛ kechii ɛybam ghàà ɛysake ghal ghene-a?

⁶Mɛ suuy əbluuy se ghɛn ge, wel lu fɛn wɛ kenəə ə wene chian kɛ́ ndaa-ɛykokse.

⁷Ŋwaale-Feyine suuye ge: “Mɛ koŋe ge wel yɛ chame wel əblee, chia nyam sɛ yɛ taŋle mɛ so.” Ghɛn nè bóy se yɛ ke kenəə kɛ keleŋ kine suuyen fene ghɛn nè báà se ghame ghel ghɛ ɛ́ báà se ki jas.

⁸Ke lu dî bek ge Wanwel lu Báàba ə kechii ɛybam.

⁹Jesus nɛy lòò se fo, è ndu se ngay ɛyjem yɛ ntɛk fo.

¹⁰Nè lu dî nɛ wel əblee lu fo nɛ keghoo ə wene kuomen. Ghel ɛlee bif se Jesus ge: Ke lɛ lu ɛ titiy ge wel chuk wel ɛ kechii ɛybam-a? Bife dì ka ɛ́ kooy kenəə kɛ ɛ́ toy wen so.

¹¹Jesus fise ge: Wel se ghɛn lɛ ki bvəy njiɛ, ɛy too se ɛybee ɛ kechii ɛybam é əb jia guf, è fəyse-a?

¹²Wele mesoŋ lɛ báà se chia bvəy njiɛ-a? Ɛysake dì dine ge ke jofe se nɛɛye njuŋ ɛ kechii ɛybam.

¹³Əb me suuy se wel vi ge: Nate keghoo ə kiɛ. Əb nate, ke me kase bonen è me se lu kɛn ka kelee.

¹⁴Ghele kenone Falisee fəy, è ndu è se chio ntaŋ kum jii yɛ ɛ́ yuy Jesus ɛ ten.

¹⁵Jesus keele ge ɛ́ chio ntaŋ se yuye yi, è me lòò se fo. Ngose wel lòò ɛ wen ɛybam, əb se chuke nduu nɛ̀ ghɛ ɛ́ nè yafken,

¹⁶è me chiise se ghene ge ghene yɛ ke se nɛɛy nɛ wel yio kenəə kɛ kum yi.

¹⁷Kii nɛ̂ kine nè gan se nɛɛy ge kenəə kɛ wele ntum nə Feyine wɛ Ezaya nè suuyen kwɛn. Əb nè suuy ge:

¹⁸“Vin lu wel ɛyfɛl nə mɛ wɛ mɛ nè choken, vi wɛ mɛ koŋen, nɛ gese lu wen wɛ mɛ saŋlen bek wen. Mɛ nɛ̂y tinse Keyioy ə kom se wen é əb yɛ fekte se əbtume ka mɛ nɛ̂y sak ghene.

¹⁹Əb jia nɛ̂y yɛ fekte ghane yole ghene ghele è jia nɛ̂y yɛ ghan ɛ jiise zəəme zəəmen.

²⁰Əb jia nɛ̂y yɛ yɛne ngɛk nɛ ɛy ngvənlen əb mɛyse bɛk, è jia nɛ̂y yɛ limse kekaaken kɛ ke banen lifle lifle. Əb nɛ̂y yɛ taŋen se chin se əbliy wɛ əb nɛ̂y yiɛ mbi è fo ɛysake yɛ titiye.

²¹Əbtum əbjime nɛ̂y yɛ chii ki ɛykwaate bek wen.”

²²Ghel ɛlee me gwiy nɛ̀ kechichi se Jesus, nɛ ko gese lu kenfef, nɛ nɛɛy ɛyfim ge əb ghàà yɛ suŋnen. Jesus chuk; kechichi ki me se suŋnene gese yɛne əblik.

²³Ghel ɛjim ghɛ ɛ́ nè luun fo yɛn è se lu nɛ̀ əbchíò əbyúméné kante ge: Lɛ lòó yɛ lu ge vin lu wán ə David-a?

²⁴Ghele kenone Falisee ɛlee yio, è suuy nɛ lu ge: Əb jume ɛyfim kɛn nɛ̀ əbtaawe wɛ foon Beelzebul wɛ luun əbfon ɛyfim.

²⁵Jesus keele ɛykwaate ə ghen, è suuy se ghene ge: Naa ketum kekɛ kɛ ke giabsen, è yɛ lu əbnkakten əbnkakten, gese noo ngeŋse lu nɛ ke jia nɛ̂y teem, nɛ ntɛk ɛykɛ kene ɛyshaa ndaa giabsen è yɛ lu əbnkakten əbnkakten, gese noo ngeŋse ghen lu nɛ ɛy jia náà teem.

²⁶Satan lɛ lòò è yɛ jume Satan ke fene ke dine ge əb giabsenmen ngeŋ ə wen giabsen. Ke lòò è yɛ lu dî é ɛysak ə wene teem lɛɛy?

²⁷Lòò è yɛ lu ge mɛ jume ɛyfim nɛ̀ əbtaawe nɛ foo Beelzebul fene ghele ə ngoo nə ghɛne jume nɛ̀ əbtaawe ndɛ-ɛ? Kenəə kɛ ghele ngoo nə ghɛne nɛɛyen, dine ge ghɛne báà se suuye əbluuy.

²⁸Ɛngaŋ, dì foo Keyioy ə Feyin əbtaawe ge mɛ yɛ jum ɛyfim so. Kii nɛ̂ kine lu se din ge ɛysak ə Feyine shi ɛ ghɛne məm.

²⁹Lòó wel jia kol ndaa ə wel əbtaa è lii è liɛ əbfua ə wen, buu ge əb kɛɛte kul wen, əb kul dì é əb me choŋ əbfua ə wen.

³⁰Naa ndɛ wɛ əb báà se lu ghɛse wen lu nɛ əb noo mɛ noon, nɛ naa ndɛ wɛ əb báà se giamten mɛ se baate lu nɛ əb takse taksen.

³¹Mɛ me se suuy se ghɛn ge wel nɛɛy naa mbee ɛykɛ, kene əb tɛy Feyin naa ɛ jii ɛy kɛ, é Feyine lɛyse se wen, dî nɛ wel tɛy Keyioy Kelanene é Feyine jia yî lɛyse se wen.

³²Wel suuy kenəə kebee kum Wanwel, é Feyine lɛyse se wen, dî nɛ wel suuy kenəə kebee kum Keyioy Kelanene, é Feyine jia yî lɛyse se wen ɛ mbi lan gese nɛ se mbi yɛ ɛygwiyen.

³³Fekak fejuŋe fejime koom əmtam əmjuŋ, nɛ fekak febee fejime koom əmtam əmbee. Ɛ́ sɛɛ keele fekak se əmtam mɛ əm koom ɛ ten.

³⁴Ghɛn lu ghone yiose, lòó ghel əbnəə əbbee ka ghɛn lɛ jia yɛ suuy əbnəə əbjuŋe bek ge kenəə kɛ ke fəyen ɛ wel əbchio lu kɛ ke lunen ɛ wen ɛytem.

³⁵Wele loo lu wel əbjuŋ, ɛytem ə wene lun nɛ̀ njuŋ, əb yɛ suuy əbnəə əbjuŋe. Loo lu wel əbbee, ɛytem ə wene lun nɛ̀ mbee, əb yɛ suuy əbnəə əbbee.

³⁶Mɛ suuy se ghɛn ge ɛ́ náà loo lu ɛ kechii nsak, é wel əbjim yɛ lu se taŋle əbchio ə wen ɛ ɛyshiɛ nə Feyine kum əbnəə lólò əbjim wɛ əb nè suuyen.

³⁷Feyine náà yɛ liɛ əbnəə wɛ əb fəyen ɛ wel əbchio sake wen so, se yɛn ge əb sɛ lu nɛ əb fɛy nsak moo əb báà fɛy-a.

³⁸Ghɛ́ ɛydinte tesak ɛlee ghene ghele kenone Falisee ɛlee me suuy se Jesus ge: Ndinte, ghɛse kɛŋe ge wɛ̀ nɛɛy kenəə əbchio əbyúméné.

³⁹Əb sɛy fise ge: Ghɛne ghɛ́ ntem fɛne lu ghel ɛbee, kokse wiy Feyin. Ghɛne kɛŋe ge mɛ nɛɛy kenəə əbchio əbyúméne-a? Kenəə əbchio əbyúméné di wiy kɛ Feyine nɛɛy se ghɛn bak kɛn kɛ əb nè nɛɛyen se wele ntum nə wen wɛ Jona.

⁴⁰Ka Jona nè chiin ɛ səə ɛyghaken əblɛɛ se əbchii əbtal lu ghɛɛ-ghɛɛ ka Wanwel náà chii ɛ məme ntiɛ se əbchii əbtal.

⁴¹Ɛ́ náà loo lu ɛ kechii nsak, ɛ́ ghele Nineve teem è gham ghele ghɛ́ ntem fɛne bek ge Jona nè lô fekte kenəə ə Feyin, ghene yio, è kubsen tetem ə ghen. Mɛ suuy se ghɛn ge, wel lu fɛn wɛ kenəə ə wene chian kɛ́ Jona.

⁴²Ɛ́ náà loo lu ɛ kechii fo, é no ə ntoke Sheba teem, è gham ghele ghɛ́ ntem fɛne bek ge əb nè lô lòò naa əbtəm è gwiy se yiote əbnəə əbfee wɛ Solomon nè dinten. Se lu nɛ wel lu fɛn wɛ kenəə ə wene chian kɛ́ Solomone.

⁴³Loo lu əbliy wɛ keyioy ɛyfime fəyen se wel əbghun, ke yɛ jɛl ɛ əbkwak əbyume kɛŋe bene fɛ ke bɛɛ. Ke kɛŋ è jia yɛn,

⁴⁴ke me suuy se ngeŋ ə wen ge: Mɛ kase fiile se mɛ ndaa yɛ mɛ kè fəyen ɛ ten. Ke fiile, è yɛn nɛ ndaa nɛ̂ yì lu ɛyyum nɛ ɛ́ nɛyte ɛy se laanee,

⁴⁵ke me ndu, è gwiy nɛ̀ əbyioy ɛyfim əblee saamba nɛ əb befe chia wen, ghene me lii è yɛ chii fo. Ɛychii wele ten me yɛ befe chia naa ka ɛy nè luun se mbiy. Ghɛy ka ke náà gan se ghele ghɛ́ ntem fɛne ghɛ ɛ́ befen lɛ.

⁴⁶Se lu nɛ Jesus bo suŋnene se ghel ghii, no ə wen ghene ghone-no ə wen wɛ Jesus gwiy, è teem ɛ bɛy è se kɛŋe se suŋnen se wen.

⁴⁷[Wel əblee me suuy se wen ge: Yɛn-a! No ə viɛ ghene ghone-no ə viɛ tiy ɛ bɛy kɛŋe se suŋnen se wɛ̀].

⁴⁸Jesus fise ge: No ə wom lu ndɛ? Ghone-no ə wome lu ghe ndɛ?

⁴⁹Əb nase keghoo è lom ghon-ɛyfɛl nə wen, è suuy ge: Yɛn-a! Lɛɛ no ə wom ghene ghone-no ə wome.

⁵⁰Naa ndɛ wɛ əb nɛɛyen kenəə kɛ Ba ə wom wɛ əb luun ɛ ɛyyio kɛŋen lu lumse ə yom, nɛ̀ jɛmte ə yom gese nɛ̀ no ə wom.