Read Oku Mat 13 Bible Online

Mat 13 - Oku bible

Mat 13

¹Ko se lu ɛ kechii fo, Jesus fəy se ndaa, è ndu, è diom əbghune kechem keghuye.

²Ngose wel kaame ɛ wen ɛybee bɛme, əb me lii se kenək è diom se ten nɛ ghel ɛjime teem se əbghune jio.

³Əb me se dinte əbnəə se ghene se ɛydio ɛ nganse suuye ge: Wel ɛylem əblee nè lô shik se make ngos.

⁴Əb loo mak, ɛylee chemke ɛ beelese, əmnənme gwiy, è biŋte è yiɛ.

⁵Ɛylee chemke əbkuk ɛtiy nɛ ntiɛ wiy fo se ɛydio, è me fəyke kaŋ ɛymok bek ka ntiɛ nɛ̀ dion wiy fo.

⁶Chuy nɛy loo ban, è nyok əbfua ten, əb yoble bek ka ɛghaŋe nè báà toke lii se ntiɛ.

⁷Ɛylee chemke ɛ məme kenjoonjoŋ, ke me tooke, è kuy è chite.

⁸Ɛylee chemke nɛ lu ɛ ntiɛ ɛyjuŋ, è fəy, è kuy è loote koom. Əbtuu əblee se foo ɛshiɛ kaŋ əbviɛ chia ka ɛ́ nè maken, nɛ əblee foo ɛshiɛ kaŋ əmntuufe chia ka ɛ́ nè maken, nɛ əblee foo ɛshiɛ kaŋ əmmtal chia ka ɛ́ nè maken.

⁹Jesus loo ləysen è suuy ge: Naa ndɛ wɛ əb kiin əbtuule se yio, əb yio.

¹⁰Ghon-ɛyfɛl nə Jesus kokte gwiy è bif se wen ge: Lu bek ghɛ wɛ wɛ̀ suŋnen se ghel ghine ɛ nganse?

¹¹Əb fise ge: Feyine nɛɛymen ghɛne keele əbnəə wɛ kum ɛysak ə wen wɛ əb luun ɛ kenlete, dî è jia nɛɛy ge ghene keele.

¹²Naa ndɛ wɛ əb kiin lu nɛ Feyine nɛ̂y gise é ke dio, nɛ naa ndɛ wɛ əb báà se ki lu nɛ Feyine náà fii kɛ́ ɛylaaye kɛ əb kiin.

¹³Mɛ suŋnen se ghene ɛ nganse bek ge ghene kiye, yɛne wiy, yiote əbnəə, yio wiy, gese keele wiy.

¹⁴Ghene nɛɛy dî kenəə kɛ Ezaya wɛ wele ntum nə Feyine nè nyaken me kwɛn. Əb nè nyak ge: “Ghɛne nɛ̂y yɛ yiote kɛn yioten, keele wiy; kiye kɛn kiyen, yɛne wiy.

¹⁵Bek ge tetem ə ghel ghine boolemen, ghene chite əbtuule ə ghen è gese bvəte ɛshiɛ ə ghen, fɛ ghene yɛ yɛn nɛ̀ ɛshiɛ ə ghene, yio nɛ̀ əbtuule ə ghene è yɛ keele əbnəə nɛ̀ ɛytem ə ghene, è me fiile se mɛ ka mɛ chuk ghene.”

¹⁶Ke lu kejuŋ se ghɛn bek ge ɛshiɛ ə ghɛne yɛne, nɛ əbtuule ə wɛne yio əbnəə.

¹⁷Ghɛn keele se əbluuy ge, ghele ntum nə Feyine se ɛydio nɛ̀ ghel ə Feyin ɛlee se ɛydio nè lô se shii se yɛn əbnəə wɛ ghɛne yɛnen, dî è jia yɛn, è se shii se yio əbnəə wɛ ghɛne yion dî è jia yio.

¹⁸Ghɛn yiote yi kenəə kɛ kum ngane ngos ɛymaken.

¹⁹Ngos yɛ ɛy nè chemken ɛ beelese lu ghel ghɛ ɛ́ yion kenəə kɛ kum ɛysak ə Feyin è jia keele, Satan me gwiy è fəyse kenəə ten se ghene tetem.

²⁰Ngos yɛ ɛy nè chemken ɛ əbkuk ɛtiy lu ghel ghɛ ɛ́ yion kenəə ə Feyin, ɛ́ me beeme kaŋ ɛymok nɛ̀ chɛkle.

²¹Ghene beeme, dî ke jia lii se ghene tetem. Ngɛkse ghene əbbaanese loo gwiy se ghene bek kenəə ə Feyin nɛ̂ ki ghene me fɛy kaŋ ɛymok.

²²Ngos yɛ ɛy nè chemken ɛ məme kenjoonjoŋ lu ghel ghɛ ɛ́ yion kenəə ə Feyin ɛ́ vii ɛytem nɛ lu əbnəə wɛ ketuu ntiɛ fɛne ghene əbghaake, ke jia yɛ ki kelik ɛ ghene tetem, è jia koom əmtam.

²³Ngos yɛ ɛy nè chemken ɛ ntiɛ ɛyjuŋ lu ghel ghɛ ɛ́ yion kenəə ə Feyin, ɛ́ lɛm se ɛytem, è me yɛ nɛɛy əbnəə əbjuŋe ka ngos yɛ ɛy nè koom ɛshiɛ əblik əbviɛ chia ka ɛ́ nè maken, ɛylee koom əblik əmntuufe chia ka ɛ́ nè maken, ɛylee koom əblik əmmtal chia ka ɛ́ nè maken.

²⁴Jesus gese maa ngan ɛylee se ghene ge: Ɛysak ə Feyine lu ka wel wɛ əb nè maken ngos ɛ wen ɛylem.

²⁵Nɛy se lu nɛ ntəke nɛ ghele buunemen, wel əbbaanese nə wen gwiy è mak ngos əbgii se ten è lòò.

²⁶Ngos yi fəy, è kuy è kɛɛte se koom, əbgii vi me yɛnsen sɛy.

²⁷Ghon-ɛyfɛl nə wel vi gwiy è bif se wen ge: Babɛy, wɛ̀ lɛ nè báà mak nɛ lu ngos ɛyjuŋ ɛ wɛ̀ ɛylem-a? Ke ghan lɛɛy ge əbgii yɛ kuy ɛ ten?

²⁸Əb fise ge: Nɛɛy wel əbbaanese nə mɛ. Ghon-ɛyfɛl ghii bif ge: Wɛ̀ koŋe ge ghɛs ndu è dəəne əbgii ten-a?

²⁹Əb fise ge: Ɛngaŋ! Tame ghɛn loo dəəne, è chok ngos ɛ məme ten.

³⁰Ghɛn vəse é əb yɛ kuy fo əbjim se chin se kechii kɛ ɛ́ náà kaa əbfua. Naa loo lu ɛ kechii fo é mɛ suuy se ghel ɛyfɛl ge: Ghɛn chia mbiy è dəəne əbgii vi è kul ɛ giɛse ɛ giɛse è nyok, è me dən ɛsaŋ è vii se mɛ əbŋwak.

³¹Jesus gese maa ngan ɛylee ge: Ɛysak ə Feyine lu ka ɛyhiɛ ngose fekak yɛ wel nè liɛn è mak ɛ wen ɛylem.

³²Ngos nɛ̂ yin lu nɛ ɛy layte è chia ngose əmkak naa sejim. Dî nɛ ɛy fəye, ɛy kuy è yɛ ghake chia naa əmkak əmjim. Əmnənme me yɛ gwiye bakle ndaase ghen ɛ ɛytam ten.

³³Jesus gese maa ngan ɛylee ge: Ɛysak ə Feyine lu ka ɛyshiɛ feshik yɛ əbvii nè liɛn è too kɛlse əmnkfeŋ setal so, feshik fi jɛl kebane ten naa kejim.

³⁴Jesus nè suuy əbnəə vin əbjim se ngose wel nɛ lu ɛ nganse. Əb nè báà suuy kenəə se ghene nɛ wiy ɛ nganse.

³⁵Kii nɛ̂ kine nè lu se lunse kenəə kɛ wele ntum nə Feyine nè suuyen ge: “Mɛ nɛ̂y yɛ suŋnen se ghene nɛ lu ɛ nganse; mɛ nɛ̂y fekte əbnəə wɛ əb nè luun ɛ kenlete, Se kɛ̀ɛ̀tè se əbliy wɛ Feyine nè bomen mbi.”

³⁶Jesus nɛy lòò è vəse feliɛ wel fi è lii se ndaa. Ghon-ɛyfɛl nə wene gwiy è suuy se wen ge: Fekte se ghɛs kenəə kɛ əbgii wɛ əb kuyen ɛyleme dinen.

³⁷Əb fise ghene ge: Wel wɛ əb nè maken ngos lu Wanwel.

³⁸Nɛ ɛyleme lu mbi yin. Ngos ɛyjuŋ lu ghel ghɛ Feyine saken, nɛ əbgii lu ghel ghɛ ɛ́ yion se Satan.

³⁹Wel wɛ əb nè maken əbgii lu Satan, wɛ wel əbbaanese nə Feyine. Əbliye ɛydən ɛsaŋe lu əbliy wɛ mbi yî mɛy ɛ ten, nɛ ghel ɛydən ɛsaŋe lu nchiyse-ndaa nə Feyine.

⁴⁰Kɛn ka ɛ́ nè baaten əbgii è nyok, lu ghɛɛ-ghɛɛ ka ke naa gan əbliy wɛ mbi mɛy.

⁴¹Wanwel náà tum nchiyse-ndaa nə wen é se baate ghel ghɛ ɛ́ nɛɛyen nɛ ghele nɛɛye mbeese gese nɛ ghel ɛbee ɛlee è fəyse se məme ghel ghɛ əb saken,

⁴²è mak se kemboo əbvəs bene fɛ ghene náà toŋnen gese kfəle ɛsoŋ,

⁴³é ghel ə Feyine me yɛ ban ka chuy ɛ məm ɛysak nə Ba ə ghen. Naa ndɛ wɛ əb kiin əbtuule se yio, əb yio.

⁴⁴Ɛysak ə Feyine lu ka ngan yɛ kum kefaa əbkaa kɛ ke nè luun ɛ əbkwak yɛnsen wiy. Wel nɛy yɛn, è nɛyte chite, è se saŋle naa se ŋaŋ, è ndu è feene ɛykɛŋ ə wen naa ɛyjim è yun əbkwake wɛ́ tene əbjim.

⁴⁵Ɛysak ə Feyine gese lu sɛy ka ngan yɛ kum wel əbwɛy əblee wɛ əb nè kɛŋe ɛtiy ɛjuŋe se yun,

⁴⁶é nɛy yɛn ɛylee nɛ ɛy jofe naa se ŋaŋ, è ndu è feene ɛykɛŋ ə wen ɛyjim, è yun so.

⁴⁷Ɛysak ə Feyine gese lu ka ngan yɛ kum felame səəse fɛ ɛ́ nè maken ɛ jio ɛyghaken, fe koo ɛynkii səə sejim.

⁴⁸Səəse lun se ten, ghel ɛykoo səəse guf, è fəyse se bɛy, è diom, è tayte sejuŋe è vii se nkaa, è fəyse sebee è maay.

⁴⁹Lu ka ke náà yɛ lu əbliy wɛ mbi mɛyen. Feyine náà tum nchiyse-ndaa nə wen, é se gwiy è fəyse ghel ɛbee se məm nə ghel ɛjuŋe,

⁵⁰è mak se kemboo əbvəs bene fɛ ghene yɛ toŋnen, gese kfəle ɛsoŋ.

⁵¹Jesus bif se ghon-ɛyfɛl nə wene ge, ghene sɛ lu nɛ ɛ́ keele əbnəə vin-a? Ghene beeme.

⁵²Əb me suuy se ghene ge: Naa ndinte tesak ɛykɛ yɛ ɛy yiɛkemen se yɛ lu wel əblee ɛ məme ɛysak nə Feyine lu ka ba ə ndaa wɛ əb fəysen əbfua əbfɛɛ ghene əbməə ɛ wen ɛychia.

⁵³Nɛy se lu ka Jesus dinten əbnəə se ghele ɛ nganse è mɛyse ɛ leghɛ, è me lòò se fo,

⁵⁴è ndu se ghene ntɛk è se dinte əbnəə se ghele ɛ ghene ngay ɛyjem. Ghele yio è se lu nɛ̀ əbchíò əbyúméné, ghɛynen ge: Əb liɛ ghááy əbfee vin? Ke ghan lɛɛy ge əb yɛ nɛɛye əbnəə əbchio əbyúméné lɛ?

⁵⁵Vin lɛ báà se lu wán ə kamenda-a? No ə wen lɛ wiy Mɛɛle-a? Jɛms nɛ̀ Josɛf, nɛ̀ Simon gese nɛ̀ Judas lɛ báà se lu ghone-no ə wen ɛluumene-a?

⁵⁶Jɛmtese wene lɛ báà se chii ghɛsen nɛ̀ ghene fɛn-a? Əb liɛ ghááy əbtaawe wɛ əb nɛɛyen əbnəə vin so?

⁵⁷Ghene ghɛynen dì, è me tunse wen. Jesus me suuy se ghene ge: Ɛ́ lóó ɛ́ yɛ ngvəmle wele ntum nə Feyine əblik əbjim buu kɛn ɛ ghene ntɛk nɛ̀ se ghene ɛykfəə.

⁵⁸Əb nè báà nɛɛy əbnəə əbchio əbyúméné fô bek ka ghene nè báà fo ɛytem se wen.