Read Oku Mat 14 Bible Online

Mat 14 - Oku bible

Mat 14

¹Se lu ɛ keleŋ əbliy fo, Helod wɛ əb nè saken Galilee yio əbnəə wɛ kum Jesus,

²è me suuy se ghel ɛyfɛl nə wene ge: Wel vin lu kɛn naa Joon Nfoo Moo ka əb kasen loole se ɛykuo, nɛ ghan kenəə kɛ ke nɛɛyen ge əb yɛ ki əbtaawe se yɛ nɛɛye əbnəə əbchio əbyúméné lɛ.

³Nè lu dî nɛ Helod nè làmen ɛ́ koo Joon è kul è vii se nchak bek Helodias wɛ wiy ə wan-no ə wen wɛ Filib;

⁴bek ge Joon nè se suuye se Helod ge ɛysake báà beeme ge əb liɛ Helodias se əbvii.

⁵Helod nè kɛŋe se yuye Joon dî, è se fane ghel bek ge ghene nè liɛ wen ge wele ntum nə Feyine əblee.

⁶Ɛ́ naa loo yiɛ kechii kɛ ɛ́ nè biin Helod, wan ə Helodias əbkiy bin ɛ ghel ɛjime ɛyshiɛ. Helod se saŋle naa se ŋaŋ,

⁷è me kak wán vi è laa kelek ge yi nɛ̂y fo naa ghɛ se wen kɛ əb bifen.

⁸No ə wen bɛyse wen, əb suuy ge: Fó ketuu Joon Nfoo Moo se mɛ fɛn ɛ ɛyshɛn.

⁹Əbfon jia se saŋlee, dî è kò lam ge ɛ́ nɛɛy ka əb kɛŋen bek kelek kɛ əb kè laanmen ɛ ɛyshiɛ nə ghel ɛyghan nə wene.

¹⁰Ɛ́ me ndu ɛ ndaa nchak, è ten ketuu Joon,

¹¹è gwiy so ɛyshɛn è fo se wan əbvii vi, əb ndu so è fo se no ə wen.

¹²Ghon-ɛyfɛl nə Joon nɛy gwiy, è buŋ ɛygvən ə wen, è ndu, è gvəəme, è ndu suuy se Jesus.

¹³Jesus yio kenəə kɛ ke ganen, è lii se kenək, è lòò se fo è ndu əbkwak ka əb yɛ lu fo wen nyiŋ. Ghele yio ge əb lòòmen, è me fəyke se ghene ntɛkse, è jɛl nɛ̀ kevəə, è ndu se ghaa əb nè nduun.

¹⁴Jesus gwiy è se fəye se kenək è yɛn feliɛ wel, ketuu lum wen, əb me se chuke ghɛ ɛ́ nè yafken.

¹⁵Nɛy loo lu ɛ likfəəy, ghon-ɛyfɛl nə wene kokte è gwiy è suuy se wen ge: Fɛn lu əbkwak nɛ əbliye gesemen chia. Lam é ghele giabsen è lii è ndu ɛ ntɛkse è yun əbfua-əbyíɛ́ne nə ghen.

¹⁶Jesus fise ge: Ke báà se lu ɛ shii ge ghene loo. Ghɛn fo əbfua-əbyíɛ́ne se ghene se ghɛne ngeŋ.

¹⁷Ghene fise ge: Ghɛs ki kɛn ntukse keban fɛn setan nɛ̀ səə sebaa.

¹⁸Jesus me suuy ge: Ghɛn gwiy so fɛn se mɛ.

¹⁹Ɛ́ gwiy so, əb suuy ge ghele diom se əbgii, əb fii ntukse keban shi setan nɛ̀ səə shi sebaa, è kiy ɛyyio, è bɛ̀ɛ̀lè Feyin, è bɛkte kebane ten è fo se ghon-ɛyfɛl nə wene, ghene me fo se ghele.

²⁰Wel əbjim yiɛ è kul. Ghon-ɛyfɛle biŋte əbmbɛkele wɛ əb nè bɛɛsen, əb lun nkaase njio-sebaa ɛyvəm.

²¹Ghel ghɛ ɛ́ nè yiɛn əbfua-əbyíɛ́ne nɛ̂ vin nè lu ɛluumen ka nkam setan, nɛ ɛ́ báà taŋ əbkiy ghene ghone.

²²Jesus me suuy se ghon-ɛyfɛl nə wen ge: Ghɛn lii se kenək è diaŋ ɛ njine jio se mbiy. Əb yese è me chakte ghel è tinse.

²³Əb tinse ghel dì, è lòò è kok ɛ kfən se jem wen nyiŋ. Kebɛye nɛy se fine nɛ əb bɛɛy fo wen nyiŋ.

²⁴Nè lu dî nɛ kenəke loomen se shif è ndu ɛ məme jio naa əbtəm, nɛ əbfiɛfe gwiye jii mbiy, shikse jio nɛ ɛy loole shɛŋse kenək.

²⁵Əbtəke nɛy se tenen gwiye, Jesus se jɛle gwiye ɛ ketuu moo se baksene ghon-ɛyfɛl nə wen.

²⁶Ghene yɛn ka əb jɛ́len gwiyen ɛ ketuu moo, è me se fane toŋe suuye ge: Lu nkfəsay.

²⁷Jesus suuy se ghene kɛn se əbliy ge: Ghɛn kul ɛyteme, lu mɛ Jesus, ghàà ghɛn yɛ fan.

²⁸Bita me suuy ge: Báàba, loo lu wɛ̀ se əbluuy, wɛ̀ suuy é mɛ gwiy ɛ ketuu moo è baksen wɛ̀.

²⁹Jesus fise ge: Gwiye. Bita me fəy se kenək, è se jɛle ɛ ketuu moo nduu se baksene Jesus.

³⁰Ka əb jɛ́len nduun dî, è yio jii yɛ əbfiɛfe chian ɛ ten, è loo fan, è me se yime nduu ɛ məme jio toŋe ge: Báàba, boyse mɛ!

³¹Jesus nase keghoo kɛn se əbliy, è ghal wen so, è suuy ge: Wɛ̀ lu lɛ nɛ wɛ̀ báà fo ɛytem se mɛ, lu bek ghɛ wɛ wɛ̀ kè maanen ge lòó mɛ nɛɛy é wɛ̀ jɛl ɛ ketuu moo?

³²Ghene lii se kenək, əbfiɛf vi me tenen.

³³Ghon-ɛyfɛl ghɛ ɛ́ nè luun ɛ kenək me se foo ɛykokse se Jesus suuye ge: Lu se əbluuy nɛ wɛ̀ lu Wán ə Feyin!

³⁴Ghene diaŋ se njine vii è me fəy ɛ Gennesalet,

³⁵ghele keele Jesus fo, è me tum ge ɛ́ gwiy nɛ̀ ghel ɛyafkene ghɛ́ nseŋ foo se Jesus.

³⁶Ɛ́ gwiy so, è me se beŋte Jesus ge əb ko vəse ɛ́ ghene yɛ kum ɛyghaŋe ndəyse nə wen. Naa ndɛ se kume, me bonene.