Read Oku Mat 15 Bible Online

Mat 15 - Oku bible

Mat 15

¹Ghele kenone Falisee ɛlee ghene ndintese tesak selee me lòò ɛ Jolesalem è gwiy è bif se Jesus ge:

²Lu bek ghɛ wɛ ghon-ɛyfɛl nə wɛ̀ báà se nɛɛy əbnəə wɛ ɛbàá ɛbàá ə ghɛse nè lɛmen se ghɛsen? Ghene lóó ghàà ɛ́ suu ɛghoo ɛ ndee ɛylak se geese yɛ yiɛ.

³Jesus fise ge: Lu bek ghɛ wɛ ghɛne kolen ɛysak ə Feyin, jumte nɛ lu ndee ɛylak nə ghɛn?

⁴Feyine nè suuy ge: Wel ngvəmle ba ə wen ghene no ə wen, nɛ̀ naa ndɛ suŋnen kebee kum ba ə wen kene no ə wen, fene ɛ́ yuy wen yuyen.

⁵Se lu se ghɛn nɛ ghɛn suuy ge, wel ki kefaa kɛ kè lòó əb giamten ba ə wen so kene no ə wen, è suuy ge lu kɛ́ Feyine, fene əb bo bɛɛy wiy se ngvəmle ba ə wen.

⁶Ghɛne nɛɛye dì me kiye ɛysak ə Feyin lolo, me jumte nɛ lu ndee ɛylak nə ghɛn.

⁷Ghɛn ghɛ nfefsese! Nfekte yɛ Ezaya nè suuy se əbluuy əbliy wɛ əb nè suŋnen kum ghɛn ge: “Feyine nè suuy ge:

⁸Ghel ghine kokse mɛ se əbchio, dî nɛ tetem ə ghene lu əbtəm se mɛ.

⁹Ɛykokse yɛ ghel ghine fóon se mɛ lɛye se lólò, bek ge ghene liɛ əbnəə wɛ lɛmen ghel, dinte se ghele ge lu nchil ə som.”

¹⁰Jesus me jaŋ ghel ghi è suuy se ghene ge: Ghɛn yiote kenəə kɛ mɛ suuy, è keele.

¹¹Kefaa kɛ ke liin əbchio báà se bese wel, kɛ ke besen wel lu kɛ ke fəyen ɛ wel əbchio.

¹²Ghon-ɛyfɛle kokte gwiy è bif se Jesus ge: Wɛ̀ lɛ ke ge ghele kenone Falisee kè lô yio kenəə kɛ wɛ̀ suuyen, ke yaf ghene-a?

¹³Əb fise ge: Kefaa lu kɛ nè báà yiɛte Ba ə wom wɛ əb luun ɛ ɛyyio fene əb nɛ̂y chok nɛ̀ ɛghaŋe se ten.

¹⁴Ghàà ghɛn yɛ ki shii kum ghene. Ghene lu əbnfef dine jii se əbnfefe, nɛ kenfefe lòò è yɛ dine jii se kenfefe, é ghene ghel ɛjim too se ɛybee.

¹⁵Bita me suuy se wen ge: Ko suuy se ghɛs ge ngan yin sɛ dine gee ghɛ-a?

¹⁶Jesus bif se ghene ge: Ɛytof ə yɛne bo təmse ka yɛ ghel ɛlee-a?

¹⁷Ghɛne báà se ke ge kefaa kɛ ke liin ɛ wel əbchio, chia nduu se əblɛɛ me fəye-a?

¹⁸Dî nɛ kefaa kɛ ke fəyen ɛ wel əbchio lòò ɛytem, nɛ̀ lu keghene kɛ ke besen wen.

¹⁹Ke lu dî bek ge lu ɛ wel ɛytem ghaa wele loo əb yɛ ki tekwaate tebee, me yuyte ghel, liɛ əbkiy kene ɛlum ə ghel, jaŋ kenjaŋ, choŋe əbchoŋ, yia əbbuam gese bese teghel ə ghel ɛlee.

²⁰Lu əbnəə nɛ̂ vin wɛ əb besen wel, dî nɛ wele yiɛ nɛ əb báà suu ɛghoo ɛ ndee ɛylak, é kii nɛ̂ kine jia bese wen.

²¹Jesus nɛy lòò se fo, è fəy se keluune è ndu ɛ keleŋe Taya ghene Sidon.

²²Əbvii wɛ̂ Kanaan əblee wɛ əb nè chiin fo me gwiy è se beŋte wen suuy ge: Báàba wɛ wán ə David, ko cham ɛysen ə yom. Ɛyfime nəkse wán ə wom əbvii ɛ jii ɛybee.

²³Jesus jia suuy kenəə ghɛy. Ghon-ɛyfɛl nə wene kokte gwiy è se lone wen suuye ge: Ko nɛɛy é əb lòò bek ge əb gwiy ɛ ghɛsen ɛybam toŋe.

²⁴Jesus me fise ge: Feyine nè tum ge mɛ gwiy kɛn se ghele Islael ghɛ ɛ́ lɛyenmen.

²⁵Əb sɛ́y gwiy è təm ɛləy ɛ Jesus ɛyshiɛ è suuy ge: Báàba, giamten mɛ.

²⁶Jesus fise ge: Ke báà jof ge ɛ́ liɛ əbfua-əbyíɛ́ne nə ghone è mak se buose.

²⁷Əbvii vi bente ge: Lu se əbluuy, dî nɛ buose loo se yɛ biŋte ɛykfək əbfua wɛ ɛbaa ghene yiɛn nɛ əb chemke ɛ ntiɛ.

²⁸Jesus me suuy se wen ge: Əbvii, wɛ̀ lu nɛ wɛ̀ fó ɛytem se mɛ naa se ŋaŋ. Ke gan kɛn ka wɛ̀ foon ɛytem se mɛ. Əb suuy dì ɛ leghɛ, wan əbvii vi me bonen.

²⁹Jesus nɛy lòò se fo è chia əbghune kechem keghuye kɛ Galilee, è kok è diom ɛ ketuu kfən.

³⁰Ngose wel se kaame fo, gwiye nɛ̀ ghel ɛləmmene, nɛ̀ əbnfefe, nɛ̀ ghel ɛkɛblene, nɛ̀ əbchichii, gese nɛ̀ ghel ɛyafkene ɛlee, lɛme ɛ wen ɛyshiɛ nɛ əb chuke ghene.

³¹Ghele se lu nɛ̀ əbchíò əbyúméné se yɛn nɛ əbchichii suŋnene, nɛ ɛləmmene bonene, nɛ ɛkɛblene jɛle, nɛ əbnfefe yɛne əblik. Ghele yɛn dî, è se foo ɛykokse se Feyine ghele Islael.

³²Jesus nɛy lòò è kwayte ghon-ɛyfɛl nə wen è suuy se ghene ge: Mɛ koosen ɛysen se ghel ghine bek ge ghene shi fɛn ghɛse ghene se əbchii əbtal, ki wiy kefaa se yiɛ. Mɛ báà se koŋe se suuy ge ghene yɛ kfəəy se jeŋ bek ge lòó jeŋ mak ghene ɛ jii.

³³Ghon-ɛyfɛl nə wene bif se wen ge: Lòó é ghɛs liɛ ghááy əbfua-əbyíɛ́ne əbkwak fɛn wɛ əb kwɛn se ngose wel yin?

³⁴Jesus bif se ghene ge: Ghɛn ki ntukse keban se sek? Ghene fise ge: Se lu saamba, gese nɛ̀ əmsəətese se ɛylaay.

³⁵Jesus me suuy ngose wel yi diom se ntiɛ.

³⁶Əb liɛ ntukse keban sɛ saamba shi, gese nɛ̀ əmsəətese mi, è bɛ̀ɛ̀lè Feyine, è bɛkte, è fo se ghon-ɛyfɛl nə wene, ghene giate se ngose wel yi.

³⁷Wel əbjim yiɛ è kul. Ghon-ɛyfɛle biŋte əbmbɛkele wɛ əb nè bɛɛsen, əb lun nkaase saamba.

³⁸Ghel ghɛ ɛ́ nè yiɛn nè lu nkam sekɛɛk nɛ ɛ́ báà taŋ əbkiy ghene ghone.

³⁹Jesus nɛy tinse ngose wel yi ge ɛy yɛ kfəəy, è lii se kenək è me ndu se ntaam Magadan.