Read Oku Mat 16 Bible Online

Mat 16 - Oku bible

Mat 16

¹Ghele kenone Falisee ɛlee ghene Sadduseese gwiy se Jesus se mome wen, è suuy ge əb nɛɛy kenəə əbchio əbyúméné se din ge əbtaawe ə wene lòò se Feyine.

²Jesus me suuy ge: Chuye lóó sooy, ghɛn suuy ge kebɛye nɛ̂y yɛ lu kejuŋ ɛ likebvəchi bek ka ɛyyio baŋen.

³Loo lu ɛ bvəse bvəse nɛ ɛyyio baŋe nɛ mbàkse fine, ghɛn me suuy ge ɛyghuu nɛ̂y gwiy. Ghɛn ke se kiy ɛyyio, se suuy ka kechii nɛ̂y yɛ lu, dî ke wiy se fekte əbnəə wɛ kum keleŋ əbliy kin.

⁴Ghɛne ghɛ́ ntem fɛne lu ghel ɛbee, kokse wiy Feyin, kenəə əbchio əbyúméné di wiy kɛ Feyine nɛɛy se ghɛn bak kɛn kɛ əb nè nɛɛyen se Jona. Əb suuy dì, è me lòò se fo è se nduu.

⁵Ghon-ɛyfɛl nə Jesus diaŋ se njine jio se vəəy, diaŋe di nɛ ɛ́ lɛysen se liɛ keban.

⁶Jesus suuy se ghene ge: Ghɛn yɛ toknen kum feshike ghele kenone Falisee gese nɛ̀ fɛ́ kenone Saddusee.

⁷Ghon-ɛyfɛl nə wene yio dî, è me se kantê se ngeŋse ghene ge: Tam fene əb suuye lɛ bek ka ghɛsen kè báà gwiy nɛ̀ kebane.

⁸Jesus keele kenəə kɛ ghene ghɛyten, è bif se ghene ge: Ghɛn ghɛ ɛ́ foon ɛytem se mɛ kɛn se ɛylaay! Lu bek ghɛ wɛ ghɛne kanten kum kenəə keban kɛ ghɛn kè báà liɛ?

⁹Ghɛne yɛne əbnəə chəysen wiy-a? Ghɛn bo kuume wiy ntukse keban sɛ setan sɛ mɛ nè yiɛsen ghel so nkam setan-a? Ghɛn nè biŋte əbmbɛkele ten əb lun nkaa se sek?

¹⁰Ghɛn lɛysenmen sɛy ghel ghɛ nkam sekɛɛk ghɛ mɛ nè yiɛsen nɛ̀ ntukse keban sɛ saamba-a? Ghɛn nè biŋte əbmbɛkele ten əb lun nkaa se sek?

¹¹Nɛɛy ghɛ ge ghàà ghɛn keele ge mɛ kè báà se suŋnen kum keban? Mɛ gese kunte suuye se ghɛn ge ghɛn yɛ toknen kum feshike ghele kenone Falisee nɛ̀ fɛ́ kenone Saddusee.

¹²Əb suuy dì ghon-ɛyfɛl nə wene me keele ge əb kè báà se suŋnen kum feshik fɛ ɛ́ sɛɛ vii ɛ keban. Əb kè suŋnen nɛ lu kum teyiɛke ghele kenone Falisee ghene tɛ́ ghele kenone Saddusee.

¹³Jesus nɛy ndu è chin ɛ nseŋe Saesalea Filibi, è bif se ghon-ɛyfɛl nə wene ge: Ghele suuye ge Wanwel lu ndɛ?

¹⁴Ghene fise ge: Ghel ɛlee suuy ge wɛ̀ lu Joon Nfoo Moo, nɛ ɛlee suuy ge wɛ̀ lu Elija, nɛ ɛlee suuy ge Jelemia, kene wele ntum nə Feyine wɛ́ mbiy əblee.

¹⁵Əb bif se ghene ge: Ghɛne suuy kɛne ge mɛ lu ndɛ?

¹⁶Simon Bita fise ge: Wɛ̀ lu Vi wɛ Feyine nè Yiosen wɛ wán ə Feyin Fɛ Fe chiin.

¹⁷Jesus suuy se wen ge: Ke lu kejuŋ se wɛ̀ Simon Wán ə Jona! Báà nɛɛy wele-mesoŋ ge wɛ̀ keele əbluuy vin; nɛɛy Ba ə wom wɛ əb luun ɛ ɛyyio.

¹⁸Mɛ me se suuy se wɛ̀ ge: Wɛ̀ lu Bita, dii ge wɛ̀ lu ɛyghok, nɛ lu ɛ ketuu ɛyghok nɛ̂ ghan yɛ mɛ nɛ̂y baklé kenchintene ghel ɛbeemene nə mɛ, nɛ lòó ɛykuo jia yî taa è chia.

¹⁹Mɛ nɛ̂y vii əbnchok ɛysak nə Feyin ɛ wɛ̀ keghoo. Naa ghɛ kɛ wɛ̀ tunsen ɛ ntiɛ fɛn, lu nɛ Feyine tunse ɛyyio, nɛ naa ghɛ kɛ wɛ̀ beemen ɛ ntiɛ fɛn, lu nɛ Feyine beeme ɛyyio.

²⁰Jesus suuy dì, è me chiise se ghon-ɛyfɛl nə wene ge, ghàà ghene suuy se wel ge yi lu Vi wɛ Feyine nè Yiosen.

²¹Se kɛ̀ɛ̀tè se əbliy fo Jesus me se suŋnene se ghon-ɛyfɛl nə wene ge yi lu se ndu ɛ Jolesalem se yɛne ngɛk ɛ ɛghoo nə chɛɛse ghene ghele mbiye se ghɛ́ ntaŋlee gese nɛ̀ ndintese tesake, é ɛ́ yuy yi, é əbchii lun əbtal é yi loole se ɛykuo.

²²Bita me liɛ wen, ghene wen bak əbghun, əb me se yole Jesus suuy ge: Báàba Feyine tɛɛke fɛ kii nɛ̂ kine yî gan se wɛ!

²³Jesus benle è suuy se Bita ge: Loo se mɛ ɛybee, wɛ̀ lu Satan! Wɛ̀ tiy ɛ mɛ jii, bek ge ɛykwaate ə yiɛ báà se lu yɛ́ Feyine, lu yɛ́ wele.

²⁴Jesus me suuy se ghon-ɛyfɛl nə wene ge: Naa ndɛ wɛ əb kɛŋen se yɛ jumte ɛybam ə yom lu se liɛ ngeŋ ə wen ka kefaa lólò, se bɛɛye kentam ə wen se yɛ jɛl so ɛ mɛ ɛybam.

²⁵Bek ge naa ndɛ wɛ əb kɛŋen se babte ɛychii ə wene náà lɛy ɛyghene, nɛ naa ndɛ wɛ əb lɛyen ɛychii ə wen bek mɛ lu nɛ əb náà yɛ ki ɛychii.

²⁶Lòó sɛk yɛ lu ghɛ se wel ɛ lefɛ əb kiilen ketuu ntiɛ kejim, è lɛy ɛychii ə wen? Moo kefaa lu kɛ lòó wel fó se ten ɛychii ə wen so-a? Ke wiy.

²⁷Wanwel shi se gwiy ɛ əbtaawe nə Ba ə wen, gwiye ghene nchiyse-ndaa nə wene. Əb nɛ̂y gwiy è yɛ makte wel əbjim se əbnəə wɛ əb nɛɛyenmen.

²⁸Mɛ suuy əbluuy se ghɛn ge ghel ɛlee tiy fɛn nɛ ɛ́ jia yî kuo nɛ ɛ́ báà yɛn Wanwel nɛ əb gwiy ka əbfon.