Read Oku Mat 17 Bible Online

Mat 17 - Oku bible

Mat 17

¹Əbchii chia ntuufe, Jesus liɛ Bita nè Jɛms gese nɛ̀ Joon wɛ wán-no ə Jɛms ghene ghene kok ɛ kfən ɛydia ɛylee ghene se lu fo kɛn ghene-ghene.

²Ghene loo chin, əbghun ə Jesuse kubsen ɛ ghene ɛyshiɛ, ɛykɛk ə wene se bane ka chuy, nɛ ndəyse ə wene fəfe ge bvəə.

³Kɛn se əbliy ghon-ɛyfɛl nə Jesus ghii me yɛn nɛ Moses ghene Elija shi fo suŋnen ghene ghe Jesus.

⁴Bita me suuy se Jesus ge: Báàba, ke lu kejuŋ ka ghɛs luun fɛn. Wɛ̀ loo è yɛ koŋ, é mɛ baklé əmtaa fɛn əmtal, viɛ nɛ̀ wɛ Moses gese nɛ̀ wɛ Elija.

⁵Se lu nɛ Bita bo suŋnene, mbàkse gvəm è chite ghene fəfe ge bvəə. Giɛ ɛylee fəy è gwiy ɛ məme mbàkse fo ge: Vin lu wán ə wom wɛ mɛ koŋen naa se ŋaŋ, mɛ saŋle kum wen. Ghɛn yɛ yio se wen.

⁶Ghon-ɛyfɛl ghii yio, è se fane naa se ŋaŋ è me təm tekek ə ghen se ntiɛ.

⁷Jesus kokte gwiy è kum ghene è suuy ge: Ghɛn loole, ghàà ghɛn yɛ fan.

⁸Ghene lose əbtuu è loo kiy è jia gese yɛn wel fo buu kɛn Jesus.

⁹Ghene loo chio se kfən, Jesus chiise se ghene ge: Ghàà ghɛn yi suuy kenəə kin kɛ ghɛn yɛnen se wel buu ge Wanwel naa kuo Feyine lose wen se ɛykuo.

¹⁰Ghene me bif se Jesus ge: Lu bek ghɛ wɛ ghɛ́ ɛydinte tesak suuyen ge Elija tiy se náà se gwiy nɛ Vi wɛ Feyine nè yiosen geese gwiy.

¹¹Jesus fise ge: Ghene suuy əbluuy, Elija lu se gwiy se mbiy, se siyse əbnəə əbjim.

¹²Dî nɛ mɛ suuy se ghɛn ge: Elija gwiymen, ghele jia se ke ge lu wen, è me se nyable nɛ̀ wen ka ɛ́ koŋen. Lu ghɛɛ-ghɛɛ ka ghene yî nyable nɛ̀ Wanwel.

¹³Ghon-ɛyfɛl ghii me keele ge Jesus kè suŋnen kum Elija, dî loote suŋnen nɛ lu kum Joon Nfoo Moo.

¹⁴Ghe Jesus chio è baksen ngose wel, wel əblee kokte gwiy è təm ɛləy ɛ wen ɛyshiɛ è suuy ge:

¹⁵Báàba, ko koosen ɛysen se wan ə wom. Əb yafe nɛ̀ kenguo, nɛ ke nəkse wen naa se ŋaŋ. Əb lóó əb yɛ yaŋse fɛy ɛ əbvəs gese nɛ̀ se moo.

¹⁶Mɛ nè lô gwiy nɛ̀ wen se ghon-ɛyfɛl nə wɛ̀ ge ghene chuk, ghene mom lolo.

¹⁷Jesus me suuy ge: Ghɛne ghɛ ntem fɛne báà fo ɛytem se Feyine ghɛy. Ghɛne jiŋe jiŋen. Ghɛne kɛŋe ge mɛ yɛ lu ghɛsen se chin lɛɛy? Ghɛne kɛŋe ge mɛ nɛ̂y təəte ghɛn se chin lɛɛy? Gwiye nɛ̀ wan ten se mɛ fɛn.

¹⁸Ɛ́ gwiy so, Jesus kwanten ɛyfim yɛ ɛy nè jefsen wen, ɛy fəy kɛn se əbliy, əb me bonen.

¹⁹Ghon-ɛyfɛl nə wene me gwiy se wen ɛybam ɛybam è bif ge: Lu bek ghɛ wɛ ghɛs kè momen lolo se jum ɛyfime ten?

²⁰Əb fise ge: Ghɛn kè mom lolo bek ka ghɛne báà loote fo ɛytem se Feyine. Mɛ suuy əbluuy se ghɛn ge, ghɛn fó ɛytem se Feyine se ɛylaay naa ka ɛyshiɛ ngose fekak ɛylaytene, é ghɛn suuy se kfən yin ge: Məəke se fɛn è ndu fɛɛy, é ɛy ndu, é kenəə jia yɛ ghake ghɛn se nɛɛy ghɛy.

²¹[Lòó ɛynkii ɛyfim ka yine jia fəy buu kɛn əbliy wɛ ɛ́ jemen, gese bame əbfua-əbyíɛ́ne.]

²²Nɛy se lu ka Jesus ghene ghon-ɛyfɛl nə wene nè kaamen ɛ Galilee, əb suuy se ghene ge: Əbliye se baksene wɛ ɛ́ nɛ̂y din Wanwel é ghele koo

²³è yuy, dî əbchii chin əbtal é əb kase loole se ɛykuo. Əb suuy dì, ghon-ɛyfɛl nə wene me se lu kɛn ɛysen ɛysen.

²⁴Jesus ghene ghon-ɛyfɛl nə wene nɛy ndu se Kabanaum, ghɛ ɛyfii shile wɛ ndaa-ɛykokse nɛy me gwiy se Bita è bif ge: Ndinte ə yɛn lɛ sɛɛ lake shile wɛ̂ ndaa-ɛykokse-a? [2]

²⁵Bita bééme, è nɛy lii se ndaa, Jesus kɛɛte bif se wen ge: Ɛykwaate ə yiɛ lu gee ghɛ Simon? Sɛɛ lake ghe ndɛ shile se tefone tɛ mbi fɛne? Sɛɛ lake ghel ə ghɛ ɛylak foo moo əbngwiy-a?

²⁶Bita fise ge: Sɛɛ lak əbngwiy. Jesus me suuy ge: Ke fene ke dine ge ghele ghɛ ɛylak foo sɛɛ jia lak.

²⁷Ghɛsen báà se kɛŋe se nɛɛy ge ghel ghine yafse se ghɛsen. Ndu ɛ kechəm keghuye è mak lof se jio. Wɛ̀ guf səə yɛ mbiy yɛ ɛy liɛn ɛ ten, wɛ̀ ŋiɛm əbchio ten é wɛ̀ yɛn ɛyshiɛ shile, è fəyse, è ndu è lak shile ə wɛsoo so.