Read Oku Mat 18 Bible Online

Mat 18 - Oku bible

Mat 18

¹Se lu kɛn əbliy nɛ̂ fo, ghon-ɛyfɛl nə Jesuse kokte gwiy, è bif se wen ge: Ɛ́ yî yɛ lu ndɛ ketuu əbliy ɛysak nə Feyine?

²Jesus me jaŋ wan əbtɛlɛ, è tiyse ɛ ghene ɛyshiɛ,

³è suuy ge: Mɛ suuy əbluuy se ghɛn ge: Ghɛn loo lu è jia kubsen se yɛ lu ka ghon ɛtɛlɛɛ, é ghɛn jia yî yɛ ki kelik ɛ məm ɛysak nə Feyine.

⁴Naa ndɛ wɛ əb liɛn ngeŋ ə wen ɛ ntiɛ ka wán vin é yî yɛ lu ketuu ɛ məm ɛysak nə Feyine.

⁵Naa ndɛ wɛ əb fiisen wán ka vin bek mɛ lu nɛ əb fiisen nɛ lu mɛ.

⁶Naa ndɛ wɛ əb nɛɛyen ge wel se ɛtɛlɛɛ ghine ghɛ ɛ́ foon ɛytem se mɛ nɛɛy mbee, lu nɛ kè lòó ke yɛ lu kejuŋ se wen ge ɛ́ kul ɛytiy ɛyghuye se wen ə kendoŋ, è mak se jio ɛyghuy.

⁷Lòn se ghele ghɛ mbii bek əbnəə wɛ əb nɛɛyen nɛ ghele nɛɛye mbee. Əbnəə nɛ̂ vin lu se yɛ gan, dî nɛ lòn lu se wel wɛ əb nɛɛyen ge əb yɛ gan.

⁸Keghoo ə kiɛ kene kevəə ə kiɛ lòò è yɛ lofte wɛ̀ ge wɛ̀ nɛɛy mbee, yɛ jof ge wɛ̀ ten è maay. Ke lu kejuŋ se wɛ̀ se kiile ɛychii yɛ ɛy jia yî mɛy ki keghoo kemok kene kevəə kemok chia ka wɛ̀ yɛ ki ɛghoo ɛbaa kene ɛvəə ɛbaa, é Feyine mak wɛ̀ se əbvəs wɛ əb fuon əbliy əbjim.

⁹Ɛyshiɛ ə yiɛ lòò è yɛ lofte wɛ̀ ge wɛ̀ nɛɛy mbee, yɛ jof ge wɛ̀ mɛn è maay, ke lu kejuŋ se wɛ̀ se kiile ɛychii yɛ ɛy jia yî mɛy ki ɛyshiɛ ɛymok chia ka wɛ̀ yɛ ki ɛshiɛ ɛbaa, é Feyine mak wɛ̀ se kemboo əbvəs.

¹⁰Ghɛn yɛ toknen se yɛ kiye wel se ghon ɛtɛlɛɛ ghine lolo. Ghɛn keele ge nchiyse-ndaa nə Feyine sɛ se toknen nɛ̀ ghene lu ghene ghe ba ə wom ɛ ɛyyio əbliy əbjim.

¹¹[Wanwel nè gwiy bek ghel ghɛ ɛ́ lɛyenmen, se boyse ghene.]

¹²Wel lɛ ki bvəyse-njiɛ əbviɛ, yɛ ɛymok lɛy, é ghɛn yɛ kwaate ge əb jɛl lɛɛy? É əb jia vəse sɛ njiose-buumok əmbuumok se kfən è yɛ kɛŋe yɛ ɛymok yɛ ɛy lɛyen-a?

¹³Mɛ suuy se ghɛn ge əb yɛn é əb yɛ saŋle naa se ŋaŋ kum ɛyghen chia ka lòó əb yɛ saŋle kum sɛ njiose-buumok əmbuumok sɛ se kè báà lɛy.

¹⁴Lu sɛy ghɛɛ-ghɛɛ ka Ba ə wom wɛ əb luun ɛ ɛyyio báà se kɛŋe ge wel se ɛtɛlɛɛ ghine kuo.

¹⁵Ke gan ge wan-nyii jas se wɛ̀, wɛ̀ ndu se wen è din jas ə wen nɛ lu kɛn ghɛne wen. Əb beeme ge yi lu nɛ yi jas, fene wɛ̀ lu nɛ wɛ̀ kase kiile wen.

¹⁶Əb jia beeme ge yi lu nɛ yi jas, wɛ̀ liɛ wel əblee kene ɛbaa, é ghɛne ghene ndu, ka wɛ̀ yɛ dine jas ə wen, nɛ ghel ɛyshiɛ lu ɛbaa kene ɛtal.

¹⁷Yɛ lu wɛ ge əb jia beeme jas ə wen ɛ ghene ɛyshiɛ, wɛ̀ me fekte se kenchintene ghel ɛbeemene. Ko yɛ lu wɛ ge əb jia beeme, ghɛn liɛ wen ka wele mbee kene wel ɛyfii shile.

¹⁸Mɛ suuy əbluuy se ghɛn ge naa ghɛ kɛ ghɛn tunsen ɛ ntiɛ fɛn, lu nɛ Feyine tunse ɛyyio, nɛ naa ghɛ kɛ ghɛn beemen ɛ ntiɛ fɛn, lu nɛ Feyine beeme ɛyyio.

¹⁹Mɛ gese se suuy se ghɛn ge naa ɛ leghɛ wɛ ghɛn loon ghel ɛbaa ɛ ntiɛ fɛn è beeme ge lɛɛ kenəə kɛ ghɛne jemen ge Feyine nɛɛy, é Ba ə wom wɛ əb luun ɛ ɛyyio yɛ lu se nɛɛy kɛn di se ghɛn.

²⁰Naa ghááy bene fɛ ghel ɛbaa kene ɛtal chinten ɛ mɛ ɛyghel, fene mɛ lu ghɛse ghene.

²¹Bita me kokte gwiy è bif se Jesus ge: Báàba, wan-no ə wom lɛ lòò è yɛ jas kɛn jasen se mɛ, é mɛ lɛyse se wen kaŋe sek? Ka kaŋ saamba di-a?

²²Jesus fise ge: Ghàà lɛyse kɛn kaŋ saamba, lɛyse kaŋ əmsaamba, əblik saamba.

²³Ke lu dî bek ge ɛysak ə Feyine lu ka əbfon wɛ əb nè kɛŋen se kiynen ɛykaa wen yɛ ghon-ɛyfɛl nə wen nè kiin.

²⁴Əb kɛɛte è loo kiynen ɛ́ gwiy nɛ̀ wel ɛyfɛl əblee nɛ əb ki ɛykaa əbbuam əbkaa əbviɛ.

²⁵Əbkaa vin nè ghakmen wel ɛyfɛl vi se lak. Əbfon vi me làm ge ɛ́ feene wen, nɛ̀ wiy ə wen, gese nɛ̀ ghon ə wene, nɛ̀ ɛykɛŋ ə wene naa ɛyjim è lak ɛykaa wen so.

²⁶Wel ɛyfɛl vi me təm ɛləy ɛ wen ɛyshiɛ è se lone ge: Babɛy ko koosen ɛysen se mɛ, é mɛ nɛ̂y lak əbkaa viɛ əbjim.

²⁷Əbfon vi koosen ɛysen se wel ɛyfɛl vi è me vəse wen, è buuse ɛykaa wen yi ɛyjim.

²⁸Wel ɛyfɛl vi fəy è loo ndu, è yɛn wele ngoo nə wen əblee wɛ əb nè kiin ɛykaa wen nkam ɛyvəm, è sɛy me faŋ wen ɛ əbndoŋ è suuy se wen ge: Lake əbkaa wom.

²⁹Wele ngoo nə wen vi fɛy ɛ wen ɛyshiɛ è se lone wen ge: Babɛy ko koosen ɛysen se mɛ, é mɛ nɛ̂y lak əbkaa viɛ əbjim.

³⁰Əb tɛn, è sɛ́y liɛ wen è ndu è fo ɛ́ vii se ndaa nchak se chin ka əb nɛ̂y lak ɛykaa ten.

³¹Ghel ɛyfɛl nə əbfon vi ɛlee yɛn kenəə kɛ ke ganen, ke yaf ghene. Ghene me ndu è fekte kenəə kejim se əbfon.

³²Əbfon me jaŋ wel ɛyfɛl vi è suuy se wen ge: Wɛ̀ lu wel ɛyfɛl əbbee! Mɛ kè buuse ɛykaa yiɛ bek ka wɛ̀ buken ɛghoo.

³³Kè nɛɛy ghɛ ge wɛ̀ jia koosen ɛysen se wele ngoo nə wɛ̀ kɛn ka mɛ kè koosen ɛysen se wɛ̀?

³⁴Əbfon bif dì è me liɛ wen ɛ əblɛɛ əbbee, è fo ge ɛ́ vii əb yɛ lu ndaa nchak se chin se ka əb nɛ̂y lak ɛykaa wen ɛyjim.

³⁵Jesus loo mɛyse è suuy ge: Wel se ghɛn lòò è jia yɛ lɛyse kejas se wan-no ə wen nɛ̀ ɛyteme wene, fene Ba ə wom wɛ əb luun ɛ ɛyyio nɛɛy se wen kɛn ghɛɛ-ghɛɛ ka əbfon nè nɛɛyen se wel ɛyfɛl vi.