Read Oku Mat 20 Bible Online

Mat 20 - Oku bible

Mat 20

¹Ɛysak ə Feyine lu ɛ jii ghan ge: Babɛy əblee nè lô bvəs è fəy se kɛŋe ghel ghɛ ɛ́ fɛl ɛ wen ɛylem é əb lak.

²Ghene ghene kamnen, è beeme ge əb yɛ lake ghene shile-shile se kechii, əb me suuy ghene se fɛle ɛ wen ɛylem.

³Nɛy se lu ka chuy lùmten, əb ndu əbwɛy è yɛn ghel ɛlee nɛ ɛ́ tiy fo se lólò,

⁴è me suuy se ghene ge: Ghɛn ndu è yɛ fɛl sɛy ɛ mɛ ɛylem, mɛ nɛ̂y lak ghɛn kejuŋ.

⁵Nɛy se lu ka chuy tiysen əb gese ndu əbwɛy è liɛ ghel, chuy nɛy mak mbàŋ setal, əb gese ndu è liɛ ɛlee.

⁶Nɛy se lu ɛ kembolebɛy, əb ndu əbwɛy, è ko gese yɛn ghel ɛlee nɛ ɛ́ tiy fo è bif se ghene ge: Lu bek ghɛ wɛ ghɛn luun fɛn se kechii keful se lólò.

⁷Ghene fise ge: Wele báà liɛ ghɛs se ɛyfɛl. Əb me suuy se ghene ge: Ghɛn ndu è yɛ fɛl ɛ mɛ ɛylem sɛy.

⁸Nɛy loo lu ɛ likfəəy ba ɛylem vi suuy se wel wɛ əb nè toknen nɛ̀ ɛyfɛle ge: Jaŋte ghel ɛyfɛl è lak ghene, kɛɛte nɛ̀ ghɛ ɛ́ kè kɛɛten ɛyfɛl se ɛybam è lak è chin se wel wɛ əb kè gwiyen se mbiy.

⁹Ɛ́ lak ghel ghɛ ɛ́ kè shiken ɛyfɛl ɛ kembolebɛy shile-shile.

¹⁰Ghel ghɛ ɛ́ nè shiken ɛyfɛl se mbiy nɛy gwiy se liɛ əbkaa, è se kwaate ge ɛ́ lak ghene nɛ əbkaa dio, dî ɛ́ lak sɛy ghene shile-shile.

¹¹Ghene fii əbkaa ə ghen, è se vəke ba ɛylem vi,

¹²suuy ge: Ghel ghɛ ɛ́ kè gwiyen se ɛybam fɛl kɛn se chuy ɛymok, dî nɛ ghɛse fɛl se kechii keful ɛyshaa chuy, wɛ̀ ko lak ghɛse ghene ɛyghɛl.

¹³Ba ɛylem me suuy ge: Sun ə yom, mɛ báà boo ghen. Ghɛsen lɛ kè báà beeme ge mɛ nɛ̂y lak ghɛn shile-shile se kechii-a?

¹⁴Ghɛn liɛ əblaake ə wɛn è yɛ kfəəy. Kè koŋ mɛ se fo əbkaa se wel wɛ əb gwiyen è ləysen kɛn ka mɛ foon wɛne.

¹⁵Ke chèmè dine ge mɛ báà se ki əbtaawe se yiɛ əbkaa ə wom ka mɛ koŋen-a? Moo ghɛne baŋe ɛshiɛ bek ka mɛ kiin keghoo keyii-a?

¹⁶Jesus se ləysene suuy ge: Wel wɛ əb luun ɛ ɛybam ɛ leenen nɛ̂y yɛ lu ɛ mbiy, nɛ wel wɛ əb luun ɛ mbiye nɛ̂y yɛ lu ɛybam.

¹⁷Jesus nɛy lòò è se koke ɛ Jolesalem, è liɛ ghon-ɛyfɛl nə wen ghɛ njio-sebaa ɛyvəm ghene ghene bak əbghun, əb suuy se ghene ge:

¹⁸Yɛn-a, ghɛsen koke ɛ Jolesalem ghaa ɛ́ nɛ̂y fo Wanwel se ghele mbiy se ghɛ́ ntaŋlee, nɛ̀ ghɛ́ ɛydinte tesake, ɛ́ chiase ɛysak ge əb lu se kuo,

¹⁹è vii wen se keghoo nɛ̀ ghel əbtume, ɛ́ yɛ buu wen, tɛle, è me bante se kentam. Dî nɛ əbchii nɛ̂y lun əbtal é əb kase loole se ɛykuo.

²⁰Wiy ə Zebedee me gwiy se Jesus nɛ̀ ghon ə wen ghɛ ɛbaa è təm ɛləy ɛ wen ɛyshiɛ è se lone ge əb giamten yi.

²¹Jesus bif se wen ge: Wɛ̀ kɛŋe ghɛ? Əb fise ge: Kake mɛ ge ɛ nɛ̂y loo lu əbliy wɛ wɛ̀ saken əbfone viɛ é ghone ghome diom ɛ wɛ̀ ɛybee, wel əblee se ɛybee əbkoy əbkiye, nɛ̀ əblee se ɛybee əbkoy əbtaa.

²²Jesus fise ge: Ghɛne báà se ke kenəə kɛ ghɛne bifen kin. Lɛ lòó ghɛn nəə əbbome ngɛk wɛ mɛ shiin se nəə-a? Ghene fise ge: Lòó ghɛs nəə.

²³Jesus me suuy se ghene ge: Ghɛne nɛ̂y nəə naa ɛ mɛ əbbom, dî nɛ mɛ báà se ki əbtaawe se choke ghel ghɛ ɛ́ yî diom se mɛ ɛybee əbkoy əbtaa nɛ se mɛ ɛybee əbkoy əbkiye. Əblik nɛ̂ vine lu se ghel ghɛ ba ə wom nè siysen se ghene.

²⁴Ghon-ɛyfɛl ghɛ ɛyvəme yio kenəə nɛ̂ kin, è me se yafse ɛytem se ghone-nyii ghɛ ɛbaa ghii.

²⁵Jesus me jaŋ ghene ghel ɛjim è suuy ge: Ke ghɛn ke ge ghel ghɛ ɛ́ saken əbtum nɛ ghel ghɛ ɛ́ tiyen ɛ mbiy nə ghene ki əbtaawe se nɛɛy naa ghɛ se ghene.

²⁶Ke jia nɛ̂y yɛ lu dì ɛ ghɛne məm. Wel ɛ ghɛne məm lòò è yɛ kɛŋ se yɛ lu ketuu, fene əb lu se yɛ fɛl se wel əbjim,

²⁷nɛ̀ wel se ghɛn koŋe se yɛ lu ɛ keleŋe kɛ́ mbiye, əb yɛ lu kekos ə kɛn;

²⁸kɛn ka Wanwel wɛ əb nè báà gwiy ge ɛ́ yɛ fɛl se yi. Əb nè gwiy è se fɛle se ghele, è gese fo ngeŋ ə wen se tene ghel se ɛydio.

²⁹Jesus ghene ghon-ɛyfɛl nə wene nɛy loo lòò se Jeliko, feliɛ wele lòò ɛ wen ɛybam.

³⁰Nè lu dî nɛ əbnfef əblee əbbua diom se ɛyghaŋe jii; ghene yio ge Jesuse chia fo, è me se jaŋe suuy ge: Báàba, koosen ɛysen se ghɛse wan ə David!

³¹Ngose wel wamnen ghene ge ghene yɛ lu ɛ chichi. Ghene sɛy me waame naa ketaan ketaan ge: Báàba, koosen ɛysen se ghɛse wan ə David!

³²Jesus teem, è toŋte ghene, è bif ge: Ghɛne kɛŋe ge mɛ nɛɛy ghɛ se ghɛn?

³³Ghene me suuy ge: Báàba, yiase ɛshiɛ ə ghɛs.

³⁴Jesus koosen ɛysen se ghene, è kum ɛshiɛ ə ghen, ghene me kase se yɛne əblik kɛn se əbliy, è me se jumte wen.