Read Oku Mat 21 Bible Online

Mat 21 - Oku bible

Mat 21

¹Jesus ghene ghon-ɛyfɛl nə wene ndu è bɛɛte Jolesalem, è chin ɛ ntɛke Betfej əbghune kfən ə Olif, Jesus tum ghon-ɛyfɛl ɛlee ɛbaa,

²è suuy se ghene ge: Ghɛn lii è ndu ɛ məme ntɛk yɛ ɛy luun ɛ ghɛne mbiy yii, ɛ leghɛ é ghɛn yɛn kembɛɛybiy nɛ ɛ́ chəŋ ghene wan, è yas è gwiy so se mɛ.

³Wele loo bife kenəə ghɛn suuy se wen ge: Báàba ki shii se ten, nɛ əb kase tinse kɛn se əbliy.

⁴Kii nɛ̂ kine nè gan se lunse kenəə kɛ wele ntum nə Feyine nè suuyen ge:

⁵“Ghɛn suuy se ghele ghɛ́ Zion ge, Yɛn-a! Əbfon ə wɛn gwiye se ghɛn, nɛ əb liɛ ngeŋ ə wen ɛ ntiɛ, è kok kembɛɛybiy, è kok wán ə kembɛɛybiy.”

⁶Ghon-ɛyfɛl ghii ndu è nɛɛy kɛn ka Jesus kè suuyen.

⁷Ghene gwiy nɛ̀ kembɛɛybiy kii gese nɛ̀ wan ə ten è yiy ndəyse ghen se ketuu gho. Jesus me diom ɛ ten.

⁸Ngose wel yɛ ɛy nè luun fo se saŋte ndəyse ghen se jii nɛ ɛlee kaŋte ɛytam ə əmkak nyiŋse se jii nɛ Jesus chia ɛ ketuu ten.

⁹Ngose wel yɛ ɛy nè nduun ɛ Jesus mbiy nɛ̀ yɛ ɛy nè gwiyen ɛ wene ɛybam me se yofe suuy ge: “Ɛykokse yɛ lu se nyiɛ ndaa nə əbfon wɛ David! Ɛybose lu se vi wɛ əb gwiyen ɛ ɛyghel nɛ̀ Báàba! Ɛykokse yɛ lu se Feyine ɛyyio!”

¹⁰Jesus ndu è lii ɛ Jolesalem, ntɛk ɛyjim shiŋ, ghele se bifte ge: Lu ndɛ nɛ̂ vin?

¹¹Ngose wel yi me suuy ge: Vin lu wele ntum nə Feyine, Jesus wɛ əb lòòn ɛ Nazalet ɛ Galilee.

¹²Jesus me ndu è lii ɛ ndaa-ɛykokse Feyin, è jum ghel ghɛ ɛ́ nè kamnen əbwɛy fo, è bvəŋse əbtatane ghel ghɛ ɛ́ nè kubsen əbkaa è gese bvəŋse əbtiɛ ghel ghɛ ɛ́ nè feenen əbnlal.

¹³Əb suuy se ghene ge: Ɛ́ nyak ɛ ŋwaale-Feyin ge: Feyine suuy ge: Ɛ́ náà yɛ toŋte ndaa ə yom ge ndaa ɛyjem; ghɛne sɛy bense se mbvək ə ɛchoŋ.

¹⁴Əmnfefe ghene ghele ləmene gwiy se Jesus ɛ ndaa-ɛykokse, əb chuk ghene.

¹⁵Ghele mbiy se ghɛ́ ntaŋlee gese nɛ̀ ghɛ́ ɛydinte tesake yɛn əblom wɛ əb nè choken, è gese yio ka ghon ɛtɛlɛɛ yofen ge: Ɛykokse yɛ lu se wan ə David! È me se yafse ɛytem.

¹⁶Ghene me bif se Jesus ge: Wɛ̀ lɛ yio kenəə kɛ ghene suuyen-a? Əb fise ge: Mɛ yio. Ghɛn nè bɛɛy ghàà jaŋ kenəə kɛ ɛ́ nyaken ɛ ŋwaale-Feyin ge: “Feyine nɛɛymen ghon ɛtɛlɛɛ gese nɛ̀ ghɛ ɛ́ bo nyoŋen ɛyghen se kokse wen-a?”

¹⁷Jesus me lòò se fo è ndu ɛ Betani ghaa əb nè chiin.

¹⁸Nɛy se lu ɛ bvəse bvəse Jesus se kase fiile se Jolesalem, nɛ jeŋ yafe wen.

¹⁹Əb loo ndu è yɛn fekake fig ɛ ɛyghaŋe jii, è lii ɛyshaa ten è jia yɛn kefaa naa se nkan buu kɛn ɛghaa; è me suuy se fekak fii ge: Wɛ̀ jia bo yî koom əmtam. Fekake fig fi me yoble kɛn se əbliy.

²⁰Ghon-ɛyfɛl nə Jesus yɛn kii nɛ̂ kine, əbchio yum ghene. Ghene me se kante ge: Ke ghan lɛɛy ge fekake fig fine yoble chikiy chikiy lɛ?

²¹Jesus fise ge: Mɛ suuy əbluuy se ghɛn ge ghɛn fo ɛytem se Feyine, è jia yɛ maanen, fene lòó ghɛn nɛɛy kenəə kɛ mɛ nɛɛyen se fekake fig fine, é jia mɛy kɛn kii nɛ̂ kine, é ghɛn ko yɛ lu kekwɛnten se suuy se kfən yin ge: Məəke è ndu fɛy se jio ɛyghuy, é ke gan dì.

²²Ghɛn fó ɛytem se Feyine, é ghɛn nɛ̂y kiile naa ghɛ kɛ ghɛne bif se wen ɛ ɛyjem.

²³Jesus nɛy kase fiile se ndaa-ɛykokse, è loo dinte əbnəə, ghele mbiy se ghɛ́ ntaŋlee ghene chɛɛse gwiy se wen è bif ge: Wɛ̀ ki əbtaawe əbkɛ se yɛ nɛɛy əbnəə vin? Fo ndɛ əbtaawe nɛ̂ vin se wɛ̀?

²⁴Jesus fise ge: Mɛ bif ɛybif se ghɛn kɛn ɛymok, nɛ ghɛn fó ɛyfise ten, é mɛ me fekte ɛynkii əbtaawe wɛ mɛ kiin se yɛ nɛɛy əbnəə vin so.

²⁵Nè fo ndɛ əbtaawe se Joon ge əb yɛ foo moo se ghele? Nè fo Feyin moo nè fo ghel-a? Ghene me se bekte ge: Ghɛsen lòò è suuy ge nè fo Feyin, é əb me bif ge: Me nɛɛy ghɛ fɛ ghɛn bééme kenəə kɛ Joon nè fekten?

²⁶Dî nɛ ghɛsen fane ngose wel se suuy ge nè fo wel, bek ge wel əbjime yɛne ge Joon lu wele ntum nə Feyine.

²⁷Ke ghak, ghene fise ge: Ghɛse báà se ke. Jesus me suuy ge: Mɛɛ mɛ jia suuy se ghɛn wel wɛ əb foon əbtaawe wɛ mɛ nɛɛyen əbnəə vin so.

²⁸Jesus bif se ghene ge: Ghɛne kwaate gee ghɛ kum kine? Wel əblee nè lô se ki ghon ɛbaa, è nɛ̂y ndu se wɛ ngɛsewel è suuy ge: Wan ə wom, shik ɛ ɛylem lan è yɛ fɛl.

²⁹Əb fise ge: Mɛ jia shik, è nɛ̂y yese, è kubsen ɛykwaate ə wen è me shik.

³⁰Əb ndu se wɛ ɛybam è suuy ge: Shik ɛ ɛylem lan è yɛ fɛl. Əb fise ge: Mɛ shike bàá, dî è jia shik.

³¹Ɛ məme ghon ghɛ ɛbaa ghin, ghɛne yɛne ge nè nɛɛy ndɛ kenəə kɛ ba ə ghen kɛŋe? Ghene fise ge: Wɛ ngɛsewel. Jesus me suuy se ghene ge: Mɛ suuy əbluuy se ghɛn ge, ghel ɛyfii shile ghene əbjɛle se lii se ɛysak nə Feyine se mbiy se ghɛn.

³²Ke lu dî bek ge Joon Nfoo Moo nè gwiy se ghɛn è se dine ge ghɛn yɛ chii ka Feyine kɛŋen, ghɛn jia beeme kenəə kɛ əb nè fekten. Dî ghel ɛyfii shile ghene əbjɛle beeme. Ghɛn yɛn, è chèmè jia kubsen tetem ə tɛn se beeme.

³³Jesus suuy ge: Ghɛn yiote ɛylee yɛ ngan. Wel əblee nè lô dise ɛylem əmtam mɛ ɛ́ sɛɛ nɛyte əmnduk so, è bàklè kengɛy è kal ɛyleme ten so è siyse kelik ɛ ɛytiy kɛ ɛ́ yɛ nɛyte əmnduk ɛ ten, è gese bakle kebaŋ bene fɛ wele nchiye yɛ lu. Əb nɛɛy əbnəə vi dì, è me fo ɛyleme ten se ghel ghɛ ɛ́ yɛ toknen so, è lòò è ndu ɛyjɛl ɛ ketum kelee.

³⁴Əbliy ɛykoy əmtam naa kwɛn, əb tum ghel ɛyfɛl nə wen ge ɛ́ ndu è fii mii mɛ əmtam.

³⁵Ghɛ́ ɛylem ghii faŋ ghel ɛyfɛl ghi, è tɛl wɛ əbmok tɛlen, è yuy əblee, è təmle əblee nɛ̀ ɛtiye.

³⁶Əb gese tum ghel ɛyfɛl ɛlee nɛ ɛ́ dio chia ghɛ əb kè tumen se mbiy. Ghɛ́ ɛylem ghii gese nɛɛy kɛn ka ɛ́ kè nɛɛyen nɛ̀ ghɛ́ mbiye.

³⁷Se ɛybame ten, əb tum kɛn naa wán ə wen se ghene suuye ge: Yè ghɛ é ghene ngvəmle wan ə wom.

³⁸Ghɛ́ ɛylem ghii yɛn wan vi, è sɛ́y suuy se ngeŋse ghene ge: Vin lu nyiɛ ndaa, yɛn-a, ghɛsen yuy wen è yɛ ki əbtik wɛ əb kè nɛ̂y se yiɛ.

³⁹Ghene me faŋ wen, è fəyse se ɛylem fo, è yuy.

⁴⁰Jesus maa ngan yi dì è bif ge: Ba ɛyleme nɛ̂y gwiy, è nɛɛy lɛɛy se ghel ghi ghɛ ɛ́ nè toknen nɛ̀ ɛyleme?

⁴¹Ghene fise ge: Əb gwiy, é əb yuyte ghel ɛbee nɛ̂ ghii yuyten, è fo ɛyleme ten se ghɛ́ ɛyleme ɛchine nɛ lu ghel ghɛ ɛ́ nɛ̂y fo mɛ̂ wen mɛ əmtam ɛ əbliy wɛ ɛ́ koyen ɛ ten.

⁴²Jesus me bif se ghene ge: Ghɛn nè bɛɛy ghàà jaŋ kelike ŋwaale-Feyin kɛ ke suuyen ge: “Ɛytiy yɛ ghɛ́ kembome nè maayen ge ɛy báà se ki ɛyfɛl, lu ɛyghene yɛ ɛ́ tomen ɛybuu ndaa so-a? Kii nɛ̂ kine nè nɛɛy Báàba Feyin, ghele se yɛne lu nɛ̀ əbchio əbyúméné.”

⁴³Mɛ me se suuye se ghɛn ge: Ɛ́ náà fii keleŋ kɛ Feyine foon se ghɛn ɛ wen ə məme ɛysak, è fo se ghel ghii ghɛ ɛ́ nɛɛyen əbnəə wɛ Feyine kɛŋen.

⁴⁴[Naa ndɛ wɛ əb yî fɛy ɛ ɛytiy fɛn yî chɛkte, nɛ ɛytiy yine fɛy ɛ wele ketuu é ɛy jɛm wen jɛmen].

⁴⁵Ghɛ́ ntaŋlee, nɛ̀ ghele kenone Falisee yio ngan sɛ Jesus maan, è keele ge əb suŋnen kum ghene.

⁴⁶Ghene me se kɛŋe ge ɛ́ koo wen, dî è se fane ngose wel bek ge ghele nè yɛne ge Jesus lu wele ntum nə Feyine.