Read Oku Mat 22 Bible Online

Mat 22 - Oku bible

Mat 22

¹Jesus gese se suŋnen se ghele ɛ nganse ge:

²Ɛysak ə Feyine lu ka əbjen wɛ əbfon əblee nè baaten se wan ə wen.

³Əbliye nɛy kwɛn, əb tum ghel ɛyfɛl nə wen se ghel ghɛ əb nè been ge ghene gwiy, ghene sɛy tɛn se gwiy.

⁴Əb me gese tum ghel ɛyfɛl nə wen ɛlee suuye ge: Ghɛn suuy se ghel ghɛ mɛ nè been ge: Mɛ baatemen əbnəə əbjim. Mɛ gwɛlmen ɛlume nyam gese nɛ̀ tekuŋe nyame, kefaa kejime shi kebaaten ka ɛ́ me kɛɛ è yɛ yiɛ. Ghɛn gwiy se əbjen.

⁵Dî ghene yio fuy è se nɛɛye əbnəə ə ghen. Wel əblee shik nɛ lu ɛylem ə wen, əblee ndu ɛ wen ə ndaa əbwɛy,

⁶ɛlee faŋ ghel ɛyfɛl ghi, è tɛl è yuyte.

⁷Ke yaf əbfon vi, əb tinse ghel ɛyghoŋ nə wen, ghene ndu è yuyte sɛy ghel ghi, è nyok ntɛke ghen.

⁸Əb nɛy me suuy se ghel ɛyfɛl nə wene ge: Əbjene kwɛnmen ɛyyiɛ dî nɛ ghel ghɛ mɛ nè been báà se lu kekwɛnten se gwiy.

⁹Ghɛn fəy yi è ndu se əmnkonen, è suuy se naa ndɛ wɛ ghɛne yɛn fo ge əb gwiy.

¹⁰Ghel ɛyfɛl ghi me ndu se əmnkonen, è liɛ wel əbjim wɛ ghene nè yɛnen, kene lu wel əbjuŋ kene əbbee, è gwiy so se bene əbjen, ndaa əbjen lun.

¹¹Əbfon vi nɛy lii se chakte ghɛ́ əbjene, è yɛn wel əblee fo nɛ əb báà mak ndəyse əbjen.

¹²È bif se wen ge: Sun ə yom, wɛ̀ ghan lɛɛy se yɛ lu ɛ məm fɛn nɛ wɛ̀ báà mak ndəyse əbjen? Əb jia se ki kenəə se suuy.

¹³Əbfon me suuy se ghel ɛyfɛl nə wene ge: Ghɛn kul ɛghoo ə wen nɛ̀ ɛvəə ə wene, è mak se bɛy ɛ nfiine bene fɛ əb yɛ toŋ gese kfəle ɛsoŋ.

¹⁴Jesus se ləysene suuy ge: Feyine jaŋe ghel se ɛydio, dî choke se ɛylaay.

¹⁵Ghele kenone Falisee me lòò è ndu è se taŋe ka ɛ́ nɛ̂y gof Jesus nɛ̀ tebife.

¹⁶Ghene nɛy me tinse ghon-ɛyfɛl nə ghene ɛlee gese nɛ̀ ghɛ́ kenon nə Helode se Jesus, ɛ́ suuy se wen ge: Ndinte, ghɛs ke ge wɛ̀ suuye əbluuy. Wɛ̀ fekte kenəə kɛ Feyine kɛŋen ge ghele yɛ nɛɛy, kiye wiy ge ghele sɛ kwaate gee ghɛ-a. Ke lu dî bek ka wɛ̀ báà se kiye ge fekɛɛy ə wele sɛ lu lɛɛy-a.

¹⁷Ghɛse kɛŋe se keele se wɛ̀ ge, ɛysak ə yɛ́sene sɛ bééme ge ɛ́ yɛ lake shile se əbfone Lûm moo ɛngaŋ-a?

¹⁸Jesus keele ge lu gof è me suuy ge: Nfefsese, lu bek ghɛ wɛ ghɛne momen se gofe mɛ?

¹⁹Ghɛn din ɛyshiɛ əbkaa san wɛ ɛ́ laken shile so. Ghene gwiy so se wen.

²⁰Əb bif se ghene ge: Lu ketuu ndɛ gese nɛ̀ ɛyghel ə ndɛ lɛ̂?

²¹Ghene fise ge: Lu kɛ́ əbfone. Əb me suuy se ghene ge: Ghɛn fó yi kɛ́ əbfone se əbfon, è fo kɛ́ Feyine se Feyine.

²²Ghene yio kii nɛ̂ kine, è se lu nɛ̀ əbchíò əbyúméné, è me lòò se ghaa əb nè luun.

²³Kɛn ɛ kechii fo ghele kenone Saddusee ɛlee gwiy se Jesus, nɛ lu ghel ghɛ ɛ́ suuyen ge ghele jia yî loole se ɛykuo, è bif se wen ge:

²⁴Ndinte, Moses nè suuy ge: Wel kuo nɛ əb báà se ki wan, fene wan-no ə wen tiy se lɛme wiy-nkfə nɛ ghene wen yɛ bii ghon ge ghɛ́ wel əbkuone.

²⁵Yɛn-a, ghone-nyii ɛlee nè lô se chii ghɛse ghene fɛn saamba. Wɛ ngɛsewel naa kiile əbvii, è kal è kuo, ki wiy ghon, wiy ə wen me se lu ghene wan-no ə wen.

²⁶Wan-no wen kuo, ɛybame wene kuo, tebame wene kuo tejim.

²⁷Se kenləysen, əbvii vi kuo.

²⁸Ɛ́ náà loo lu ɛ kechii kɛ ghele kase loolen se ɛykuo, é əb yɛ lu wiy ə ndɛ nɛ ghene ghel ɛjim saamba nè liɛmen wen?

²⁹Jesus fise ghene ge: Ghɛne kwaate nɛ ɛybame bek ka ghɛne báà se ke kenəə kɛ ke luun ɛ ŋwaale-Feyin, gese ke wiy əbtaawe Feyin.

³⁰Ɛ́ náà loo lu əbliy wɛ ghele loolen se ɛykuo, é ghene yɛ lu ka nchiyse-ndaa nə Feyine ɛyyio, è jia yɛ ki əbkiy kene ɛlum.

³¹Jesus gese bif se ghene ge: Ke dine ge ghɛne bɛɛy ghàà jaŋ kenəə kɛ Feyine suuyen se ghɛn kum ɛyloole se ɛykuo-a?

³²Feyine nè suuy ge: “Mɛ lu Feyin Fɛ Ablaham nɛ̀ Ayzek gese nɛ̀ Jakobe koksen. Feyine báà se lu Feyin ə ghel ɛkuone, Əb dì lu Feyin ə ghel ɛchiinee.”

³³Ngose wel yio kii nɛ̂ kine, è se lu nɛ̀ əbchíò əbyúméné kum əbnəə wɛ əb nè dinten.

³⁴Ghele kenone Falisee yio ge Jesus chitemen əbchio ghele kenone Saddusee, è me konen è gwiy se Jesus.

³⁵Wel əblee ɛ ghene ngoo nɛ lu ndinte tesak, me gof Jesus nɛ̀ ɛybif yine ge:

³⁶Ndinte, nchil yɛ ɛy chian nchil sejim ɛ məm ɛysak lu ɛy kɛ?

³⁷Jesus fise ge: Wɛ̀ lu se yɛ koŋe Báàba Feyin nə wɛ̀ nɛ̀ ɛytem ə yiɛ ɛyjime, nɛ̀ keyioy ə kiɛ kejime gese nɛ̀ ɛytof ə yiɛ ɛyjime.

³⁸Yin lu nchile yɛ mbiy, nɛ gese lu nchil yɛ ɛy chian nchil sejim.

³⁹Nchil yɛ ɛy kumten ɛyghen lu kɛn ka ɛyghen ge: Wɛ̀ lu se yɛ koŋe wel wɛ əb báksen se wɛ̀ kɛn ka wɛ̀ koŋen ngeŋ ə yiɛ.

⁴⁰Ɛysake Moses ɛyjim, nɛ̀ əbnəə wɛ ghele ntum nə Feyine nè ndinten se ghele yɛkte nɛ lu ɛ nchilse fɛn sebaa.

⁴¹Nɛy se lu ka ghele kenone Falisee konen, Jesus bif se ghene ge:

⁴²Ghɛne kwaate gee ghɛ kum Vi wɛ Feyine nè Yiosen? Əb lu wán ə ndɛ? Ghene fise ge: Əb lu wán ə David.

⁴³Əb bif se ghene ge: Ke ghan lɛɛy nɛ Keyioy Kelanene nɛɛy é David yɛ toŋte wen ge Báàba, suuy ge:

⁴⁴“Báàba Feyin nè suuy se Báàba ə wom ge: Diom se mɛ ɛybee əbkoy əbtaa se chin se ka mɛ nɛ̂y lɛm mbanen ə shiɛ é wɛ̀ tom ɛvəə ɛ ghene əbtuu.”

⁴⁵David nè toŋte wen ge Báàba, ke ghan lɛɛy ge Vi wɛ Feyine nè Yiosen yɛ lu wán ə David?

⁴⁶Wel jia se ki kenəə se suuy; kɛɛte se kechii fo wel jia gese mom ge yi bif ɛybif se Jesus.