Read Oku Mat 23 Bible Online

Mat 23 - Oku bible

Mat 23

¹Jesus me se suŋnen se ngose wel ghene ghon-ɛyfɛl nə wene ge:

²Ghɛ́ ɛydinte tesake ghene ghele kenone Falisee lu ghel ghɛ ɛ́ kiin əbtaawe se yɛ jɛmte tesak ə Moses.

³Ke me se lu ge, ghɛn yɛ nɛɛy əbnəə wɛ ghene suuyen, dî è jia yɛ chii ka ghene bek ge ghene báà se nɛɛy əbnəə wɛ ghene dinten se ghele.

⁴Ghene lóó ɛ́ kokse kediile se wele ketuu, dî è jia yɛ lu se chèmè se lose wan-keghoo se tok so.

⁵Əbnəə əbjim wɛ ghene nɛɛyen lu nɛ ghene nɛɛye ka ghele yɛ yɛn. Ghene lóó ɛ́ nyak giɛse Feyin se əbbual nɛ əb ghake ge, ɛ́ kul se ɛykoy, è kul əblee se əbyes-ɛshiɛ, è gese chəŋte ntekse se ndəyse nɛ se diafke ge.[3]

⁶Ghene ndu kenəə, ɛ́ yɛ koŋ se diom ɛ əbchio ɛkiy, è lii ɛ ngayse ɛyjem ɛ́ diom ɛ əbtiɛ wɛ́ mbiye.

⁷Ghene lóó ɛ́ yɛ koŋ ge ɛ́ yɛ chakte ghene əblik əbwɛy nɛ̀ ɛyvəme, koŋe ge ɛ́ yɛ toŋte ghene ge ndintese.

⁸Ghɛn yɛ kɛ fɛ ɛ́ yɛ toŋte ghɛn ge ndintese, bek ge ghɛn lu ghone-nyii ki kɛn ndinte ɛymok.

⁹Ghɛn yɛ ke sɛy se yɛ toŋte wel ɛ ketuu ntiɛ ge Bay, bek ge ghɛn ki Bay əbmok nɛ lu wɛ əb luun ɛ ɛyyio.

¹⁰Ghɛn yɛ ke fɛ ɛ́ yɛ toŋte wel se ghɛn ge wele mbiy bek ge wele mbiy nə ghɛn lu kɛn əbmok, nɛ lu Vi wɛ Feyine nè Yiosen.

¹¹Wel wɛ əb chian ghel ɛjim ɛ ghɛne məm lu vi wɛ əb səksen ngeŋ ə wen ɛ ntiɛ, è se fɛle se wel əbjim.

¹²Naa ndɛ wɛ əb koksen ngeŋ ə wen lu nɛ Feyine nɛ̂y səkse wen, nɛ naa ndɛ səkse ngeŋ ə wen, é Feyine náà lose wen.

¹³Lòn se ghɛne ndintese tesake gese nɛ̀ ghele kenone Falisee! Ghɛn lu nfefsese. Ghɛne fene jii ɛysak nə Feyine se ghele, dî nɛ ghɛn se ghɛne ngeŋse lii wiy se ten, koŋe wiy se vəse ge ghel ghi ghɛ ɛ́ kɛŋen se lii, lii.

¹⁴[Lòn se ghɛne ndintese tesake gese nɛ ghele kenone Falisee! Ghɛn lu nfefsese. Ghɛne fii əbfua əbkiy-nkfə, dî fefse ghel nɛ̀ ɛyjem ɛydia yɛ ghɛne jemen. Bek kii nɛ̂ kine, Feyine náà mak ngɛk ɛytaa se ghɛn.]

¹⁵Lòn se ghɛne ndintese tesake gese nɛ̀ ghele kenone Falisee! Ghɛn lu nfefsese. Ghɛne lóó ɛ́ yɛ jɛl ɛ ketuu ntiɛ, diaŋe jio seghuye kɛŋe se kiile kɛn wel əbmok wɛ ghɛne nɛɛy é əb bééme se ghɛn. Əb bééme se ghɛn, ghɛn sɛ̂y me nɛɛy ge ngɛk yɛ əb yî kiile əbvəs yɛ dio chia yɛn ka kaŋ ɛbaa.

¹⁶Lòn se ghɛne əbnfef wɛ əb luŋen se yɛ dine jii se ghele! Ghɛne dinte ge wel suuy kenəə è kan ndaa-ɛykokse fene kii nɛ̂ kine báà se lu kenəə, dî nɛ əb loo lu è kan nɛ lu ɛytian yɛ ɛy luun ɛ ndaa-ɛykokse, fene əb lu se nɛɛy kenəə kɛ əb kè kanen bek keghene.

¹⁷Əmnfefe, ghɛn lu əbyuŋ! Kɛ ke chian kelee lu kekɛ, ɛytian moo ndaa-ɛykokse yɛ ɛy nɛɛyen nɛ ɛytiane gee se yɛ lu kefaa kelanene-a?

¹⁸Ghɛne gese dinte ge wel loo lu è suuy kenəə è kan ketatan ɛytio, fene kii nɛ̂ kine báà se lu kenəə, dî nɛ əb kan è toŋte nɛ lu əbfua ɛytio wɛ əb luun ɛ ketatan, fene əb lu se lunse kenəə kɛ əb kè kanen bek keghene.

¹⁹Əbnfefe! Kɛ ke chian kelee lu kekɛ, kefaa ɛytio moo ketatane ntaŋle kɛ ke nɛɛyen nɛ kefaa ɛytio geese yɛ lu kefaa kelanene-a?

²⁰Ke me se lu ge naa ndɛ wɛ əb suuyen kenəə è kan ketatan ɛytio, lu nɛ əb kan ketatan ɛytio nɛ̀ əbfua wɛ əb luun ɛ ten əbjim.

²¹Nɛ naa ndɛ wɛ əb suuyen kenəə è kan ndaa-ɛykokse, lu nɛ əb kan Feyin Fɛ Fe luun ɛ ndaa-ɛykokse fo.

²²Wele suuy kenəə è kan ɛyyio, fene əb kan nɛ lu kaba ə Feyin ghene wel wɛ əb diom ɛ ten.

²³Lòn se ghɛne ndintese tesak gese nɛ̀ ghele kenone Falisee! Ghɛn lu nfefsese. Chèmè lu əbfua wɛ ɛ́ lóó ɛ́ yɛ naaye mbas so, fene ghɛne liɛ, ɛ́ ko nyifte əblik ɛyvəm è fo kemok se Feyine, dî nɛɛye wiy ketuu kenəə kɛ nchile dinen ge ghɛn yɛ nɛɛy, ka se yɛ nɛɛy kenəə kɛ́ titiye se wel, koosen ɛysen se wel, gese foo ɛytem se Feyine. Vii nɛ̂ vine lu əbnəə wɛ ghɛn luun se yɛ nɛɛy, se geese yɛ nɛɛy əmnəətese əmlee.

²⁴Əbnfef wɛ əb luŋen se dine jii se ghele! Ghɛne lóó ɛ́ yɛ luŋ se fəyse fembvəŋ se ghɛn əmnduk, dî mii nyam fenkok.

²⁵Lòn se ghɛne ndintese tesak gese nɛ̀ ghele kenone Falisee! Ghɛn lu nfefsese. Ghɛne lóó ɛ́ yɛ suute ɛybom ə yɛn ghene əbghen ə wɛne kɛn ɛbɛy ɛbɛy, dî nɛ ɛməme tene lun nɛ̀ əbfua wɛ ghɛne fiin se kediak gese nɛ̀ keŋwɛye.

²⁶Ghɛn ghɛ ghele kenone Falisee, ghɛn lu əbnfef! Ghɛn chia mbiy è suute ɛməm ɛybom ghene əbghene, é ɛbɛye ten me yɛ laane sɛy.

²⁷Lòn se ghɛne ndintese tesak gese nɛ ghele kenone Falisee! Ghɛn lu nfefsese. Ghɛn lu ka tesɛy tɛ ɛ́ looten è yiose te se yɛnsene tejuŋ se bɛy, dî nɛ se məm lu əbvəf gese nɛ̀ əbnfoye tegvən nə ghele.

²⁸Lu ghɛɛ-ghɛɛ ka ghɛne yɛnsen ɛ bɛy ɛ bɛy se ghel ə Feyine, dî nɛ ghɛn lu kɛn naa nfefsese gese lu ghele mbeese.

²⁹Lòn se ghɛne ndintese tesak gese nɛ̀ ghele kenone Falisee! Ghɛn lu nfefsese. Ghɛne bome tesɛye ghele ntum nə Feyine, gese lafse tɛ ghel ghii ghɛ ɛ́ nè chiin ɛychii ɛyjuŋe,

³⁰suuye ge: Ghɛs nè bóy se yɛ lu əmchii nə ɛbaa ɛbaa ghɛse, fene ghɛs nè báà yuyte ghele ntum nə Feyine ka ɛbaa ɛbaa ghɛse nè yuyten.

³¹Ghɛne nɛɛy dì nɛ ke me dine se əbluuy ge ghɛn lu ghone ghon nə ghel ghii ghɛ ɛ́ nè yuyten ghele ntum nə Feyine.

³²Ghɛn ndu ɛ mbiy è mɛyse kenəə kɛ ɛbaa ɛbaa ghɛne nɛ̀ kɛɛten!

³³Ghɛn lu yiose, lu ghone əmbûk! Ghɛne kwaate ge ghɛne yî boy se kemboo əbvəs wɛ Feyine náà mak ghɛn ɛ ten-a?

³⁴Mɛ suuy se ghɛn ge mɛ nɛ̂y tum ghele ntum nə Feyine ghene ghel ɛtofene gese nɛ̀ ndintese se ghɛn, é ghɛn yuyte ɛlee, è bante ɛlee se kentam, è tɛl ɛlee ɛ ghɛne ngayse ɛyjem è nəkse ghene ɛ ntɛk ɛ ntɛk.

³⁵Bek kii nɛ̂ kine, Feyine yî mak ngɛk se ghɛn bek ghel ɛjim ghɛ ɛ́ nè yuyten ɛ mbi fɛn nɛ ɛ́ báà se ki kejas, kɛɛte se Abel wɛ əb nè báà se ki kejas è chin se Zakalia wɛ wán ə Balakiah wɛ ghɛn nè yuyen ɛ fetetene ndaa-ɛykokse ghene ketatane ntaŋle.

³⁶Mɛ suuy əbluuy se ghɛn ge ngɛkse əbnəə nɛ̂ ghan əbjime nɛ̂y fɛy ɛ ketuu nə ghele ghɛ́ ntem fɛne.

³⁷O Jolesalem, Jolesalem! Ghɛne yuyte ghele ntum nə Feyine gese təmle ghel ghɛ Feyine tumen se ghɛn nɛ̀ ɛtiye. Lu kaŋe sek wɛ mɛ momen ge mɛ baate ghone ghiɛ ka no ngvəə zəten ghon ɛ wen ɛyshaa ghàà dî wɛ̀ jia beeme.

³⁸Yɛn-a! Feyine maaymen ndaa-ɛykokse nə wɛ̀, ɛy se lu ɛyyum.

³⁹Mɛ suuy se wɛ̀ ge wɛ̀ jia bo nɛ̂y gese yɛn mɛ se chin ka wɛ̀ nɛ̂y suuy ge: Ke lu kejuŋ se wel wɛ əb gwiyen ɛ ɛyghel nə Báàba Feyin.