Read Oku Mat 24 Bible Online

Mat 24 - Oku bible

Mat 24

¹Jesus lòò se ndaa-ɛykokse è loo ndu, ghon-ɛyfɛl nə wene kokte è gwiy ɛ wen ɛyshiɛ è se dine ndaa-ɛykokse yi, bensen jii yɛ ɛ́ nè bomen ɛ ten.

²Jesus sɛy suuy se ghene ge: Ka ghɛne yɛnen nɛ kembome tene jofe lɛ, mɛ suuy əbluuy se ghɛn ge ɛ́ náà kɛs é ɛytiy ɛylee jia yɛ nyiŋ ɛ ɛylee ketuu. Ɛ́ náà səkse kefaa kejim se ntiɛ.

³Nɛy se lu ka Jesus nè koken è diom ɛ kfən Olif, ghon-ɛyfɛl nə wene nyiake gwiy se wen è suuy ge: Fekte se ghɛs əbliy wɛ kenəə kine náà gan, gese nɛ̀ əbchəyte wɛ əb náà din ge wɛ̀ se gwiye, gese nɛ̀ wɛ əb náà din ge mbi se mɛye.

⁴Jesus fise ge: Ghɛn yɛ toknen fɛ wel lɛɛse ghɛn.

⁵Ghele náà fəy è gwiy se ɛydio è yɛ lɛɛse ghel ɛ mɛ ɛyghel suuye ge: Lu mɛ Vi wɛ Feyine nè Yiosen, é ghele jas jii se ɛydio.

⁶Ghɛne naa yio ge ɛ́ təme ɛyghoŋ fɛn-fɛn, è yio ge ɛ́ baate ɛyghoŋ ɛ əbtəm, ghàà ke yɛ foo ngɛk se ghɛn. Əbnəə nɛ̂ vin lu se nɛy se gan, dî nɛ báà se lu ge mbi se mɛye.

⁷Ɛylak ɛlee náà yɛ noo ɛylee, nɛ əbfon ghene ghele ə wene təme ɛyghoŋ ghene ghe əbfon əblee ghene ghel ə wene. Jeŋe naa koo. Ntiɛ naa yɛ shiken ketaan ketaan əblik se ɛydio.

⁸Əbnəə nɛ̂ vin əbjime nɛ̀y yɛ lu kɛn kenkɛɛte kenəə kɛn ka wán ɛ əbliy wɛ əb momen əbvii.

⁹Ɛ́ náà loo lu əbliy fô ɛ́ koo ghɛn è fo ge ɛ́ nəkse è yuy. Mbi ɛyjime náà yɛ bane ghɛn bek mɛ.

¹⁰Ghel se ɛydio náà maa mɛ, è yɛ bane wel nɛ̀ wel, kale əmnaŋ kum ngeŋse ghen.

¹¹Nfektese əbbuame náà fəy è yɛ lɛɛse ghel se ɛydio.

¹²Əbnəə əbbee naa dio ɛ ketuu ntiɛ se ŋaŋ é ghel se ɛydio jia bo yɛ koŋe ghel ɛlee.

¹³Dî nɛ naa ndɛ wɛ əb teem ketaan se chin se kenləysene náà boy.

¹⁴Ɛ́ náà fekte sakghɛ əbjuŋ vin wɛ kum ɛysak ə Feyin é ketuu ntiɛ kejime yio, nɛ mbi geese mɛy.

¹⁵Ghɛne náà yɛn nkfəm ɛybee ɛybee yɛ wele ntum nə Feyine wɛ Daniel nè suuyen, nɛ əb tiy ɛ ndaa-ɛykokse. Naa ndɛ wɛ əb jaŋen, keele.

¹⁶Ghɛne naa yɛn nɛ ke se gane, ghel ghɛ ɛ́ luun ɛ Judea mɛ nyiŋ è kok se kfən

¹⁷Wele yio lu ɛ ketuu ndaa, fɛ əb yɛ jefse əbliy ge yi ko səəke, è liɛ əbfua ə vi ɛ ndaa.

¹⁸Wele yɛ lu əbkwak ghàà əb kfəəy ge yi liɛ ndəyse kenton nə yi.

¹⁹Ke yi yɛ bef se əbkiy ghɛ ɛ́ luun nɛ̀ əmlɛɛme gese nɛ̀ se əbkiy ghɛ ɛ́ kiin ghon ɛbole ɛ keleŋ əbliy fo.

²⁰Ghɛn yɛ jem se Feyine ge ghàà nsam yɛn nɛ̂ yi naa fəy nɛ bèŋ kene ɛ kechii ɛybam.

²¹Ghele naa yɛn ngɛk yɛ wel nè bɛɛy ghàà yɛn, se kɛ̀ɛ̀tè se əbliy wɛ mbi nè kɛɛten se kok se chin se leenen. Nɛ kenəə ka kii nɛ̂ kine jia bo yî gan.

²²Nè báà buu nɛ Feyine fafte əbchii nɛ̂ vi fene wele-mesoŋe jia yî boy. Dî nɛ Feyine naa faf əbchii ten bek ghele wen ghɛ əb nè chokenmen.

²³Wel naa suuy se ghɛn ge: Yɛn-a, Vi wɛ Feyine nè Yiosen vine kene ge! Əb vii dii! Ghàà wel beeme!

²⁴Ghel ɛlee náà fəy è yɛ lɛɛse ghel ge ghene lu Vi wɛ Feyine nè Yiosen, nɛ ɛlee yia ge ghene lu ghele ntum nə Feyine. Ghene náà fek mbɛm è nɛɛy əbnəə əbchio əbyúméné, nɛɛy dî ge jii sɛ yɛ lu yɛ nɛɛy ge ghele jas jii-a, tete-tete ghɛ Feyine nè chokenmen.

²⁵Yɛn-a! Mɛ suuymen əbnəə vin se ghɛn nɛ əbliye bɛɛy ghàà kwɛn.

²⁶Ke me se lu ge ghele naa suuy se ghɛn ge: Yɛn-a! Əb lu əbkwak, ghàà ghɛn ndu fo, kene ɛ́ suuy ge: Yɛn-a! Əb lu ɛ məme ndaa fɛn, ghàà ghɛn beeme.

²⁷Wanwele náà loo gwiy é ke yɛ lu ghɛɛ-ghɛɛ ka ɛyghuu liaken ɛy ban è tosen ɛyyio ɛyjim.

²⁸Wel nè lô maa ngan ge: Kenkuo kefaa loo nyiŋ fɛɛy fene lu ghaa əbngum-ngume yɛ guo.

²⁹Əbliye ngɛk setaa shine náà loo mɛy ɛ leghɛ é chuy liime, é njoŋ jia bo yɛ ban, é əmnjesme fɛyke se ɛyyio. Əbfua nɛ̂ vin wɛ əb kiin kediak ɛ ɛyyio yî shiken.

³⁰Ke naa loo lu dì ɛ́ me yɛn əbchəyte Wanwel ka əb yɛnsen ɛ ɛyyio, é ghele ghɛ́ mbi fɛne ɛjim yɛ toŋnen, è me yɛn Wanwel nɛ əb gwiye ɛ məme mbàkse ɛyyio nɛ̀ kediake gese nɛ̀ əbghaake əbtaa.

³¹Əb náà loo gwiy, é ɛ́ toŋ ɛyshoŋ ɛyghuye, é əb tinse nchiyse-ndaa nə wen se tebuulese mbi tɛ tekɛɛk, é se bááte ghel ə wen ghɛ əb nè chokenmen ɛ ketuu ntiɛ fɛn ɛjim.

³²Ghɛn liɛ nfek se fekake fige. Ɛghaa ə tene sɛɛ kaale, ɛfɛɛ kase loo tooke, wɛ̀ me keele ge əbsane se kake.

³³Lu ghɛɛ-ghɛɛ ka ghɛne naa yɛn əbnəə nɛ̂ vin nɛ əb se gane, ghɛn me keele ge Wanwel se baksene nɛ əb shi kɛn ɛ əmtəəmese.

³⁴Mɛ suuy əbluuy se ghɛn ge ghele ghɛ́ ntem fɛne jia naa kuo è mɛy nɛ əbnəə vine báà gan.

³⁵Ɛyyio ghene ntiɛ yî mɛy, dî nɛ giɛ ə some jia yî mɛy.

³⁶Wele báà se ke kechii, kene əbliy wɛ əbnəə vine náà gan ɛ ten. Chèmè lu nchiyse-ndaa nə Feyine ɛyyio, kene wán ə wen, fene ghene báà se ke. Lu kɛn Bay wen nyiŋ wɛ əb keen.

³⁷Ɛygwiye Wanwele náà yɛ lu kɛn ka ke nè luun ɛ əbliy nə Noa.

³⁸Nɛ jio geese lun se fəy se kuŋe ketuu ntiɛ, nè lu nɛ ghele yiɛ, nəə əmnduk, nɛ ɛluumene ghene əbkiye chintene, se kok se chin se kechii kɛ Noa nè liin se kenək,

³⁹nɛ̀ ghele ke wiy kenəə kɛ ke ganen, se chin se əbliy wɛ jio nè lunen è fəy, è kuŋ ghene ɛjim. Lu ghɛɛ-ghɛɛ ka ke náà gan ɛ əbliy wɛ Wanwele gwiyen.

⁴⁰Ɛ́ náà loo lu əbliy fo, nɛ ghele leme ɛylem ɛbaa, ɛ́ liɛ wɛ əbmok, è vəse əblee.

⁴¹Əbkiye náà yɛ guo keban ɛ ɛytiy ɛbaa, ɛ́ liɛ wɛ əbmok è vəse əblee.

⁴²Ke me se lu ge ghɛn yɛ toknen bek ge ghɛne báà se ke kechii kɛ Báàba ə wen gwiyen ɛ ten.

⁴³Ghɛn yɛ ke ge Ba ə ndaa lòò è yɛ ke əbliy wɛ əbchoŋe nɛ̂y gwiy ɛ ten, é əb chii se kek ka əb yɛ chiye ndaa ə wen è jia vəse ge əbchoŋ kol.

⁴⁴Ke me se lu ge ghɛn yɛ lu kebaaten, bek ge Wanwele náà gwiy ɛ əbliy wɛ ghɛne báà se kwaatee.

⁴⁵Nkante wel ɛyfɛl wɛ əb feesen wɛ ba-ɛyfɛl lòó əb samse è lɛm ge əb yɛ toknen nɛ̀ ghon-ɛyfɛl nə wene gese yiɛse ghene əbliy əbjuŋe lu əbkɛ?

⁴⁶Ke lu kejuŋ se wel ɛyfɛl nɛ̂ vi wɛ ba-ɛyfɛl nə wene nɛ̂y loo gwiy è yɛn nɛ əb nɛɛye ɛyfɛl ə wen.

⁴⁷Mɛ suuy əbluuy se ghɛn ge, ba-ɛyfɛl nə wene nɛ̂y lɛm wen é əb yɛ toknen nɛ̀ ɛykɛŋ ə wen ɛyjim.

⁴⁸Dî nɛ wel ɛyfɛl vi ki ndee ɛybee, é əb suuy se ngeŋ ə wen ge: Ba-ɛyfɛl nə mɛ jia nɛ̂y yaŋse fiile ɛybam;

⁴⁹è me kɛɛte se yɛ tɛle ghon-ɛyfɛl ɛlee tɛlen, gese yiɛ, nəə ghene ghe ɛshiɛ əmnduk;

⁵⁰é ba ə ɛyfɛl nə wen nɛ̂y gwiy ɛ kechii kɛ əb kè báà se kwaatee, gese nɛ̀ se əbliy wɛ əb báà se ke.

⁵¹Əb nɛ̂y gwiy dì è jum wen é əb ndu è yɛ lu ghene nfefsese ghaa ghene yɛ toŋnen gese kfəle ɛsoŋ.