Read Oku Mat 26 Bible Online

Mat 26 - Oku bible

Mat 26

¹Jesus mɛyse ɛyyiɛke yì ɛyjim è me suuy se ghon-ɛyfɛl nə wene ge:

²Ke ghɛn ke ge, ɛ́ lóó lun əbchii əbbua ɛ́ yɛ yiɛ Kechii Ɛyboyse, nɛ lu əbliy wɛ ɛ́ nɛ̂y feene mɛ wɛ Wanwel, ɛ́ bante se kentam.

³Ko kɛn əbliy fo, ghele mbiye se ghɛ́ ntaŋlee gese nɛ̀ chɛɛse konen ɛ Kaiafase bɛy wɛ ketuu se ghɛ́ ntaŋlee,

⁴è se siyse jii yɛ ɛ́ nyiake è koo Jesus è yuy.

⁵Ghene loo siyse dì, è me suuy ge: Lòó jia yɛ lu ɛ kechii keghakene, fɛ ghele lose əbchio.

⁶Jesus nɛ̂y lòò, è ndu ɛ ntɛke Betani, è shik ɛyghan se Simon, nɛ əb nè yimen yaf nɛ̀ kensaasee.

⁷Ghene loo yiɛ, əbvii əblee chia è ndu ɛ Jesus ɛybee, nɛ əb ki febel nɛ̀ keyiósén əbkaa əbtaa lu ɛ ten, è bàà ɛ Jesus ə Ketuu,

⁸ghon-ɛyfɛl nə Jesus yɛn, è se vəke ge: Əbvii vine jefse keyiósén kin lɛ bek ghɛ,

⁹nɛ kè lòó ɛ́ feene keyiósén kin se əbkaa se ɛydio, è gia əbkaa ten se ghɛ́ ketane.

¹⁰Ka ghene vəken dî, Jesus keele, è bif se ghene ge: Ghɛne foo ngɛk se əbvii vin se ghɛ? Əb dì nɛɛy nɛ lu naa kenəə kejuŋe san.

¹¹Ghɛne ghele ketane lu əbliy əbjim, dî nɛ mɛ jia nɛ̂y yɛ lu ghɛsen əbliy əbjim.

¹²Keyiósén kɛ əbvii vin bààn ɛ mɛ əbghun lɛ, lu nɛ əb yiose se siyse əbghun ə wom ka əbliye kwɛn ɛ́ gvəəme.

¹³Ghɛn yɛ ke se əbluuy ge, naa ghááy wɛ ɛ́ náà yɛ fekte sakghɛ əbjuŋ nɛ̂ vin ɛ ketuu ntiɛ kejim, lu nɛ ɛ́ ko náà yɛ fekte sɛy kenəə kɛ əbvii vin nɛɛyen se yɛ kuume wen.

¹⁴Wel əblee ɛ məme ghon-ɛyfɛl nə Jesus ghɛ njio-sebaa ɛyvəm nɛ ɛ́ toŋte ge Judas Iskaliot nɛ̂y lòò ɛ keleŋ əbliy fo è ndu se ghele mbiye se ghɛ́ ntaŋlee,

¹⁵è bif se ghene ge: Mɛ lɛ nɛɛy ghɛne koo Jesus, é ghɛn fó ghɛ se mɛ? Ghene yio dî, è me taŋ ɛshiɛ əbkaa silva əmmtal,[4] è fo se wen.

¹⁶Kɛɛte se əbliy fo, Judas me se kɛŋe jii yɛ əb nɛ̂y din Jesus, é ɛ́ koo.

¹⁷Nɛy loo lu ɛ kechii kɛ́ mbiye əbliy ɛyyiɛ keban kɛ tóó ghàà feshik è kaŋ,[5] ghon-ɛyfɛl nə Jesus gwiy, è bif se wen ge: Wɛ̀ kɛŋe ge, ghɛs nɛyté əbfua-əbyíɛ́ne wɛ wɛ̀ nɛ̂y yiɛ Kechii Ɛyboyse so ghááy?

¹⁸Əb fise ge: Ghɛn lii ndu ɛ məme ntɛk, é ghɛn yɛn wel əblee, è suuy se wen ge: Ndinte suuy-a ge, əbliy ɛykuo nə yi kwɛnmen, nɛ yi kɛŋe ge, ghene ghon-ɛyfɛl nə yi yiɛ Kechii Ɛyboyse ɛ wene ndaa.

¹⁹Ghon-ɛyfɛl nə Jesus ghii me nɛɛy kɛn ka əb nè suuyen, è me fɛl əbfua-əbyíɛ́ne kechii ɛyboyse vi fo.

²⁰Nɛ̂y se lu ɛ likfəəy, Jesus ghene ghon-ɛyfɛl nə wen ghɛ njio-sebaa ɛyvəme me diom è se yíɛ.

²¹Əb me suuy ge: Mɛ suuy kenəə kɛ́ əbluuye se ghɛn ge, wel əblee ɛ ghɛne məme nɛ̂y feene mɛ.

²²Kenəə tene nè lô fo ngɛk se ghene se ŋaŋ, ghene me se bife femok femok ge: Lu mɛ-a? Báàba?

²³Jesus fise ge: Wel wɛ ghɛse wene vii keghoo se kekaŋ əbfua-əbyíɛ́ne nɛ̂y feene mɛ.

²⁴Wanwel shi se kuo kɛn ka ɛ́ nyaken ɛ ŋwaale-Feyin, dî nɛ ngɛk ɛytaa lu se wel vi wɛ əb feenen mɛ. Nɛ nè lòó ke yɛ jof ge, ɛ́ jia bii wel nɛ̂ vin naa se nkan.

²⁵Judas wɛ əb kè feenen Jesus me bif sɛy ge: Lu mɛ-a Ndinte? Jesus fise ge: Lu ka wɛ̀ suuyen.

²⁶Ghene loo yiɛ, Jesus liɛ ntuke keban ɛylee, è bɛ̀ɛ̀lè Feyin, è bɛkte è fo se ghon-ɛyfɛl nə wene, è suuy ge: Ghɛn ko, è yiɛ, lu əbghun ə wom.

²⁷Jesus me gese liɛ əbbom əmnduk, è bɛ̀ɛ̀lè Feyin, è gese suuy se ghene ge: Ghɛn ko, è nəə naa ghel ɛjim,

²⁸lu əmnduŋ mə mom mɛ kum kelek [kefɛɛ]; əm lɛŋ bek ghel se ɛydio ka Feyine lɛyse mbeese ghen.

²⁹Ghɛn keele ge mɛ jia bo yî kase nəə əmnduk min se chin se ka mɛ yî yɛ nəə kefɛɛ ghɛsen, nɛ ba ə wom se sake əbfon ə wen.

³⁰Ghene me yem njàŋ ɛykokse se Feyine, è me fəy è se koke ɛ kfən koo Olif.

³¹Jesus suuy se ghene ge: Ghɛn ghel ɛjime nɛ̂y nyiŋ nɛ ntəke, bek kenəə kɛ ke nɛ̂y gan san. Nɛ lu ka ɛ́ nyake ɛ ŋwaale-Feyin ge: “Mɛ nɛ̂y yuy nchiy-bvəyse, é kenon ə bvəyse takle.

³²Dî nɛ Feyine nɛ̂y lose mɛ se ɛykuo, é mɛ lòò, è ndu se Galilee ɛ ghɛne mbiy.”

³³Bita me suuy ge: Ghele chèmè nɛ̂y nyiŋ wɛ̀ naa ɛjim, é mɛ jia nyiŋ se ten.

³⁴Jesus suuy se wen ge: Kɛ́ əbluuye, kɛn nɛ ntəke lan, lumngvəə nɛ̂y yɛ ghan ge əb toŋ nɛ wɛ̀ maamen mɛ kaŋ ɛtal.

³⁵Bita ko gok kɛn kɛ́ wene ge: Chèmè lu nɛ mɛ nɛ̂y kuo ghɛsoo, é mɛ jia maa wɛ̀! Ghon-ɛyfɛl ɛjime me chìntèn è suuy kɛn dî.

³⁶Jesus lòò ghene ghene mè se nduu ɛ kelik kelee nɛ ɛ́ toŋte ge Getsemane, ɛ́ ndu è chin, əb suuy se ghon-ɛyfɛl nə wen ghii ge: Ghɛn diom fɛn é mɛ keŋte ndu ɛ mbiy è jem.

³⁷Əb suuy dì, è me liɛ Bita ghene ghon ə Zebedee ɛluumene ɛbaa, ghene ghene keŋte ndu. Ketuu toŋ wen, ɛyteme wene me kɛɛte se chiŋe naa se ŋaŋ.

³⁸Əb me suuy se ghene ge: Kenəə kelee foo ngɛk ɛ mɛ ɛytem nɛ lòó ke yuy mɛ. Ghɛn yɛ lu fɛn, ɛ mɛ ɛybee keke.

³⁹Əb suuy dì, è me lòò, è keŋte ndu ɛ mbiy se ɛylaay, è təm əblɛɛ ɛ ntiɛ è jem ge: Ba ə wom, loo lu nɛ lòó wɛ̀ nɛɛy ge ghàà mɛ nəə ɛ te əbbome ngɛkse ghan, wɛ̀ nɛɛy. Dî, nɛ ghàà nɛɛy ɛ mɛ ɛykoŋ, nɛɛy ɛ wɛ̀ ɛykoŋ.

⁴⁰Əb jem dì, è me kase fiile, è ndu bene fɛ ghon-ɛyfɛl nə wen ghɛ ɛtal ghii nè luun, è yɛn nɛ ghene buunee. Əb me bif se Bita ge: Lɛ lu ge kè lòó ghɛn jia yɛ kek jeme ghɛsen kɛn naa se chuy ɛymok-a?

⁴¹Ghɛn yɛ chiy gese jeme, ka ghɛne jia fɛy se məme ɛymomse. Ghɛn yɛ ke ge ɛyteme koŋe se yɛ nɛɛy ɛyfɛl ɛyjuŋe, dî nɛ əbghune kwene.

⁴²Əb kase ndu se jem ge kaŋ ɛbaa, è jem ge: Ba ə wom, loo lu ge lòó əbbom ə ngɛkse vin jia fəy se mɛ keghoo, buu ge mɛ nəə, ke yɛ lu kɛn ka wɛ̀ kɛŋen.

⁴³Əb mɛyse ɛyjem, è kase fiile ghaa ghon-ɛyfɛl nə wen ghii nè luun, è gese yɛn nɛ ghene ko bo buune, bek ka mbuunese nè diilen ɛ ghene ɛshiɛ naa se ŋaŋ.

⁴⁴Əb me gese lòò, è vəse ghene, è ndu se jem ge kaŋ ɛtal, è jem kɛn ka əb kè se jemen.

⁴⁵Əb jem dì è kase gwiy se ghon-ɛyfɛl nə wene nɛ ghene ko bo buune, è suuy ge: Ghɛn ko bo tɛse buune-a? Yɛn-a, əbliye baksenmen wɛ ɛ́ feene Wanwel se ghele mbeese.

⁴⁶Ghɛn loolé, é ghɛsen yɛ ndu. Wel wɛ əb feenen mɛ se gwiye.

⁴⁷Se lu kɛn ka Jesus suuyen dî, Judas wɛ nè luun wel əblee ɛ məme ghon-ɛyfɛl nə wen ghɛ njio-sebaa ɛyvəm me tum fo. Əb nè gwiye nɛ̀ ngoo wel, nɛ ɛ́ ki fiakse nɛ̀ əbbule, nɛ tum ghele mbiy se ndaa-ɛykokse Feyin, gese nɛ̀ chɛɛse.

⁴⁸Nè lu dî nɛ Judase siysemen ghene ghene ge, ghene nɛ̂y yɛn nɛ yi chakte wel nɛ̀ ɛyngvəmlee fene lu-a wen, ghene me koo.

⁴⁹Ghene ghene gwiy è chin, ɛ leghɛ Judas chia è teem ɛ Jesus ɛyshiɛ, è chakte wen ge: Ndinte, mɛ chakte wɛ̀, è me baamé wen.

⁵⁰Jesus suuy se wen ge: Bɛ ə wom, nɛɛy yi kenəə kɛ wɛ̀ kɛŋen se nɛɛy.[6] Ghel ghii me kaame ɛ Jesus ɛ ketuu, è faŋ wen.

⁵¹Wel əblee wɛ ghene ghe Jesus nè luun fo sasen è guf fiak ə wen se əbkuu è gwɛl kekos se ketuu se ghɛ́ ntaŋlee so, è kɛf ketuule.

⁵²Jesus kɛy, è suuy se wen ge: Kase vii fiak ə viɛ se əbkuu. Yɛɛ ke ge naa ndɛ wɛ əb chóken fiak lu nɛ əb nɛ̂y kuo ɛykuo nɛ ɛy ko chia nɛ lu ɛ fiak.

⁵³Wɛ̀ báà se ke ge kè lu əbnoo, é mɛ suuy se Ba ə wom, é əb tinse əbnone nchiyse-ndaa nə wen ɛ nkamse nkamse əbliy əbmok, é ghene gwiy è noo san-a?

⁵⁴Mɛ lɛ nɛɛy dì, é kenəə kɛ ɛ́ nyaken ɛ ŋwaale-Feyin ge ke lu se gan, bo náà ghan lɛɛy se geese gan?

⁵⁵Jesus suuy dì, è me bif se ngoo wel yi ge: Ghɛn bɛ̀yten fiakse gese nɛ̀ əbbule ka ɛ́ jume nɛ lu əbchoŋ se gwiy se koo mɛ-a? Nè tun ghɛ ge ghàà ghɛn koo mɛ əbliy wɛ mɛ nè yesen dinten əbnəə se ghele ɛ ndaa-ɛykokse kechii nɛ̀ kechii?

⁵⁶Əbnəə vin lɛ gan lɛ se lunse əbluuy əbnəə wɛ ghele ntum nə Feyine nè nyaken ɛ ŋwaale-Feyin. Ka ɛ́ koon Jesus dì, ghon-ɛyfɛl nə wene me vəse wen, è nyiŋke ɛjim.

⁵⁷Ghel ghɛ ɛ́ nè koon Jesus ghi, me liɛ wen, è ndu so se Kaiafase bɛy wɛ ketuu se ghɛ́ ntaŋlee. Ghene nè nduu dì nɛ ndintese tesake ghene chɛɛ sɛ ɛylak foo kè shi fo chiytee.

⁵⁸Ɛ́ loo ndu nɛ̀ Jesus dì, Bita se nyiake nduu ɛybam, dî nduu baksen wiy se ghene. Əb ndu è chin ɛ ntetembɛy nə ketuu se ghɛ́ ntaŋlee, è chia diom ghene nchiyse-ndaa, è se yiote ge é sɛ gan ghɛ se Jesus-a?

⁵⁹Ghele mbiy se ghɛ́ ntaŋlee, ghene ghel ɛjim ghɛ ɛ́ nè luun ɛ ɛydiom fo, me se kɛŋe kenəə kɛ toy ɛ Jesus əbghun, ka ɛ́ yuy wen;

⁶⁰è chèmè jia yɛn ghɛy. Naa nɛ ghel əbbuame teem naa se ɛydio è se toye əbnəə ɛ Jesus əbghun! Ke ghak, ghel ɛlee din ketuu ɛbaa,

⁶¹è suuy ge: Biɛ vin ne suuy ge lòó yi sakte ndaa-ɛykokse nə Feyine, è kase bom ɛychin se əbchii əbtal.

⁶²Ketuu se ghɛ́ ntaŋlee me loole, è teem ɛyyio, è bif se Jesus ge: Wɛ̀ lɛ ki kenəə se suuy ɛ kenəə kɛ ghel ghine suuyen kum wɛ̀-a?

⁶³Jesus gok kɛn ɛ chichi. Ketuu se ghɛ́ ntaŋlee ki me suuy se wen ge, mɛ suuy ge wɛ̀ kan ɛyghel ə Feyin Fɛ Fe chiin ge wɛ̀ sɛ lu Vi wɛ Feyine nè Yiosen, wɛ̀ luun wán ə Feyin-a.

⁶⁴Jesus fise ge: Ke lu ka wɛ̀ suuyen. Dî nɛ ghɛn gese yɛ ke ge, ɛ́ lóó moote é ghɛn yɛn Wanwel nɛ əb diom ɛ ɛybee əbkoy əbtaa nə Feyine, Wɛ Ba-Əbtaawe-Əbjim, è gese yɛn nɛ əb gwiye ɛ məme mbàke sɛ́ ɛyyio.

⁶⁵Ketuu se ghɛ́ ntaŋlee yio dî è me sas ndəyse wen nɛ̀ ngeŋ wen, è suuy ge: Wel vin tɛymen Feyin. Lòó ɛ́ jia bo yɛ kɛŋe kenəə kɛŋen kum wen. Ghɛn lu nɛ ɛ́ yio sɛy ka əb tɛyen Feyin.

⁶⁶Ghɛne kwaate ge ɛ́ nɛɛy lɛ́ɛ́y nɛ̀ wen? Ghene fise naa ghel ɛjim ge, ɛ́ yuy wen.

⁶⁷Ghel ɛlee me tio teliɛ ɛ Jesus ɛykek, ghel ɛlee kfənle wen, nɛ ɛlee saaye ɛghoo ɛ wen ɛykek.

⁶⁸Ghene nɛɛy əbnəə vin se Jesus dì, è me se wɛysee, bife se wen ge: Wɛ̀ wɛ wɛ̀ been ge wɛ̀ lu Vi wɛ Feyine nè Yiosen, lɛ lòó wɛ̀ din wel wɛ əb tɛ̀lèn wɛ̀-a?

⁶⁹Ka ɛ́ nɛɛyen dî, nɛ Bita ko diom kɛn se ntetembɛy fo. Wándɛ əbvii əblee wɛ əb nè fɛ́len ɛ bɛy fo yɛn wen, è ndu, è suuy se wen ge: Wɛɛ wɛ̀ sɛy nè lô se lu ghɛne Jesus wɛ̂ Galilee vi.

⁷⁰Bita maa lɛ keful ɛ ɛyshiɛ nə ghel ɛjime, è suuy ge: Mɛ báà se ke kenəə kin kɛ wɛ̀ suuyen se mɛ.

⁷¹Əb maa dî, è me lòò se fo, è ndu è teem jii əbchio bɛy. Wándɛ əbvii əblee wɛ əb ko nè fɛ́len ɛ bɛy fo sɛy gese yɛn wen, è suuy se ghel ghɛ ɛ́ nè teem fo ge: Wel vin nè lô se lu ɛ ngoo nə Jesuse wɛ̂ Nazalet.

⁷²Bita gese maa, è kan ɛyghele Feyin, ge yi báà se ke wen.

⁷³Se moote kɛn lɛ ghel ghɛ ɛ́ nè teem əbchio bɛy ghi, kokte è ndu, è suuy se Bita ge: Ke loote lu se əbluuy ge wɛ̀ lu wele ngoo nə Jesus, bek ge kesuŋnene kiɛ dine ge wɛ̀ lu wele wɛ̂ Galilee.

⁷⁴Bita me kɛ̀ɛ̀tè leenen se laa kelek ge, loo lu nɛ yi yia əbbuam, Feyine mak ngɛk se yi ketuu, yi báà se ke wel nɛ̂ vin. Kɛn ka əb choken giɛ se əbchio, lumngvəə me toŋ.

⁷⁵Əb me kuume kenəə kɛ Jesus nè suuyen ge: Lumngvəə nɛ̂y yɛ ghan ge əb toŋ, nɛ wɛ̀ maamen mɛ kaŋ ɛtal. Ka Bita kuumen dî, è me nyiake teem jii bɛy, è kɛ̀sèn nɛ̀ ɛydiye.