Read Oku Mat 27 Bible Online

Mat 27 - Oku bible

Mat 27

¹Əbtəke bvəs è yio, ghele mbiye se ghɛ́ ntaŋlee, ghene chɛɛ sɛ ɛylake Juda naa sejim konen, è se siyse jii yɛ lòó ɛ́ chia ɛ ten, è yuy Jesus.

²Ghene suŋnen dì, è me ghal wen è kul ɛykoy ə wen, è ndu so se Bailɛt wɛ əb nè saken ɛylake Juda əbliy fo.

³Judas wɛ əb nè feenen Jesus me keele ge ɛ́ shi se yuye Jesus, è me se diye əbghun náà se ŋaŋ, è liɛ ɛshiɛ əbkaa silva ghɛ əmmtal ghi è ndu so se kase se seese se ghele mbiy se ghɛ́ ntaŋlee gese nɛ̀ chɛɛ sɛ ɛylak foo.

⁴Əb ndu so dì, è suuy se ghene ge: Mɛ lu nɛ mɛ nɛɛy mbee, è feene wel ge ɛ́ yuy nɛ əb báà jas kenəə. Ghene fise ge: Ɛ́ keele wɛ̀, kii nɛ̂ kii di báà kum ghɛs.

⁵Judas me waŋ əbkaa vi se ndaa-ɛykokse, è fəy è ndu è shiŋse.

⁶Ghele mbiy se ghɛ́ ntaŋlee ghii me biŋte ɛshiɛ əbkaa silva ghi, è suuy ge: Vine lu əbkaa əmnduŋ, nɛ ɛysake báà beeme ge lòó ɛ́ vii se kebame kɛ́ ndaa-ɛykokse.

⁷Ghene suuy dì, è me siyse è liɛ əbkaa ten è yun kelik ɛylem kɛ ghel ɛybome ntonse nè sɛɛ liɛ kechak ɛ ten, è lɛm se kelik kɛ ɛ́ yɛ gvəəme ghel ɛgwiyene ɛ ten.

⁸Di ghan kenəə kɛ ke nɛɛyen ɛ́ se toŋte ɛyleme ten ge: Ɛylem əmnduŋ, se kok se chin se lan.

⁹Ke lɛ nè gan dî se lunse kenəə kɛ Jelemia wɛ wele ntum nə Feyine nè nyaken ge: “Ɛ́ nè liɛ ɛshiɛ əbkaa silva əmmtal, nɛ lu əbkaa ketuu nə wen wɛ ghele Islaele nè beemen ge ɛ lak,

¹⁰è me lak ɛylem ə wel ɛybome ntonse so, kɛn ka Báàba nè suuyen se mɛ.”

¹¹Ka ɛ́ nduun nɛ̀ Jesus ɛ Bailɛt ɛyshiɛ, Bailɛt bif se wen ge: Lɛ lu wɛ̀ əbfon ə ghele Juus-a? Jesus fise ge: Kene lu ka wɛ̀ suuyen.

¹²Ghele mbiy se ghɛ́ ntaŋlee gese nɛ̀ chɛɛ sɛ ɛylak foo ko se toye əbnəə ɛ Jesus ə əbghun. Əb jia suuy naa kenəə se nkan.

¹³Bailɛt gese bif se wen ge: Wɛ̀ báà se yio əbnəə vin wɛ ghel ghine toyen wɛ̀ se ten-a?

¹⁴Jesus ko gok kɛn ɛ chichi è jia fise kenəə naa se nkan, əbchio yum Bailɛt.

¹⁵Ke nè lu ɛ ndee nə Goveno ge, ɛ́ loo yiɛ Kechii Ɛyboyse fene ghele din wel əbmok ɛ məme ghele nchak wɛ ghene koŋen ge ɛ́ fəyse se nchak, é əb me fəyse.

¹⁶Nè lu əbliy fo nɛ wel əblee lu ɛ ndaa-nchak nɛ ɛ́ toŋte ge Balabbas, nɛ wel əbjim ke feteete ə wen.

¹⁷Se lu ka ghele nè kaamen, Bailɛt bif se ghene ge: Ɛ məme ghel ghɛ ɛbaa ghin, ghɛne koŋe ge mɛ fəyse ndɛ? Mɛ fəyse Balabbas moo Jesus wɛ ɛ́ toŋten ge Vi wɛ Feyine nè Yiosen-a?

¹⁸Bailɛt nè bife di, bek ka əb nè keen ge ghɛ́ mbiy nə ghele Juuse nè gwiy nɛ̀ Jesus se yi nɛ ɛ́ ghɛk kɛn wen ghɛken.

¹⁹Se lu nɛ Bailɛt bo sake nsake Jesus, wiy ə wen me tinse ntum se wen ge, ghàà əb yɛ ki kenəə se nɛɛy kum wele wel vi nɛ əb báà nɛɛy kenəə kebee. Yi ne lô yɛn ngɛk ɛ jɛmse nɛ ntəke kum wel nɛ̂ vi.

²⁰Ka Bailɛt bifen ge, yi sɛ fəyse ndɛ-a, ghele mbiy se ghɛ́ ntaŋlee gese nɛ̀ chɛɛ sɛ ɛylak foo, me bɛyte ngose wel yi ge ghene suuy ge əb fəyse nɛ lu Balabbas, è yuy Jesus.

²¹Bailɛt gese bif se ghene ge: Ghɛne koŋe ge mɛ fəyse ndɛ ɛ məme ghel ghɛ ɛbaa ghine? Ghene suuy ge əb fəyse Balabbas.

²²Ghene suuy di, Bailɛt me gese bif se ghene ge: Mɛ nɛɛy lɛɛy nɛ̀ Jesus wɛ ɛ́ toŋten ge Vi wɛ Feyine nè Yiosen? Ghene suuy kɛn ɛ giɛ ɛymok ge: Bante wen se kentam.

²³Əb bif ge: Mbee ə wen lu ghɛ? Ghene chinten ghel ɛjim è waame kɛn waamen ge: Bante wen se kentam.

²⁴Bailɛt yɛn ge kenəə bɛɛy wiy kɛ lòó yi nɛɛy, è se fane ge lòó kenəə tene gwiy nɛ̀ ngɛkse é fenkame me loo è dək, è me suuy ɛ́ sɛfte moo è gwiy so, əb suu ɛghoo wen so ɛ ghel ɛjime ɛyshiɛ, è suuy ge: Keghoo kome wiy ɛ wel vin ɛykuo. Keele ghɛn.

²⁵Ghel ghi sɛbte, è suuy ge: Ɛ́ nɛɛy é əmnduŋ mə ɛykuo nə wen fɛy ɛ ghɛse ghon ə ghɛse ketuu.

²⁶Bailɛt yio, è me fəyse Balabbas se ndaa nchak se ghene, è suuy ɛ́ tɛl Jesus ɛ leghɛ, əb me fo ge ɛ́ ndu yi è bante se kentam.

²⁷Ghele nchiy nə Bailɛt me liɛ Jesus, è lii nɛ̀ wen jii məme bɛy, è jaŋte ghele ngoo nə ghen, ghene gwiy è teem è kaale Jesus.

²⁸Ghene gwiy dì, è chokte ndəyse se wen əbghun, è liɛ ɛynkii ndəyse ghel ɛyghoŋ nɛ se baŋe baŋen è lafse wen so,

²⁹è báá kefol nɛ̀ njoŋse, è sooy se wene ketuu, è liɛ mbàŋ è vii se wene keghoo kɛ́ əbkoy əbtaa, ge lu kedioŋ əbfon. Ghene nɛɛy əbnəə vin dì, è me təm ɛləy ɛ wen ɛyshiɛ, è se buu suuye ge: Ghɛse bune wɛ̀ əbfon ə ghele Juus.

³⁰Ghene gese tio teliɛ ɛ wen ɛykek, è fii mbàŋ yɛ əb kè kiin ɛ keghoo yi è tɛl ketuu wen so.

³¹Ghene buu Jesus, è mɛyse, è me chok ɛylaf yi se wen əbghun, è kase mak ndəyse wen, è liɛ wen è se nduu so se bante se kentam.

³²Ghene fəy, è loo ndu, ghene ghe wele wɛ̂ Silene əblee konen nɛ̀ ɛ́ toŋte ge Simon. Ghene me kan wel vi bɛɛy fekake kentam nə Jesus fi.

³³Əb bɛɛy, ghene ghene se nduu, è nɛ̂y ndu è chin ɛ kelik kelee nɛ ɛ́ toŋte ge Golgota, nɛ ɛyghel yɛ Golgota yin lu ge: Kevəf ə ketuu,

³⁴è fo ɛynkii əmnduk əmlee se Jesus ge əb nəə, nɛ ɛ́ fis nɛ̀ kefaa kelee, nɛ ke luye ka kenluy-chek. Əb fii è mom, è tɛn se nəə.

³⁵Ɛ́ me bante wen se kentam, è liɛ ndəyse wen è se make kaŋ se yɛn ge ɛ́ sɛ giate ɛ jii ɛykɛ-a,

³⁶è me diom fo, è se chiye.

³⁷Ɛ́ me nyak kenəə è base se wen ə ketuu kentam ge lu njio ə wen kenəə nɛ̂ kin nè lu ge: “Vin lu Jesus wɛ əbfon ə ghele Juus.”

³⁸Ɛ́ gese bante kokse ɛchoŋ selee sebaa se əmntam əblee ɛ Jesus ɛyghaŋ, bante əblee jii Jesus ɛybee əbkoy əbtaa, nɛ̀ əblee ɛ wen ɛybee əbkoy əbkiye.

³⁹Ghel ghɛ ɛ́ nè chian jii fo me se mɛkte əbtuu ə ghen tɛyle wen

⁴⁰suuye ge: Ahaa! Wɛ̀ ne bee ge wɛ̀ sakte ndaa-ɛykokse, è kase baklé se əbchii əbtal, wɛ̀ báà giamten ngeŋ ə yiɛ è səəke se kentam fɛy se din ge wɛ̀ lu wán ə Feyin-a!

⁴¹Ghele mbiy se ghɛ́ ntaŋlee, nɛ̀ ndintese tesake, gese nɛ̀ chɛɛ sɛ ɛylak foo ko se buu sɛy Jesus, suuye ge:

⁴²Əb ne ghane giamten kɛn ghel ɛchine. Se lu ɛ leenen nɛ lòó əb jia giamten ngeŋ ə wen. Wen wɛ əb ne been ge yi lu əbfon ə ghele Islaele, əb səəke yi ɛ leenen se kentam fɛn, é ghɛs fo ɛytem se wen.

⁴³Əb nè suuy ge, yi samse ɛytem ə yi se Feyine. Loo lu ge Feyine koŋe wen, Əb giamten yi wen ɛ leenen, bek ge əb ne bee ge yi lu Wán ə Feyin.

⁴⁴Ɛchoŋ ghii ghɛ ɛ́ nè banten ghene ghe Jesus, ko se tɛyle sɛy wen di.

⁴⁵Nɛy se lu ka chuy tiysen, mbi sasen fin naa ɛyjim, è fin dî se chuy setal.

⁴⁶Chuy nɛy mak mbàŋ setal, Jesus toŋ ɛ giɛ ɛytaa ge: Eli, Eli, Lema Sabatani? Nɛ ke lu ge: Feyine Fome, Feyine Fome, wɛ̀ maay mɛ lɛ bek ghɛ?

⁴⁷Ghel ɛlee ɛ məme ghel ghɛ ɛ́ nè tiyen fo yio, è me se suuy ge: Əb yi ka əb se jaŋen Elija.

⁴⁸Wel əblee ɛ ghene məm nyiŋ è ndu liɛ kuncha, è chəə se məme kengwɛy əmnduk, è sooy se wan fekak, è lose se Jesus, ge əb nyioŋe.

⁴⁹Ghel ɛlee suuy ge, ɛ́ yiote wɛ yio ge Elija sɛ gwiy, è giamten wen-a?

⁵⁰Jesus nɛ̂y gese toŋ ɛ giɛ ɛytaa, è me yioy kenləysen keyioy nə wen.

⁵¹Ka Jesus kuon ɛ leghɛ, ndəy sɛ ɛ́ nè keŋen ɛybuu ɛylanene so ɛ ndaa-ɛykokse me basen əbwaŋ əbbua se loo ɛ ɛyyio se səəke se chin ɛ ntiɛ. Ntiɛ nè lô shiŋ, ɛtiye bayte.

⁵²Tesɛye dise, ghel ə Feyin ghɛ ɛ́ nè kuokenmen kase loole se ɛykuo naa se ɛydio.

⁵³Feyine nɛ̂y lose Jesus se ɛykuo, ghel ghi me lòò è ndu se Jolesalem, ghele yɛn ghene naa se ɛydio.

⁵⁴Ketuu ghel ɛyghoŋ ghene ghel ɛyghoŋ ghɛ ɛ́ nè chiyen Jesus əbliy wɛ ɛ́ nè banten wen, yɛn ka ntiɛ shiken, è gese yɛn əbnəə wɛ əb nè ganen naa əbjim, ɛyfane koo ghene naa se ŋaŋ. Ghene me suuy ge: Wel vin nè lu kɛn naa Wán Feyin se əbluuy.

⁵⁵Əbkiy ghɛ ɛ́ nè lòòn ɛ Jesus ɛybam ɛ Galilee, è se jɛle giamten wen nè lô se lu fô, nɛ ghene teem əbtəm, è se kiye.

⁵⁶Əbkiy ɛlee ɛ məme əbkiy ghɛ́ tene nè lu: Mɛɛle Magdalene, nɛ̀ Mɛɛle wɛ no ə Jɛms ghene Josɛf gese nɛ̀ no ə ghon nə Zebedee.

⁵⁷Ka əbtəke jiɛn gwiyen, wel əbghaken wɛ̂ Alimatea əblee nɛ ɛ́ toŋte ge Josɛf me gwiy. Wel nɛ̂ vin nè lu sɛy wán-ɛyfɛl nə Jesus.

⁵⁸Əb gwiy dì, è ndu è yɛn Bailɛt, è lon ge ɛ́ fó ɛygvən ə Jesus se yi. Bailɛt bééme, è suuy ge ɛ́ ndu è səkse è fo se wen.

⁵⁹Ɛ́ səkse ɛygvən ə Jesus yi, Josɛf fii, è limte nɛ̀ əbkoy ndəyse əbfɛɛ,

⁶⁰è ndu è vii se wen wɛ Josɛf ɛysɛy yɛ əb nè chufen ɛ ɛyghok,[7] nɛ ɛy bo bɛɛy kɛn ɛyfɛɛ. Əb vii di, è me biŋse lum ɛytiy, è chite əbchio ɛysɛy yi so, è me lòò.

⁶¹Nè lu dî nɛ Mɛɛle Magdalene gese nɛ̀ Mɛɛle wɛ no ə Jɛms ghene Josɛf lu fo nɛ ghene diom jii diaŋsen ɛysɛ̂y fo, è se kiye.

⁶²Əbtəke bvəs è yio ɛ kechii ɛybam kɛ ɛ́ nè baaten se ten, ghele mbiy se ndaa-ɛykokse Feyin ghene ghele kenone Falisee ndu è yɛn Bailɛt,

⁶³è suuy se wen ge: Babɛy, ghɛs ko bo kuume kenəə kɛ biɛ vin nè suuyen əbliy wɛ əb nè bo kumen ɛyyio. Əb nè suuy ge, yi nɛ̂y kuo é əbchii loo lun ge əbtal é yi kase loolé se ɛykuo.

⁶⁴Bek kii nɛ̂ kine, ghɛse me gwiy se suuy ge wɛ̀ tinse ghel ɛyghoŋ nə wɛ̀ é ghene ndu è yɛ chiy ɛysɛye ten se chin ka əbchii wɛ əbtal nɛ̂ vii chia. Ɛ́ jia nɛɛy di, é ghon-ɛyfɛl nə wene nɛ̂y gwiy è choŋ ɛygvən ə wen è lòò so, è yɛ̂ ghane suuy se ghele ge əb lòòlemen se ɛykuo. Ghene kè lòò, è loo suuy ndu di, é əbbuam nɛ̂ vine yɛ bɛɛmê chia wɛ̂ mbiye.

⁶⁵Bailɛt bééme, è suuy se ghene ge: Ghɛn liɛ ghel ɛyghoŋ, é ghene ndu, è yɛ loote chiy ɛysɛye ten ɛ jii yɛ ghɛne kɛŋen.

⁶⁶Ghene me ndu, è me loote siyse è chəysen ɛytiy yɛ ɛ́ nè chiten əbchio ɛysɛy yi so, è gese lɛm ghel ɛyghoŋ ge, ghene yɛ chiy.