Read Oku Mat 28 Bible Online

Mat 28 - Oku bible

Mat 28

¹Kechii ɛybame chia, se lu bvəse bvəse kechii kɛ́ mbiye ɛ məme əbwɛy, Mɛɛle Magdalene ghene Mɛɛle wɛ no ə Jɛms ghene Josɛf ndu se kiy ɛysɛy ə Jesus.

²Ɛ leghɛ ntiɛ me shiken naa se ŋaŋ, bek ka nchiy-ndaa-Feyin nè səəken se ɛyyio, è biŋse ɛytiy yɛ ɛ́ nè chiten ɛysɛ̂y so, è diom se ketuu ten.

³Ɛykek ə wene nè liake ka ɛyghuu ɛyliakene, nɛ̀ ndəyse wene fəfe ka ɛybvəə.

⁴Ghel ɛyghoŋ ghɛ ɛ́ nè chiyen ɛysɛy ə Jesus yɛn dî, ɛyfane koo ghene, ghene fɛyke se ntiɛ, è se lu ka əbnkuo ghel.

⁵Nchiy-ndaa-Feyin yi suuy se əbkiy ghii ge: Ghàà ghɛn yɛ fan, mɛ ke ge ghɛne kɛŋe Jesus, wɛ ɛ́ nè banten se kentam.

⁶Əb báà se lu fɛn. Feyine losemen wen se ɛykuo kɛn ɛyghɛl ka əb nè suuyen ɛ əbliy wɛ əb nè bo bɛɛyen əbtaa. Ghɛn gwiy, è yɛn bene fɛ ɛygvən ə wene ne nyiŋen.

⁷Ghɛn ndu chikiy-chikiy, è suuy se ghon-ɛyfɛl nə wene ge Feyine losemen wen se ɛykuo. Əb loomen è se nduu ɛ Galilee ɛ ghɛne mbiy ghaa ghɛne nɛ̂y yɛn wen, mɛ lu nɛ mɛ suuymen se ghɛn.

⁸Əbkiy ghi me lòò se əbghun ɛysɛy fɛy kɛn lɛ chikiy-chikiy, è se nduu se fekte se ghon-ɛyfɛl nə Jesuse. Ghene nè nduu dì nɛ ɛyfane koo ghene, nɛ ghene ko saŋlee.

⁹Ghene loo ndu di, ɛ leghɛ, ghene ghe Jesus konen, Əb chakte ghene ge: Mɛ chakte ghɛn. Ghene me chia è baamé ɛvəə ə wen, è se foo ɛykokse se wen.

¹⁰Jesus suuy se ghene ge: Ghàà ghɛn yɛ fan. Ghɛn ndu, è suuy se ghele ngoo nə mɛɛ ge ghene yɛ ndu ɛ Galilee bene fɛ ghɛse ghene konen.

¹¹Əbkiy ghi lòò, è loo ndu se teefe ntum yi, ghel ɛyghoŋ ghɛ ɛ́ nè chiyen ɛysɛy ə Jesus, me lòò, è lii ndu ɛ məm ɛylak, è fekte əbnəə wɛ əb nè ganen naa əbjim se ghele mbiye se ghɛ́ ntaŋlee.

¹²Ghele mbiye se ghɛ́ ntaŋlee ghii ghene chɛɛ sɛ ɛylak foo me diom è siyse, è fo ntuk əbkaa se ghel ɛyghoŋ se chite ɛychio ghen so.

¹³Ghene fó dî, è suuy se ghene ge: Ghɛn lu se suuy se ghele kɛn ge ghon-ɛyfɛl nə wene ne gwiy nɛ ntəke è choŋ ɛygvən ə wen nɛ ghɛs buune.

¹⁴Ghene suuy di, è me gese din se ghene ge: Goveno loo lu è nɛ̂y yio kenəə kin, é ghɛs ko keele kenəə kɛ ghɛse nɛɛy ka lòó ghɛn jia kiile ngɛkse.

¹⁵Ghel ɛyghoŋ ghii fii əbkaa vi, è me nɛɛy kɛn ka ɛ́ suuy ge ghene nɛɛy. Mɛ se lu nɛ lu əbbuam wɛ ɛ́ yian nduun ɛ məm nə ghele Juuse se chin se lan, ge ɛ́ nè choŋ ɛygvən ə Jesus choŋen.

¹⁶Ghon-ɛyfɛl nə Jesus ghɛ njio-ɛymok ɛyvəm me lòò, è ndu ɛ Galilee, è kok ɛ kfən yɛ Jesus nè suuyen ge ghene ghene nɛ̂y konen ɛ ten.

¹⁷Ghene kok è chin fo, è yɛn Jesus, è se foo ɛykokse se wen, dî nɛ ghel ɛlee ko maanene ge ko lɛ lu wen-a?

¹⁸Jesus kokte baksen se ghene, è suuy se ghene ge: Ba ə wom lu nɛ əb foomen əbtaawe ɛysake wɛ́ ɛyyio gese nɛ̀ wɛ́ ntiɛ se mɛ əbjim.

¹⁹Ghɛn ndu yì se əbtum əbjim, è nɛɛy ghele yɛ lu ghon-ɛyfɛl nə mɛ, é ghɛn yɛ foo moo se ghene, se ɛyghel nə Bay, nɛ̀ se ɛyghel nə Wan, gese nɛ̀ se ɛyghel nə Keyioy Kelanene.

²⁰Ghɛn dinte əbnəə se ghene, é ghene yɛ lɛm əbnəə əbjim wɛ mɛ nè dinten se ghɛn. Ghɛn keele ge mɛ ko nɛ̂y yɛ lu kɛn ghɛsen, se chin ka mbi náà mɛy.