Read Oku Mat 4 Bible Online

Mat 4 - Oku bible

Mat 4

¹Keyioy ə Feyine me liɛ Jesus è ndu nɛ̀ wen se əbkwak ge Satan momse.

²Jesus yese se jeŋ è chii se jeŋ se əbchii əmmkɛɛk, jeŋ me se yafe wen.

³Satan gwiy è suuy se wen ge: Lòò è yɛ lu ge wɛ lu wán ə Feyin, wɛ̀ bense ɛtiy ghin se keban.

⁴Jesus fise ge: Ke lu kenyaken ɛ ŋwaale-Feyin ge, wele báà se chii kɛn se əbfua-əbyíɛ́ne, wele chii se giɛ sejim sɛ se fəyen ɛ Feyine əbchio.

⁵Satan me liɛ wen, è ndu so se Jolesalem, dii ntɛk ɛylanen, è kokse wen se kegwɛs ə ndaa-ɛykokse,

⁶è suuy se wen ge: Loo lu ge wɛ̀ lu Wán ə Feyin, wɛ̀ chak se ntiɛ; bek ge ke lu kenyaken ɛ ŋwaale Feyin ge: “Feyine náà lam é nchiyse-ndaa nə wene yɛ chiye wɛ̀. Ghene náà koo wɛ̀ nɛ̀ ɛghoo ə ghene fɛ wɛ̀ fɛy è kfən kevəə ə kiɛ se ɛytiy.”

⁷Jesus suuy se wen ge: Ke ko gese lu kenyaken ɛ ŋwaale Feyin ge: “Wɛ̀ báà se lu se momse Báàba wɛ Feyin ə fiɛ.”

⁸Satan gese liɛ Jesus è kok so se ketuu kfən ɛydia ɛylee è din telak tejim ɛ ketuu ntiɛ se wen nɛ̀ əbjuŋ wɛ əb luun ɛ ten,

⁹è suuy se wen ge: Wɛ̀ təm ɛləy è kokse mɛ, é mɛ fó ketuu ntiɛ nɛ̂ kin se wɛ̀ kejim.

¹⁰Jesus me suuy se Satan ge: Loo se mɛ ɛybee. Ke lu kenyaken ɛ ŋwaale Feyine ge: “Wɛ̀ lu se yɛ kokse kɛn Báàba wɛ Feyin ə fiɛ gese fɛle kɛn se wen.”

¹¹Satan me lòò, è vəse Jesus se fo, nchiyse-ndaa nə Feyine gwiy è giamten wen.

¹²Jesus nɛy yio ge ɛ́ viimen Joon se nchak, è me lòò è ndu ɛ Galilee.

¹³Əb ndu, è jia se chii ɛ Nazalet, dî è se chii nɛ lu ɛ Kabanaum wɛ luun ntɛk ɛ əbghune kechəm keghuye kɛ́ Galilee, nɛ lu ngvən Zebulun ghene Naftali.

¹⁴Ke nè gan dì se nɛɛy ge kenəə kɛ wele ntum nə Feyine wɛ Ezaya nè suuyen kwɛn.

¹⁵Əb nè suuy ge: “Ngvən ə Zebulun ghene ngvən ə Naftali, ɛylak yɛ ɛy luun ɛ əbghune kechəm keghuye ɛ njine jio Joldan, Galilee bene fɛ ghel əbtume chiin,

¹⁶Ghel ghɛ ɛ́ chiin ɛ nfiine nɛ̂y yɛn nɛ ɛybane gwiye se ghene naa se ŋaŋ. Ɛybane nɛ̂y gwiy, se ghel ghɛ ɛ́ nè chiin ɛ nfiine gese chii ɛ məme ɛykuo.”

¹⁷Se kɛ̀ɛ̀tè se əbliy fo, Jesus kɛɛte se yɛ fekte kenəə ə Feyin ge: Ghɛn kubsen tetem ə tɛn bek ge ɛysak əbfon ɛyyio shi ɛ keghoo.

¹⁸Nɛy se lu ka Jesus nè ghanlen ɛ əbghune kechəm keghuye kɛ́ Galilee, əb yɛn ghone-nyii ɛbaa, Simon wɛ ɛ́ toŋten ge Bita ghene wan-no ə wene Andole, nɛ ghene make felam ɛ jio, bek ka ghene nè luun ghel ɛykoo səəse.

¹⁹Jesus suuy se ghene ge: Ghɛn gwiy ɛ́ loo, é mɛ nɛɛy é ghɛn yɛ koo nɛ lu ghel.

²⁰Ghene me vəse əmlam mə ghen kaŋ ɛymok è se jumte nduu nɛ̀ wen.

²¹Jesus loo ndu, è yɛn ghone-nyii ɛlee ɛbaa nɛ lu Jɛms ghene wan-no ə wene Joon ghon ə Zebedee. Ghene nè lu ɛ kenək ghene ghe ba ə ghene Zebedee siyse əmlam mə ghen. Jesus jaŋ ghene,

²²ghene me vəse kenək, nɛ̀ ba ə ghen kɛn se əbliy, è me se jumte nduu nɛ̀ Jesus.

²³Jesus me lòò è se ghane Galilee əbjim, dinte əbnəə se ghele ɛ ghene ngayse ɛyjem, fekte sakghɛ əbjuŋ wɛ kum ɛysak ə Feyin, gese chuke naa tenkii teyaf tejim, nɛ̀ ɛynkii əbnəə əbjim wɛ əb fóon ngɛk se əbghune.

²⁴Ɛ́ saaken nə sakghɛ wɛ kum wen Silia əbjim, ghele me se gwiye nɛ̀ ghel ɛyafkene se wen ge əb yɛ chuk. Ɛlee nè lu nɛ ɛyghune chɛfe chɛfen, nɛ ɛlee lu ghel ɛyfim, nɛ ɛlee yafe nɛ̀ kenguo, nɛ ɛlee lu ɛləmmene. Əb chuk ghene ghel ɛjim.

²⁵Feliɛ wele se nduu ɛ wen ɛybam nɛ fe loo ɛ Galilee, nɛ̀ Ntɛk-Sɛ-Ɛyvəm, nɛ̀ se Jolesalem, nɛ̀ se Judea, gese nɛ̀ se ɛybee njine jio Joldan.