Read Oku Mat 7 Bible Online

Mat 7 - Oku bible

Mat 7

¹Ghàà ghɛn yɛ ghame ghel fɛ Feyine náà gham ghɛn.

²Ke lu dî bek ge Feyine náà yɛ ghame ghɛn kɛn ɛ jii yɛ ghɛne ghamen ghel ɛlee ɛ ten. Əbfek wɛ wɛ̀ feken kefaa so se geese fo se wel lu əbghene wɛ Feyine náà fek kiɛ so.

³Lu bek ghɛ wɛ wɛ̀ kiyen ɛykfəke fekak yɛ ɛy luun ɛ wan-no ə viɛ ɛyshiɛ, dî yɛne wiy kefuŋ kɛ ke luun ɛ yiɛ?

⁴Lòó wɛ̀ suuy lɛɛy se wan-no ə viɛ ge: Wan-no ə wom fəyse ɛykfəke fekak yɛ ɛy luun ɛ wɛ̀ ɛyshiɛ, nɛ kefuŋe fekake lu ɛ yiɛ?

⁵Wel əbbuam, chia mbiy è fəyse kefuŋ kɛ ke luun ɛ wɛ̀ ɛyshiɛ, é wɛ̀ me loote yɛn əblik ka wɛ fəyse ɛykfəke fekak yɛ ɛy luun ɛ wan-no ə viɛ ɛyshiɛ.

⁶Ghàà wel liɛ kefaa kɛ luun kɛ́ Feyine, è mak se buose fɛ se baa benle è yɛ lumle wen. Ghàà wel liɛ ɛshiɛ baŋ nə wen è mak se nkfəənyamse fɛ se baa jɛɛle nɛ̀ ɛvəə.

⁷Ghɛn yɛ bif kɛn bifen, é Feyine fó se ghɛn; è yɛ kɛŋ kɛn kɛŋen, é Feyine din se ghɛn; è yɛ kfənte kɛn əbchio ndaa kfənten, é Feyine dise se ghɛn.

⁸Bek ge naa ndɛ bife, é Feyine fó se wen, nɛ̀ naa ndɛ kɛŋe, é Feyine din se wen. Naa ndɛ yɛ kfənte əbchio ndaa, é Feyine dise se wen.

⁹Lu ndɛ ɛ ghɛne məm wɛ wan ə wen bifen keban, é əb fó nɛ lu ɛytiy?

¹⁰Kene əb bif səə, é əb fó nɛ lu yio?

¹¹Ghɛn ghɛ ghele mbeese lɛ ke se fo əbfua əbjuŋe se ghon ə ghɛne lɛ, é Ba ə wɛn wɛ əb luun ɛ ɛyyio jia fo əbfua əbjuŋe se ghel ghɛ ɛ́ bifen se wen è chia ka ghɛne foon-a!

¹²Ghɛn yɛ nɛɛye kenəə se ghele nɛ lu kɛ ghɛne koŋen ge ghene yɛ nɛɛy se ghɛn, bek ge kii nɛ̂ kine lu kenəə kɛ nchil ghene ghele ntum nə Feyine dinen.

¹³Ghɛn yɛ lii jii əbchio ndaa əblaytene bek ge jii yɛ ɛy nduun ɛ kemboo əbvəse bonene, nɛ əbchio ndaa ghake, nɛ ghel ghɛ ɛ́ liin ɛ ten dio.

¹⁴Dî nɛ əbchio ndaa wɛ əb liin nɛ lu ɛychii yɛ ɛy jia yî mɛye laytee, nɛ jii ten taa, nɛ ghel ghɛ ɛ́ chian ɛ ten laaye.

¹⁵Ghɛn toknen kum nfektese əbbuam. Ghene lóó ɛ́ gwiy se wel ge wɛ̀ɛ̀ ka bvəy njiɛ, dî nɛ lu se məm nɛ ghene lu ka bááse.

¹⁶Ghɛne nɛ̂y keele ghene bek nchiine ə ghen. Lɛ lòó ɛ́ koy ɛybiy ɛ fekake bia-a? Moo lɛ lòó ɛ́ koy fenyak ɛ əbteŋe nduy-a?

¹⁷Ke me se lu ge fekak fejuŋe sɛɛ koom əmtam əmjuŋ, nɛ fekak febéé koom əmtam əmbee.

¹⁸Fekak fejuŋe lòó fe jia koóm əmtam əmbee, ghɛɛ-ghɛɛ ka fekak febee lòó fe jia koóm əmtam əmjuŋ.

¹⁹Fekak fɛ fe báà se koom əmtam əmjuŋ lu nɛ ɛ́ nɛ̂y gwɛl è kwaay.

²⁰Ghɛne nɛ̂y keele nfektese əbbuam bek ndee ghen.

²¹Báà se lu wel əbjim wɛ əb móòte mbáàten mɛ ge: Báàba, wɛ əb náà lii se məme ɛysak nə Feyine. Lu kɛn wel vi wɛ əb nɛɛyen kenəə kɛ Ba ə wom wɛ əb luun ɛ ɛyyio kɛŋen ge əb nɛɛy.

²²Ɛ náà lóó lu ɛ kechii kɛ Feyine saken ghel é ghel se ɛydio yɛ mbaate mɛ ge: Báàba, Báàba, suuye ge: Ghɛs nè lô se fekte sakghɛ Feyin ɛ wɛ̀ ɛyghel, jume tefim, gese nɛɛy əbnəə əbchio əbyúméné se ɛydio ɛ wɛ̀ ɛyghel.

²³Ghene náà lóó suuy di é mɛ suuy se ghene ge: Mɛ báà se ke ghɛn. Ghɛn loo se mɛ ɛyshiɛ. Ghɛn lu ghel ɛbee.

²⁴Ke me se lu ge naa ndɛ wɛ əb yion giɛ ə som shin è yɛ nɛɛye ka mɛ suuyen nɛ̂y yɛ lu ka wel əbtofen wɛ əb nè baklen ndaa ə wen ɛ ketiɛ kɛ luun ɛyghok.

²⁵Ɛyghuu nɛ̂y gwiy, jiose lúnkê, əbfiɛfe se chia shikse ndaa ten, dî ɛy jia fɛy, bek ka ɛ́ nè baklen ɛ ketiɛ kɛ ɛ́ viin nɛ̀ ɛtiye.

²⁶Dî nɛ wel wɛ əb yion giɛ som shin nɛɛye wiy ka mɛ suuyen nɛ̂y yɛ lu ka kengoo kɛ ke nè baklen ndaa ə wen ɛ kegvəmte əmntiɛ.

²⁷Ɛyghuu nɛy gwiy, jiose lúnkê, əbfiɛfe se chia shikse ndaa ten, ɛy me fɛy è bvəəse naa ɛyjim. Ɛyfɛy tene nè bɛme.

²⁸Jesus nɛy dinte əbnəə se ghele è mɛyse, əbchio yum ngose wel kum jii yɛ əb ke dinten ɛ ten.

²⁹Əb nè dinte əbnəə se ghene ka wel wɛ əb kiin əbtaawe, dinte wiy ka ndintese tesak.