Read Oku Mat 9 Bible Online

Mat 9 - Oku bible

Mat 9

¹Jesus nɛy lii se kenək è se kase diaŋe se wen ə ntɛk.

²Ka əb diaŋen ɛ leghɛ, ɛ́ gwiy nɛ̀ wel se wen nɛ əb nyiŋ ɛ wen ə əbkun, nɛ ɛybee əbghun nə wen ɛylee kuomen. Jesus yɛn jii yɛ ghene foon ɛytem se Feyine ɛ ten, è suuy se wel əbkɛblen vi ge: Wan ə wom, ghal ɛyteme! Mɛ lɛysemen mbee ə shiɛ.

³Ghɛ́ ɛydinte tesak ɛlee yio, è me se vəke se ghene ngeŋse ge: Wel vine tɛyle Feyin.

⁴Jesus ko me keele kenəə kɛ ghene kwaaten, è bif se ghene ge: Ghɛn ki tekwaate tebee ɛ ghɛne tetem bek ghɛ?

⁵Kɛ Ke bonen se suuy lu kine? Ɛ́ lɛysemen mbee ə shiɛ moo, se suuy ge: Loole è yɛ jɛl-a?

⁶Dî nɛ mɛ din se ghɛn ge, Wanwel ki əbtaawe ɛ ketuu ntiɛ se lɛyse mbeese. Əb suuy dì, è me suuy se wel əbkɛblen vi ge: Loole è liɛ əbkun ə viɛ, è yɛ kfəəy.

⁷Wel vi me loole è se kfəəye.

⁸Ghele yɛn kenəə ten, è se fane, kokse Feyin bek əbtaawe ka vine wɛ əb foon se ghele.

⁹Jesus nɛy lòò se fô è loo ndu, è yɛn wel ɛyfii shile ka əb diom ɛ wene kelik ɛyfɛl, nɛ ɛ́ toŋte ge Matio, è suuy se wen ge: Gwiy ɛ́ loo. Əb me loole, è se jumte ɛybam ə Jesus.

¹⁰Jesus nɛy se yiɛ ɛ Matio ə ndaa. Ghel ɛyfii shile ghene ghele mbeese se ɛydio gwiy è diom ghene ghe Jesus nɛ̀ ghon-ɛyfɛl nə wene se yiɛ.

¹¹Ghele kenone Falisee yɛn è bif se ghon-ɛyfɛle ge: Lu bek ghɛ wɛ ndinte ə yɛne yiɛn ghene ghɛ́ ɛyfii shile gese nɛ̀ ghele mbee?

¹²Jesus yio ka ghene bifen dî è fise se ghene ge: Ghel ghɛ ɛ́ luun əbghun əbtaa shii wiy wel əbchuken. Shii kɛn ghel ɛyafkene wel əbchuken.

¹³Ghɛn ndu è yiɛke è keele kelike ŋwaale-Feyin kɛ ke suuyen ge: “Mɛ koŋe ge wel yɛ chame wel əblee, chia nyam sɛ yɛ taŋle mɛ so.” Mɛ báà gwiy se tiyse ghel ɛjuŋe, mɛ gwiy se tiyse nɛ lu ghel ɛbee.

¹⁴Ghon-ɛyfɛl nə Joon Nfoo Moo gwiy se Jesus è bif se wen ge: Lu bek ghɛ wɛ ghɛse ghele kenone Falisee lóó ɛ́ yɛ bam əbfua-əbyíɛ́ne, dî nɛ ghon-ɛyfɛl nə wɛ̀ bame wiy se nkan?

¹⁵Jesus fise ge: Lɛ lòó ghele ndu əbjen è yɛ toŋnen toŋnen nɛ lum əbvii lu ghene ghene-a? Dî nɛ əbliye gwiye wɛ ɛ́ nɛ̂y fii lum ə əbvii se ghene é ghene me yɛ bam əbfua-əbyíɛ́ne.

¹⁶Lòó wel jia bal ndəy seməə nɛ̀ kensase ndəy sefɛɛ bek ge kensase ndəy sefɛɛ nɛɛy é ndəy seməə shii bef kɛn befen.

¹⁷Ghɛɛ ghɛɛ ka lòó ɛ́ jia kuune əmnduk əmbol ɛ kefaa əmnduk keməə, bek ge ɛ́ nɛɛy dì é kefaa tene bvəs, é əmndukme ten səyte, é kefaa əmnduk nɛ̂ kii bef. Ɛ́ lu se vii əmnduk əmfɛɛ nɛ lu ɛ kefaa əmnduk kefɛɛ, ka əmndukme ghene kefaa əmnduke jia bef.

¹⁸Se lu nɛ Jesus bo suŋnen se ghene, wel əbghaken əblee gwiy è təm ɛləy ɛ Jesus ɛyshiɛ è suuy ge: Wan ə wom əbvii kuo kɛn ɛ leenen. Gwiye è lɛm keghoo ə kiɛ ɛ wen əbghun é əb loole se ɛykuo.

¹⁹Jesus me loole, ghene wel vi se nduu. Ghon-ɛyfɛl nə Jesus se nduu ɛ wen ɛybam.

²⁰Ghene lóó ndu, əbvii əblee nyiake gwiy ɛ Jesus ɛybam è kum ɛyghaŋ ə ndəyse nə wen. Nè shi nguk njio-sebaa ɛyvəm ka əbvii vin nè yɛ́nen əbliy, əb yɛ gwiy naa se ŋaŋ, bo tenen wiy.

²¹Əb nè kume dì nɛ əb suuy se ngeŋ ə wen ge: Mɛ chèmè kum kɛn ɛyghaŋ ə ndəyse nə Jesus é mɛ kô bonen.

²²Jesus benle è yɛn wen, è suuy ge: Wan ə wom, ghal ɛyteme. Ɛytem yɛ wɛ foon se Feyine nɛɛymen wɛ̀ bónen. Əbvii vi me bonen kɛn se əbliy.

²³Jesus ghene wel əbghaken vi ndu è chin ɛ wen ə ndaa è yɛn ngose wel ka ɛy toŋen ɛykuo. Ɛlee nè toŋe ndoŋse, nɛ ɛlee toŋnene.

²⁴Jesus suuy se ghene ge: Ghɛn fəy, wel əbjim! Wan vine báà kuo. Əb buune buunen. Ghene sɛ̂y me se buu wen buun.

²⁵Ghel ghii ɛjim fəy se bɛy, ɛ leghɛ Jesus lii è ghal əbkoy ə wan vi, əb loole.

²⁶Sakghɛ wɛ kum kenəə kin me saanken ɛ ɛybee ketum fo naa ɛyjim.

²⁷Jesus nɛy lòò se fô è loo ndu, əbnfef əblee əbbua me se nduu ɛ wen ɛybam jaŋe ketaan ge: Wan əbfon wɛ David, koosen ɛysen se ghɛs.

²⁸Jesus ndu è lii se ndaa, əbnfef vii lii è baksen wen, əb bif se ghene ge: Ghɛn lɛ lu nɛ ɛ́ bééme ge lòó mɛ nɛɛy kenəə kin se ghɛn-a? Ghene fise ge: Ɛɛne Báàba!

²⁹Jesus me kum ɛshiɛ ə ghen è suuy ge: Ke gan yi kɛn ka ghɛn foon ɛytem se mɛ!

³⁰Ghene me kase se yɛne əblik. Jesus chiise se ghene ge: Ghɛn yɛ ke se fiɛl se wel!

³¹Ghene lòò, è ndu, è sɛ́y saŋse saŋsen sakghɛ wɛ kum wen ɛ ɛybee ketum fo ɛyjim.

³²Ghene loo lòò ɛ leghɛ, ghele gwiy nɛ̀ kechichi se Jesus nɛ nɛɛy ɛyfim ge ghàà əb yɛ suŋnen.

³³Jesus jum ɛyfim se əbghun gho ɛ leghɛ, kechichi ki me se suŋnene. Ngose wel se lu nɛ̀ əbchíò əbyúméné, suuye ge: Ɛynkii kenəə ghan nè bɛɛy ghàà yi gan ɛ Islael.

³⁴Ghele kenone Falisee se suuy nɛ lu ge: Fo əbfon ɛyfim əbtaawe se wen ge əb yɛ jum ɛyfim so.

³⁵Jesus me lòò è se ghane ntɛk se ghakene ghene se tɛle dinte əbnəə se ghele ɛ ghene ngayse ɛyjem, fekte sakghɛ əbjuŋ kum ɛysak ə Feyin, gese chuke tenkii teyaf tejim tɛ ghele nè kiin nɛ̀ ɛynkii əbnəə wɛ əb foon ngɛk se əbghune.

³⁶Əb nè yɛne ngose wel, ketuu lum wen bek ge ɛ́ nè nəkse ghene, nɛ ngiamten wiy, nɛ ghene me lu ka bvəyse njiɛ sɛ ghàà nchiy.

³⁷Əb me suuy se ghon-ɛyfɛl nə wene ge: Ɛsaŋe biymen se ɛydio, ghel ɛdənene se laaye.

³⁸Ghɛn lon se Bay wɛ ba ɛylem ge əb tinse ghel ɛydən ɛsaŋ nə wen.