Read Oku Mak 1 Bible Online

Mak 1 - Oku bible

Mak 1

¹Lɛɛ sakghɛ əbjuŋ kum Jesus Christ wɛ wán ə Feyin.

²Əb nè kɛɛte kɛn ka wele ntum nə Feyin wɛ Ezaya nè nyakenmen ge: “Mɛ náà tum wele ntum nə mɛ ɛ wɛ̀ mbiy é əb siyse jii ə yiɛ.

³Yio ka giɛ wele jaŋen ɛ əbkwak ge: Siyse jii se Báàba, nɛyte kevəə jii se wen é ke yɛ nduu ɛ titiy!”

⁴Kɛn dî Joon me gwiy ɛ əbkwak è se foo moo, fekte se ghele ge: Ghɛn kubsen tetem ə tɛn è fiile se ɛybame mbee ɛ́ fó moo se ghɛn ka Feyine lɛyse mbee ə sɛn.

⁵Ghele nè lô fəy teghaŋe Judea tejim, ghele Jolesaleme gese fəy naa ɛjim è ndu se yɛne Joon. Ghene nè lô se taŋle ɛychio ə ghen ge ghene lu nɛ ɛ́ nɛɛy mbee, nɛ Joon me foo moo se ghene ɛ jio Joldan.

⁶Joon nè make ndəyse nɛ ɛ́ báà nɛ̀ ɛyghuye nyam kesɛsɛye, gese teme kekuye guo se wen əmkeŋkeŋ. Ɛyyiɛ ə wene nè lu nguumese ghene fedioŋe.

⁷Sakghɛ wɛ Joon nè fekten nè lu ge: Ka mɛ gwiyen, wel bo gwiye ɛ mɛ ɛybam taa chia mɛ, nɛ chèmè lu kɛn guose ɛvəə nə wen fene mɛ báà se lu kekwɛnten ka lòó mɛ ngvəkte è yayte.

⁸Mɛ fóó nɛ lu moo se ghɛn, nɛ əb nɛ̂y gwiy è yɛ fóó nɛ lu Keyioy Kelanene.

⁹Se lu ɛ keleŋ əbliy fo, Jesus lòò ɛ ntɛke Nazalet ɛ Galilee è gwiy Joon fo moo se wen ɛ jio Joldan.

¹⁰Jesus se fəye gwiye se jio ɛ leghɛ, è me yɛn ka ɛyyio disen, nɛ Keyioy ə Feyine səəke gwiye ɛ wen ə əbghun ɛ əblame kenlal.

¹¹Giɛ fəy è gwiy ɛyyio ge: Wɛ̀ lu wán ə wom wɛ mɛ koŋen. Mɛ saŋle naa se ŋaŋ kum wɛ̀.

¹²Keyioy ə Feyine tinse wen ɛ əbkwak kɛn se əbliy.

¹³Əb nè chii əbkwak se əbchii əmmkɛɛk, nɛ Satan momse wen. Əb nè lu kɛn ghene nyamse əbkwake, nchiyse-ndaa nə Feyine gwiy è giamten wen.

¹⁴Se lu ka ɛ́ nè viinmen Joon se nchak, Jesus me lii è ndu ɛ Galilee, è se fekte nduu nɛ̀ sakghɛ əbjuŋ nə Feyine.

¹⁵Jesus nè suuy ge: Əbliye kwɛnmen, nɛ ɛysake Feyine baksenmen. Ghɛn kubsen è beeme sakghɛ əbjuŋ.

¹⁶Nɛy se lu ka Jesus nè chian ɛ əbghune kechəm keghuye kɛ́ Galilee, əb yɛn Simon ghene wan-no ə wene Andole nɛ ghene make felam ɛ jio, bek ka ghene nè luun ghel ɛykoo səəse.

¹⁷Jesus suuy se ghene ge: Ghɛn gwiy ɛ́ loo, é mɛ nɛɛy é ghɛn yɛ koo nɛ lu ghel.

¹⁸Ghene me vəse əmlam mə ghen kaŋ ɛymok è se jumte nduu nɛ̀ wen.

¹⁹Jesus se keŋte nduu, è yɛn Jɛms ghene wan-no ə wene Joon, ghon ə Zebedee ɛ kenək, nɛ ghene nɛyte əmlam mə ghen.

²⁰Jesus me jaŋ ghene kaŋ ɛymok, ghene vəse ba ə ghene Zebedee ghene ghel ɛfɛ́lene ɛ məme kenək è me se jumte nduu nɛ̀ Jesus.

²¹Ghene me lòò è ndu ɛ Kabanaum, se lu ɛ kechii ɛybam, Jesus me lii è ndu ɛ ngay ɛyjem è se dinte əbnəə se ghele.

²²Əbchio yum ghel kum jii yɛ əb nè dinten ɛ ten, bek ka əb nè dinten əbnəə se ghene ka wel wɛ əb kiin əbtaawe, dinte wiy ka ndintese tesak.

²³Se lu kɛn əbliy nɛ̂ fɛy wel əblee ɛ ghene ngay ɛyjem nɛ ɛyfime lu ɛ wen əblɛɛ me toŋ ɛ ghene məm ge:

²⁴Jesuse wɛ̂ Nazalet, wɛ̀ kɛŋe se jɛl lɛɛy se ghɛs? Wɛ̀ gwiymen se mɛyse ghɛs-a? Mɛ ke wel wɛ wɛ̀ luun əbghen. Wɛ̀ lu wel əblanen nə Feyine.

²⁵Jesus me wam ge: Yɛɛ lu ɛ chichi, è fəy se wen əblɛɛ!

²⁶Ɛyfime yɛ́ tene jikten wele ten naa se ŋaŋ è toŋ ɛ giɛ ɛytaa è me fəy se wen əblɛɛ.

²⁷Əbchio yum ghel ɛjim ɛ jii ɛybee, ghene se kane ge: Kine lu ɛynkii kenəə kekɛ? Ɛyyiɛke ɛyfɛɛ yɛ ɛ́ yiɛken nɛ̀ əbtaawe! Əb kwanten tefim nɛ te yionen se wen!

²⁸Sakghɛ ə wen me ghan əbghoŋe Galilee naa əbjim kɛn se əbliy.

²⁹Se lu ka Jesus nè fəyenmen se ngay ɛyjem ɛ leghɛ, ghene ghe Jɛms nɛ̀ Joon me ndu ɛ ndaa nə Simon ghene Andole.

³⁰No əbchii nə Simon nè nyiŋ əbkun yafe nɛ̀ kenchɛme, ghene me fekte ɛyyafe yɛ́ tene se Jesus.

³¹Jesus me chia è ghal keghoo wel əbyafen è giamten wen, əb loole. Ka əb loolen gwiyen ɛ leghɛ, kenchɛme kɛ́ tene me takle, əb me se fɛle əbfua-əbyíɛ́ne ge ghene yiɛ.

³²Nɛy se lu ɛ likfəəy fo kɛn ka chuy sooyen, ghele liɛ ghel ɛyafkene, nɛ̀ ghɛ tefime liin se əmlɛɛ, è gwiy nɛ̀ ghene se Jesus.

³³Ntɛke ten me lòò naa ɛyjim è me ndu è chìntèn ɛ əbchio ndaa yɛ Jesus nè luun ɛ ten.

³⁴Jesus me chuk ghel ghɛ ɛ́ nè yafken se ɛydio, è gese jumte tefim se ɛydio se ghele əmlɛɛ. Əb nè báà se foo jii ge tefime tɛ́ tene yɛ suŋnen bek ka te nè keen wel wɛ luun wen.

³⁵Se lu ɛ bvəse bvəse, Jesus loole naa nɛ kebɛye bo fine, è fəy se ndaa è ndu ɛ kelik kɛn wen nyiŋ è jem fo.

³⁶Simon ghene ghel ɛyjɛl nə wene me lòò è se kɛŋe Jesus,

³⁷se lu ka ghene nè yɛnenmen wen ɛ leghɛ, ghene suuy ge: Wel əbjime kɛŋe wɛ̀.

³⁸Jesus fise ge: Ghɛsen ndu ɛ ntɛke sɛ́ keleŋ fɛne, è mɛ yɛ lu se fekte gho sɛy. Ghɛy kenəə kɛ mɛ nè gwiyen bek keghene.

³⁹Əb me se ghane əbghoŋe Galilee əbjim, fekte ɛ ngayse ɛyjem jume tefim se ghele əmlɛɛ.

⁴⁰Wel əblee yafe nɛ̀ kensaase nè lô gwiy se Jesus è təm ɛləy ɛ wene ɛyshiɛ, è beŋte Jesus ge: Loo lu nɛ wɛ̀ koŋe, wɛ̀ nɛɛy é mɛ bonen.

⁴¹Jesus koosen ɛysen se wen naa se ŋaŋ, è nase keghoo, è kum wen so è suuy ge: Mɛ koŋe, bonen!

⁴²Kensaase kɛ́ tene me mɛy se wele ten əbghun kɛn se əbliy, əb bonen.

⁴³Jesus suuy ge əb yɛ ndu, è chiise se wen ge:

⁴⁴Yɛɛ ke se suuy kenəə kɛ ke kooyen kin se wel. Ndu è din ngeŋ ə yiɛ se wele ntaŋle, è taŋle ntaŋle ka ɛysake Mosese dinen ge wɛ̀ bonen wɛ̀ taŋle ka əbchəyte se din se ghele.

⁴⁵Wele ten sɛy me lòò è se fekte nduu nɛ̀ kenəə kɛ́ tene əblik əbjim, əb nè lô bee kenəə kɛ́ tene ɛ jii yɛ Jesus nè lòó əb jia bo lii è yɛ ghane ntɛk bene lòó wel yɛn. Jesus me se ghane nɛ lu ɛ teghaŋe əbkwak nɛ ghele lòò naa əblik əbjim gwiye yɛne wen fo.