Read Oku Mak 10 Bible Online

Mak 10 - Oku bible

Mak 10

¹Jesus nɛy me lòò se Kabanaum è ndu ɛ keleŋe Judea è me diaŋ ɛ njine jio Joldan, ngose wel gese kaame ɛ wen ɛybee, əb me se dinte əbnəə se ghene kɛn ka əb nè sɛɛ nɛɛy.

²Ghele kenone Falisee ɛlee kokte è gwiy se mome wen, è bif ge: Nchil ə yɛsen lɛ dine ge lòó wel jum wiy ə wen-a?

³Jesus me bif ge: Moses nè fo nchil se ghɛn gee ghɛ?

⁴Ghene fise ge: Moses nè lô vəse ge wel yɛ̂ loo lu se jum əbvii, əb fó ŋwaale se wen yɛ ɛydinen ge ghene wen giabsenmen.

⁵Jesus me fise se ghene ge: Moses nè fo nchil nɛ̂ yin se ghɛn bek ka ghɛn nè taan ketuu se yio kenəə kɛ Feyine nè dinten se ghɛn.

⁶Ghɛn keele ge, nè lu ɛ kenkɛɛte, Feyine bom əbluumen, ghene əbvii.

⁷Bek kii nɛ̂ kine, əbluumene yî yɛ lòò əb vəse ba ə wen ghene no ə wen ghene wiy ə wen chinten.

⁸Ka ke luun dì fene ghene bo bɛɛy wiy ghel ndun ndun, ghene shi wel əbmok.

⁹Ke me se lu ge, ghàà wel yî giabsen kii dii kɛ Feyine chintenmen.

¹⁰Ghene nɛy loo lu ɛ ndaa, ghon-ɛyfɛl nə wene gese bif kenəə kum kenəə nɛ̂ ki se wen.

¹¹Əb fise ge: Naa ndɛ wɛ əb jumen wiy ə wen, è ndu əbvii əbchin lu nɛ əb jas se əbvii wɛ̂ mbiy bek ka əb liin nchiine kenjaŋ

¹²Ghɛɛ ghɛɛ ka əbvii wɛ əb fəyen lum ə wen è lii ghene əbluumen əbchin lu nɛ əb lii nchiine kenjaŋ.

¹³Ghel ɛlee se gwiye nɛ̀ ghone ɛtɛlɛɛ se Jesus ge əb kum nɛ̀ keghoo nzəətee, ghon-ɛyfɛl nə wene sɛ́y se yole ghene yolen.

¹⁴Jesus yɛn ke yaf wen, əb suuy se ghene ge: Ghɛn vəse ghon é ghene gwiy se mɛ, ghàà ghɛn se jum bek ge ɛysak ə Feyine lu se ghel ka ghine.

¹⁵Mɛ suuy əbluuy se ghɛn ge: Naa ndɛ wɛ əb báà beeme ɛysak ə Feyin ka wán əbtɛlɛ jia yî lii se ten.

¹⁶Əb suuy dì, è me se koyten ghon ghi, lɛme ɛghoo ɛ ghene əbtuu, bose ghene.

¹⁷Nɛy se lu nɛ Jesus se lòò, wel əblee nyiŋ, è gwiy, è təm ɛləy ɛ wen ɛyshiɛ, è suuy se wen ge: Ndinte, wɛ̀ lu wel əbjuŋ. Lòó mɛ nɛɛy ghɛ se geese kiile ɛychii yɛ ɛy jia yî mɛy?

¹⁸Jesus fise ge: Lu bek ghɛ wɛ wɛ̀ toŋten mɛ ge wel əbjuŋ. Wel əbjuŋ báà se lu buu kɛn Feyin wen nyiŋ.

¹⁹Wɛ̀ ke nchil sɛ ge: Ghàà yuy wel, ghàà liɛ wiy ə wel, ghàà choŋ, ghàà toy wel se kenəə, ghàà fif wel, nɛ̀ yɛ ge: Ngvəmle ba ə viɛ ghene no ə viɛ.

²⁰Wel vi fise ge: Ndinte, mɛ nè se lɛme nchil shin sejim kɛɛte se əmtɛlɛ.

²¹Jesus kiy wen nɛ̀ ɛykoŋe è suuy ge: Kenəə bɛɛy kemok kɛ lòó wɛ̀ nɛɛy. Ndu, è feene əbfua ə viɛ əbjim, è fo əbkaa ten se ghɛ́ ketane, è yɛ jumte mɛ. Wɛ̀ nɛɛy dì é wɛ̀ yɛ ki əbghaake nɛ lu ɛyyio.

²²Əb yio di, ɛykek wene gvənen, bek ge əb nè ki ɛykɛŋ naa se ŋaŋ. Əb se lóò se fo lu ɛysen-ɛysen.

²³Jesus me kiynen əblik, è suuy se ghon-ɛyfɛl nə wene ge: Ketaa se ghɛ́ əmkaa se lii se ɛysak nə Feyine.

²⁴Ghene se lu nɛ̀ əbchíò əbyúméné. Jesus me gese suuy se ghene ge: Ghon ghine, ketaa náà se ŋaŋ se [ghel ghɛ samsen əbkaa] se lii se ɛysak nə Feyine!

²⁵Ke bonen se nyam fenkok[2] se chia ɛ kebuke tas chia ka wel əbghaken yɛ lu wel əblee ɛ məme ɛysak nə Feyine.

²⁶Ghon-ɛyfɛle yio kii nɛ̂ kine è se loote lu nɛ̀ əbchíò əbyúméné kante ge: Ke lòò è yɛ lu dì, é naa boy ndɛ?

²⁷Jesus kiy ghene, è suuy ge: Lu se wel nɛ kenəə tene taa, dî nɛ lu kenəə kebole se Feyine. Lòó kenəə jia ghak Feyin se nɛɛy.

²⁸Bita me suuy se wen ge: Yɛn-a, ghɛs vəsemen əbnəə ə wɛs əbjim è se jumte ɛybam ə yiɛ.

²⁹Jesus me suuy se ghene ge: Mɛ suuy əbluuy se ghɛn ge: Wel wiy wɛ əb vəsen kebɛy ə wen, kene ghone-no ə wen ɛluumene, kene ɛkiye, kene no ə wen, kene ba ə wen, kene ghon ə wen, kene əbkwak ə wen, bek mɛ, gese nɛ̀ sakghɛ əbjuŋ,

³⁰wɛ əb jia nɛ̂y kiile əbfua ten se ɛydio ɛ mbi fɛn. Ə́b nɛ̂y kiile ndaase, əbbɛy, nɛ̀ ghone-nyii ɛluumene, nɛ̀ ɛkiye, nɛ̀ ɛnoo ə wene, nɛ̀ ghone, gese nɛ̀ ɛykwake naa ka əblik əbviɛ di, è gese kiile ngɛkse, é loo lu ɛ mbi yɛ ɛy gwiyen é əb kiile ɛychii yɛ ɛy jia yî mɛy.

³¹Dî nɛ ghel se ɛydio ghɛ ɛ́ luun ɛ mbiy ɛ leenene nɛ̂y yɛ lu ɛybam nɛ̀ ghel se ɛydio ghɛ ɛ́ luun ɛybame nɛ̂y yɛ lu ɛ mbiy.

³²Jesus ghene ghon-ɛyfɛl nə wene lòò è se koke ɛ Jolesalem nɛ Jesus nduu ɛ ghene mbiy. Ghon-ɛyfɛl nə wene se lu nɛ̀ əbchíò əbyúméné, nɛ ghel ghɛ ɛ́ nè nduun ɛ wen ɛybam gese fane. Jesus liɛ ghɛ́ ntum nə wene ghɛ njio-sebaa ɛyvəm ghene ghene bak əbghun, əb me kɛɛte se suuy se ghene kenəə kɛ ke nɛ̂y gan se wen.

³³Əb nè suuye ge: Yɛn-a, ghɛsen kok ɛ Jolesalem ghaa ɛ́ nɛ̂y fo Wanwel se ghele mbiy se ghɛ́ ntaŋlee, nɛ̀ ghɛ́ ɛydinte tesake, ɛ́ chiase ɛysak ge əb lu se kuo, è vii wen se keghoo nɛ̀ ghel əbtume.

³⁴É ghene nyable nɛ̀ wen è tio teliɛ ɛ wen əbghun, è tɛl wen, è yuy wen, é əbchii chia əbtal é əb loolé se ɛykuo.

³⁵Jɛms ghene Joon ghɛ ghone Zebedee me kokte è gwiy è suuy se Jesus ge: Ndinte, ghɛse kɛŋe ge wɛ̀ nɛɛy naa ghɛ se ghɛs kɛ ghɛse bif se wɛ̀.

³⁶Əb bif se ghene ge: Ghɛne kɛŋe ge mɛ nɛɛy ghɛ se ghɛn?

³⁷Ghene fise ge: Wɛ̀ náà loo sak əbfon ə viɛ wɛ̀ nɛɛy é ghɛs diom ɛ wɛ̀ ɛybee, wel əblee se ɛybee əbkoy əbkiye, nɛ̀ əblee se ɛybee əbkoy əbtaa.

³⁸Jesus suuy se ghene ge: Ghɛne báà se ke kenəə kɛ ghɛne bifen kin. Lɛ lòó ghɛn nəə əbbome ngɛk wɛ mɛ nəə-a? Ghɛne lɛ nɛ̂y fii ngɛk yɛ ɛ́ nɛ̂y fo san-a?

³⁹Ghene fise ge: Ghɛs lu kebaaten. Jesus me suuy se ghene ge: Ghɛne nɛ̂y nəə əbbom wɛ mɛ nəə, è gese fii ngɛk sɛ ɛ́ fó san.

⁴⁰Dî nɛ mɛ báà se ki əbtaawe se choke ghel ghɛ ɛ́ yî diom se mɛ ɛybee əbkoy əbtaa nɛ se mɛ ɛybee əbkoy əbkiye. Əblik nɛ̂ vine lu se ghel ghɛ ɛ́ nè siysen se ghene.

⁴¹Ghon-ɛyfɛl ghɛ ɛyvəme yio kenəə nɛ̂ kin, è me se yafse ɛytem se Jɛms ghene Joon.

⁴²Jesus me jaŋ ghene ghel ɛjim è suuy ge: Ké ghɛn ke ge ghel ghɛ ɛ́ luun se yɛ sak əbtum nɛ ghel ghɛ tiyen ɛ mbiy nə ghene ki əbtaawe se nɛɛy naa ghɛ se ghene?

⁴³Ké dí jia nɛ̂y yɛ lu dî ɛ ghɛne məm. Wel ɛ ghɛne məm lòò è yɛ kɛŋ se yɛ lu ketuu, fene əb lu se yɛ fɛl se wel əbjim.

⁴⁴Nɛ naa ndɛ wɛ əb kɛŋen se yɛ lu wele mbiy lu se yɛ lu kekos se ghɛn ɛjim.

⁴⁵Wanwel dì nè báà gwiy ge ɛ́ yɛ fɛl se wen. Əb nè gwiy se yɛ fɛl se ghele, è fo ketuu ə wen ka ngvəə ntaŋle se tene ghel se ɛydio se ghene mbeese.

⁴⁶Jesus ghene ghon-ɛyfɛl nə wene ndu è chin ɛ Jeliko, è loo chia, feliɛ wele lòò ɛ ghene ɛybam. Ghene loo ndu è yɛn kenfef nɛ ɛ́ toŋte ge Baltimaeus (nɛ lu wán ə Timaeus), nɛ əb diom è se lone əbfua.

⁴⁷Əb yio ge lu Jesus wɛ̂ Nazalet ka əb chian, è me se jaŋe ge: Jesus wɛ wán ə David, koosen ɛysen se mɛ!

⁴⁸Ghel se ɛydio me se wamnen wen wamnen, suuy ge əb yɛ lu ɛ chichi. Əb sɛ́y gese jaŋ ketaan ge: Wan ə David, koosen ɛysen se mɛ!

⁴⁹Jesus teem è suuy se ghon-ɛyfɛl nə wene ge: Ghɛn jaŋ wen. Ɛ́ jaŋ kenfef ki è suuy se wen ge: Kul ɛyteme. Loole ɛyyio, əb jaŋe wɛ̀.

⁵⁰Əb maay ndəy sɛ əb nè limen, è tum è lòòle è ndu se Jesus.

⁵¹Jesus bif se wen ge: Wɛ̀ kɛŋe ge mɛ nɛɛy ghɛ se wɛ̀? Kenfef ki fise ge: Ndinte! Mɛ kɛŋe ge ɛshiɛ ə ghome yiase!

⁵²Jesus suuy se wen ge: Yɛɛ nduu, ɛytem yɛ wɛ̀ foon san nɛɛymen wɛ̀ bonen. Ɛshiɛ kenfef kii ko me yiase kɛn se əbliy, əb se yɛne əblik, è me lòò è se nduu ɛ Jesus ɛybam.