Read Oku Mak 11 Bible Online

Mak 11 - Oku bible

Mak 11

¹Jesus ghene ghon-ɛyfɛl nə wene ndu è bɛɛte Jolesalem, è loo bɛɛte ntɛke sɛ Betfej ghene Betani ɛ kfən kekoo Olif, əb tum ghon-ɛyfɛl nə wen ɛlee ɛbaa;

²è suuy se ghene ge: Ghɛn ndu ɛ ntɛk yɛ ɛy luun ɛ ghɛne mbiy yii. Ghɛne loo lii ɛ leghɛ è yɛn nɛ ɛ́ chəŋ wán kembɛɛybiy, nɛ wel nè bɛɛy ghàà kok, é ghɛn yas è gwiy so.

³Yɛ́ lu ge wel bif se ghɛn ge ghɛn sɛ nɛɛy ghɛ di-a, ghɛn suuy se wen ge: Báàba shii keghene, nɛ əb kase tinse ɛybam kɛn ɛ leenen.

⁴Ghene loo ndu è yɛn wán kembɛɛybiy nɛ ɛ́ chəŋ ɛ əbchio ndaa əbghun ɛ jii, è me yas.

⁵Ghel ghɛ ɛ́ nè tiyen fo bif se ghene ge: Ghɛne yásè kembɛɛybiy ki bek ghɛ?

⁶Ghene suuy kenəə kɛ Jesus kè suuyen, ghel ghii me vəse ghene se nduu so.

⁷Ghene gwiy nɛ̀ kembɛɛybiy kii se Jesus è yiysen nɛ̀ ndəyse kenton nə ghene, Jesus me kok è diom se ten.

⁸Əb loo ndu ghel se ɛydio me se saŋte ndəyse kenton nə ghen se jii nɛ ɛlee kaŋte ɛytam əmkak ɛyzəə ɛ telem nyiŋse se jii.

⁹Ghel ghɛ ɛ́ nè nduun ɛ mbiy nɛ̀ ghɛ ɛ́ nè gwiyen ɛybam me se waame ge: Ɛykokse lu se Feyine, ɛykokse lu se wen wɛ əb gwiyen ɛ əbtaawe nə Báàba Feyin.

¹⁰Ɛykokse yɛ lu se wen wɛ əb se gwiyen se yɛ sak əbfone ba ə wɛsen wɛ David! Ɛykokse yɛ lu se Feyine!

¹¹Jesus me ndu è chin ɛ Jolesalem, è lii ɛ ndaa-ɛykokse è kiy kal se yɛn ka əbnəə əbjime luun, è loo mɛyse nɛ əbtəke se jiɛ, ghene ghon-ɛyfɛl nə wene ghɛ njio-sebaa ɛyvəm me lòò è kase fiile è ndu ɛ Betani.

¹²Əbtəke nɛy yio, Jesus ghene ghon-ɛyfɛle lòò se Betani è se fiile se Jolesalem, jeŋ se yafe wen.

¹³Əb loo mak ɛyshiɛ è yɛn fekake fig nɛ fe tɛk, zəəlèè. Əb ndu se kiy ge fetame sɛ lu ɛ ten-a, è yɛn nɛ lu kɛn ɛghaa ɛ ten bek ge nè bɛɛy ghàà yɛ lu əbliy wɛ fe sɛɛ koom ɛ ten.

¹⁴Jesus me suuy se fekake fig fii ge: Wele jia bo yî kase yiɛ fetame fiɛ. Əb loo suuy dì ghon-ɛyfɛl nə wene yio.

¹⁵Ghene chin ɛ Jolesalem, Jesus ndu è lii se ndaa-ɛykokse è me se jume ghel ghɛ ɛ́ nè kamnen əbwɛy fo. Əb bvəŋse əbtatan wɛ ɛ́ nè kubsen əbkaa ɛ ten, gese nɛ̀ əbtiɛ ghel ghɛ ɛ́ nè feenen əbnlal,

¹⁶beeme wiy ge wel bo bɛɛy kefaa è tosen so ɛ ndaa-ɛykokse.

¹⁷Əb me se dinte əbnəə se ghele, suuy ge: Ɛ́ lɛ báà nyak ge: Ɛ́ toŋte ndaa ə yom ge ndaa ɛyjem se əbtume əbjime, ghɛne sɛ́y bense se mbvək ɛchoŋ-a!

¹⁸Ghele mbiy se ndaa-ɛykokse Feyin gese nɛ̀ ghɛ́ ɛydinte tesake yio kenəə ten è me se kɛŋe jii yɛ yuy Jesus ɛ ten. Ghene nè fane wen bek ge ghel ɛjime nè lu nɛ̀ əbchíò əbyúméné kum əbnəə wɛ əb nè dinten.

¹⁹Nɛy se lu ɛ likfəəy Jesus ghene ghon-ɛyfɛl nə wene lòò se ntɛk fo.

²⁰Nɛy se lu ɛ bvəse bvəse, Jesus ghene ghon-ɛyfɛl nə wene se chia è yɛn nɛ fekake fig fii yoblemen è chin se ɛghaŋ.

²¹Bita me kuume è suuy se Jesus ge: Ndinte, yɛn-a! Fekake fig fɛ wɛ̀ nè liŋen fi yoblemen!

²²Jesus suuy se ghene ge: Ghɛn fó ɛytem se Feyine.

²³Mɛ suuy əbluuy se ghɛn ge, naa ndɛ wɛ əb suuyen se kfən yin ge: Məəke è ndu fɛy se jio ɛyghuy, nɛ əb bééme se wen ɛytem, maanen wiy maanen ge lòó ke gan, é Feyine nɛɛy é ke gan.

²⁴Mɛ me se suuy se ghɛn ge naa ghɛ kɛ ghɛne bifen se Feyine əbliy wɛ ghɛne jemen, foo ɛytem se wen ge əb fomen, é ghɛn kiile.

²⁵Naa ɛ leghɛ wɛ ghɛn teem se yɛ jem, wele yɛ ki kenəə kum wel, əb lɛyse se wen, é ba ə wɛn wɛ əb luun ɛ ɛyyio me lɛyse sɛ̂y mbee ə sɛn.

²⁶[Dî nɛ ghɛn lòò jia yɛ lɛyse əbjas ə ghel ɛlee, é Ba ə wɛn wɛ əb luun ɛ ɛyyio jia yɛ lɛyse mbee sɛn].

²⁷Jesus ghene ghon-ɛyfɛl nə wene kase fiile se Jolesalem. Əb ndu ɛ ndaa-ɛykokse è loo ghanle fo ghele mbiy se ndaa-ɛykokse Feyin, nɛ̀ ghɛ́ ɛydinte tesake gese nɛ̀ chɛɛse kokte gwiy,

²⁸è se bife se wen ge: Wɛ̀ nɛɛy əbnəə vin ɛ əbtaawe nə ndɛ? Fo ndɛ əbtaawe ge wɛ̀ yɛ nɛɛy əbghene?

²⁹Jesus fise ge: Mɛ bif ɛybif se ghɛn. Ghɛn fó ɛyfise ten, é mɛ me fekte ghaa mɛ liɛn əbtaawe se yɛ nɛɛy əbnəə nɛ̂ vin so.

³⁰Fo ndɛ əbtaawe ge Joon yɛ foo moo, nè fo Feyin moo nè fo wel-a? Ghɛn fise yi mɛ.

³¹Ghene me se beke ɛ ghene məm ge: Ghɛsen loo lu è suuy ge ə́b nè lòò se Feyine, é əb me bif ge sɛ nè nɛɛy ghɛ ge ghɛsen jia beeme kenəə Joon-a?

³²Yɛ lu wɛ ghɛsen suuy ge ə́b nè lòò se wel é ke yɛ lu ɛ titiy-a? Ghene nè fane ghel bek ge wel əbjim nè beeme ge Joon lu wele ntum nə Feyine.

³³Ghene me fise se Jesus ge: Ghɛse báà se ke. Əb suuy se ghene ge: Fene mɛ jia fekte se ghɛn ghaa mɛ liɛn əbtaawe se yɛ nɛɛy əbnəə wɛ́ tene so.